Remmelt Eldering en Kanada dogge Fryske froulju sear: sulver foar Rijpma-de Jong en Groenewoud

18:15

Grutskens oerhearsket by Friezinnen

Se liken yn earste ynstânsje bot teloarsteld te wêzen oer it twadde plak, mar Antoinette Rijpma-de Jong en Marijke Groenewoud seagen dat der net mear yn siet as dat.

En dus prolongearret Kanada de olympyske titel. "We ha alles jûn en sulver is dan no it heechst helbere", fertelt Groenewoud nei ôfrin.

Rijpma-de Jong: "Ik tink dat we super bliid wêze meie mei it sulver."

Lês hjir de reaksjes fan Rijpma-de Jong, Groenewoud én Jorrit Bergsma dy't fjirde waard:

17:24

Hoe komst oan seldsume pins op de Olympyske Spelen? Us manlju yn Milaan sykje it út

Us manlju yn Milaan komme der op de Olympyske Spelen efter dat der noch in bysûndere tradysje bestiet ûnder supporters: it sammeljen fan pins. Mar hoe sit dat krekt?

17:01

Sa sjocht bliidskip derút by Remmelt Eldering

Remmelt Eldering en Kanada wurde olympysk kampioen

16:55

Twadde sulver foar Rijpma-de Jong, earste foar Groenewoud

It is foar Antoinette Rijpma-de Jong har twadde sulveren olympyske medalje. Yn 2018 waard se ek twadde op de ploege-efterfolging mei Nederlân.

Marijke Groenewoud helle noch noait in sulveren medalje op de Olympyske Spelen. Se wûn fjouwer jier lyn brûns op de ploege-efterfolging.

Beide froulju komme freed wer yn aksje: dan ride se de 1.500 meter. Groenewoud hat dêrnei noch in izer yn it fjoer, se rydt sneon ek noch de massastart.

16:51

Teloarstelling by Nederlân

Joy Beune, Antoinette Rijpma-de Jong en Marijke Groenewoud hawwe gjin sulver wûn, mar goud ferlern as je nei harren gesichten sjogge. De teloarstelling dript der fanôf.

Nederlân begûn noch wol goed oan de finale tsjin Kanada, mar krekt wat oer de helte nimme de froulju fan Remmelt Eldering de lieding oer.

Dy foarsprong jouwe se net mear út hannen; sterker noch, dy wreidzje se allinnich mar út.

Nederlân finisht yn 2.56,77 en Kanada yn 2.55,81. It is de twadde sulveren medalje út de skiednis foar de Nederlânske froulju op dit ûnderdiel.

16:47

Nederlân grypt neist olympyske titel

SULVER... De Nederlânske froulju gripe neist de olympyske titel op de ploege-efterfolging. Joy Beune, Antoinette Rijpma-de Jong en Marijke Groenewoud wûnen de ôfrûne oardel jier alles, mar ferlieze yn de olympyske finale fan Kanada.

16:45

Dêr binne se!

It is safier. Joy Beune, Antoinette Rijpma-de Jong en Marijke Groenewoud jouwe inoar noch in boks, geane it iis op en ride nei de startline. Wurdt it goud of sulver?

It brûns giet nei Japan, dat yn de B-finale Amearika ferslacht.

16:42

Primeur foar Rijpma-de Jong en Groenewoud?

Antoinette Rijpma-de Jong, Joy Beune en Marijke Groenewoud

Net earder yn harren karriêre waarden Antoinette Rijpma-de Jong en Marijke Groenewoud olympysk kampioen. Se krije sa dé kâns fan harren libben yn de finale fan de ploege-efterfolging.

Noch eefkes, om 16.46 oere sette de twa Friezinnen útein mei Joy Beune. Tsjinstanner is it Kanada fan (Fryske) bûnscoach Remmelt Eldering.

16:32

Italië ferrast mei winst op Amearika

Italië is de nije olympysk kampioen op de ploege-efterfolging. It gastlân ferrast troch yn de finale Amearika te ferslaan.

