Kwartfinale is einstasjon foar Noppert op European Tour | LWD Basket ferliest yn Den Helder

It Nederlânske frouljusiishockeyteam, mei de Friezinnen Hilde Huisman, Roos Karst en Esther de Jong, hat Letlân mei 6-3 ferslein op it WK yn Spanje.

Dêrmei promovearret it team nei divyzje 1A, it heechste nivo fan de wrâld.

Esther de Jong makke yn de earste perioade de 2-0 en dêrmei de iennige Fryske goal.

Letlân kaam yn de twadde perioade noch wol werom oant 2-2, mar yn de tredde perioade makke Nederlân it ferskil.

Danny Noppert hat syn earste wedstriid op de European Tour yn it Dútske Sindelfingen wûn fan Oskar Lukasiak.

Maklik gie dat net, want der moast in beslissende leg oan te pas komme op in 5-5 stân. Dêryn wie Noppert de bêste. Mei in 86-finish slagge it him om 6-5 te winnen.

Noppert nimt it moarn yn de achtste finales op tsjin de winner fan de partij tusken Gary Anderson en Niko Springer.

It Nederlânske frouljus iishockeyteam, mei de Friezinnen Hilde Huisman, Roos Karst en Esther de Jong, hat foar it earst in wedstriid ferlern op it WK yn Spanje.

Grut-Brittannië wie te sterk foar de iishockeysters. Mar dêr hiene sy wol shoot-outs foar nedich. Nei reguliere spyltiid stie it nammentlik noch hieltyd 0-0.

Yn de shoot-outs waard it 2-1 foar Grut-Brittannië. Huisman en De Jong misten beide harren penalty.

De folgjende wedstriid stiet sneon op it programma, dan is Letlân de tsjinstanner.

Darter Jurjen van der Velde is al yn de earste ronde útskeakele op de European Tour yn it Dútske Sindelfingen. Van der Velde ferlear mei 6-4 fan lângenoat Kevin Doets.

Danny Noppert komt moarn yn aksje. Hy streamt in ronde letter yn fanwegen syn hege posysje op de pleatsingslist.

UNIS Flyers komt takom seizoen net út yn de Central European Hockey League, mar yn de earedivyzje.

It bestjoer en de Ried fan Tafersjoch fan de Flyers hawwe dat beslút naam, om't de kosten yn de CEHL stikken heger binne as yn de earedivyzje.

De CEHL is in kompetysje mei Nederlânske, Belgyske en Dútske teams. It nivo leit yn dy kompetysje heger, mar de budzjetten lizze dêr ek heger en de reizen bringe in protte organisatoryske swierrichheden mei him mei.

Yn de earedivyzje, mei allinnich Nederlânske klups, hopet de klup him ûntwikkelje te kinnen op sportyf nivo, mar binnen realistyske en finansjeel ferantwurde kaders.

LWD Basket hat jûn mei ien puntsje ferskil ferlern fan de Den Helder Suns. Op it Kealledykje yn Ljouwert waard it 98-99 yn it foardiel fan de gasten (kwartstannen: 32-23, 24-33, 26-16 en 16-27).

De Ljouwerter basketballers stean op it stuit op it 15e plak yn de BNXT League, krekt ûnder de ploech út Den Helder.

Sportklup Hearrenfean hat in besletten oefenwedstriid tsjin Go Ahead Eagles mei 4-3 wûn. Dylan Vente, Lasse Nordås en Maxence Rivera (2) makken de Fryske doelpunten yn it Abe Lenstra Stadion.

It duel duorre 120 minuten.

Hearrenfean spile de oefenwedstriid om't se kommend wykein net yn aksje komme fanwegen de bekerfinale dy't dan op it programma stiet.

Cambuurdoelman Thijs Jansen en âld-spiler Oscar Sjöstrand meitsje kâns op in yndividuele priis yn de Keuken Kampioen Divisie.

Jansen hat in wildcard krigen yn de kategory bêste keeper en Sjöstrand yn de kategory grutste talint. De twa hienen in wildcard nedich foar de ferkiezing, om't se yn de fjouwer perioades net as bêste út de bus kamen. Mar de organisaasje fynt no dochs dat se meidinge moatte om de titels.

