Famke (8) út Kollum stikte fermoedlik yn lym, mem (35) fertocht fan moard
14 april, 13:50 • 2 minuten lêstiid
It 8-jierrige famke dat begjin jannewaris libbenleas fûn waard yn in wenning oan de Gysbert Japicxstrjitte yn Kollum, is mooglik om it libben kaam troch ferstikking mei sekondelym.
Dat is tiisdei bekend makke by in pro-formasitting yn de strafsaak tsjin har 35-jierrige mem.
It famke waard op sneontemoarn 3 jannewaris om 08.45 oere hinne libbenleas fûn. De meldkeamer krige dy moarn fan de mem te hearren dat har bern kâld oanfielde, net mear azeme en dat reanimaasje gjin sin like te hawwen.
Helptsjinsten stelden by oankomst fêst dat it famke ferstoarn wie.
Meardere tuben sekondelym fûn
Neffens it foarriedige ûndersyk fan it lichem nei har ferstjerren is sprake fan ferstikking. Dêrby soe it sykheljen behindere wêze troch in lichemsfrjemde stof. It bern soe spuid hawwe en dat ynazeme hawwe, wat in ferstikkingseffekt feroarsake.
Yn de noasgatten is de wurksume stof fan sekondelym fûn. "In de vensterbank zijn meerdere tubes secondelijm gevonden die overeenkomen met de lijm die bij sectie werd vastgesteld", fertelde de offisier fan justysje.
Fertochte fan moard
De frou wurdt foarearst fertocht fan moard. Neffens it Iepenbier Ministearje binne der oanwizingen dat sy it yn it foar neitocht hat oer wat se dwaan soe.
De fertochte soe op 2 jannewaris sekondelym kocht hawwe by de Action; dat soe har iennige ôfspraak dy dei west hawwe.
Ek soe sy koart dêrfoar de heit witte litten hawwe dat hy de bern letter ophelje moast. "Haal de kinderen zondag maar op", sa is yn berjochteferkear te sjen.
De bern soene earst freed ophelle wurde. "De bern hawwe dêr sels net om frege", folle de offisier oan.
Online giene earst ek geroften dat it famke ferdôvjende middels tatsjinne wie. "Daar is niets van gebleken vanuit het toxicologisch onderzoek", fertelde de offisier.
Foararrest ferlinge
De rjochtbank oardiele dat de earnstige beswieren tsjin de fertochte noch hieltyd bestean. It foararrest fan de frou wurdt dêrom foar ûnbepaalde tiid ferlinge.
Psychysk ûndersyk pland
De fertochte wie sels net oanwêzich by de sitting. Har advokaten melden dat se fanwegen har psychyske tastân net by steat wie om te kommen.
De rjochtbank hat earder besletten dat de frou observearre wurde sil yn it Pieter Baan Centrum. It strafproses giet fierder sadree't de resultaten fan dat ûndersyk bekend binne. Ein juny is der opnij in pro forma fan de saak ynpland.