It goud giet yn 3.39,20 nei Davide Ghiotto, Andrea Giovannini en Michele Malfatti, dy't mear as fjouwerenheale sekonde flugger binne as Ethan Cepuran, Casey Dawson en Emery Lehman.

Je hawwe der neat oan, mar Nederlân notearre mei 3.41,47 sels in fluggere tiid as Amearika (3.43,71).

16:30

Minimaal ferskil

Dat Sina flugger úteinsette soe as de Nederlânske manlju, wie gjin ferrassing. Mar de weromkear fan Stijn van de Bunt, Jorrit Bergsma en Chris Huizinga kaam te let.

In misser fan Huizinga holp ek net mei om it grutte ferskil mei Sina te oerbrêgjen. Ien rûntsje foar de ein wie it ferskil noch oardel sekonde; op de finish wie it 0,09 sekonde.

It is in flinke tebeksetter foar de Nederlânske ploech, dy't ûnder lieding stiet fan bûnscoach Rintje Ritsma.

Bergsma en Van de Bunt krije noch in kâns op revâns: sneon foarmje se it Nederlânske duo op de massastart.

16:27

Bergsma en Nederlân ferlieze fan Sina

NEE... Nederlân ferliest fan Sina yn de B-finale. It oranjetrio rint de hiele rit efter de feiten oan en wurdt úteinlik krekt ferslein. Noch gjin twadde medalje dus foar Jorrit Bergsma op dizze Olympyske Spelen.

16:16

De spanning nimt ta...

Pakt Jorrit Bergsma (midden) syn twadde medalje?

Noch in pear minuten... Wurdt in in twadde brûnzen medalje foar Jorrit Bergsma op dizze Olympyske Spelen? We witte it aanst.

Tsjinstanner Sina fiert ien wiziging troch yn fergeliking mei de heale finale: Zhongyan Ning rydt tongersdei de 1.500 meter, dus docht yn de finale tsjin Nederlân net mei. Hy wurdt ferfong troch Wenhao Li.

15:49

De ferromming by Ritsma wie grut

De bliidskip is grut by Rintje Ritsma nei de winst yn de heale finale

15:35

Mei tank oan De Hûnekop yn de finale: Kanada

It Nederlânske trio mei Groenewoud en Rijpma-de Jong treft aansen yn de grutte finale om it goud en sulver de ploech van Kanada ûnder lieding fan Noardburgumer Remmelt Eldering.

Eldering brûkt muzyk fan De Hûnekop om syn froulju op te swypkjen.

15:11

Bergsma rydt ek B-finale, pynlik foar Prins

Jorrit Bergsma bliuwt stean en mei aansen ek de B-finale ride. Dat is niiskrekt dúdlik wurden. Bûnscoach Rintje Ritsma lit de opstelling yntakt.

Dat betsjut dat Marcel Bosker, dy't spesjaal foar de ploege-efterfolging selektearre is, net ynset wurdt yn de heale finale en de finale. Hy ried wol de kwartfinale.

Hoe soe dêr op De Jouwer op reagearre wurde? Tim Prins moast ommers syn startbewiis op de 1.500 meter ynleverje, om't Bosker perfoarst mei moast neffens reedrydbûn KNSB.

15:04

It skeelde hast neat!

De Nederlânske froulju yn de heale finale

Pfoe, dat skeelde hast neat. Mei tank oan in goeie lêste ronde wûn Nederlân de heale finale fan Japan. It ferskil op de finish wie mar 0,11 sekonde.

De start fan Japan wie better, mar mei noch fjouwer rûntsjes te gean naam Nederlân de lieding oer. Japan rûn dêrnei lykwols wer wat yn, yn de rûntsjes dy't folgen. Mei noch ien rûntsje te gean naam Japan de lieding oer.

Lykas de manlju liken ek de Nederlânske froulju harren opmeitsje te moatten foar de B-finale, mar de einsprint brocht rêding foar Joy Beune, Antoinette Rijpma-de Jong en Marijke Groenewoud.

