'Kening' Tolsma fytste alvestêdetocht al 66 kear, en wol takom jier wer

De fytsers krije yn Parregea stipe fan dizze bern en man, dy't der alles oan dogge om harren it lêste stikje troch te krijen. "Nog een klein stukje", roppe de bern, wylst de man mei deksels fan in panne klapperet.

Der binne oant no ta sa'n 8.500 minsken oer de finish, seit foarsitter Stephan Rekker. "Oant no ta is it in fantastyske dei."

De 36-jierrige Ruurd-Jan Sonnega hat koartlyn te hearren krigen dat er foar de tredde kear yn syn libben kanker hat. It is útsiedde yn syn botten en dêrom wurdt er net mear better.

Dochs hat er fan 'e moarn besletten om hjoed mei te dwaan oan de Alvestêdetocht. Neffens syn âlders woe er koste wat kost op 'e fyts. "Dan tinkst, it kin net wêze dat dy jongen siik is. It is sa ûnwerklik, it is bijna net te leauwen", seit syn mem.

Ruurd syn âlders en in goede freon wachten by de finish op him.

Hieltyd mear fytsers hawwe de Tocht achter de rêch en dêrom is it tige drok by de finish yn Boalsert.

It wie in drokke dei foar de EHBO'ers yn Aldemardum. Sa behannelen se minsken mei spierpine, ien mei eachletsel en sels twa minsken dy't stutsen wiene troch in ealjebij.

No binne de measte minsken Aldemardum wol foarby en hawwe se it wat rêstiger.

Winda Veldman hat maleur. Har fyts is stikken gien. Se sit no by Warns te wachtsjen op de servicebus.

Ek Timo Jepkema fytst mei yn Team Simone. No hie Timo wat lêst fan in tsjinslach, want hy wie syn stimpelkaart kwytrekke.

De kaart waard fûn yn Starum en waard troch twa Switsers nei Hylpen brocht, wêrnei't Timo wer trochride koe.

Foar Simone Scheffer is it in nuvere tocht. Se is trije kear fallen. "En dat is my noch noait gebeurd!"

Se sil nei alle gedachten net foar 20.00 oere by de finish wêze, mar hat der alle fertrouwen yn dat se de ein hellet. "It is fierder in hiele goeie Tocht, mei moai waar en net in soad wyn."

Se fytst sa wer fierder, mar net foardat se in lekker pûdsje chips opyt.

Tecla Sikkes-Brandsma (69) en Akke Terbraak-van der Werf (79) binne de earste froulju dy't de Tocht foar de 50e kear fytse. En dat los fan inoar, want de twa froulju koene inoar foar dizze edysje noch net iens.

No binne se by tafal beide yn Starum. Noch sa'n 30 kilometer te gean. De froulju hawwe der alle betrouwen yn dat dat goedkomme sil.

Tinus fytst de Alvestêdetocht al jierren op syn bakkersfyts. "Ik kin wol op de racefyts, mar dan sjochst allinnich mar tegels en asfalt omdatst as in spear foarút giest. Op dizze fyts kin ik moai om my hinne sjen."

De 80-jierrige Yme hat foar de 50e kear de Alvestêdetocht fytst. "Ik bin tankber dat ik it noch dwaan kin", seit er.

Syn frou wachte by de finish op him en oerhandige him in spesjale ketting, dy't se foar him makke hie.

Akke Terbraak fytst de Tocht foar de 50e kear en mocht fan 'e moarn it startskot dwaan. En sa te sjen is se noch hieltyd fleurich!

Harmen fytst de Alvestêdetocht foar de 30e kear en hat dêrom in spesjaal personalisearre shirt krigen fan syn trije dochters.

Hoe spesjaal oft de Tocht ek is, foar dizze Friezen om utens is it dit jier "in trainingsronde".

Al 20 jier wenje sy in Noarwegen. Begjin july fytse se yn njoggen dagen fan Noarwegen nei Parys om jild yn te sammeljen foar bern mei kanker.

Dizze bern stiene te wachtsjen op Johan en Johan. En dêr binne se!

Twaling Haring en Steffen fytse de Alvestêdetocht foar de 40e kear. Dêrom wurde se traktearre op in hapke en in moai spandoek.

Yn Ljouwert wurde yntusken de lêste stimpels set.

Frijwilliger Judith docht it stimpeljen dit jier foar it earst, "maar als het aan mij ligt zullen er nog vele edities volgen".

De fytsers dy't as earst oer de streek kamen by de finish yn Boalsert wurde huldige.

Dizze grutske pakesizzer makket mei har boerd by Burdaard in soad pakes bliid, mar ien yn it bysûnder!

Ek de 7-jierrige Dylano is drok oan it stimpeljen. Dat docht hy yn Starum.

Wylst de measte fytsers noch in flink ein moatte, binne de earste fytsers yn Boalsert yntusken oer de streek kaam!