Mark Diemers, Ismael Baouf en trainer Henk de Jong meitsje ek kâns op in priis by it gala fan de earste divyzje. Dat is ein dizze moanne.

Cambuurtrainer Henk de Jong belibbet in hektyske en emosjonele tiid. Oan it begjin fan dizze wike ferstoar hommels syn mem. Sjoukje de Jong waard 80 jier.

"Dit is gewoan in dikke klap, want it bliuwt altyd je mem", seit de Drachtster trainer. "Mem sei ek noch 'leave' tsjin my en ik bin 61 jier. Dy bân bliuwt altyd."

De bân tusken Henk en syn mem wie hecht. De trainer gong alle dagen om kofje. Syn mem wie fit en dus kaam it ferstjerren ûnferwachts.

"Ik ha der yn de moarn noch west. Trije oeren letter hie ik gjin kontakt mear en bin ik nei har hûs gongen. Dêr fûn ik har en efkes letter is sy ferstoarn."

De famylje De Jong belibbe dêrtroch in drokke wike mei in protte emoasjes. It wie de fraach oft De Jong op de training wêze koe. Al hie syn mem noch wol advys foar him.

"Sy hat oan de ein sels noch sein dat 'Henk wol fuotbalje moast'. Dus ik bin hjir ek foar har. Ik fyn it ek lekker om hjir te wêzen."

Sjoukje de Jong koe koartlyn noch foar it lêst by in wedstriid fan soan Henk wêze. Op Twadde Peaskedei spile Cambuur thús tsjin Dordrecht en wie frou De Jong derby.

"Ik ha doe ek hieltyd nei har swaaid, dus dat wie wol hiel moai. Efterôf sjoen hat it noch mear betsjutting krigen. Us mem wie in ynspiraasje foar my."

Cambuur spilet freed noch út tsjin De Graafschap. In pear basisspilers ûntbrekke. Nicky Souren en Rik Mulders kinne der net by wêze.

Noch twa wedstriden en dan is de kompetysje klear. Cambuur is al promovearre en kin gjin kampioen mear wurde.

Cambuurspiler Jochem Nap hat in kontrakt foar trije jier tekene by RKC Waalwijk. It siet der al oan te kommen dat de middenfjilder (21) fuortgean soe út Ljouwert.

Nap spile yn totaal acht wedstriden yn it earste alvetal fan Cambuur.

RKC stiet op it stuit sânde yn de earste divyzje. De Waalwijkers soenen fia de play-offs noch promovearje kinne.

It Nederlânske frouljus iishockeyteam, mei de Friezinnen Hilde Huisman, Roos Karst en Esther de Jong, is suksesfol dwaande op it WK yn Spanje.

De iishockeysters wûnen hjoed harren tredde wedstriid mei in oertsjûgjend 3-0 fan tsjinstanner Súd-Koreä. De 2-0 yn it duel kaam ta stân troch tariedende passes fan De Jong en Huisman, wêrnei't Maree Dijkema de oanfal ôfmeitsje koe.

Foar Oranje is it de tredde oerwinning dit WK yn de Spaanske stêd Puigcerdà. Earder waard al wûn fan gastlân Spanje (0-6) en Kazachstan (3-0).

Freed stiet opnij in wedstriid op it programma. Dan is Grut-Brittannië de tsjinstanner.

Sander Arends en syn maat David Pel hawwe de earste wedstriid fan it ATP-toernoai yn München ferlern.

Tsjin it Dútske duo Schnaitter/Wallner gie it yn de earste set lykop, mar ferlearen de Nederlanners wol (5-7).

De twadde set wie dêrnei mei 6-3 foar Arends en Pel. Dêrnei waard in tie-break spile om de winst en dy wie mei 6-10 foar de Dútsers.

It is dêrtroch in minne dei foar de Ljouwerter, dy't in München in soad punten te ferdigenjen hie dy't er ferline jier yn Barcelona helle mei de winst tegearre mei Luke Johnson.

No't dy punten fuortfalle fan de ranking, sakket Arends nei it 44ste plak op de wrâldranglist.

De seleksje en stêf fan SC Cambuur wurde snein 3 maaie huldige foar de promoasje nei de earedivyzje.

De huldiging is by de Aldehou. De spilers en stêf sille yn in iepen bus fan it Kooi Stadion troch de stêd nei de Aldehou ride.

