Liveblog | 16 augustus 2025

Sterke Jerke hat it 'ferskiten': "Dit is wol even soer"

De skûtsjes fan de IFKS sylden de finale yn de Lemster Baai.

Lêst bywurke: 16 augustus 2025, 18:13

18:13

Sjoch hjir nei it Skûtsjesjoernaal

17:20

Sterke Jerke hat it 'ferskiten': "Dit is wol even soer"

Sterke Jerke © Martin de Jong

Twa dagen lang hie it skûtsje Sterke Jerke alle kaarten yn hannen om kampioen te wurden, en twa kear waard de striid yn it lêste rak beslikke yn it foardiel fan Eastermar.

"Dit is wol even soer," seit skipper Pieter Jilles Tjoelker fan de Sterke Jerke, "mar dêr moatte je trochhinne sjen. We ha in prachtich kampioenskip hân."

"In twadde plak, dan kinne je wol hiel lang seure, mar dat moat net. Dit is hiel moai, we ha goed syld. Allinne juster en hjoed ha we it wat ferskiten. Dy oare mannen ha gewoan folle better syld. Dêr moatte we ús by dellizze."

"Wy ha oant it lêste rak op kampioenskoers lein, dus dêr moatte we wol even fan bekomme, Mar we moatte ek troch. Takom jier is der wer in jier." Hiel lang sil Tjoelker der gjin lêst fan ha, seit er. "Tsien minuten, en in pear bierkes, dan is it wol wer klear. Dêr sit ik net oer yn."

17:00

Sjoch hjir nei in ferslach fan de kampioenswedstriid

De kampioenswedstriid

16:49

It klassemint

It klassemint © Omrop Fryslân

16:48

De folsleine útslach

De útslach © Omrop Fryslân

16:38

Eastermar lokwinske troch deputearre Abel Kooistra

Mei in slokje op kosten fan it provinsjebestjoer lokwinsket deputearre Abel Kooistra de skipper en bemanning fan It Doarp Eastermar.

IFKS © Omrop Fryslân

16:22

De bliidskip is grut by Eastermar

15:33

Eastermar kampioen yn IFKS nei fenomenale apoteoaze op Iselmar

Eastermar wint © Martin de Jong

It skûtsje fan Eastermar is kampioen wurden yn de IFKS nei in fenomenale apoteoaze op de Iselmar.

Eastermar hie in twadde plak nedich, en dan moast de Sterke Jerke net yn de top fiif finishe. Dat slagge.

Skipper Geale Tadema fan Eastermar is út de skroeven. "We ha prachtige wedstriden syld, de hiele wike al. Alles wie raak. Dit is toch moai silen? Geweldich, geweldich!"

"Wy binne machtich moai nei foaren syld. En de Sterke Jerke sakke ôf. Sy rekken wat mei oare skippen yn konklaaf, en wy koene moai de frije slagen fine. Echt machtich."

It is de twadde kear dat Tadema mei Eastermar kampioen wurdt yn de IFKS. "Dit is no, dat oare wie sân jier lyn. Dat stiet yn de boeken. Dit fiele wy yn ús hert."

"Dy emoasje, dat makket ús grutsk. Sa binne we. Wy binne wat emosjoneel, dat makket it libben ek moai. Der moat wat emoasje yn sitte."

15:26

Eastermar yn hâlders hân

It is no oan Eastermar. De Sterke Jerke hat in wûnder nedich om der noch by te kommen. En de finish leit der al yn.

Eastermar is yn hâlders hân.

15:23

Eastermar en Grutte Pier stride om twadde plak

Eastermar en Grutte Pier geane board oan board on de boppetonne. No komt it derop oan foar Eastermar. Kinne se der yn it foardewynse rak foarby? Dan lizze se op kampioenskoers.

Wat in finale!

15:10

Sterke Jerke sakket achterút

De Sterke Jerke sakket fuort yn it middenfjild, en komt as achtste om de tonne. Eastermar leit noch hieltyd op it tredde plak.

As it sa bliuwt, is de Sterke Jerke kampioen. Mar as de Eastermarders ien plakje nei foaren sylt, pakke sy de titel.

