Van Zwieten wint earste frijeformaasjepartij fan it seizoen | Partoer Smink pakt winst by de froulju

LWD Basket hat syn lêste kompetysjewedstriid yn de BNXT League ferlern. Op besite by Okapi Aalst waard it 118-90.

Yn it earste kwart koe LWD goed meikomme mei de thúsploech (27-25), mar dêrnei rûn Aalst hurd út. Leo O'boyle makke de measte punten foar LWD Basket (18).

Foar LWD Basket is it net allinnich de lêste wedstriid dit seizoen yn de Nederlânsk-Belgyske kompetysje, mar foar altyd. De Ljouwerters ha har nammentlik net ynskreaun foar takom seizoen. Neffens it bestjoer is it finansjeel en organisatoarysk in te grutte útdaging om ek takom seizoen mei te dwaan.

Dit seizoen is noch net hielendal foarby, want LWD Basket hat him wol pleatst foar de play-offs om de Nederlânske lânstitel. LWD is nammentlik de sechsde Nederlânske klup op de BNXT-ranglist.

Dat betsjut yn de earste ronde in best-of-3-searje tsjin ZZ Leiden, dat tredde wurden is. De earste wedstriid yn de play-offs is freed yn Leiden. De winner fan dizze kwartfinale spilet yn de heale finale tsjin de Nederlânske nûmer twa fan de reguliere kompetysje, Donar.

Darter Danny Noppert hat de tredde ronde berikt fan de Austrian Darts Open. Yn de twadde ronde wie de Jouster mei 6-5 te sterk foar Alan Soutar.

Noppert kaam mei 1-3 efter, en letter ek noch wer mei 4-5. Mar hy focht him beide kearen werom en wûn de wedstriid úteinlik mei in gemiddelde fan 91,3.

By de lêste sechtjin nimt Noppert it op tsjin Cristo Reyes.

Gerbrich Koster, Rixt Wijnia en Noa Elzinga ha de earste trochelkoarlotterspartij fan it jier wûn. Op de Gouden Wilhelminapartij yn Menaam wienen se yn de finale te sterk foar Larissa Smink, Jeska Terpstra en Fiera de Vries.

Yn de einstriid waard it 5-3 en 6-2 foar Koster en dy.

De lytse preemje wie foar Roelie Kroondijk, Iris Oosterbaan en Sjanet Wijnia. Yn de treastfinale wûnen se mei 5-2 en 6-2 fan Annet de Haan, Linda van der Meer en Jeldau Koopmans.

Der stienen 23 keatsters op de list yn Menaam.

ONS Snits hat op besite by DZC'68 in belangrike oerwinning pakt. De Snitsers kinne de punten goed brûke yn de striid tsjin degradaasje út de fjirde divyzje.

Mei noch trije wedstriden te gean stie ONS yn de degradaasjesône. Mar al nei oardel minút kamen de Snitsers op foarsprong yn Doetinchem, doe't de keeper fan DZC in foarset fan Simon Abrahaley net goed ferwurke.

In kertierke letter ûntsnapte Arjen Stremler oan bûtenspul en koe er yn syn ientsje op de goal ôf. Hy makke der 0-2 fan.

Troch in eigen goal fan Lucas Bijker, in kertier foar tiid, wie de slotfaze noch hiel spannend. Mar ONS hold fol en nimt de trije punten mei nei Fryslân.

Sa komt ONS op likense hichte mei DZC en helje de Snitsers TVC'28 yn op de ranglist. ONS stiet no alfde. De nûmers 13 en 14 spylje oan de ein fan dit seizoen neikompetysje om liifsbehâld. De nûmers 15 en 16 degradearje streekrjocht.

Harkemase Boys hat thús trije punten pakt tsjin kampioen Rohda Raalte. Op De Bosk waard it 2-1 foar de Harkiten.

De wedstriid gie yn feite nergens mear oer: Harkemase Boys kin allinnich yn teory noch promovearje, en Rohda Raalte hat it kampioenskip yn de tredde divyzje al binnen.

Nei't Steyn Postma de thúsploech nei in healoere spyljen op foarsprong set hie, makken de besikers fia Sven Pazie al gau de lykmakker.

