'AVROTROS die foar diskwalifikaasje melding fan ûnfeilige sfear'

De organisaasje fan it Songfestival reagearret yn meardere bûtenlânske kranten op de rebûlje fan dit jier. Yn The Mirror en de Irish Independent seit de EBU it spitich te finen dat guon delegaasjes har net oan de regels holden ha.

Yn in statement hat de EBU it ûnder oare oer subtile ferwizingen nei de situaasje yn Gaza. Dêr binne meardere delegaasjes wilens it festival op oansprutsen.

De EBU sil it evenemint no evaluearje. "De bestjoersorganen fan de EBU sille mei de delegaasjes de foarfallen beoardiele, om foarútgong te boeken en derfoar te soargjen dat de wearden fan it evenemint respektearre wurde."

Earder melde de EBU al dat it beslút om Joost Klein út te sluten unanym stipe waard troch de lieding fan de EBU, nei in yngreven yntern ûndersyk. Neffens de EBU komme ferhalen dy't rûn geane oer it barren mei Joost Klein net oerien mei ferklearringen dy't ôfjûn binne by de Sweedske plysje.

Omdat it no in juridyske saak is, wol de EBU fierders neat kwyt.

Nei in rûzich wykein leit de songfestival-stoarm him wat del. Joost Klein fan Britsum waard diskwalifisearre troch in ynsidint mei in kamerafrou achter de skermen. Yntusken is Klein werom yn Nederlân.

Op it stedhûs fan Ljouwert wurdt tiisdei om 12.00 oere 'Europapa' spile troch de kariljonspiler. Ljouwert slút him dêrmei oan by in aksje fan radiostjoerder 3FM. Al wis op 13 plakken is it ferske tiisdei te hearren.

De blêdmuzyk wurdt troch de stjoerder beskikber steld. Mei de aksje stipet de moarnsshow Joost Klein. Syn nûmer is op 'e nij útroppen ta 'megahit' en ek ynternetfenomeen Orgel Joke sil 'Europapa' spylje.

De Sweedske plysje ferwachtet de saak om it ynsidint mei Joost Klein hinne begjin juny oerdrage te kinnen oan de offisier fan justysje. Dat meldt de Sweedske Aftonbladet.

De saak wurdt flugger behannele, want gewoanwei duorret de proseduere langer. Neffens it haad fan de ôfdieling spoare-ûndersyk kin it om't der genôch bewiismateriaal is en om't it net om in slim misdriuw giet. It betsjut net dat der in beslissing naam it oer it oanklagen fan Klein as fertochte, dat is oan de offisier.

In oare kompanjon fan Joost Klein, Stuntje of Stuntkabouter, fynt it "unfair" dat de EBU Joost diskwalifisearre hat. Yn in filmke op Instagram lit er witte dat er bot teloarsteld is dat se net optrede mochten yn de finale.

Stuntje stie tongersdei yn de twadde heale finale tegearre mei Joost en Appie Mussa op it poadium, achter it keyboard.

Joost Klein hat sels noch hieltyd net reagearre. Hy is sûnt sneintejûn wer werom yn Nederlân.

Joost Klein is wer werom yn Nederlân. Ferslachjouwers fan RTL Boulevard soenen him sjoen hawwe op Lelystad Airport.

Hy soe jûn om 18.10 oere fan Roskilde Airport, by Kopenhagen, mei in privee-fleantúch nei Nederlân flein wêze, seit RTL Boulevard. Om 19.25 oere hinne kaam Joost oan. Hy waard dêr fuort fierder ferfierd yn in blyndearre auto.

De rest fan Nederlânske delegaasje kaam earder hjoed al oan yn Nederlân. Mei Joost reizgen in befeiliger en syn manager Rick mei.

Joost Klein hat de kamera fan de fotografe stikken makke. Dat meldt de Sweedske krante Aftonbladet op basis fan in tsjûge.

Neffens ferskate tsjûgen soe Klein him 'tige agressyf' gedroegen hawwe, skriuwt de krante. De frou soe bot oandien wêze troch it ynsidint en help krije by de ferwurking.

De AVROTROS melde juster dat Klein de frou sels net oanrekke hat. De EBU sei dêrop dat it ferhaal fan de frou hiel oars wie as dat fan de AVROTROS. Hoe't har ferhaal dan krekt wie, woe de EBU net sizze.

Yn in filmke dat online in protte dield wurdt, hellet Appie Mussa hurd út nei de organisaasje fan it Songfestival. Mussa stie by Joost Klein op it poadium as blauwe fûgel.

Hy lit it oerkomme as hat Joost Klein neat dien: 'basically nothing', seit er, yn in sketch. Mussa makket faker sketches foar tiktok of instagram.

Joost Klein sels hat noch net reagearre op de situaasje. It iennige dat er de ôfrûne dagen online set hat, is in grappich filmke fan hûntsjes en in blau hartsje.

