Lambooij wol nei Cambuur en spant arbitraazjesaak oan tsjin RKC

It is no sa'n fiif moannen lyn dat Etiënne Reijnen syn funksje as technysk direkteur by Cambuur ferruile foar it assistint-trainerskip by Feyenoord. Sûnt dy tiid is de direksje fan Cambuur op syk nei in opfolger.

Frij gau waard dúdlik dat de Ljouwerters ien hawwe wolle, dy't in ferlykber profyl hat as dat fan Reijnen. Dat hâldt yn: jong, ambysjeus en betûft yn de digitale wrâld. Sa wol de klup ien hawwe dy't goed is mei fideo, data en dat kombinearje kin mei scouting.

Sa kaam Cambuur út by Lambooij, dy't sûnt 2020 haad scouting is by RKC Waalwijk. Dêrfoar wurke er as jeugdtrainer en haad scouting by Go Ahead Eagles. By dy klup is er nei syn spilerskarriêre hingjen bleaun.

Lambooij fuotballe tusken 2009 en 2017 by SC Veendam, dat yntusken net mear bestiet, en Go Ahead Eagles. Hy kaam as ferdigener ta mear as hûndert wedstriden yn de earste divyzje en hast fyftich yn de earedivyzje.

De ynteresse fan Cambuur yn Lambooij spilet al langer.

As direkteur Ard de Graaf fan Cambuur heal febrewaris yn de Sportcast fan Omrop Fryslân konfrontearre wurdt mei de namme fan Lambooij, seit hy: "Daar hebben wij mee gesproken. Neemt niet weg dat hij een contract heeft bij RKC, dus dat is niet heel dichtbij."

Sels wol Lambooij de oerstap fan Noard-Brabân nei Fryslân graach meitsje. Dêrom besocht Cambuur derút te kommen mei RKC Waalwijk om de 35-jierrige Brabanner oer te nimmen. Dat slagge net.

RKC hâldt Lambooij oan syn kontrakt, dat nei dit seizoen noch twa jier trochrint. Sels wol de âld-fuotballer wol graach oerstappe, om't er dit sjocht as in moaie stap yn syn karriêre. Hy wol in oerstap forsearje en dêrom spant er in arbitraazjesaak oan tsjin syn hjoeddeiske wurkjouwer.

In soad tiid is der net foar Cambuur. De klup moat foar 1 april oan spilers witte litte oft se harren ôfrinnende kontrakten formeel opsizze of net. Michael Breij, Roberts Uldrikis en Sekou Sylla binne foarbylden fan spilers mei in ôfrinnend kontrakt.

Dêrneist binne der ek yn de technyske stêf noch kontrakten dy't ôfrinne, lykas dy fan assistint-trainer Jeroen Burghout en keeperstrainer Peter van der Vlag. Dat binne besluten dy't gewoanwei naam wurde troch in technyske einferantwurdlike.

Dêrom wol Cambuur sa gau as mooglik in nije technysk manager oanstelle. De klup hat sprutsen mei meardere kandidaten, mar kiest earst foar de opsje-Lambooij. Mocht der út de arbitraazjesaak komme dat Lambooij net fuort mei by RKC, sil Cambuur de syktocht ferfolgje moatte.

It is noch net dúdlik oft de arbitraazjekommisje fan de KNVB woansdei fuortendaliks útspraak docht yn de saak tusken Lambooij en RKC. It soe ek samar in oantal wiken duorje kinne foardat der útslútsel komt, sa lit in wurdfierder fan it fuotbalbûn witte.

De haadpersoan sels, Lambooij, wol op dit stuit noch net reagearje.