Under mear dowen en kavia's dea by grutte brân by SanjesZoo | Gjin treinen nei Starum

De brânwacht set in kraan yn om de loads út elkoar te lûken. De loads is hielendal ferlern gien.

Dielen fan sinnepanielen binne yn de omjouwing telâne kaam.

Njonken de loads stiet in kantoar, dat stiet noch wol oerein, mar dat hat wol in soad skea troch bluswetter en reek.

Yn de loads dêr't brân útbrutsen is stiene hinnen, dowen, kavia's, fazanten en savannahkatten. De lêste twa bistesoarten koene frij út de loads rinne. It is noch net dúdlik hoefolle fan de bisten yn de loads achterbleaun binne.

Bûten de loads rûnen wallaby's, skiep, stoksturtsjes, ponnys en geiten om. Dy bisten binne foar safier dat mooglik wie út de reek holden.

In biste-ambulânse is te plak om te helpen. Foar de bisten is ek opfang regele.

De Sintrale As tusken Dokkum en ôfrit De Westereen is yntusken wer frijjûn.

De brânwacht is yntusken dwaande mei it neiblussen fan de brân by SanjesZoo yn Feanwâlden, der komt net in soad reek mear frij.

Dêrom is it NL-Alert ynlutsen. It advys om de doarren en rúten ticht te hâlden, is dêrom net mear nedich.

Om gjin ûnrêst te feroarsaakjen, wurdt der gjin nij NL-Alert ferstjoerd as de warskôging net mear jildich is.

By de tige grutte brân by SanjesZoo yn Feanwâlden hawwe de oanwêzige bern net yn gefaar west. Dat seit Sytske Balt fan de Veiligheidsregio Fryslân.

Op it stuit dat de brân útbruts, wienen der meardere skoalreiskes by SanjesSafari, it boarterspark neist SanjesZoo.

Neffens de brânwacht hawwe de bern en de begelieders dy't yn de bistetún oanwêzich wienen net yn gefaar west.

Datselde jildt foar de bern en begelieders fan de njonkenlizzende berne-opfang. De bern dy't dêr wienen, wurde ophelle.

In túnsintrum yn Feanwâlden is op it stuit ticht fanwegen de brân.

In part fan de Sintrale As is yntusken ôfsletten fanwegen de reek dy't oer de dyk lûkt.

De dyk is ticht tusken Dokkum en ôfrit De Westereen.

In túnsintrum yn de buert hat de doarren foarearst sletten.

De brânwacht meldt dat meardere bisten net mear te rêden binne by de brân yn Feanwâlden. Om hoefolle oft it giet, is noch net bekend. Fierder is noch net dúdlik om watfoar bisten oft it giet.

In oantal bisten koe noch út de loads helle wurde. Der binne gjin minsken mear yn it gebou.

De brânwacht bestriidt it fjoer fan bûtenôf. It is net feilich om de loads yn te gean.

SanjesZoo is ûnderdiel fan it boarters- en bistepark Sanjes Safari yn Feanwâlden. Dat is in populêr boartersplak dêr't bern binnen en búten boartsje kinne.

Al hiel wat jierren is it ek in bistetún, dêr't 40 ferskillende soarten bisten libje. Boppedat is it in deibesteging foar minsken mei in (lichte) beheining.

Op it terrein oan De Sanjes is ek in sportakkommodaasje fan de lokale tennisferiening.

By SanjesZoo wie neffens in korrespondint in skoalreiske geande.

De klasse is mei in bus fuorthelle op it plak fan de brân.

Minsken yn de omjouwing fan Feanwâlden hawwe in NL-Alert krigen fanwegen de brân by SanjesZoo.

Dêryn wurdt oproppen om út de reek te bliuwen, ruten en doarren ticht te hâlden en de fentilaasje út te setten.

De dyk nei SanjesZoo is fanwegen de brân ôfset foar ferkear. Meardere brânwachtkorpsen binne yn it spier om it fjoer te bestriden.

It is noch net dúdlik oft der minsken of bisten ferwûne rekke binne. Boppedat is de oarsaak fan de brân noch ûndúdlik.

Der is brân útbrutsen oan De Sanjes yn Feanwâlden. De brânwacht hat opskaald nei 'grutte brân'.

Neffens de melding soe it gean om in brân yn in loads of in grut hok fan SanjesZoo.

De brânwachtkorpsen fan De Westereen en Bûtenpost hawwe in oefening hâlden yn de eardere Ringobar yn Feankleaster.

Yn it pân waarden de brânwachtminsken traind yn hoe om te gean mei in needsituaasje.

Wolkom yn it 112-livebloch fan hjoed. Hjir fynst in oersjoch fan ûnder oare ûngelokken, brannen en ferkearsynformaasje yn ús provinsje.

Wolst meldingen krije by in nij berjocht? Klik dan op it beltsje boppe-oan yn de app.