"Ik hie in kertier om my om te klaaien": Kees moast ynfalle yn haadrol Dútske musical

De 26-jierrige Kees komt út in muzikaal laach. Syn pake is de Fryske tekstskriuwer, komponist en muzikant Hindrik van der Meer. Guon Friezen sille dy namme miskien noch wol kenne fan 'e ferskes dy't er mei syn bern op sang en ynstruminten útfierde.

Kees hat musicalteäter en muzykteäter studearre yn Tilburg. In bachelor en in master helle er dêr. Dêr wie ek bekend dat yn Dútslân in soad musicalwurk te finen wie. Mei musicals hie er al ûnderfining opdien troch syn staazjes by The sound of music en De mol en de paradijsvogel.

Dútsk hie er op 'e middelbere skoalle hân. Mei in eventuele baan yn Dútslân yn 'e achterholle die er syn bêst om syn útspraak fan it Dútsk te ferbetterjen. "Doe kaam dy audysje. Dy haw ik dien en ik haw de rol krigen."

No wennet de Gaastmarder yn Stuttgart en wurket er by de Dútske musical nei de Amerikaanske Disneyfilm Frozen. Hy hat wat in dûbelde funksje.

"Normaal stean ik yn it ensemble. Dat binne de minsken sûnder in haadrol dy't de gasten by de kroaning fan Elsa of it folk spylje. En dan bin ik ek noch understudy (ynfaller, red.) fan Prinz Hans."

Se spylje it stik acht kear yn de wike, wêrfan twa kear oerdeis. Kees dielt de ynfallerrol mei in kollega. As de haadrolspiler fakânsje hat, dan wit er wannear't er de rol fan Hans oernimme moat. It kin ek wêze dat ien siik wurdt en dan heart er it pas om 11 oere moarns.

Hy hat Hans sechstich en in heal kear spile. Dy heale kear komt omdat de akteur dy't altyd Hans spilet, healwei de foarstelling útfoel troch in blessuere. Hy wie fallen. Nei it skoft moast Kees it oernimme, wylst er foar it skoft ek al mei it ensemble meispile hie.

"Ik hie in kertier om my om te klaaien, in oare prûk op te setten en der dan foar te gean. Der kaam in soad adrenaline oan te pas, mar it is goed gien."

"Normaal wit ik moarns al dat ik opgean foar Hans. Dan kin ik de tiid nimme om de teksten troch te nimmen. It is dochs Dútsk en dat moat fatsoenlik dyn strôt út komme."

As er kieze moat tusken it ensemble - de grutte, mear anonime groep spilers - en Hans, dan kiest er foar dy lêste. Want dat is in rol mei in geheim. Mei twa ferskillende kanten: in aardige en in gemiene kant. Hoe leaver ast Prinz Hans yn it begjin spilest, hoe grutter de reaksje by it publyk, as se sjogge datst in minnenien bist.

Bûten it teäter wurdt Kees der net op oansprutsen dat er gemien wie. "No ja, sa no en dan troch in berntsje. Mar dat heart derby. Dan hast it goed dien."

It Dútske aventoer mei dizze musical hâldt foar Kees febrewaris takom jier op. Wat er dêrnei dwaan sil, wit er noch net. Der binne in soad audysjes en dy begjinne eins no pas.

In echte foarkar hat er net: "Elk ferhaal en elke musical hat syn sjarme. Ek mei de minsken dy't der binne, kin elke foarstelling spesjaal wêze. Ik haw noch net echt in dreamshow op it each. Ik stean iepen foar ferskillende dingen."

Foarearst yn Dútslân bliuwe of werom nei Nederlân? "It hat allebeide wol wat", seit Kees "Dochs bliuw ik leaver noch efkes yn Dútslân."

En hoe sit it mei De Gaastmar? Hellet it doarp it net by Stuttgart, of is it krekt folle better? "It binne twa hiel ferskillende plakken. Mar De Gaastmar sit foar altyd yn myn hert. Dêr bin ik berne."