15:00

Eastermar sylt nei foarren

Eastermar © Martin de Jong

Eastermar doch wat it kin om kampioen te wurden. Skipper Geale Tadema en syn bemanning binne alwer ien plakje nei foaren syld. No lizze allinne de Vrouwe Jantje en de Grutte Pier der noch foar.

Achter Eastermar sile de Grutte Geert en de Deviatie. De Sterke Jerke leit op plak seis.

As de Eastermarders noch ien plakje nei foaren sylt, lizze se op kampioenskoers. En se komme hieltyd tichter by de Grutte Pier. Wat in spanning!

14:51

Sterke Jerke op kampioenskoers

Ien boppetonne letter hat Eastermar in plakje wûn. Der sylt no ien skûtsje tusken de Sterke Jerke en It Doarp Eastermar. Dat is de Deviatie.

Dêrmei leit de Sterke Jerke noch op kampioenskoers. Eastermar moat hjoed earste of twadde wurde, om kampioen te wuden, en dan moatte der ek noch twa of mear skûtsjes tusken Eastermar en de Sterke Jerke finishe.

De Sterke Jerke leit dus op kampioenskoers. Mar dat wie juster ek sa, en doe kaam Eastermar der noch oerhinne. Hoe komt dat hjoed?

14:30

Apoteoaze op Iselmar: Sterke Jerke en Eastermar stride om kampioenskip IFKS

Sterke Jerke © Martin de Jong

No is it oan de skûtsjes fan de grutte A-klasse. De Sterke Jerke en It Doarp Eastermar stride om it kampioenskip.

Beide skippen komme flak nei mekoar om de boppetonne. Net as earste. De Sterke Jerke is as sechsde om de tonne, Eastermar as sânde.

De Vrouwe Jantje - dy't juster de deipriis pakte - is no ek wer as earste om de boppetonne.

13:51

Swanneblom wint slotwedstriid en is kampioen yn lytse a

Swanneblom © Omrop Fryslân

It skûtsje Swanneblom hat de slotwedstriid wûn op de Iselmar by De Lemmer en is kampioen wurden yn de lytse a-klasse.

Lang seach it der nei út dat It Goutumer skûtje de deipriis pakke soe, mar yn it alderlêste rak sylde de Swanneblom der foarby, omdat Goutum yn de slach rekke mei de Nije Dei.

"It wie in prachtige striid", seit skipper Jelle Talsma fan de Swanneblom. "Wy wiene eins al tevreden mei ús tredde plakje, want dan wiene we ek al kampioen. Mar we ha knokt foar it earste plak, en dat betearde super!"

Talsma is der bliid mei dat der wyn kaam, healweis it kampioenskip. Sûnder wyn sylt de Swanneblom lang sa hurd net. "Dat wie hiel dreech, mei sa'n bytsje wyn. Dan ha we muoite om float te hâlden. Mei dat lichte waar moatte we it allegearre noch wat útfine."

Noch foardat it skûtsje oan de wâl lei, siet de bemanning al oan it bier. "Der binne hjir in pear dy't it goed foar mekoar ha!"

13:11

Fûle striid by lytse a-klasse

No binne de skûtsjes fan de lytse a-klasse op it wetter. Dêr leit de titelstriid noch hielendal iepen.

De Swanneblom hat de bêste papieren, folge troch It Abbegeaster Skûtsje en it Goutumer Skûtsje. Fan dizze trije wie it Goutumer Skûtsje as earste by de boppetonne, achter de Avontuur, mar flak dêrachter sile ek de Swanneblom en it Abbegeaster Skûtsje.

12:53

Sjoch hjir nei de spanning by de Jonge Jan

Doe't de Jonge Jan ienkear oer de finish wie, wie it wachtsjen op de finish fan de oare skippen. As der ien skip tusken de Jonge Jan en de Ut en Thús siet, wie de Jonge Jan kampioen.

De bemanning koe allinne noch mar ôfwachtsje. Us kameraboatsje wie derby, en lei de spanning fêst. En de bliidskip.

Spanning by de Jonge Jan

12:24

Bliidskip by de kampioen

Skipper Bart Westerhof fan de Jonge Jan is út de skroeven mei de winst. "Dit is ûnfoarstelber. Ik hie net hielendal begrepen dat it sa siet, mar blykber is dit genôch."