It tal minsken dat him folget op instagram groeit noch wol hieltyd. Foardat dúdlik waard dat er net mear meidwaan mocht, hie er 675 tûzen folgers. Dat binne der no 1,2 miljoen.

It liet Europapa fan Joost Klein is yn ferskate lannen it meast ôfspile nûmer op Spotify. Yn Nederlân, België en Letlân fiert it de list oan fan meast beharke nûmers fan dit momint.

Yn Nederlân stiet it liet op plak 1 mei goed 740.000 streams, yn België mei goed 186.000 streams en yn Letlân mei goed 18.000 streams.

It nûmer komt yn in soad oare Europeeske lannen net op plak 1, mar is bygelyks wol omheech gien yn de Spotify-list yn Sweden (no op plak 6) en yn Poalen (no op plak 15).

Op in protte oare Europeeske listen stiet it liet ek yn de top 50 fan bêst beharke nûmers, lykas yn Switserlân (plak 17), Noarwegen (plak 18), Dútslân (plak 25), Grikelân (plak 27), Ierlân (plak 43) en Denemarken (plak 46).

As Joost Klein op it lêste momint wol meidien hie oan de finale fan it Eurovisie Songfestival, hie er net wûn. Dat blykt út in analyze fan Omrop Fryslân.

It giet 'best wel okee' mei Joost Klein. Dat seit Twan van de Nieuwenhuijzenfan AVROTROS tsjin RTL Boulevard.

Klein is yn de nacht fan sneon op snein nei in afterparty fan de EuroClub gien, befêstiget Van de Nieuwenhuijzen nei berjochten op sosjale media. "Joost is een knappe en sterke persoonlijkheid. Zo staat hij daarin en zo gaat hij ermee om."

Sa 'n 2,1 miljoen minsken ha yn Nederlân de finale fan it Eurovisie Songfestival sjoen. Dat meldt sjochsiferanalist Tina Nijkamp. Joost Klein hie him pleatst foar de finale, mar waard diskwalifisearre om in ynsidint mei in kamerafrou.

As Klein wol meidien hie, soene minimaal 4 miljoen sjoggers ynskeakele hawwe, skat Nijkamp. De heale finale mei Klein skoarde tongersdei mear sjoggers as de finale: hast 3 miljoen minsken.

Meastentiids leit it tal sjoggers in stik heger. Sûnt 2016 lûkt de finale hast altyd mear as 4 miljoen sjoggers. It rekôr wie yn 2021. Doe stimden goed 5,5 miljoen minsken ôf op de finaleajûn yn Rotterdam.

De minst besjoene finale fan de ôfrûne 10 jier luts 1,8 miljoen sjoggers. Dat wie ferline jier, doe 't Mia en Dion út namme fan Nederlân meidiene. Sy hellen de finale net.

Joost Klein giet hjoed net mei de rest fan de Nederlânske delegaasje werom nei Nederlân, dat makke omrop AVROTROS niiskrekt bekend. Dat betsjut ek dat der gjin parsemomint yn Malmö of Schiphol komt.

De artyst sels hat noch net reagearre, mar hy hat wol wer in nij teken fan libben jûn op Instagram. Op de side Eurovision 24 pleatste hy in blau hertsje. Dêrfoar wie syn lêste berjocht yn dy groep in post oer hoe't je op him stimme koene mei it Songfestival.

De Sweedske plysje wol net yngean op de fraach oft sy kamerabylden krigen hawwe fan it ynsidint dêr't Joost Klein by belutsen wie. Dy fraach makket diel út fan it ûndersyk, seit in wurdfierder.

Wol is dúdlik dat de plysje it ûndersyk ynhâldlik ôfrûne hat en dat it op koarte termyn oerdroegen wurdt oan it Iepenbier Ministearje. Dêr moat besletten wurde oft der fierder aksje ûndernaam wurdt tsjin Klein.

Dat kin noch wol wiken duorje, sizze plysje en IM. Joost Klein mei yntusken Sweden wol gewoan ferlitte. Hy sil dêryn net behindere wurde, seit de plysje. It is net dúdlik oft Klein noch yn Sweden is of net.

De diskwalifikaasje fan Joost Klein makket hiel wat los: net allinne yn Fryslân, mar ek by bekend Nederlân. Tal fan BN'ers binne poer op de gong fan saken en solidêr mei Joost.

Yn de twadde heale finale krige Joost Klein mear punten fan it publyk as de letter winner Switserlân. Dat blykt út sifers dy't de organisaasje frijjûn hat. Allinne Israël krige yn dizze heale finale mear punten as Nederlân.

In inisjatyf om 'Europapa' yn de Top 2000 te krijen, is massaal omearme troch harkers fan NPO Radio 2. Yn de útstjoering fan dj Jasper de Vries besocht de stjoerder it fertriet oer de diskwalifikaasje fan Joost Klein in plakje te jaan.

