Studinten siede iten yn doarpstún: "Krom en smoarch, mar folle lekkerder as fan de gruthannel"

Fiif wiken lang siede njoggen studinten fan koksoplieding fan Firda mei yngrediïnten fan eigen grûn.

Gjin skjinne kratsjes mei kearsrjochte woartels fan de gruthannel, mar woartels dy't krom binne en swart fan de ierde.

Yn in grutte wite tinte riede de studinten in high tea ta foar de túnfrijwilligers. It slotstik fan it projekt. Op it menu steane woartelcake mei selskweekte woartels en sûkeladetaart mei truffel. Ek servearje se sjampanje mei finkelsiroop en jeneverbessjelei.

"De yngrediïnten binne net perfekt", seit in studint. "Ungelyk en smoarch fan de grûn. Mar se binne allegear like lekker."

It idee foar it projekt ûntstie ûnder in flecht nei Turkije, doe't dosint Patricia Dijkstra-Bekkema in studint fertellen hearde oer in dokumintêre fan de Amerikaanske sjef Dan Barber.

'Dat kinne wy hjir ek', tocht se. De doarpstún oan de râne fan Ljouwert waard partner fan it projekt.

De studinten wurkje yn wikseljende tsjinsten yn kas, tún en keuken. Harren menu wurdt net bepaald troch de lesboeken, mar troch wat der beskikber is. "In wike lyn hiene we ynienen in enoarme lading slaad", fertelt Dijkstra-Bekkema. "Dan moatst wat betinke."

Foar Tim is it wurkjen yn de tún in moaie ôfwikseling. "Ik vind dit veel leuker dan de gewone lessen. Je leert werken met lokale producten en merkt hoeveel moeite het kost om iets te laten groeien. Daar had ik eerder geen besef van."

It projekt past yn in bredere ûntwikkeling. Yn 2023 ferkochten neffens sifers fan Universiteit Wageningen goed 7.800 Nederlânske boeren harren produkten fia in koarte itensketting - 9 persint mear as trije jier earder.

De totale omset wie 2,2 miljard euro. "Yn Fryslân hast produkten genôch", seit in studint. "Hoechst it echt net fan fier te heljen."