Lês werom: sc Hearrenfean krijt de wyn fan foaren tsjin AZ en ferliest mei 3-0

Brouwers krijt in triuw yn syn ribbekast. Ek Willemsen grypt nei syn knibbel. Beide spilers geane nei de kant, mar Brouwers liket wer fierder te kinnen.

Docht Hearrenfean it net, dan docht AZ it wol. Troy Parrott rekkenet ôf mei Maas Willemsen en sjit de bal lâns Bernt Klaverboer.

It stiet 3-0.

Braude hellet út rjochting de fiere linkerhoeke fan it doel fan de thúsploech, mar de bal einiget op de peal.

Dijkstra krijt in grutte kâns en sjit op doel, mar de bal fljocht mar krekt oer de latte hinne.

In earste skot fan Jensen wurdt keard troch Klaverboer. Dan komt der in twadde skot, mar Zagaritis wit de bal foar it doel fuort te koppen.

In knappe rinaksje fan Maxence Rivera einiget minder goed foar Wouter Goes. Hy krijt de noppen fan Rivera op syn skynbonke en rôlet oer de grûn fan pine.

Van Overeem tikket de bal nei Zagaritis dy't him oanjaan wol oan Vente, mar der springt noch krekt in ferdigener fan AZ tusken.

De keeper fan AZ liket blessearre (wat er oer it algemien faak is). Mar efkes letter docht bliken, krekt as by Klaverboer, neat oan 'e hân.

De Friezen sykje nei in doelpunt en begjinne AZ werom te dringen.

In pear Hearrenfeanspilers is begûn oan de warming-up, wêrûnder Luuk Brouwers.

It grutte doel fan Hearrenfean dit seizoen is it berikken fan de play-offs foar Europeesk fuotbal. Mar wat binne de kânsen fan de Fryske klup yn Europa?

Fuotbalanalist Gertjan Verbeek, dy't ek haadtrainer west hat by sawol sc Hearrenfean as AZ, jout syn miening oer de prestaasjes.

Skiedsrjochter Nagtegaal fluitet foar de ein fan de earste helte.

Hearrenfean stiet mei 2-0 achter.

Der komme twa minuten extra by de earste helte.

Trenskow hat de bal en wol in foarset jaan foar it doel fan de thúsploech, mar Meerveld is krekt te let om him oan te nimmen.

In skot fan Parrott wurdt keard troch Klaverboer, mar de bal rôlet wer fuort. Hy dûkt der krekt op tiid boppe-op om de 3-0 foar te kommen.

Klaverboer giet derby sitten en liket blessearre. Of is dit in taktysk momint foar de stêf fan Hearrenfean om de spilers efkes ta te sprekken?

Uteinlik is der gjin skea by de jonge keeper en giet it spul fierder.

Efkes like de 3-0 fan Alexandre Penetra yn it net te lizzen, mar de skiedsrjochter kart de goal ôf fanwegen bûtenspul.

Earder makke Lasse Nordås hands, wat AZ in frije traap opsmiet foar dizze kâns.

Mijnans koe hast syn tredde treffer meitsje dizze wedstriid, mar hy rekket de bal net krêftich genôch foar in serieus skot.

Meerveld besiket te skoaren, mar de bal fljocht te fier nei rjochts.

Gjin goede iepeningsfaze foar sc Hearrenfean. Alwer hat Sven Mijnans de bal en hy tikket him yn 'e fiere linkerhoeke.

It stiet 2-0 nei noch gjin tsien minuten.

Earder like Troy Parrott de iepeningstreffer te meitsjen, mar in minút letter is it Sven Mijnans. Hy hellet út en Bernt Klaverboer is kânsleas, kin net mear by de bal.

It stiet 1-0.

Dêr is Daal alwer mei in skot út in corner wei en dy bedarret yn de goal, mar der giet in streek troch dat doelpunt. De Wit makke nammentlik dêrfoar in oertrêding op Klaverboer.

Daal hellet út mei in flinke knal, mar Klaverboer tikket de bal fuort mei in knappe rêding.

De ôftraap is foar Hearrenfean.

De skiedsrjochter hjoed is Marc Nagtegaal.

De nûmer seis en sân fan de earedivyzje nimme it hjoed tsjininoar op. De Alkmaarders hawwe ien punt mear as de Friezen, mar Hearrenfean is dwaande mei in goeie searje fan seis oerwinningen yn de lêste acht wedstriden.

De foarige wedstriid tusken AZ en Hearrenfean wie ferline jier yn novimber. Doe wûnen de Friezen yn eigen hûs mei 3-1.

De 'paspoortgate' is dus oplost foar Dylan Vente, mar it smiet him noch in soad gedoch op. Hy mocht ynienen net mear traine en wedstriden spylje, omdat bliken die dat er syn Nederlânske nasjonaliteit kwytrekke wie.

Hy kaam earder fjouwer kear út foar it Surinaamske alvetal, wat úteinlik gefolgen hie foar syn wurkfergunning.

"Ik mocht niet op de club komen, geen interviews geven, zelfs geen kleding van Heerenveen dragen", seit Vente tsjin Omrop Fryslân.

AZ ferlear ôfrûne tongersdei mei 3-0 fan Sjachtar Donetsk yn de Conference League. De spilers lykje neffens trainer Leeroy Echteld goed út dat duel kaam te wêzen.

Oanfaller Amourricho van Axel Dongen komt dit seizoen net mear yn aksje. De blessuere oan syn boppeskonk blykt slimmer as earst tocht.

"Amourricho is bijzonder aangedaan", seit trainer Robin Veldman tsjin Omrop Fryslân. "En het doet mij als mens, als trainer en als voetballiefhebber heel veel pijn dat een jonge sporter niet zijn droom kan najagen."

Fanwegen de 'paspoortgate' mocht Dylan Vente ôfrûne wykein net spylje, mar dat is yntusken oplost. Hy mei hjoed dus wer yn aksje komme, mar begjint op 'e bank.

Doelman Andries Noppert reizget net mei nei Alkmaar om't er noch te folle lêst hat fan syn rêch.

Hjoed stiet de wedstriid tusken AZ en sc Hearrenfean op it programma yn it AFAS Stadion yn Alkmaar.

Wy folgje de wedstriid streekrjocht yn dit blog en hâlde dy op 'e hichte fan alle belangrike mominten. Fia de radio fan Omrop Fryslân kinst ek harkje nei in ferslach fan de wedstriid AZ sc Hearrenfean. It kommentaar wurdt fersoarge troch Arjen de Boer. Harkje kin online, mar ek fia 92.2 FM.

De wedstriid begjint om 16.45 oere.