Tim Prins op in hûndertste nei de wrâldbekers | Darter Van der Wal pleatst foar de Lakeside

Op it kwalifikaasjetoernoai foar de wrâldbekers hawwe Jorrit Bergsma en Sil van der Veen harren by de bêste fiif riden op de tsien kilometer. De kwalifikaasje fynt dit wykein plak yn Thialf.

Mei in tiid fan 12.47,23 einige de 40-jierige Bergsma op it tredde plak. Van der Veen (21), dy't op de fiif kilometer al ferrassend in ticket foar de wrâldbekers binnen helle, waard fiifde mei 12.49,80.

Foar de tsien kilometer kwalifisearje de bêste twa riders harren fuortendaliks. De nûmers trije oant en mei fiif binne ôfhinklik fan it wrâldbekerklassemint.

De tsien kilometer wurdt dit wrâldbekerseizoen ien kear riden. Dat is yn desimber op It Hearrenfean. Dat is de tredde wedstriid fan dit seizoen fan de wrâldbekers.

Yn de earste twa wedstriden wurdt de fiif kilometer riden. Op basis fan in goeie prestaasje op dy ôfstân kinne de nûmers trije oant en mei fiif mooglik dochs nei de tsien kilometer.

De iishockeyers fan de Jumbo Flyers binne niiskrekt yn in ferlinging ûnderút gien. Op It Hearrenfean wiene de Nijmegen Devils yn powerplay krekt better: einútslach 3-4.

Mei twa doelpunten fan Kaeden Patrick kaam de thúsploech nei de earste perioade noch mei 2-1 foar. Nei de twadde perioade wie it 3-3 en yn de tredde waard net skoard.

Yn powerplay makke Martynas Grinius de winnende goal foar de gasten. Dêrmei bliuwe de Flyers yn de ûnderste helte fan de kompetysje stean.

De follybalsters fan Friso Snits ha fan 'e jûn de topper yn de earedivyzje ferlern fan Sliedrecht Sport. Yn de Sneker Sporthal kaam de thúsploech mei 2-0 yn sets foar, maar waard dochs ferlern: einstân 2-3.

De Snitser froulju wûnen de earste twa sets met 25-16 en 25-20. Doe kaam Sliedrecht werom. Nei sets fan 21-25 en 15-25 foar de gasten pakten sy ek de fyfde en lêste set mei 11-15.

It is de earste nederlaach foar Friso Snits dit seizoen yn de earedivyzje. Sliedrecht Sport ferlear noch gjin wedstriid.

Marijke Groenewoud fan Grou hat sneon yn Thialf de tredde wedstriid fan de Marathon Cup dit seizoen wûn.

Yn in massasprint rekkene se ôf mei Gioya Lancee en Kim Talsma.

Homme Jan de Groot fan Hilaard wie ek suksesfol, by de manlju. Nei in tige spannende slotfaze en in fotofinish bleau hy Friso van Vliet krekt foar.

Fjouwer Friezen kwalifisearje harren op de 500 meter foar de wrâldbekers, in searje ynternasjonale toernoaien. De kwalifikaasje dêrfan fynt dit wykein plak op It Hearrenfean.

Femke Kok fan Nij Beets wie lykas yn de earste omloop de rapste mei in tiid fan 36,97.

Amber Duizendstraal ferraste en einige mei in tiid fan 37,38 as twadde.

Suzanne Schulting (37,56) en Jildou Hoekstra (37,62) waarden fjirde en fiifde en kwalifisearren harren dêrmei ek foar de wrâldbekers. Dat jildt foar de bêste fiif riders.

Yn de earste omloop waard Anna Boersma noch diskwalifisearre nei twa falske starts, mar sy mocht yn de twadde omloop wol wer meidwaan. Ek dêr hie se gjin goeie start, en mei in tiid fan 38,66 hat se har net kwalifisearre.

De Fryske klups yn de fjirde divyzje hawwe sneon beide in punt pakt.

ONS Snits kaam yn Oldenzaal net fierder as 0-0 tsjin Quick'20.

LAC Frisia út Ljouwert spile nei in spikergekke slotfaze dochs noch mei 2-2 lyk tsjin Bon Boys. De Frisianen stienen lang op efterstân troch in doelpunt fan Thom ter Hogt, mar Boyd Dijkstra makke yn de 77e minút de lykmakker.

Doe't Pim van der Meer yn blessueretiid de 1-2 makke, like de winst dochs nei Bon Boys te gean, mar Frisia makke úteinlik dochs noch de 2-2.