"Ik voel een top 10-positie aankomen", seit De Vries. "Er zijn veel mensen die op dat spoor zitten."

Guon harkers trunen der op oan dat hy in healoere lang non-stop it nûmer fan Klein draaie soe op de radio. Dat die fertuten, want it ferske wie leafst njoggen kear efterinoar te hearren op de stjoerder.

"Als dit mijn laatste avond was, dan was dit mijn laatste avond - ik vind het een briljant idee", sei de dj.

Hoewol't likegoed Joost sels as de takenning fan de Nederlânske punten net yn Ljouwert wiene, sjocht de organisaasje fan de Europaparty werom op in slagge feest.

It hichtepunt fan de jûn hie de komst fan Nikkie de Jager wêze moatten, sy soe om 00.20 oere hinne op it dak fan kultureel sintrum Obe de punten fan Nederlân beken meitsje.

Mar eintsjebeslút luts De Jager har werom. Boargemaster Sybrand Buma sei begryp te hawwen foat it beslút, al fûn er it wol spitich.

De presintaasje fan de Europaparty lei yn hannen fan Sylvana IJsselmuiden, Curvalicious Diamond en Ritse de Jong. Foar IJsselmuiden wie it yn alle gefallen in moaie ûnderfining. "Ziek", pleatste sy op sosjale media, mei in filmke fan it publyk, fan it poadium ôf sjoen.

Joost Klein sels hat krekt foar middernacht foar it earst wat fan him hearre litten. Hy pleatste in filmke fan 12 sekonden op Instagram.

Op it filmke is in achttal hûnen te sjen dat gek foarút trippelet op it ferske 'Who Let the Dogs Out' fan Baha Men. Wat hy der krekt mei bedoelt, is like riedseleftich as altyd.

Sneon ferklearre AVROTROS-direkteur Taco Simmerman wol dat Klein "ontzaglijk verdrietig" wêze soe. "Die zit in zak en as", sei hy.

Kommissaris fan de Kening Arno Brok - sels in grut leafhawwer fan it Songfestival - wol Joost Klein takom jier wer nei it Eurovisie Songfestival.

"As bliken docht dat er ûnterjochte diskwalifisearre is, dan hoopje ik dat er sels de krêft en de ambysje hat om takom jier wer foar Nederlân mei te dwaan", sa pleite de kommissaris op de radio.

"Der is in hiel soad fertriet yn Fryslân", ferklearre Brok. "Der is echt in soad teloarstelling en fertriet. It is fansels net hielendal dúdlik wat der bard is. Mar it is ien grutte teloarstelling. Der wie moannen nei dit momint útsjoen. En Klein wurdt tige droegen yn Fryslân, benammen ûnder jongelju."

De kommissaris neamt it fierder "enoarm teloarstellend" dat net ien de kwestje wer ta proporsjes werombringe koe.

Brok makket him soargen oer Joost Klein. "Ik freegje my op dit stuit ôf hoe't it mei him sels is. En mei de minsken om him hinne dy't hjir ek in soad fertriet fan ûnderfine."

Kommentator Cornald Maas sleat de dei ôf mei it biedwurd fan de diskwalifisearre finalist: "Joost Klein Droom Groot!" "En lang leve Nemo", heakke hy dêr oan ta. Dat is de Switserske artyst dy't mei it ferske The Code wûn.

Hy sei earder dat eltsenien "totally in shock" wie doe't bliken die dat de organisaasje trochsette soe mei de diskwalifikaasje fan Joost Klein.

Maas en Jacqueline Govaert hawwe der nei eigen sizzen lang oer praat oft se no wol of net it kommentaar fersoargje woene. Uteinlik joegen se oan harren bêst te dwaan om "goed gemutst" te bliuwen. "Ook omdat we trouwens vinden dat recht moet worden gedaan aan al die andere artiesten met hun verhalen."

Hy hie it fierder oer "een shitzooi" en sei "tamelijk woedend" te wêzen. "Ik zou bijna zeggen, fuck de EBU. Maar dat zeg ik nu ook." Maas hie foar de gelegenheid in Europapa-strik om.

Boargemaster Sybrand Buma fan Ljouwert sjocht teloarsteld, mar ek mei tefredenens werom op sneon. "Niets loopt zoals verwacht, maar toch maken de Friezen er weer een bijzondere avond van", pleatste hy op sosjale media.

Ljouwert organisearre de Europaparty. Op it drokste momint wiene der sa'n 5.500 besikers op it Aldehoustertsjerkhôf oanwêzich.

Nei in rûzige nacht noch ien kear in liveblog, dêr'tsto it lêste nijs oer Joost Klein en it Eurovisie Songfestival yn Sweden folgje kinst.

It nijs fan juster kinst op dit plak weromlêze.