Fryske tsjerken sykje in lykwicht tusken boeren stypje en soarch foar de ierde

De wurkgroep Kerken en Landbouw spilet dêryn in wichtige rol. Sy advisearret tsjerken oer hoe't se hjirmei om gean kinne. De wurkgroep is ferbûn mei de Raad van Kerken Fryslân, mei de Roomske tsjerke (fia Solidair Friesland) en mei de klassis Fryslân fan de PKN.

Fan alle wurkgroepen dy't der lanlik yn dit ferbân wiene is der noch mar ien oer: de Fryske wurkgroep. Gjin wûnder dat dy no út it hiele lân wei fragen krijt om stipe by de aktuele lânboudiskusje.

Neffens wurkgroepfoarsitter Douwe Hiemstra moatte se geregeld fersiken ôfwize om't se de hannen fol ha oan wat yn Fryslân fan har frege wurdt. Materiaal dat ûnwikkele is, wurdt wol breder beskiber steld en brûkt by it debat yn de tsjerken.

Lânboupastor en wurkgroeplid Pieter Knijff hat in soad kontakt mei yndividuele lânbouwers. "Ik fernim by in soad boeren dat se fine dat harren ûnrjocht oandien wurdt. Sa binne der ek guon dy't sels gjin útwei mear sjogge."

Dan is it wichtich dat je dy sinjalen yn it pastorale wurk oppikke, is Knijff fan betinken. "Dat je de learzens en de overall oanlûke, mei de minsken yn petear gean en oandacht jouwe. Dat moat net yn de sneinske klean op de bank."

Wurkgroepfoarsitter Douwe Hiemstra ûnderstreket dat: "Der komme bêst in soad minsken by de boer op it hiem. Mar dy moatte eins allegearre wat fan him. As der in dûmny komt is dat net sa. Dan krije jo in hiel oar petear."

Hiemstra tinkt net dat de diskusje boer-natuer yn de tsjerken sels bot spilet. "De solidariteit mei boeren is hjir grut. De feesteapel troch de helte, dat hearre wy hjir hast net. Wy wolle oeral wol rekken mei hâlde, mar is it sa maklik sein: jo moatte dit en jo moatte dat. De grûn moat ek wat opsmite en as dat te min is, kinne jo net draaie."

Lanlik tinkt de wurkgroep ek mei oer de wize hoe't tsjerken omgean moatte mei pacht. In soad tsjerken ferpachtsje grûn dy't foar lânbou brûkt wurdt. Sy soene dêrby ek betingsten meijaan kinne oer hoe't de grûn brûkt wurde moat. Dat kin goed passe by de bibelske opdracht om duorsum en goed mei de ierde om te gean.

Oan de oare kant moat de boer ek rendabel buorkje kinne. Boppedat binne de ynkomsten út de pacht fan libbensbelang foar de tsjerken om bygelyks gebouwen te ûnderhâlden en de dûmny te beteljen.

Neffens Douwe Hiemstra binne je ek in goed rintmaster as je in optimaal rendemint helje. Dat slagget net as je de pachter allerhanne restriksjes oplizze. "Dan snijdt de tsjerke himsels yn 'e fingers. It giet om it sykjen nei in goed lykwicht en dêr helpt ús wurkgroep graach by."