Frisia hat 12 punten út njoggen wedstriden. ONS hat ien punt minder.

Mei in tiid fan 1.45,82 hat Tim Prins him op de 1.500 meter kwalifisearre foar de wrâldbekers. De kwalifikaasje dêrfoar hat dit wykein plak yn Thialf.

Mei dy tiid hat de Jouster it krekt helle: hy stiet op it fiifde plak, en de bêste fiif riders kwalifisearje harren foar de wrâldbekers.

It wurdt foar Prins de fjirde kear dat er meidocht oan de wrâldbekers.

Kjeld Nuis wie it rapst op de 1.500 meter.

Femke Kok giet op de earste 500 meter op it World Cup kwalifikaasjetoernoai oan de lieding. Op dat toernoai stride de reedriders foar in plak op de Wwâldbekers, in ynternasjonaal toernoai.

Mei in tiid fan 37,23 stiet se nei de earste 500 meter op it earste plak. De 500 meter wurdt noch in kear riden: de bêste tiid telt.

De 23-jierrige Amber Duizendstraal ferraste en sette de twadde tiid del: 37,38.

Foar Anna Boersma wie de earste 500 meter teloarstellend, sy hie twa kear in falske start en waard diskwalifisearre. De twadde 500 meter mei Boersma wol wer meidwaan.

Michelle de Jong stiet nei de earste 500 meter ek op in kwalifikaasjeplak: mei in tiid fan 37,69 stiet se op it fiifde plak. De bêste fiif riders kwalifisearje harren.

Om 17.14 oere wurdt de twadde omloop riden.

Marijke Groenewoud pleatst har op de 3.000 meter foar de World Cups. Mei in tiid fan 3.56,18 is se de rapste op it kwalifikaasjetoernoai, dat dit wykein op It Hearrenfean riden wurdt.

De 27-jierrige Grouster hellet dêrmei har twadde ticket foar de ynternasjonale wedstriden binnen. Freed siet se ek by de bêste tiden fan de 1.500 meter.

"Ik woe hiel graach in flakke rit ride", seit Groenewoud. "Dus net al te rap begjinne en dat nivo fêsthâlde foar de hiele rit. Dêr bin ik gewoanwei net goed yn en dus bin ik bliid dat it slagge is."

Opfallend genôch grypt Antoinette RIjpma-de Jong mis. Mei in tiid fan 4.01,27 waard se sechsde en hat se har dus net pleatst. De earste fiif riiders meie nei de World Cups.

De iishockeyers fan OG Capitals fan Ljouwert ha harren kompetysjewedstriid tsjin Santino Eindhoven Kemphanen wûn.

Dêrfoar hiene sy wol in overtime nedich, want nei de tredde perioade stie it 2-2. Ljouwert skoarde yn de overtime as iennichste: 3-2.

Foar de Jumbo Flyers fan It Hearrenfean wie it gjin goede jûn. De Flyers ferlearen mei 5-3 op besite by Hijs Hokij yn Den Haag.

Nei de twadde perioade stiene de Flyers noch mei 1-2 foar, mar yn de lêste perioade gie it folslein mis. Dêr't de Flyers noch ien kear skoarden, die de thúsploech dat fjouwer kear.

Ek op de 500 meter by de manlju is der in Fryske dielnimmer op de wrâldbekerwedstriden dit jier. Johan Talsma kaam op it kwalifikaasjetoernoai ta de twadde tiid (34.748).

De Hallumer ried dêrmei in persoanlik rekôr. De 500 meter waard twa kear riden en de bêste fiif tiden telle.

"Dizze rit fielt wol echt as in stunt", seit Talsma. "Ik wit wol dat ik it kin, mar dit sjen litte is wol hiel bysûnder."

Tim Prins fan de Jouwer helle gjin startbewiis binnen. Hy kaam mei 35.049 net by de top fiif.

Marijke Groenewoud en Antoinette Rijpma-de Jong ha op de 1.500 meter startbewizen binnenhelle foar de wrâldbekerwedstriden dit seizoen.

Op it kwalifikaasjetoernoai yn Thialf kaam Groenewoud mei 1:54.888 ta de twadde tiid, Rijpma-de Jong waard fjirde mei 1:55.279.

De bêste fiif kwalifisearje harren foar de wrâldbekers fan Peking (China), Obihiro (Japan), It Hearrenfean en Stavanger (Noarwegen).

Joy Beune út Borne wûn úteinlik de ôfstân.

