Coronanijs 13 desimber: Ferlinging jûnslockdown | Mooglik earder krystfakânsje

Yn Fryslân binne yn de ôfrûne 24 oeren 648 nije coronabesmettingen registrearre. Dat meldt it RIVM. It binne der 40 minder as snein. Doe waarden 688 besmettingen meld.

Yn trochsneed binne yn de ôfrûne wike alle dagen 722 besmettingen meld yn Fryslân. Snein lei dat trochsneed op 762 besmettingen, in wike lyn op 826.

Lanlik leit it tal nije coronabesmettingen op 13.844. It is it leechste tal sûnt 14 novimber.

It trochsneed tal besmettingen fan de ôfrûne sân dagen is 17.376.

It tal coronapasjinten yn de Nederlânske sikehûzen is yn de ôfrûne 24 oeren wer wat ôfnaam. Foar de fjirde dei op rige wiene it der minder as 2800, docht bliken út sifers fan it Landelijk Coördinatiecentrum Patiënten Spreiding.

Op it stuit soe it gean om 2748 coronapasjinten; dat binne 14 minder as snein. Op de ic's lizze 630 coronapasjinten: 12 minder as in dei lyn.

Op de ferpleechôfdielingen lizze no 2118 pasjinten mei Covid; twa minder as snein.

De ôfrûne 24 oeren binne 29 nije pasjinten mei it firus opnaam op de ic's. Op de ferpleechôfdielingen giet it om 183 nije coronapasjinten. It is de leechste ynstream fan de ôfrûne moanne. It LCPS sei ferline wike dat de ynstream fan pasjinten mei corona oer it hichtepunt hinne wie.

It tempo fan de boosterprikkampanje giet fierder omheech. Dat seit demisjonêr minister De Jonge fan folkssûnens. It moat de flugge fersprieding fan de omikronfariant tsjingean.

"Wat we leren uit Engeland is dat het zich snel verspreidt", seit De Jonge, dy't tiisdei mear fertelle sil. "Wat we ook leren uit Engeland is dat het versnellen van het boosteren wel helpt."

IC-baas Peter van der Voort, dy't fan Boksum komt, seit tsjin RTV Noord dat ferrommingen fan de maatregels der net komme moatte. "Of het strikter moet, is een reëlere vraag."

It tal pasjinten dat binnen komt op de ic wurdt minder, mar it tal pasjinten mei Covid op de ic's nimt noch hieltyd ta, seit Van der Voort. Op de intensive care yn it UMCG wurde op it stuit 17 fan de 18 coronabêden brûkt.

Van der Voort is it dan ek net iens mei LCPS-foarsitter Ernst Kuipers, dy ferline wike sei dat de ynstream fan nije pasjinten oer de pyk hinne is. "We zijn helemaal niet over de piek heen. Moet je je voorstellen hoe dit aankomt bij verpleegkundigen en artsen die zich een slag in de rondte werken en het nauwelijks voor elkaar krijgen?"

De coronastipepakketten binne net genôch om de holle boppe wetter te hâlden. Dat skriuwt de Ljouwerter ôfdieling fan Koninklijke Horeca Nederland oan boargemaster Buma fan Ljouwert.

Yn de brief stiet dat de NOW, de Noodmaatregel Overbrugging Werkgelegenheid, net genôch is. Boppedat is de TVL, de Tegemoetkoming Vaste Lasten, basearre op oktober, doe't de omset ek al leger wie.

Op it stuit ha de hoarekasaken ek net in soad omset. Oant 17.00 komme der net in soad klanten en ek it ôfheljen en it besoargjen smyt minder op, sa skriuwt KHN.

Eijer is ek benaud dat in protte meiwurkers earne oars wurkje wolle. "Voor het flexibele personeel zijn er te weinig uren beschikbaar", skriuwt de KHN. "In de decembermaand extra vervelend, want zij hebben geld nodig voor de feestdagen en kiezen dus massaal voor ander werk."

Der lizze no 99 pasjinten mei Covid-19 yn de Fryske sikehûzen. Dêrfan lizze der 21 op de ic's.

Fan de minsken dy't mei Covid-19 opnaam binne, komme 18 pasjinten út in oare regio. Dat binne der seis mear as ôfrûne freed. Op de ic's lizze op it stuit fiif minsken út in oare regio.

It ministearje fan Underwiis lit witte dat sawat alle skoallen yn it basisûnderwiis selstesten krigen ha foar har learlingen. Bern yn groep 6, 7 en 8 moatte har twa kear yn de wike teste op Covid-19. Dat jildt ek foar it personiel.

Mei de ferdieling fan de testen oer de skoallen waard ferline wike úteinset. Tongersdei die út in rûngong fan Omrop Fryslân lykwols bliken dat in grut part fan de Fryske basisskoallen de selstesten noch net krigen hie.

