Leafde foar de see siet djip by keunstner Jan Loman fan Beetstersweach

Keunstner Jan Loman (1918-2006) is foaral bekend wurden fan it logo dat hy makke foar de Waddenvereniging, in logo dat troch de jierren hinne noch nea feroare is.

Mar Loman wie ek skilder en grafysk keunstner fan in grut ferskaat oan wurk. Syn wurken binne te finen yn de publike romte, mar ek yn ferskillende musea en galeryen. Oant syn dea wenne Loman yn Beetstersweach.

Yn 1998, doe't Loman 80 jier wie, fertelde hy yn de FryslânDOK 'Yndrukken' wêr't dy leafde wei komt: "Ik ben ooit matroos derde klas geweest. Daar is waarschijnlijk altijd iets van blijven hangen. Als ik de zee raak, dan ben ik in mijn element"

Ek kaam Loman as bern al jierliks op Skiermûntseach. Dat de natoer yn it algemien en it Waad yn it bysûnder in grut plak ynnimt yn Loman syn keunst, is dêrom net frjemd.

Loman wurke ek in protte mei grafyske techniken. Syn eftergrûn as technykstudint yn Delft kaam dêr goed by te pas. Dochs is hy nea echt yn de technyk oan it wurk gien. It keunstnerskip wie syn ropping, ek al hat hy nea op in keunstakademy sitten.

"Op zo'n academie kunnen ze geen kunstenaar van je maken, dat moet je in je hebben", sei Loman der sels oer. "Ze kunnen je leren hoe je een penseel vasthoudt. Als je dat als autodidact doet, dan zal je er in de regel wat langer over doen. Maar het zit in je."

In soad fan Loman syn wurk sil fan 18 maaie ôf te sjen wêze yn de Overtuin fan it Lycklamahûs yn Beetstersweach en yn Museum Opsterlân op De Gordyk.