Sil van der Veen hat him ferrassend pleatst foar de World Cups. De 21-jierrige Jouster mei de ôfstand fan 5.000 meter ride op it ynternasjonale poadium.

Hjoed is de earste dei fan it World Cup kwalifikaasjetoernoai, wêr de startplakken foar de World Cups te heljen binne. Van Der Veen ried mei in persoanlik rekôr fan 6:15.033 nei it fiifde plak.

De earste fiif op de 5.000 meter meie nei de wedstriden yn Peking (China), Obihiro (Japan), It Hearrenfean en Stavanger (Noorwegen).

Van Der Veen is de soan fan ferneamde reedrider Bert Jan van der Veen, dy't meardere titels wûn.

Ek Jorrit Bergsma mei nei de World Cups. De 40-jierrige Boarnster kaam ta de fjirde tiid (6:14.794).

Parahurdfytser Tristan Bangma hat sulver pakt op de ien kilometer op it WK yn Apeldoorn.

Tegearre mei piloat Patrick Bos kaam Bangma ta in tiid fan 1.01,682. Dat wie goed twa sekonden dreger as de Britten James Ball en Aaron Pope.

It brûns gie nei Beau Wootton en Byron Davies út Australië.

It is de twadde medalje fan de wike foar Bangma en Bos. Juster pakten se noch it goud op de fjouwer kilometer.

Moarn komme se noch yn aksje yn de sprint.

sc Hearrenfean spilet yn de twadde ronde fan de KNVB-beker thús tsjin De Treffers. Cambuur giet op besite by RKC Waalwijk. Dat hat de lotting niiskrekt bepaald.

Hearrenfean wûn fan 'e wike op besite by Excelsior Maassluis. Yn de folgjende ronde is De Treffers dus de tsjinstanner. De klup fan trainer Theo Janssen ferraste dizze wike Heracles Almelo yn de beker.

De Treffers is ien fan de bêste amateurklups fan Nederlân. De ploech út Groesbeek stiet op it twadde plak yn de twadde divyzje.

Fiif seizoenen lyn spile Hearrenfean yn de beker ek alris thús tsjin De Treffers. Doe waard it 2-0, troch goals fan Siem de Jong en Joey Veerman.

SC Cambuur spilet yn de twadde ronde út tsjin RKC Waalwijk. De Ljouwerters oerlibben yn de earste ronde in útwedstriid tsjin Kloetinge, RKC wûn nei strafskoppen fan Barendrecht.

Yn de earste divyzje stiet RKC op dit stuit alfde.

It is it tredde jier op rige dat Cambuur yn de beker in útwedstriid tsjin RKC spylje moat. De klup út Brabân wûn foarich jier mei 3-2. It jier dêrfoar waard it 4-1 foar RKC.

De wedstriden yn de twadde ronde wurde spile op 1, 2 en 3 desimber. De presize spyldagen wurde yn de kommende wiken bekendmakke.

In lytse tebeksetter foar de organisaasje en dielnimmers fan de Berenloop dy't dit wykein plakhat op Skylge. De metalen medaljes binne net op 'e tiid op it eilân. Dat hat alles te krijen mei fertraging yn it transport.

"Dat betekent dat we jullie dit weekend niet de metalen medaille kunnen uitreiken die we hadden aangekondigd", skriuwt de organisaasje op harren sosjals.

Nettsjinsteande dizze tebeksetter, krije dielnimmers dit wykein dochs in medalje by de einstreek: in houten medalje, dy't yn de ôfrûne jierren faker útrikt is.

"Bij Eilandbouw wordt dag en nacht gewerkt om ze op tijd klaar te krijgen. Ondertussen helpen vele handen mee om de linten in de Terschellinger kleuren te bevestigen."

De organisaasje lit witte dat it noch net dúdlik is oft de metalen medaljes neistjoerd wurde sille.

Trainer Robin Veldman fan sc Hearrenfean kin foar it earst dit seizoen beskikke oer in folslein fitte seleksje. De lêste twa wedstriden, tsjin Excelsior Maassluis en ADO Den Haag, wie Levi Smans der net by, mar tsjin NEC Nijmegen kin er wer meidwaan.

Dat betsjut wol dat Veldman wer keuzes meitsje moat op it middenfjild. Se hat er de kar út Ringo Meerveld, Smans, Nolhan Courtens, Marcus Linday en Dirk Proper.

"Een luxe keuze. Maar dat is alleen maar mooi", sa seit Veldman.

