De SportCast bepraat de seis krúsjale mominten fan de derby

"It is in terjochte penalty. Hy kin der neat oan dwaan, mar dat is de regel. It is belachlik, mar goed", fynt sportferslachjouwer Geert van Tuinen. "De hannen moatte tsjinwurdich mei tie-rips fêstmakke wurde."

Harm Zeinstra: "Ik slút my der wol by oan. Ik mis wol de kontekst dat der fierder gjin gefaar ûntstean soe, as Henk Veerman de foarset wol jûn hie. It wie in simpele fangbal wurden foar Sonny Stevens."

In soad diskusje is der oer de reade kaart dy't Doke Schmidt nei tolve minuten krijt. Zeinstra jout oan in foarkar te hawwen foar giel. "Dat wie myn earste gedachte. Mar, hoe faker ast him sjochst yn de werhelling, hoe slimmer it wurdt. It bliuwt in klisjee, mar hy kin him jaan."

Sportferslachjouwer Andor Faber dielt dy miening: "Ik fyn it net sa'n slimme oertrêding dat je dêr read foar jaan moatte."

Zeinstra is sels âld-keeper fan sc Hearrenfean en SC Cambuur. Mei it analysearjen fan doelmannen hâldt er him fanatyk dwaande. Krekt as by de 1-1 fan Cambuur, dêr't Xavier Mous útkomt en Roberts Uldrikis ynkoppet.

De lêzing fan Zeinstra: "Wat Cambuur hiel tûk die, is dat it Henk Veerman blokte. Der kaam in soad romte frij yn dy zône, dêr't Uldrikis opdûkte. Dat is gjin tafal, ik tink dat Cambuur dat analysearre hat. Yn dy sin waard Mous triggere om it op te lossen, wêr't er net bykaam."

Mar, is it dêrmei ek in flater? "It falt te ferklearjen, mar it is net de goeie kar. Dus it is in flater."

Diskusje is der ek oer de mooglike handsbal fan Joey Veerman yn de twadde helte. Cambuur woe dêr in strafskop foar hawwe. Dêr giet Van Tuinen yn mei. "Ja, ik ha in byld sjoen wêryn't er de hân te fier fan it lichem hat. Wol kromme, mar fan it lichem ôf. Dus ik fûn it in penalty."

Faber fynt it dan wer gjin penalty. "We fine dy handsbal fan Mac-Intosch allegear belachlik. Mar hjir hat Veerman de hân folle mear tsjin it liif oan as Mac-Intosch hat. Stel: dy earste wie net jûn, dan wie hjir net oer praat."

Zeinstra: "Myn gefoel seit ek fan nee. Hy hat de hân reedlik strak neist it lichem en der komt wer gjin gefaar út."

Henk Veerman koppet sân minuten foar tiid de winnende goal efter Cambuur-keeper Sonny Stevens. Dêrtroch winne de Feansters en lûke de Ljouwerters oan de koartste ein.

Faber dêroer: "Maxim Gullit en Mees Hoedemakers sjogge der by dy 1-2 net goed út. Erik Schouten foel út en dat brekt Cambuur yn myn eagen úteinlik op. Dêrtroch falt de goal sân minuten foar tiid."

Neffens De Vries hie Hearrenfean sawiesa wol skoard. "Ik tink dat er oars ek fallen wie, hear. As je sjogge nei de expected goals, die wiene hiel heech by Hearrenfean. Se rekken de peal en de latte, hy siet der wol oan te kommen."

By in 2-1 foarsprong foar Hearrenfean, krijt Cambuur yn de lêste minút noch ien kâns fia Alex Bangura. Mous komt lykwols goed út de goal en kin rêde. Dêrmei hat hy in haadrol yn de oerwinning.

Zeinstra fynt dat de Feanster keeper dat goed dien hat. "It waard net echt in kâns, om't Bangura noch fol yn duel wie mei Sven van Beek. Mar Mous makket wol in goeie kar om út te kommen en gelyk te blokken", seit Zeinstra, dy fynt dat de spits fan Cambuur mear dwaan moast foar Bangura: "Uldrikis hie Van Beek miskien mear blokke kinnen."