Nederlân finishte yn 2.55,84. Dêrmei wie it 0,08 sekonde flugger as Kanada, dat de oare heale finale wûn. Om 16.46 oere is de finale tsjin it Kanada fan bûnscoach Remmelt Eldering.

15:01

JA! Nederlân rêdt it op!

Joy Beune, Antoinette Rijpma-de Jong en Marijke Groenewoud winne yn de heale finale fan Japan! En dus geane se nei de finale en meie se stride foar it goud!

14:55

Klear foar de start

De transponders sitte om en de helmen en de brillen binne op set. Joy Beune, Antoinette Rijpma-de Jong en Marijke Groenewoud steane klear foar de heale finale tsjin Japan.

Yn de earste heale finale rekkene Kanada, ûnder lieding fan de Fryske bûnscoach Remmelt Eldering, ôf mei Amearika. Mocht Nederlân de heale finale winne, treffe se dus Eldering en syn froulju.

14:48

Revâns foar Beune en Groenewoud?

Dan is it no tiid foar de froulju. It is yndifidueel noch gjin toptoernoai foar Joy Beune en Marijke Groenewoud, dy't noch gjin medalje hellen.

Litte we hoopje dat dat net 'yn de kopkes' sitten giet en dat se dogge wat se de ôfrûne oardel jier mei Antoinette Rijpma-de Jong op de ploege-efterfolging diene: winne.

14:42

Nederlân tsjin Sina om tredde plak

De Nederlânske manlju treffe yn de B-finale fan de ploege-efterfolging sa as ferwachte Sina. Dat wie net opwoeksen tsjin Amearika, de grutte favoryt foar de olympyske titel.

Sina like him yn de heale finale sels te sparjen foar de moeting om it brûns mei Nederlân. It Aziatyske lân kaam yn 3.52,22 oer de finish, Amearika yn 3.44,29.

De B-finale is om 16.22 oere fannemiddei. It is noch net dúdlik oft Jorrit Bergsma dan op 'e nij starte mei of dat bûnscoach Rintje Ritsma de foarkar jout oan Marcel Bosker.

14:34

Italië wint, brûns heechst helbere foar Nederlân

It Italiaanske trio hat de Nederlânske manlju ferslein yn de heale finale fan de ploege-efterfolging. Dat betsjut dat Jorrit Bergsma, mei Stijn van de Bunt en Chris Huizinga, feroardiele is ta de B-finale.

Dêryn is it brûns it heechst helbere. Nederlân rydt dêryn tsjin Amearika of Sina.

Davide Ghiotto, Andrea Giovannini en Michele Malfatti begûnen flugger as Nederlân. Yn it middenstik rûn it oranjetrio yn en wie it sels efkes flugger as Italië, mar dat kaam dêrnei wer mei in einsprint.

Dy wie Van de Bunt, Bergsma en Huizinga te machtich. Italië finishte yn 3.38,88 en Nederlân yn 3.40,67.

14:29

Nederlânske manlju stean klear

We begjinne! Stijn van de Bunt, Jorrit Bergsma en Chris Huizinga steane klear. Datselde jildt foar de Italianen Davide Ghiotto, Andrea Giovannini en Michele Malfatti.

14:25

Noch ien kear de opset

Yn de heale finale rydt Nederlân tsjin Italië (manlju) en Japan (froulju). De winner fan dy heale finale giet nei de A-finale en striidt letter fannemiddei om it goud.

Mocht it Nederlânske trio de heale finale ferlieze, dan is it feroardiele ta de B-finale. De winner fan dy finale wint in brûnzen medalje, de ferliezer wurdt fjirde.

14:11

Sechsde kear op de Spelen

De ploege-efterfolging stiet foar de sechsde kear yn de skiednis fan de Olympyske Spelen op it programma.

De Nederlânske manlju wûnen yn 2014 goud, dat wie ek de iennige kear. Wol waard der ek noch trije kear brûns pakt, wêrûnder yn 2006. Doe ried Rintje Ritsma, no de bûnscoach, sels noch mei.