Mar wa spilet der dan? Meerveld of Smans? "Of beide", sa laket Veldman.

Hearrenfean stiet no sels sânde, NEC hat fjouwer punten minder en stiet tolfde. Sa kin Hearrenfean de Nijmegenaren op sân punten efterstân sette.

NEC is in oanfallend ynstelde ploech. Hearrenfean is der krekt dit seizoen mei dwaande om faker de nul te hâlden. Dat makket de wedstriid tsjin NEC ekstra ynteressant.

Ferline seizoen hold Hearrenfean fiif kear de nul. No, nei tsien wedstriden, hat Hearrenfean al fjouwer kear de nul holden. En dêr binne se by Hearrenfean bewust mei dwaande.

"We hebben op verschillende plaatsen schermen hangen met de keep the zero-bar. We willen het meer zichtbaar maken voor iedereen. Dat het één van onze doelen moet zijn."

NEC spile dizze wike gjin bekerfuotbal. Sy mochten dizze ronde noch oerslaan, omdat se dit seizoen Europeesk fuotbal spylje. Hearrenfean wûn woansdei mei 2-0 fan Excelsior Maassluis.

"We waren pas drie uur 's nachts thuis. Daarom zijn de trainingen ook wat later begonnen. We hebben vooral tactisch getraind, als een soort walking voetbal."

Devid Bouah komt moarn werom by SC Cambuur, dat it opnimt tsjin Go Ahead Eagles. De rjochterferdigener wie ferline wike skorst yn de wedstriid tsjin Willem ll.

De weromkear fan Bouah betsjut dat Rik Mulders syn basisplak kwytrekket. Fierder sil trainer Johan Plat gjin feroarings dwaan yn syn opstelling.

Rafik El Arguioui kin dus ek 'gewoan' meidwaan. De middenfjilder bruts ferline wike syn noas yn it duel mei Willem ll.

Dizze wike is de noas wer rjochtset, mar dat betsjut wol dat er mei in masker spylje moat. "Het gaat goed, maar we moeten wel nog voorzichtig zijn", seit Plat oer de middenfjilder.

"Ik heb vaker meegemaakt dat spelers dan toch één of twee weken missen. Dinsdag kon Rafik niet spelen, maar al met al valt het mee."

Foar it earst sûnt trettjin moannen sit Daan Visser wer by de wedstriidseleksje fan SC Cambuur. Yn septimber ferline jier skuorde de Snitser foar de twadde kear yn syn karriêre in krúsbân ôf.

"Ik ben er heel blij dat hij er weer is. Hij heeft iets speciaals", fertelt de Cambuurtrainer. "Ik ga er vanuit dat hij morgen zijn minuten kan maken."

Parahurdfytser Tristan Bangma hat mei piloat Patrick Bos goud helle yn de finale fan de fjouwer kilometer efterfolging op de baan op it WK. Foar Bangma is it gouden plak ekstra spesjaal, want it WK wurdt holden yn eigen lân yn Apeldoorn.

Bangma en Bos wiene foarôf al de grutte favoryt op de fjouwer kilometer. Yn de kwalifikaasje dy't earder op de dei riden waard wiene se al hast seis sekonden rapper as Britten Morgan Fice-Noyes en Christopher Latham. Tsjin dat duo namen sy it yn de finale op om goud.

It duo Bangma en Bos ride yn de finale in knappe rit en naam al gau ôfstân fan de Britten. Se kamen oer de streek yn 4.00,486, goed acht sekonden foar Fice-Noyes en Latham, dy't it sulver pakten. It brûns gie nei Branden Walton en Ian Anderson.

It is foar Bangma de tsiende kear dat er himsels wrâldkampioen neame mei.

Freed ride Bangma en Bos de ien kilometer tiidrit op de baan. Op sneon steane sy oan de start by de sprint.

SKS-skipper Sieberen van Terwisga moat in nije adviseur sykje foar op syn skûtsje fan Earnewâld.

Van Terwisga waard, sûnt hy skipper is, altyd bystien troch syn broer Wouter. Mar dy wurdt skipper op de Lytse Earnewâldster yn de IFKS en kin dan it adviseurskip der net by ha.

Sieberen van Terwisga fynt it in prachtige stap foar syn broer. Dat er no sels in oare adviseur fine moat, sit er net sa oer yn.

"Der hawwe har al minsken meld en dêr komme miskien ek noch wol in pear by. Ik sykje nei de bêste match en dat slagget sawysa."

sc Hearrenfean spilet moarntejûn yn de earste ronde fan it KNVB-bekertoernoai de útwedstriid tsjin de amateurs fan Excelsior Maassluis.

