Boat útbaarnd yn Eastermar | Koade giel fan 01.00 oere ôf foar hiel Fryslân

Yn de Wielenpôlle yn Ljouwert is in auto folslein útbaarnd. De auto stie njonken buerthûs Kobbekooi. Der stie fan alles om de auto hinne, ûnder oare in pear winkelkarkes. Dêrom liket it derop dat de auto yn 'e brân stutsen is. De brânwacht wie fluch op it plak om it fjoer út te meitsjen.

Yn Harns is in papierkontener yn 'e brân flein. Dy stiet op it parkearterrein fan fuotbalklup Zeerobben oan de Achlumerdyk. De brânwacht hat it fjoer bestriden. De oarsaak fan de brân lit him riede.

Yn Haulerwyk is in fuotgonger ferwûne rekke by in oanriding mei in stedsbus. It is net dúdlik hoe't it slachtoffer der krekt oan ta is. It foarrút fan de bus rekke flink skansearre troch de oanriding. De bus is fuortsleept, en passazjiers binne mei in oare bus fierder ferfierd.

De plysje docht ûndersyk nei de tadracht fan it ûngelok. De Leeksterweg yn Haulerwyk hat yn beide rjochtingen ticht west foar it ferkear.

Yn Drachten binne spesjale 'waarnimmers' op 'en paad. Dy wurde troch de gemeente Smellingerlân ynhierd om tafersjoch te hâlden op de feiligens.

Dizze waarnimmers kinne ek de brânwacht oanstjoere, sa as it gefal wie oan de Leisterstrjitte. Dêr moast in fjurke útmakke wurde, yn ferbân mei brângefaar troch de hurde wyn.

De brânwacht en de plysje fan Súdeast-Fryslân binne nei in melding fan in bûtenbrân nei Jobbegea ta riden. Yntusken is it fjoer wer útmakke, lit de plysje witte.

De helptsjinsten yn Drachten hawwe amper tiid om syk te heljen: it is de iene ôffalbrân nei de oare dy't opdûkt. De brânwacht, plysje en hanthavening ride fan plak nei plak.

Niiskrekt wie it raak op in fjildsje by it Ald Ambacht en de Brouwerssingel. De gemeente hat it ôffal fuort wer opromme.

Yn de Wâlden wurdt noch wolris wat slachtoffer fan pyromanen mei Ald en Nij. Dizze caravan oan de Foarwei yn Kollumersweach moast it ek ûntjilde. De caravan stie fol mei hout. De brânwacht fan De Westereen hat it fjoer útmakke.

It pleatslik belang fan Kollumersweach hat earder op de dei de ynwenners noch frege om gjin freugdefjurren oan te stekken. Mei de wyn kinne der baarnende stikjes op huzen telâne komme en sa kin der brân ûntstean.

"Dat wolle we mei man en macht foarkomme", skreau it doarpsbelang, dat freget om de helptsjinsten yn te skeakeljen by fjoer.

De brânwacht fan Surhústerfean is útriden nei De Harkema. Dêr wie ôffal yn 'e brân stutsen op in gersfjild yn de Boekweitstrjitte. It fjoer is útmakke en de plysje hat de saak fierder ôfhannele.

In eintsje fierderop, oan de Simke Kloostermanstrjitte yn Twizel, waard in bankstel slachtoffer fan fjoer. De brânwacht fan Bûtenpost is wol op it plak kaam, mar fan de bank wie al net folle mear te rêden.

Op de krusing tusken de Planetenlaan en de Anne Vondelingweg yn Ljouwert binne twa auto's mei-inoar yn botsing kaam.

Der kaam in ambulânse op it plak, mar der rekken gjin ynsitters ferwûne. De plysje hat it ûngelok fierder ôfhannele en it ferkear om de auto's hinne laat.

Yn Drachten moast de brânwacht ek al foar in twadde kear nei itselde plak. Om 13.00 oere wie der al in bûtenbrân oan it Schuttersveld, dat doe gau útmakke waard. De gemeente romme dêrnei de brânbult op.

