Lês werom: sc Hearrenfean ferslacht Telstar mei 3-0 en docht goede saken foar play-offs

Klaverboer komt twa kear yn aksje mei effektive rêdingen nei oanfallen fan Telstar. Hy wol graach wer ris de nul hâlde yn in wedstriid.

Bakker makket in doelpunt fanút in frije traap, mar syn goal wurdt ôfkard troch de skiedsrjochter.

In rare botsing wêrby't Devon Koswal in hurde knal tsjin de holle krijt. Hy wurdt in skoftke behannele op it fjild en rint dêrnei nei de kant.

It is wer raak! Jacob Trenskow krijt de bal nei in moaie oanfalsaksje en sjit rjochts út it strafskopgebiet wei de bal hurd binnen.

It stiet 3-0.

Tejan besiket te skoaren, mar Klaverboer komt yn aksje mei in knappe rêding. Hy hâldt de bal tsjin mei de linkerfoet en pakt him dêrnei fêst.

Oei, balferlies by Hearrenfean soarget derfoar dat Hardeveld besykje kin te skoaren. Mar hy sjit heech oer it doel hinne.

It is in rommeltsje by it doel fan Klaverboer. De bal liket oer de line te gean, mar de Fryske ferdigeners traapje de bal noch krekt op tiid it doel út. De skiedsrjochter brekt it feestje foar Telstar ôf: gjin doelpunt foar de ploech út Velsen-Zuid.

Wat in kanon! De oertrêding op Nordås smyt Hearrenfean in frije traap op en Maxence Rivera makket dêr optimaal gebrûk fan. Hy sjit de bal hurd it doel yn.

It stiet 2-0.

Telstar bliuwt noch efkes oanfallen en krijt wer in grutte kâns, mar de bal giet úteinlik lâns de rjochterpeal. Tejan wol noch sjitte, mar komt te let.

Hatenboer besiket te skoaren, mar sjit oer it doel fan Klaverboer hinne.

Oan de oare kant krijt Brouwer foar Telstar fuortendaliks in grutte kâns, mar Klaverboer hâldt de bal tsjin mei in knappe rêding en dûkt der dêrnei fuortendaliks boppe-op.

Zagaritis jout de foarset oan Nordås dy't besiket te skoaren mei in kopbal, mar de bal einiget yn hannen fan keeper Koeman.

Der binne gjin wiksels by beide ploegen.

Leo Driessen wurket al goed fyftich jier yn de fuotbalwrâld en is ek te finen yn it Abe Lenstra Stadion jûn. Mar hy sil jûchje foar Telstar, de klup dêr't hy sûnt koart ek aktyf is as parsesjef.

De Friezen gean mei in 1-0 foarsprong nei de klaaikeamer.

Der komt ien minút ekstra by de earste helte.

Meerveld jout in foarset oan Trenskow en dy lêste hellet út, mar keeper Koeman pakt de bal.

De Friezen ûntsnappe mei de bal. Nordås spilet de bal nei foaren rjochting Meerveld, dy't de kâns krijt om te skoaren mar te let is en it doel foarby draaft.

Van Duijn besiket te skoaren, mar de bal giet links krekt by de peal del.

Lasse Nordås docht it! Maxence Rivera jout de foarset, en Nordås jout it lêste tikje oan de bal fan tichtby.

It stiet 1-0.

Trenskow nimt in frije traap, dy't by Nordås telâne komt mar de bal giet der dochs net yn.

In serieus skot fan Trenskow! Hy krijt de bal nei in foarset fan Meerveld en sjit mar krekt oer it doel fan keeper Koeman hinne.

Thórisson komt mei in skot op doel, dêr't Klaverboer gjin problemen mei hat.

Fuortendaliks giet de bal de oare kant út mei Rivera, dy't in foarset liket te jaan, mar de bal fljocht foar it doel del.

De wedstriid sc Hearrenfean - Telster is ûnderweis.

De Olympyske reedriders hawwe harren eareronde makke oer it fjild. Dan is it no de beurt oan de spilers om it gers yn te gean.

Foar de wedstriid sille de Friezen dy't in medalje wûnen op de Olympyske Winterspelen noch huldige wurde. Dat binne Femke Kok, Antoinette Rijpma-de Jong, Jorrit Bergsma, Marijke Groenewoud en Itzhak de Laat.

Op it stuit stiet sc Hearrenfean achtste yn de earedivyzje. Telstar stiet acht plakken leger, as nûmer sechtjin. Dat is flak boppe de degradaasjesône.

De foarige wedstriid tusken beide ploegen einige ferline jier oktober yn 2-3 winst foar sc Hearrenfean. Dat wie ek de iennige eardere moeting, omdat Telstar yn juny ferline jier promovearre.

sc Hearrenfean hat in oantal goede wedstriden efter de rêch. Sa goed dat algemien direkteur Ferry de Haan sei dat de klup dit seizoen 50 punten helje kin yn de earedivyzje.

"50 punten is haalbaar", reagearret Robin Veldman by Omrop Fryslân. "Maar of het realistisch is, dat weet ik niet. We gaan een fase van het seizoen in waar clubs soms verrassende uitslagen neerzetten. Misschien gaan ploegen wel van speelstijl veranderen om erin te blijven."

Fia de klupwebside seit Robin Veldman dat hy yn Telstar in ploech sjocht dy't "met veel energie en intensiteit speelt". Neffens him moatte de Friezen mei in goed plan komme om der druk op te krijen.

Trainer Robin Veldman kin jûn rekkenje op in fitte seleksje. Allinnich Amourricho van Axel Dongen (net fit) en Levi Smans (knibbelblessuere) binne der net by.

Jûn nimt sc Hearrenfean it op tsjin Telstar yn it Abe Lenstra Stadion.

Wy folgje de wedstriid streekrjocht yn dit blog en hâlde dy op 'e hichte fan alle belangrike mominten. Fia de radio fan Omrop Fryslân kinst ek harkje nei in ferslach fan de wedstriid sc Hearrenfean - Telstar. It kommentaar wurdt fersoarge troch Arjen de Boer. Harkje kin online, mar ek fia 92.2 FM.

De wedstriid begjint om 20.00 oere.