LDODK giet net nei de finale om it lânskampioenskip yn Ahoy. Yn de lêste sekonden fan de wedstriid pakte DVO de foarsprong en dêr koe de ploech fan assistint-coach Friso Boode neat mear oan feroarje. De einstân wie 22-23.

Dat wie eins tsjin de ferwachtings yn. LDODK stie hast de hiele wedstriid oan de lieding yn it eigen Koartsweagen.

LDODK spile in sterke earste helte dêr't se bouden oan in marzje fan fjouwer punten. Yn it skoft stie it 14-10 foar de thúsploech.

Nei it skoft besocht de ploech fan Boode, dy't as coach oan de sydline stie troch de skorsing fan haadcoach Jan Niebeek, dy foarsprong út te bouwen.

Dat slagge hiel aardich, oant de lêste fjouwer minuten fan de wedstriid.

Yn dy perioade kaam DVO werom fan in 22-18 efterstân. Yn de lêste minút makke Gertjan Meerkerk de winnende foar de ploech út Bennekom.

Allinnich Julian Frieswijk koe der yn de lêste minuten noch wat oan dwaan, mar syn poging gie der net yn.

"Ongelofelijk, zo dichtbij", seit Frieswijk. "We doen het niet. We werken het hele jaar zo hard, maar we geven het weer weg."

LDODK hat no fjouwer seizoenen op rige de heale finale om it lânskampioenskip helle, mar kaam nea troch de heale finale.

Kuorbalklup LDODK moat it de rest fan it seizoen dwaan sûnder coach Jan Niebeek. Hy is foarriedich skorst en de tuchtsaak wurdt op syn betiidst takom wike behannele.

Niebeek waard skorst nei ûngeregeldheden yn de earste healefinalewedstriid tsjin DVO. Hy soe in spylster fan DVO treaun ha.

LDODK kin him jûn, mei assistint-trainer Friso Boode as ferfanger fan Niebeek, foar it earst yn de kluphistoarje pleatse foar de finale om it lânskampioenskip. De Gordyksters moatte dan yn eigen hûs ôfrekkenje mei DVO út Bennekom.

LDODK pleatste him as twadde foar de play-offs en hat dêrom yn de heale finale it thúsfoardiel tsjin DVO. Dochs moast de ploech fan Jan Niebeek yn de efterfolging, nei't DVO ferline wike yn Langsweagen mei 29-31 te sterk wie.

Ofrûne wykein luts LDODK de stân wer yn lykwicht (20-22), wêrtroch't jûn de beslissing falt.

Foar LDODK soe de finale in primeur wêze. De Gordyksters spylje sûnt 2012 op it heechste nivo, wienen in pear kear hiel ticht by 'Ahoy', mar berikten de finale noch noait. DVO stie twa kear yn de finale (2023 en 2024), mar ferlear beide kearen.

De wedstriid tusken LDODK en DVO begjint jûn om 20.30 oere yn de útferkochte sporthal Koartsweagen.

De winner nimt it kommende sneon yn Ahoy op tsjin seisfâldich lânskampioen Fortuna út Delft.

Assistint-skiedsrjochters Hessel Steegstra en Jan de Vries ha kommende snein mei skiedsrjochter Danny Makkelie de lieding oer de finale fan de KNVB-beker. Dy wedstriid giet tusken AZ en NEC.

It is in moaie beleanning foar Steegstra (Snits) en De Vries (Gytsjerk), dy't takom simmer ek al nei it WK fuotbal yn Kanada, Amearika en Meksiko ta meie.

De bekerfinale yn De Kuip begjint snein om 18.00 oere.

Fuotbalster Kerstin Casparij docht net mei oan de WK-kwalifikaasjewedstriden fan it Nederlânsk alvetal tsjin Frankryk.

De 25-jierrige ferdigener fan Manchester City hat it trainingskamp ferlitten fanwegen 'oanhâldende klachten', seit de KNVB.

Bûnscoach Arjan Veurink ropt gjin ferfanger op foar Casparij. De Nederlânske froulju spylje tiisdei yn Breda tsjin Frankryk, sneon stiet de return op it programma yn Auxerre.

Wolkom yn it sportbloch fan dizze wike. Wolst in melding krije by in nij berjocht? Klik dan op it beltsje boppe-oan dit bloch.