Seis oeren letter wie it lykwols alwer raak. Diskear wie it de hanthavening dy't de brânwacht alarmearre. Der stie wer in brânbult en de fonken dy fleagen yn de rjochting fan in flat. De brânwacht hat it fjoer dêrom wer útmakke.

De brânwacht fan It Hearrenfean is hjoed al twa kear útriden nei de Heremaweg om't der in beam yn 'e brân stie.

Dat barde krekt foar 16.00 foar de earste kear, mar om 18.30 mochten de brânwachtlju nochris op 'en paad.

In omwenner seach flammen út de beamstobbe kommen. De brânwacht hat úteinlik in heechwurker en in spesjale wetterbak brûkt om it fjoer út te krijen. Fierder is de beam bysnoeid mei in kettingseage.

Yn Bûtenpost wie koarte tiid yn skoarstienbrân yn in wenbuorkerij oan de Reahelsterwei. Foarbygongers murken op dat der fonken út de skoarstien wei kamen.

De brânwachten fan Bûtenpost en Drachten waarden oan de ein fan de middei oproppen. Sy binne fuort begûn mei it fuortheljen fan houtresten út de kachel.

Der kaam ek in heechwurker út Drachten wei om it reekkanaal te ynspektearjen. Fierder waard it reidtek wiet holden. Troch de flugge ynset koe slimmer foarkaam wurde.

De brânwacht fan Drachten moast ek yn aksje komme, foar in melding fan in bûtenbrân oan de Stelpswyk. It die bliken dat der fjoer oanstutsen wie op in stoepe tusken de dyk en in fjildsje. De brânwacht hat it fjoer útmakke.

De plysje hat oan de Brouwersingel yn Drachten yllegaal fjoerwurk yn beslach naam. Der binne gjin minsken oanholden. Wol hat de dyk tydlik efkes ticht west. De hanthavening hat stipe by de aksje.

Boargemaster Johannes Kramer fan Noardeaast-Fryslân hâldt it hert fêst foar de jierwiksel. Syn gemeente krige al te krijen mei brannen yn Blije, in gearkloftferbod yn Ferwert en parate ME yn Eanjum. En dan moat de jierwiksel noch komme.

"Ik bin altyd bliid as it wer foarby is. Sa is it al", moat Kramer tajaan. "Ik fyn der net folle oan."

De gemeente besiket oan de iene kant wat romte te jaan oan it út 'e bân springen, mar oan de oare kant ek oan de feiligens te tinken. "Dêr dogge wy gjin konsesjes oan", seit Kramer.

"Dy pear brantsjes kin fansels net, mar dêr sit net folle kwea yn. Wy hâlde it yn de gaten en op it momint as it wat gefaarliker wurdt, trede we op. Dat hawwe we ek yn Wierum en Blije dien."

Op De Jouwer waard de brânwacht ynskeakele fanwegen in kontener. Dy stie yn 'e brân efter de Haskerfjildskoalle oan de E.A. Borgerstrjitte.

De oarsaak wie foar de brânwacht wol dúdlik: fjoerwurk. De brânwachtlju hawwe it fjoer útmakke en binne retoer kazerne riden.

De brânwacht fan It Hearrenfean is op fersyk fan de hanthavening útriden nei Sint Jânsgea. Dêr hie in ploech jongerein oan de Kerkhoflaan in tonne mei autobannen yn 'e brân stutsen.

De jongelju hawwe de biezem derby krigen en wiene net te beroerd om noch efkes foar de foto te posearjen.

By in groep jongeren is yllegaal fjoerwurk oantroffen. Dat fûn de plysje nei't der meldingen fan oerlêst fan de groep binnenkaam wienen.

De plysje kaam mei fjouwer ienheden te plak en fûn by twa fan de jongeren yllegaal fjoerwurk. Dat is yn beslach naam, de jongeren moatte harren letter ferantwurdzje by de plysje.

De nijjiersdûk op Flylân set troch, nettsjinsteande de warskôging fan de rêdingsbrigade om net de see yn te gean. Dat makket de organisaasje bekend op Facebook.