Dy ploech wurdt traind troch âld-Hearrenfean-fuotballer Geert Arend Roorda en hat yn de kompetysje sân oerwinnings op in rige helle. Robin Veldman wol dan ek neat witte fan ûnderskatting. "Wij nemen deze wedstrijd hartstikke serieus."

"Het bekeravontuur leeft enorm binnen de club", seit Veldman. "Of het nu Ajax, PSV of Excelsior Maassluis is: we willen een ronde verder komen. We doen mee om succes te behalen en uiteindelijk de beker te winnen. Daarom hebben we deze wedstrijd ook zeer grondig voorbereid."

De wedstriid wurdt spile op keunstgers (dat oan ferfanging ta is) en mei folle minder keunstljocht as dat de Hearrenfeanspilers wend binne.

Boppedat binne der genôch foarbylden út it ferline, mei Quick Boys as meast resinte gefal, dat Hearrenfean it dreech hie mei de amateurs. Toch hat Veldman syn spilers dêr net foar warskôge.

"Als je spelers gaat waarschuwen voor allerlei omstandigheden, dan boezem je ze vooral angst in", seit Veldman. "Wij richten ons op de zaken waar we wél invloed op hebben: onze fitheid, de manier van opbouwen, het druk zetten en kansen creëren. Dat zijn de dingen die bepalend zijn."

Middenfjilder Dirk Proper is nei in lange blessuere wer beskikber. Ek Levi Smans en Mees Hilgers sitte by de seleksje foar it bekerduel. De ôftraap is woansdeitejûn om 21.00 en is live te folgjen by Omrop Fryslân op de radio yn in ekstra sportprogramma.

Twa kear yn 1991, en ien kear yn 2019. SC Cambuur makke yn it ferline trije kear earder de reis nei Seelân, sa ha de kollega's fan Omroep Zeeland útsocht.

De Ljouwerters spylje jûn yn de KNVB Beker tsjin amateurklup Kloetinge. Ofgeande op histoarje kin dat eins allinne mar in sukses wurde foar Cambuur; de ploech krige noch nea in doelpunt tsjin yn Seelân en wûn twa fan de trije duels dêr.

De lêste kear dat Cambuur ôfreizge nei Seelân wie dus yn 2019. Doe wie Goes de tsjinstanner. Nei in memorabele wedstriid, doe't de ferljochting meardere kearen útfoel om't der te folle frituerpannen oan stiene, wie de einstân 0-5 yn it foardiel fan Cambuur.

De wedstriid fan jûn tsjin Kloetinge begjint om 20.00 oere.

Cambuur spilet tiisdeitejûn foar de KNVB Beker tsjin amateurklup Kloetinge. It wurdt in lange reis foar it team fan trainer Johan Plat. Kloetinge leit yn Seelân en is sa'n trije-en-in-heal oere riden foar de Ljouwerters.

"Ik speelde in Duitsland en dan zat je soms tien uur in de bus", laket Plat oer de lange reis. "Dus als je het zo bekijkt stelt het niks voor."

Nei alle gedachten fiert Plat in pear wizigings troch yn de seleksje. Keeper Luca Plogmann makket syn debút foar Cambuur.

De 26-jierrige Dútser kaam yn de simmer oer fan Go Ahead Eagles en hat in rol as twadde keeper efter Thijs Jansen.

Plat seit net dat Plogmann alle wedstriden yn de beker keepe sil. Dat besjocht hy foar elke wedstriid apart.

Kloetinge spilet op keunstgers en dat hat ek ynfloed op de opstelling. Sa spilet Jorn Berkhout op it plak fan Billy van Duijl, dy't de lêste dagen in lichte blessuere hie.

Kloetinge stiet ûnderoan yn de twadde divyzje (it heechste amateurnivo). Dochs nimt Plat de tsjinstanner serieus en fljocht hy de foarbeskôging op deselde manier oan as alle oare wedstriden.

"Het is gewoon wel een behoorlijk niveau en heb ook genoeg wedstrijden gezien tussen eredivisionisten en amateurclubs die niet afliepen zoals je verwacht. We moeten scherp zijn en daar hamer ik op deze dagen."

Wolkom yn it sportbloch fan dizze wike. Hjiryn hâlde we dy op 'e hichte fan de lêste ûntwikkelingen oangeande de sport yn Fryslân.