Wybren en Gini dogge neisoarch mei in drone: "Ik mei net sykje, ik moat lústerje"

It is noch mar fiif oere moarns, as Gini, Wybren en neisoarger Femme yn in stik greide by Baaium steane. Mei help fan in drone mei in waarmtekamera sykje se hiele perselen lân ôf op greidefûgelnêsten en -piken.

Neisoargers beskermje de nêsten nei't der aaien lein binne, om de greidefûgelstân te helpen.

Dat moat wol sa betiid moarns omdat it dan noch kâld is. De drone moat de waarmte fan bisten ûnderskiede, en as de sinne derby komt, wurdt it byld minder dúdlik. Gini is de piloat, sy bestjoert de drone.

Op in skermke sjocht se opljochtsjend lytse stipkes dy't wize kinne op in nêst of fûgels. Mar it kinne bygelyks ek reekealtsjes of jonge hazzen wêze.

"Ik ha dy fjildeagen net dy't Wybren hat, mar de technyk fyn ik wol hiel moai. Ik ha de drone-oplieding dien en dat leit my mear." Mei in telefoanferbining stjoert se de beide mannen doelbewust nei it folgjende opljochtsjende puntsje op har skerm.

"As je moarns 4 oere út bêd stappe falt it net ta, mar ien kear yn it lân tinkst: wat is it moai! We dogge dit no trije jier en binne no ek wol goed op inoar ynspile. En as je it tegearre dogge, moatte je ek beide betiid út it nêst wei!", laket Gini.

Yntusken klinkt Wybren wer op har earke. "Moatst hjir ris sjen, hjirre! Wat in plaatsje, trije ljippepykjes flak byelkoar!"

Bruinsma is koördinator fan achttjin fûgelwachten. It binne no de drokke dagen foar him.

Geregeld krijt er in berjochtsje dat der in stikje lân is dêr't er even oerhinne moat omdat de boer meane wol. En dan wurde Gini en hy optromme.

Tegearre mei de neisoarger dy't kontakt mei de boer hat giet Wybren dan it lân yn. De mannen sette stokjes by de nêsten en de gegevens wurde ynfierd yn de app fan it BFVW, it Bûn fan Fryske Fûgelwachten.

Wybren is in echte fjildman. "As lyts bern wie ik altyd al it fjild yn te aaisykjen. It fjild dat lûkt, dy frijheid, dy lûden. De skries, de ljip, dat is dochs prachtich? En gelokkich, beiden fine we dat moai."

"Justermoarn hiene we in pear jonge ljurkjes. Dat hie ik noch net earder sjoen, mar dy drone fynt se wol. Dat binne fan dy geloksmomintsjes!"

De fûgelwachter docht al 50 jier oan neisoarch, mar sjocht dat der in protte feroare is.

"We hiene gjin telefoan mei apps. Naamst in briefke en in pinne mei it lân yn. De gegevens joechst troch en dan krigest letter in jieroersjoch."

"No ha we dat allegearre prachtich moai foarinoar, kinst it fuort yn de app sette, kinst it útlêze en fan alle wachten besjen. Mar de fûgelstân giet wol achterút, dy kinne we net mei in app rêde!"

De neisoarch mei help fan de faunadrone is in wolkomme ynnovaasje. It tal neisoargers fergrizet en rint tebek en mei de drone giet it folle effisjinter.

As Gini de koördinaten fan it stik lân ynfiert, leit it systeem der in raster oerhinne. Dat hiele parkoers fljocht de drone sekuer by del.

Mar it is wol oars. "De drone fljocht op 20 meter hichte. Sadree't er wat waarmte sjocht, dan zoomt er yn. Ik moat lústerje nei de piloat, ik mei eins net sykje", seit Wybren.

It fleanende apparaatsje fersteurt de greidefûgels net neffens him. "Sjochst noch wolris dat de strânljip wat lilke maneuvels makket nei de drone, mar de skries en de ljip jouwe der neat om, dy tinke dat er der gewoan by heart."

It perseel by Baaium dat de neisoargers hjoed ôfrinne is ideaal foar greidefûgels. "Der wurdt letter meand, der is gjin jarre of keunstdong oerhinne kaam, it is krûderyk en der is in soad wetter. Dit binne de peareltsjes!"

De 'opbringst' is dan ek grut. De fjildman lit entûsjast in kaartsje op de telefoan sjen mei wat se allegearre yn it stik lân fûn ha. "De ljochtgiele stippen binne kluten, read is de skries, pears de tsjirk en swart de ljippen. Alles byelkoar wol 30 nêsten!"

"Dit perseel is in oäze yn de woestyn fan gers. Ik wurd der hartstikke bliid fan, werklik wier. Dit jout my de enerzjy om troch te gean!"