De oranjefroulju ha ek ien kear olympysk kampioen west, dat wie lykas de manlju yn 2014. Yn 2018 waard Nederlân twadde en yn 2022 wûnen 'we' brûns.

13:51

Wedkantoaren foarsizze goud foar froulju, brûns foar manlju

As we nei de foarsizzings sjogge fan de (ynternasjonale) wedkantoaren, dan komme de Nederlânske froulju der goed út. Sy binne de topfavoryt foar it goud, neffens de gokwebsides.

Kanada is neffens dy websides de grutste konkurrint fan Joy Beune, Antoinette Rijpma-de Jong en Marijke Groenewoud.

By de manlju is it oars: Stijn van de Bunt, Jorrit Bergsma en Chris Huizinga pakke it brûns, sa foarsizze de wedkantoaren. Amearika is de favoryt foar it goud by de manlju, foar Italië.

13:29

Ald-bûnscoach Kuiper sjocht Ritsma 'eltse dei âlder wurden'

Bûnscoach Geert Kuiper (links) yn 2018 op de Olympyske Spelen mei Arie Koops

Op de Olympyske Spelen fan 2018 wie Geert Kuiper bûnscoach fan Nederlân. De manlju waarden doe tredde op de ploege-efterfolging, de froulju pakten sulver.

De Fryske reedrydcoach rûn doe tsjin deselde útdagings oan as Rintje Ritsma no. "It probleem is dat we gjin team meitsje kinne. Der komt safolle diskusje efter wei."

"Dat is sa ferskriklik ferfelend foar bûnscoaches. Sjochst Rintje eltse dei wat âlder wurden. As analist tocht er: 'it is net sa muoilik'. Mar it blykt wol sa te wêzen", seit Kuiper.

Foarsizzing

De Wolvegeaster is benijd hoe't it de Nederlânske manlju fergean sil, no't Jorrit Bergsma rydt yn stee fan Marcel Bosker.

"Ik tink dat Jorrit yn foarm is. Mar hy hat sa'n rare slach, hy hellet dy fuotten hiel wiid fan efter wei. Silst der mar efter ride en datst dat net wend bist. Ik bin wol benijd hoe't Chris Huizinga dêrmei omgiet."

By de froulju is Kuiper hoopfol. "Japan en Kanada binne drege tsjinstanners mei in soad ûnderfining. Mar as it goed rint, wint Nederlân goud."

12:55

De dei fan de wierheid foar Rintje Ritsma

Yn 2022 waard Rintje Ritsma oansteld as bûnscoach troch reedrydbûn KNSB.

Oan de Lemster de taak om lieding te jaan 'aan het proces dat in 2026 moet leiden naar olympisch succes op de ploegachtervolging en mass start', sa as de KNSB doe skreaun.

Sa as dat giet yn in reedrydlân as Nederlân, leit de bûnscoach ûnder in flink fergrutglês. Ritsma krige yn elts gefal foarinoar dat de kommersjele ploegen de teamûnderdielen serieuzer namen.

De fraach is oft dat liedt ta dat wat de KNSB yn 2022 skreaun: olympysk sukses op de ploege-efterfolging en de massastart. Nei hjoed witte we al in hiele hoop mear.

12:26

Oftelle rjochting de ploege-efterfolging mei de fraach fan hjoed

Olympyske poll

Op hokker plak einigje de Nederlânske manlju yn de ploege-efterfolging?

Goud

10

Sulver

11

Brûns

39

Net op it poadium

39

11:56

Is it matsje moade yn Milaan?

Dat Jorrit Bergsma wer yn aksje komt fannemiddei, betsjut dat we syn matsje ek wer dûnsjen sjogge oer it iis.

Us manlju yn Milaan, Willem Vermeltfoort en Wander Wartena, giene yn moadehaadstêd Milaan op ûndersyk út oft it matsje ek wat wêze soe foar de Italianen.

11:15

De 1.500 meter is net allinnich in 'bonus' foar Femke Kok

Femke Kok sjocht kânsen op de olympyske 1.500 meter dy't se freed ride sil yn it Milano Speed Skating Stadium.

