Ikeprosesjerûp hieltyd noardliker: "Net in skoft ûnder in beam stean"

"Wy binne dwaande mei it reguliere ûnderhâld oan de beammen, at de oannimmer de rûp tsjinkomt, wurdt der fuortendaliks in lintsje omhinne hongen", seit wethâlder Kees Wielstra fan de gemeente Dantumadiel.

Ynkoarten sil in spesjalisearre bedriuw delkomme om de nêsten en rûpen fuort te heljen. "Dat kin noch in oantal wike duorje, minsken hoege net benaud te wêzen, mar gean net in skoft ûnder de beam stean", warskôget de wethâlder.

"De rûpen sjitte in soarte fan brânhierkes ôf, dy't bot irritearje kinne." Ek foar hûsbisten kinne de hierkes gefaarlik wêze.

Kenniscentrum Eikenprocessierups warskôget dat de rûp yn it noarden fan Nederlân mear oerlêst feroarsaakje kinne soe as yn it suden. Earder wie de rûp meastentiids aktyf yn it suden, mar sûnt in pear jier is it bist hieltyd noardliker te finen.