Superlativen sjitte him tekoart. "Super. Supermoai. Echt ûnfoarstelber. Wy ha eksakt deselde rige fearn! Machtich!"

"Achterop hiene se it al yn de gaten, mar we moasten noch oardel rak. It is ûnfoarstelber, mar it is slagge."

12:18

Bizarre ûntknoping yn B-klasse

Yn de B-klasse binne twa skûtsjes einige mei eksakt likefolle punten. De Ut en Thús en de Jonge Jan. Dan giet it derom wa't de measte earste plakken hat.

Dat is gelyk. It tal twadde plakken is ek gelyk. It tal tredde plakken en it tal fjirde plakken ek.

It komt oan op de lêste wedstriid. Dy is foar de Jonge Jan krekt wat better as foar de Ut en Thús. De Jonge Jan is kampioen.

11:08

Moai wyntsje by De Lemmer

De skûtsjes fan de B-klasse binne los, en se ha der in moai wyntsje by. Twa skûtsjes starten te betiid: de Eenvoud fan Remy de Boer en de Verwisseling fan Bas Krom.

10:44

Twa titelkandidaten yn de B-klasse

Dêr't de striid om it kampioenskip yn C-klasse foar de start al beslikke wie, bliuwt it yn de oare klassen spannend oant de lêste dei.

Yn de B-klasse stiet de Ut en Thús fan Luuc Elzinga foaroan yn it klassemint, mar De Jonge Jan fan Bart Westerhoff hat ek in serieuze kâns op de titel.

10:21

Lytse Lies wint finale op De Lemmer

Op de lêste dei fan it skûtsjesilen hat de Lytse Lies de earste deipriis pakt fan it kampioenskip. Yn de C-klasse finishte de Lyts Lies foar de Ingelskman. Dat skûtsje is kampioen wurden yn de C-klasse.

09:24

Lytse Lies as earste om de tonne

De Lytse Lies is as earste om de boppetonne. Direkt dêrachter sylt de kampioen Ingelskman. Dy hat - behalve juster - alle wedstriden wûn dit kampioenskip.

De Frije Fûgel, dy't juster wûn, wie te betiid oer de startline en moast dus hielendal achteroan begjinne.

09:05

Finaledei IFKS los mei C-klasse

De skûtsjes fan de IFKS sile hjoed de finaledei fan it kampioenskip. De C-klasse is om 9.15 oere fan start gien. Om 11.00 oere start de B-klasse. De lytse a begijnt om 12.45 oere, en om 14.30 is de grutte finale fan de grutte A.

Hoe't it kampioenskip oant no ta gie, kinst hjir lêze:

Ingelskman mei oermacht kampioen yn C-klasse | Magistrale wedstriid by De Lemmer

SKÛTSJESILEN

LÊS EK

Sterke Jerke hat it 'ferskiten': "Dit is wol even soer"

Sjoch hjir nei it Skûtsjesjoernaal

Sterke Jerke hat it 'ferskiten': "Dit is wol even soer"

Sjoch hjir nei in ferslach fan de kampioenswedstriid

It klassemint

De folsleine útslach

Eastermar lokwinske troch deputearre Abel Kooistra

De bliidskip is grut by Eastermar

Eastermar kampioen yn IFKS nei fenomenale apoteoaze op Iselmar

Eastermar yn hâlders hân

Eastermar en Grutte Pier stride om twadde plak

Sterke Jerke sakket achterút

Eastermar sylt nei foarren

Sterke Jerke op kampioenskoers

Apoteoaze op Iselmar: Sterke Jerke en Eastermar stride om kampioenskip IFKS

Swanneblom wint slotwedstriid en is kampioen yn lytse a

Fûle striid by lytse a-klasse

Sjoch hjir nei de spanning by de Jonge Jan

Bliidskip by de kampioen

Bizarre ûntknoping yn B-klasse

Moai wyntsje by De Lemmer

Twa titelkandidaten yn de B-klasse

Lytse Lies wint finale op De Lemmer

Lytse Lies as earste om de tonne

Finaledei IFKS los mei C-klasse

Ingelskman mei oermacht kampioen yn C-klasse | Magistrale wedstriid by De Lemmer

Algemien

Service

Statements

Ek Omrop