Nei de winst op de 500 meter hie Kok in strieminne nacht, mar rjochte se har blik al frij gau op it keninginnenûmer fan de Olympyske Spelen.

"Ik ha der echt fan genoaten, mar de knop giet ek wer om", seit se yn petear mei de NOS. "Ik wol dy 1.500 meter goed ride, dus dêr moat ik my op tariede."

Mei har foarm op de 500 en 1.000 meter sit it wol goed en dus is it net gek om te tinken dat der ek kânsen lizze op de 1.500 meter.

"It kin fansels twa kanten op falle", seit se. "Mar ik ha der twa riden dit seizoen, beide wiene hiel goed."

Mei twa medaljes binne de Olympyske Spelen al slagge foar de frou út Nij Beets, mar de 1.500 meter is mear dan in bonus. "Minsken tinke dat ik der hiel maklik oer tink, mar as ik oan de start stean wol ik gewoan winne."

10:50

Rijpma-de Jong en Groenewoud binne oaljede masine mei Beune

It Nederlânske trio dat fannemiddei op jacht giet nei de olympyske titel kin mei rjocht in oaljede masine neamd wurde.

Joy Beune, Antoinette Rijpma-de Jong en Marijke Groenewoud wûnen foarich seizoen alle wedstriden, ynklusyf de ploege-efterfolging op it wrâldkampioenskip. Dit seizoen ried it trio ien wrâldbeker; ek dy waard wûn.

Foar Rijpma-de Jong is de ploege-efterfolging har earste ôfstân fan dizze Olympyske Spelen. Freed rydt se ek noch de 1.500 meter.

De Spelen binne foar Groenewoud noch net sa rûn as hope. Se foel tsjin op de 3.000 (achtste) en 5.000 (sânde) meter.

Mar mei de ploege-efterfolging én de massastart hat se noch foldwaande kâns op it heljen fan earemetaal.

10:06

Earste ploege-efterfolging foar Bergsma dit seizoen

Jorrit Bergsma rydt hjoed syn earste ploege-efterfolging fan it seizoen. Tegearre mei Stijn van de Bunt en Chris Huizinga stiet Bergsma foar de grutte opjefte om Italië yn de heale finale te ferslaan.

Italië wûn de kwartfinales mei oermacht en wie hast trijenheale sekonde flugger as it Nederlânske trio, dat doe noch ried mei Marcel Bosker yn it plak fan Bergsma.

De winner fan olympysk brûns op de 10 kilometer sil yn twadde posysje ride, efter Van de Bunt en foar Huizinga. De lêste kear dat Bergsma op dit ûnderdiel ried, is hast in jier lyn by de sechde wrâldbeker fan foarich seizoen.

09:41

It programma fan hjoed

De manlju en de froulju ride fannemiddei earst in heale finale. De manlju tsjin Italië en de froulju tsjin Japan. De winner fan de heale finale pleatst him foar de A-finale om it goud. De ferliezer rydt yn de B-finale om it brûns.

09:01

Buongiorno!

Antoinette Rijpma-de Jong (midden) en Marijke Groenewoud (rjochts) mei Joy Beune op de ploege-efterfolging

Ciao tutti! Op de alfde dei fan de Olympyske Spelen ha we wer folop aksje.

De shorttrackers ha hjoed in rêstdei. Dat jildt net foar de langebaanriders. Hjoed wurde de prizen ferdield op de ploege-efterfolging.

By de froulju binne Antoinette Rijpma-de Jong en Marijke Groenewoud sekerheidsjes. By de manlju rydt Jorrit Bergsma yn alle gefallen de heale finale, sa hat bûnscoach Rintje Ritsma witte litten.

Us manlju yn Milaan binne Willem Vermeltfoort en Wander Wartena. Sy dogge foar Omrop Fryslân elke dei ferslach fan de Spelen. Mear nijs oer de Fryske dielnimmers fynst op ús temapagina.

It bloch fan juster noch lêze? Dat kin hjir: