Lês werom: Brouwers en Van Overeem besoargje sc Hearrenfean de oerwinning op Excelsior (1-2)

Miliano Jonathans, dy't earder al in krúsbânblessuere oprûn, is yntusken op in brankaar lein. Hy hinkte it fjild ôf en koe net mear op syn skonk stean. Under applaus fan de tribune ôf ferlit er it fjild.

Mike van Duinen komt foar him it fjild op.

Excelsior krijt in penalty fanwegen hands fan de gasten. Naujoks sjit nei rjochts, de hoeke dêr't Klaverboer net hinne dûkt.

It stiet 1-2.

Joris van Overeem skoart de twadde goal! Hy krijt de bal fan Maxence Rivera en wol sjitte, mar de bal komt tsjin de keeper oan. Mar fia him komt de bal wer by Van Overeem en dan tikket er him binnen.

It stiet 0-2.

Ringo Meerveld pakt de bal en draaft hurd rjochting it doel. Hy komt bêst fier, foardat de bal ûnderskept wurdt troch de Rotterdamske ferdigening.

Jacob Trenskow besiket te skoaren, mar de bal giet foar it doel del.

In gefaarlik skot fan Janssen, mar Bernt Klaverboer tikket de bal fuort mei in essinsjele rêding.

Sam Kersten krijt de earmtakke fan Sanches Fernandes tsjin de mûle en jout him del, mar hy kin al gau wer fierder.

Der binne gjin wiksels by beide ploegen.

Agil Etemadi spile jierren lyn as spits by Hearrenfean. Yntusken is er nei fyftjin jier wer werom by de Fryske klup, dêr't er sûnt dit jier wurksum is as keeperstrainer. Hij fertelt ûnder mear oer de gearwurking mei Bernt Klaverboer en Andries Noppert.

Skiedsrjochter Danny Makkelie fluitet foar de ein fan 'e earste helte.

Der wurde twa minuten ekstra tiid oan de earste helte taheakke.

In gefaarlike kâns foar Excelsior, mar Bernt Klaverboer komt syn doel út en trapet de bal fuort. Hy rekket dêrby wol Luuk Brouwers, mar efkes letter stiet er wer op.

Twa minuten letter fynt Lasse Nordås it doel en hy skoart. Mar de flagge giet omheech foar bûtenspul: doelpunt ôfkard.

Lasse Nordås jout de bal yn in omskeakeling oan Luuk Brouwers, dy't de bal hurd lâns de keeper sjit.

It stiet 0 -1.

It is in wûnder dat der noch net skoard is. Wer krijt Excelsior in grutte kâns: De Regt komt ticht by it doel en sjit mar krekt oer it doel fan Klaverboer hinne.

Schouten besiket te skoaren mei in kopbal, mar Bernt Klaverboer wit krekt de bal út it doel te hâlden.

Naujoks hat de bal en krijt de earste echte kâns foar Excelsior, mar Bernt Klaverboer komt yn aksje mei in rêding.

Vasilios Zagaritis besiket te skoaren, mar de bal giet krekt foar it doel del.

Wat in kâns foar Maxence Rivera! Nei in foarset fan Jacob Trenskow hellet er hurd út rjochting it doel, mar keeper Van Gassel springt der noch krekt foar!

Jacob Trenskow krijt de bal en hat in soad romte. Hy besiket sels te skoaren, al hie Lasse Nordås de bal fan him ferwachte. Mar de bal rekket úteinlik de peal.

Ringo Meerveld grypt nei it skouder en it sjocht der net noflik út. Hy rint nei de sydline en wurdt dêr fierder behannele.

Der binne ek in soad Fryske supporters meigien nei Rotterdam, want it útfak sit ramfol.

sc Hearrenfean fine we dus op it njoggende plak fan de earedivyzje. Excelsior stiet no fyftjinde.

De foarige wedstriid tusken dizze twa ploegen wie yn oktober ferline jier. Dy waard wûn troch de Friezen mei 2-1. Mar yn it seizoen dêrfoar wist Excelsior twa kear te winnen fan Hearrenfean.

De Friezen stean op it stuit njoggende yn de earedivyzje, mei noch njoggen wedstriden te gean. Dêrfan treffe se seis kear in ploech dy't leger yn de stân stiet.

"We zien dat er kansen liggen, maar we hebben het ook weleens laten liggen natuurlijk dit seizoen", seit Robin Veldman tsjin Omrop Fryslân. "We mogen niet denken dat het ons allemaal toelacht, maar we mogen wel het enthousiasme hebben om de plekken boven ons te gaan aanvallen."

Excelsior moat it jûn dwaan sûnder linksback Arthur Zagré. Ferline wike krige er tsjin Go Ahead Eagles syn fiifde giele kaart fan it seizoen en dêrom is er skorst.

Tsjin Sparta moast Luuk Brouwers it ferline wike noch dwaan mei in ynfalbeurt, mar hjoed stiet er wer yn de basis. Hy ferfangt Marcus Linday, dy't skorst is.

Jûn stiet de wedstriid tusken Excelsior en sc Hearrenfean op it programma yn stadion Woudestein.

Wy folgje de wedstriid streekrjocht yn dit blog en hâlde dy op 'e hichte fan alle belangrike mominten. Fia de radio fan Omrop Fryslân kinst ek harkje nei in ferslach fan de wedstriid Excelsior sc Hearrenfean. It kommentaar wurdt fersoarge troch Roelof de Vries. Harkje kin online, mar ek fia 92.2 FM.

De wedstriid begjint om 21.00 oere.