Nei in kertier yn de twadde helte soarge Jules Boubane foar de fraaie 2-1. Dêr bleau it by.

Mei noch twa wedstriden te spyljen hat Harkemase Boys noch in lytse kâns op de perioadetitel. De ploech fan trainer Marcel Post spilet noch tsjin Hercules (út) en Sportlust'46 (thús).

It bestjoer fan de Flylanner fuotbalklup VSV '31 hat besletten om VSV 1 út de kompetysje werom te lûken. Snein soe de klup op it thúsfjild spylje tsjin fc Harns, mar dy ploech hat ôfsein, skriuwt VSV op Facebook.

"Daarmee is dit inmiddels de vijfde afzegging in twee maanden tijd. Door het wegvallen van deze wedstrijd is bovendien iedere kans op het kampioenschap verdwenen."

VSV kin no net mear genôch punten behelje om kampioen te wurden. Ek moatte der troch alle ferskowingen noch acht wedstriden ynhelle wurde, mar is dêr gjin romte mear foar troch de eindatum fan de kompetysje dy't it KNVB fêststeld hat.

"Na overleg met begeleiding en een afvaardiging van de spelersgroep is daarom besloten het team uit de competitie te halen", meldt VSV. "Ook omdat het lang niet zeker is dat de teams die nog gepland staan voor de resterende thuiswedstrijden wel zullen komen."

Sisca Folkertsma, Fenna Kalma en Nina Nijstad binne freedtejûn mei de froulju fan PSV kampioen wurden yn de earedivyzje.

De ploech wûn mei 2-0 fan ADO Den Haag, Kalma tekene foar de twadde goal.

It is foar it earst sûnt it seizoen 2011/2012 dat in oare ploech as Ajax en FC Twente kampioen waard yn de heechste nasjonale kompetysje foar froulju.

De froulju fan sc Hearrenfean hawwe de foarlêste wedstriid fan it seizoen mei romme sifers ferlern fan FC Utrecht. Al nei seis minuten stie it 2-0 troch goals fan Lobke Loonen.

Hearrenfean hie gjin antwurd op it fûle spul fan de Utrechters en nei in kertier stie it sels 3-0.

Aymee Altena soarge krekt nei it skoft foar de iennige Fryske goal. Se makke de 3-1, mar yn it lêste part fan de wedstriid rûn Utrecht fierder út.

Mei nochris twa goals sette Elisha Kruize de einstân op it boerd: 5-1.

Reedrider Tjerk de Boer fan Weidum rydt takom seizoen yn it grien-swart fan Reggeborgh, sa makke de ploech freed bekend.

De Boer trainde dizze wike al mei by de ploech fan coach Roy Boeve. Hy wie oant en mei it ôfrûne seizoen ûnderdiel fan Royal A-ware, de ploech fan Jillert Anema.

"Ik ben van alle markten thuis, een allround schaatser", seit De Boer. Hy sil it maratonriden takom winter kombinearje mei de toernoaien op de langebaan.

De Weidumer stie de lêste winter in skoft oan de kant troch in rêchhernia. Yn 2024 pakte hy syn moaiste oerwinning, de Rein Zwart Bokaal yn Thialf.

Mei noch twa wedstriden te gean, is Hearrenfean wis fan in plak yn de play-offs, mar kin it ek noch altyd streekrjocht Europa yn.

Snein spilet Hearrenfean út tsjin NAC Breda, de ploech fan Carl Hoefkens. Dêr wurke Robin Veldman noch mei gear by Club Brugge.

"Ik verwacht wel dat ze met een plan komen. Zo is hij wel. Ze spelen wel eens met één spits, wel eens met twee spitsen. Maar we verwachten wel een heksenketel."

NAC Breda is al sa goed as wis fan degradaasje. It kin wolris ûnrêstich wurde yn Breda. Der komt in protestmars foar de wedstriid en Hearrenfean is frege in kertier earder oanwêzich te wêzen as oars.

"Maar dat betekent niet dat wij ons helemaal gaan aanpassen voor de wedstrijd. We doen het gewoon net als anders."

Maxence Rivera, Andries Noppert en Nikolai Hopland binne der lykas ferline wike net by.

