Seekonteners by brêge Twellingea soargje foar argewaasje: "We kinne der kwealik del"

Minsken mei in scoot- of brommobyl ha sels in probleem, want dy binne yn guon gefallen nammentlik te breed.

De brêge yn de Nije Dyk gie yn novimber ticht foar auto- en lânbouferkear. Ut ûndersyk die bliken dat de brêge yn minne steat is en de feilichheid net garandearre wurde kin.

Fytsers en kuierders meie der noch wol oer. Mar ek foar harren is de brêge sûnt in skoftke dus in obstakel wurden.

Rykswettersteat, dat de konteners pleatst hat, seit dat dat dien is om slûpferkear tsjin te gean.

"In het kader van 'veiligheid voor iedereen' is dat onacceptabel", seit in wurdfierder. "Rijkswaterstaat heeft de veiligheid van iedereen, zowel weggebruikers als vaarweggebruikers, hoog in het vaandel."

Ast by de brêge komst, sjochst net wat der fan de oare kant fan de kontener komt", leit Bauke van der Meer út. Hy wennet yn 'e buert en hat in soad oerlêst troch de tichte brêge.

"Elektryske fytsen en brommers meie noch oer de brêge. Dy ha in flinke faasje. Kinst net by inoar del, sjochst inoar net en dan wurdt it al gau gefaarlik."

Nei klachten fan omwenners hat Rykswettersteat oanjûn de konteners noch dizze wike te ferfangen foar betonblokken.

"Wy ha it ferline wike freed al oanjûn. Mar der wurdt in wike mei wachte. Blykber moatte we earst in ûngelok krije foardat Rykswettersteat der wat oan docht."

Wêr't bewenners ek min oer te sprekken binne, is it stek by tankstasjon Bloksleat, in pear kilometer fierderop. Sûnder dat stek kinst fan de paralleldyk trochstekke nei de A7.

Minsken dy't fan de iene kant fan Twellingea nei de oare kant wolle, moatte dat no dwaan troch nei Snits of De Jouwer te riden, om dan fia de A7 nei de oare kant te gean.

As auto's fia it tankstasjon ride kinne, skeelt dat sa'n acht kilometer omriden.

Der wie dan ek frege om it stek iepen te setten. Yn stee dêrfan is der troch Rykswettersteat in grut betonblok foar set.

Neffens Rykswettersteat soe it iepenjen fan it stek gefaar opsmite. "Het is geen doorgang bedoeld voor verkeer."

"Het is ook geen calamiteitenroute voor de hulpdiensten. Door het openstellen van dit hek ontstaan er onveilige en ook ongewenste situaties, onder andere doordat auto's het fietspad kruisen."

Rykswettersteat seit dat ek mei tydlike maatregels, lykas ferkearsbuorden of haaietosken, de feilichheid net garandearre wurde kin.

Unbekenden ha yntusken mei graffity de wurden 'Zielig hoor' op it betonblok spuite.

Rykswettersteat is dwaande mei in wiidweidige ynspeksje nei de konstruksje fan de brêge. De resultaten dêrfan wurde mids febrewaris ferwachte.

De oerlêst foar omwenners wurdt troch Rykswettersteat 'ten zeerste betreurd'.

Yn in oerlis tusken gemeenten en Rykswettersteat is earder it 'worst-case-senario' besprutsen. Oftewol, as yn febrewaris by de ynspeksjes bliken dwaan soe dat de betonnen pylders fan de brêge yn minne steat binne.

Yn dat gefal is it net mooglik om in needbrêge oan te lizzen. De situaasje bliuwt dan sa't dy is: alle auto's, frachtauto's en trekkers moatte omride.

Der moat yn dat senario wachte wurde oant it wurk oan de Prinses Margriettunnel, in eintsje fierderop, klear is. Nei ferwachting is dat pas ein 2025.

"Wy binne as bewenners hiel benaud dat dat senario wierheid wurdt", seit Bauke van der Meer. "Dat frustrearret."