No moandei wurde noch selstesten brocht nei de skoallen dy't ferline wike mist binne, seit it ministearje.

Tongersdei en freed kinne minsken boppe de 60 in boosterprik helje yn De Klink yn Koudum. De prik wurdt jûn oan minsken dy't in brief krigen ha fan de húsdokterspraktyk yn Koudum en Wikel. De húsdokters sille sels de prik jaan, mei assistinsje fan de GGD. Ek op 3 jannewaris kinne minsken nei De Klink komme foar in prik.

Ynwenners út Súdwest-Fryslân dy't net by de húsdokterpraktyk sitte, kinne maile nei boosterkoudum@gmail.com, om te sjen oft der noch in plakje foar se is. Mei dit e-mailadres kinne minsken har ek ôfmelde.

"We hienen de winsk dat elkenien dy't der foar yn oanmerking komt, de boosterprik foar de krystdagen krije kin", seit húsdokter en inisjatyfnimster Lijklema fan Wikel. "We seagen dat de GGD it tige drok hat, en we tochten: we kinne ús stientsje bydrage."

Der kamen yn 2020 hiel wat minder bûtenlânske toeristen nei Nederlân. Dat makke it CBS hjoed bekend.

Yn 2020 kamen 7,3 miljoen bûtenlânske toeristen nei ús lân: 12,9 miljoen minder as yn 2019. Dat is in delgong fan 64 persint.

Benammen út België en in Feriene Keninkryk kamen minder minsken. It tal toeristen út dizze lannen gie omleech mei 75 persint (Feriene Keninkryk) en 56 persint (België).

It tal bedriuwen dat fallyt gie is yn de moanne novimber flink omheech gien. Neffens sifers fan it Centraal Bureau Statistiek binne der yn novimber, los fan it tal ienmanssaken, 166 falliseminten west oer bedriuwen en ynstellingen.

Foar de coronakrisis wiene der lykwols mear bedriuwen dy't fallyt giene. Troch de stipe fan de oerheid koene in protte bedriuwen it no rêde. Ek lieten rjochters sûne bedriuwen fanwegen de coronakrisis minder gau fallyt gean.

Yn oktober einige de leanstipe foar ûndernimmers. Neffens it CBS is it mooglik dat dit soarget foar it hege tal falliseminten yn novimber.

Bedriuwen kinne fanwegen de coronamaatregelen wer leanstipe oanfreegje foar novimber en desimber.

Demisjonêr minister Hugo de Jonge (Folkssûnens) hat dit jier de twiveleftige eare om winner te wêzen fan in Big Brother Award. Dy awards wurde elk jier útrikt troch burgerrjochte-organisaasje Bits of Freedom oan 'de grutste privacyskeiners fan Nederlân'.

De Jonge krige mei in romme mearderheid fan de stimmen de Publykspriis fanwegen de ynfiering fan it coronatagongsbewiis. Dy maatregel is neffens Bits of Freedom "onvoldoende gemotiveerd". Dat it kabinet de ynfiering fan it 2G-belied, wêrby in negative test net mear genôch is om in QR-koade te krijen, foarearst útsteld hat, jûget de organisaasje ta.

Wurkjouwers kinne fan moandei ôf in oanfraach dwaan by útkearingsynstânsje UWV foar de nijste leanstiperegeling. Mei de saneamde Noodmaatregel Overbrugging Werkgelegenheid (NOW) stipet it demisjonêre kabinet bedriuwen dy't rekke wurde troch de coronamaatregels.

Yn de sânde perioade fan de NOW is it nij dat bedriuwen dy't nei 1 febrewaris 2020 start binne yn oanmerking komme foar leanstipe. Wurkjouwers kinne de coronastipe foar de moannen novimber en desimber oant en mei 31 jannewaris oanfreegje.

It Veiligheidsberaad komt moandeitejûn digitaal byinoar om bypraat te wurden oer de coronamaatregels dy't it kabinet fan plan is te nimmen foar de kommende tiid. Demisjonêr minister Ferd Grapperhaus (Justysje) skoot oan by it oerlis fan de 25 boargemasters dy't foarsitter binne fan harren feilichheidsregio.

It kabinet liket fan doel om it advys fan it OMT oer te nimmen. Dat soe betsjutte dat de jûnslockdown ferlinge wurdt. Tiisdei is der in nije parsekonferinsje fan demisjonêr premier Mark Rutte en soarchminister Hugo de Jong oer de maatregelen.

Wolkom by it liveblog fan moandei 13 desimber oer de ûntwikkelingen oangeande it coronafirus yn Fryslân. Us liveblog fan juster neilêze kin hjir.