Veldman: "We hadden ook twee jongens met buikgriep, maar we verwachten wel dat ze er zondag bij zijn."

Mark Diemers giet fuort by SC Cambuur. Hy hat de stekker lutsen út de petearen mei de kluplieding. Dêrmei komt nei twa jier in ein oan syn perioade by Cambuur. Diemers sil op syk nei in nije klup.

It kontrakt fan de Cambuuroanfierder rint oer in moanne ôf. Der hawwe meardere petearen west oer kontraktferlinging, oant Diemers dizze wike besleat om dy ûnderhannelings te staken.

De grutste stroffelstien is de lingte fan de oanbieding. De 32-jierrige Ljouwerter wol syn karriêre graach ôfslute by de klup dêr't er ek begûn en dus woe er it leafst in mearjierrich nij kontrakt tekenje.

"Ik was bereid om met de club mee te denken, maar de club wil niet verder gaan dan één jaar", lit Diemers witte fanôf Ibiza, dêr't er mei de spilers en trainers fan Cambuur it seizoen ôfslút. Syn lean soe nei eigen sizzen boppedat mei tritich persint omleech gean.

Technysk manager Lars Lambooij fan Cambuur meldt dat yn de oanbieding fan 'e klup wol in opsje op in twadde jier siet, dy't yngean soe as Diemers in bepaald oantal wedstriden spylje soe. Dat wie foar de fuotballer lykwols net genôch.

De situaasje hat allinnich mar ferliezers, want Lambooij en Cambuur hiene Diemers graach behâlde wollen. Mar dus net tsjin elke betingst.

Sa einiget it houlik tusken Diemers en Cambuur. Hy trochrûn de hiele jeugdoplieding en makke syn debút yn it earste yn 2012. Yn dat seizoen waard Cambuur mei Diemers kampioen, wêrnei't er syn karriêre ferfolge by FC Utrecht.

Yn 2024 kaam Diemers werom by Cambuur. By it tekenjen fan it kontrakt spruts er út om mei Cambuur promovearje te wollen en by de Aldehou stean te wollen. Dat makke er koartlyn wier; de ploech fan trainer Henk de Jong waard twadde, promovearre nei de earedivyzje en ôfrûne snein waard it team huldige op it Aldehoustertsjerkhôf.

Nettsjinsteande de teloarstelling wol Diemers net mei modder smite. "Ik heb een geweldige tijd gehad en zoveel liefde gevoeld van de mensen op de tribunes en op de werkvloer."

LWD Basket hat de lêste thúswedstriid yn de reguliere kompetysje mei 74-100 ferlern fan ZZ Leiden.

Yn de earste twa kwarten gie it noch aardich gelyk op: 21-21 en 18-19. Mar yn it tredde kwart gie it hielendal mis foar de thúsploech. Mei 14-30 kaam Leiden op in grutte foarsprong.

Yn it lêste kwart koene de besikers dy foarsprong noch fierder útwreidzje: 21-30.

Foar de Ljouwerter klup folgje no allinnich noch wedstriden yn de play-offs.

Vincent van Sliedregt hâldt op as haadcoach fan de Ljouwerter basketbalklup LWD Basket.

Van Sliedregt, dy't yn Burdaard wennet, wie sûnt 2021 einferantwurdlik foar de ploech. Dêrneist wurke hy de lêste trije jier as bûnscoach fan de Nederlânske basketbalfroulju.

Mei beide funksjes hâldt hy op omdat hy de nije coach wurdt fan Bayreuth Basketball, dat op it twadde Dútske nivo útkomt yn de Pro A-kompetysje.

Koartlyn waard dúdlik dat LWD Basket folgjend jier net fierder giet yn de BNXT-league, de kompetysje fan Nederlânske en Belgyske klups.

Hoe't it takom jier komt mei de Ljouwerter klup, is noch net bekend.

Jûn stiet de lêste thúswedstriid fan LWD Basket yn de reguliere kompetysje op it programma. ZZ Leiden is de tsjinstanner.

Wolkom yn it sportbloch fan dizze wike. Wolst in melding krije by in nij berjocht? Klik dan op it beltsje boppe-oan dit bloch.