"De windrichting is gelukkig gunstig, maar het wordt wel een uitdaging. Dit is een duik voor échte bikkels!"

Under mear de dûken op It Amelân, Skiermûntseach, Skylge en Hylpen binne al wol ôfsein.

De Rêdingsbrigade warskôget dielnimmers fan nijjiersdûken om net de see yn te gean. De bekendste nijjiersdûk yn Scheveningen is al ôfsein en ek yn de provinsjes Noord- en Zuid-Holland binne hast alle dûken yn see annulearre.

Troch it waar kinne der yn see weagen en streaming ûntstien. "Als je tot je knieën in het water staat en je wordt door een golf omgeduwd kom je misschien boven in een dieper deel en kun je niet meer naar de kant komen."

Yn Fryslân steane noch wol in oantal nijjiersdûken oan de kust pland. Guon organisaasjes, sa as op Flylân, beriede har noch op oft it evenemint trochgiet of net.

De ME is juster te plak kaam by in brân yn Eanjum. Der stie om 02.00 oere hinne rotsoai yn de brân oan de Mûnebuorren.

De plysje kaam mei meardere auto's te plak en ek de ME wie oanwêzich. Dy hoegden lykwols net ynset te wurden. De brânwacht koe de brân rêstich blusse.

Troch de ferwachte hurde wyn yn it Waadgebiet skrast rederij Doeksen op nijjiersdei in tal ôffearten.

De tsjinst fan Skylge nei Harns fan 17.35 oere en dy fan Harns nei Skylge fan 19.55 ferfalle.

Fierder wurdt de tsjinst nei Harns fan 12.30 oere ferpleatst nei 14.00 oere. En dy nei it eilân fan 15.05 giet ek letter: om 16.45 oere.

Minsken dy't boekt ha wurde op de hichte brocht.

It KNMI hat foar it Waadgebiet koade giel ôfjûn fanwegen hurde wyn.

Fan hjoed 23.00 oere oant en mei moarn 15.00 oere kinne der wynstjitten foarkomme fan tusken de 75 en 90 kilometer yn de oere.

Yn de rest fan Fryslân jildt noch koade grien, dat feroaret moarn fan 10.00 oere ôf yn giel. It KNMI warskôget oant 18.00 oere ek op it fêstelân foar hurde wyn.

Gjin spektakelstik moarn om 00.00 oere yn Burum. Fanwegen de hurde wyn hat de gemeente Noardeast-Fryslân besletten de fjoerwurkshow yn Burum te ferpleatsen.

De show sil op 1 of op 3 jannewaris om 20.00 oere hâlden wurde. De gemeente praat tiisdei fierder oer de waarsferwachting.

Mei de jierwiksel is der kâns op hurde wynstjitten, mooglik liedt it op nijjiersdei sels ta stoarm, meldt Weeronline.

Gemeente Waadhoeke kundige earder al oan dat yn dy gemeente gjin freugdefjurren en nijjiersdûken organisearre wurde kinne fanwegen de wyn.

Yn Noardeast-Fryslân steane de freugdefjurren yn Blije, Reitsum en Hantum noch wol op de planning. It fjoer moat úterlik op tiisdei om 13.30 oanstutsen wurde.

Ek yn Blije waard stookt op strjitte. Dêr stie in steapel mei autobannen yn de brân.

Under tafersjoch fan de plysje koe it fjoer blust wurde.

De brânwacht moast justerjûn yn aksje komme yn Wierum. Op de Dykstrjitte waard yn grutte metalen tonnen fjoer makke, mar nei alle gedachten waarden de brantsjes te grut.

De gemeente Noardeast-Fryslân hat in diel fan it hout ôffierd.

Wolkom yn it 112-livebloch fan hjoed. Hjir fynst in oersjoch fan ûnder oare ûngelokken, brannen en ferkearsynformaasje yn ús provinsje.

It 112-nijs fan juster kinst hjirûnder weromlêze.