Ek yn Aldemardum sitte bern te wachtsjen op harren heit, Simon.

En wat krijt heit te hearren as er by harren del fytst? "Hup Simon, heuj!"

Luna (10) en Jade (7) hawwe in moai spandoek makke foar harren heit. Se steane tegearre mei mem en pake yn Snits om heit oan te moedigjen.

Yn Dronryp sit in groep jongerein mei in speaker en in bierke oan de kant fan 'e dyk: "As wy in ekskús ha om in feestje te meitsjen, dan dogge we dat graach."

De 6-jierrige Jens is tegearre mei syn beppe Ineke Kooiman-van Homoet oan it stimpeljen yn Aldemardum.

Jens wennet yn Súd-Hollân, mar syn famylje hat in histoarje mei de Tocht. Yn 1985 kaam beppe as de tredde frou fan dat jier oer de finish op de redens en heit en pake fytse hjoed mei. En dus woe hy ek belutsen wêze!

Yn Frjentsjer waarden even ferkearde stimpels set, nammentlik dy fan Ljouwert.

Neffens rayonhaad Wilfred Yedema fan Ljouwert leveret dat lykwols gjin problemen op foar de fytsers: "Zie het maar als een collectorsitem", laket hy.

Simone Scheffer is krekt foar Ljouwert foar de twadde kear fallen. Dit kear levere it har in ferwûning oan de knibbel en in klap op 'e holle op, dêr't se bot lêst fan hie.

Mar sa posityf as se is wie se yn Ljouwert alwer drok dwaande om donaasjes binnen te heljen.

De fytsers dy't yn Aldemardum yn de rein stiene te wachtsjen meie wer troch, der wurdt wer stimpele. En dat is net it iennige positive, want de sinne komt der ek troch!

De measte fytsers binne Dokkum yntusken foarby. De lêste stimpels wurde dêr op dit stuit set.

De earste fytsers binne yn Aldemardum, dêr't se oant 12.30 oere wachtsje moatte oant se fierder fytse meie.

Jelte Faber en Janiek de Boer binne neef en nicht en hawwe in moaie outfit makke. As 'Buurman en Buurman' kamen se yn Ljouwert oan.

It is de earste kear foar de twa, ferline jier sieten se yn de tún by pake en beppe te sjen nei de fytsers en tochten: dit kinne wy ek wol.

In berm by in fytspaad by Dronryp del stiet fol mei campingstuoltsjes, auto's en campers.

In soad freonen en famylje ha harren sammele om de dielnimmers oan te moedigjen.

By Marsum ha guon supporters it harren wol hiel komfortabel makke. Gjin túnstuoltsje by de dyk mar in wiere hottub, makke fan in omboude wein achter in trekker.

Underyn leit in hoop brânend hout dat it wetter ferwaarmet. Yn it wetter steane twa picknicktafels dêr't de supporters lekker oan sitte kinne. En yn it waarme wetter is der hast neat better as in kâld bierke.

"Wy tochten: wy moatte mar even op fakânsje yn eigen lân."

Ek lekke bannen hearre by sa'n tocht. Dizze frou fytst de 235 kilometer allinnich en moat yn Marsum wachtsje op de servicebus dy't hooplik har bân oplaapje kin.

Ek Fytsalvestêdetochtfeteraan Wiebe Tolsma hat Dokkum berikt. Tolsma fytst de tocht foar de 66e kear, sûnt er 15 is docht er mei. "Je moasten doe eins sechstjin wêze, mar de kontrôle wie noch net sa strang, en ik wie bêst wol grut", fertelt er as er troch it sintrum rint.

It bysûndere oan Tolsma is dat er gjin fytsklean, mar in hiel pak oan hat, mei dit jier: in kroan op de helm. "Ik ha myn tsiende kear yn pak dien, myn 25e kear yn sjaket. Dit jier binne alle pakesizzers en alle bern mei, dan wol ik it ek goed yn pak dwaan."

Tolsma hat mar in pear edysjes sûnt syn 15e mist. "Doe moast ik yn tsjinst, ik haw 'm yn dy jierren wol op eigen gelegenheid fytst, mar dy telle net mei."

De feteraan tinkt dat er takom jier noch wol in kear meidwaan sil. "As ik sa bliuw sa't ik no bin."

Yn Ljouwert komme de fytsers oer it Aldehoustertsjerkehôf, en dêr ha se dit jier útsjoch op net allinnich de Aldehou, mar in grut bouwurk.

It is in grut kultuerprojekt fan Arcadia, basearre op in katedraal dy't fiifhûndert jier ferlyn op dat plak stien hat.

De romte is troch it bouwurk wat beheind, en dêrtroch is it wat drok, mar it stimpeljen giet fierder prima.

De fytsers hawwe op dat plak 108 kilometer yn de skonken.

Doeke Plantinga stiet yn Ljouwert by de rûte del om de fytsers oan te moedigjen. Dat docht er moai ûnder it ôfdakje fan in fytsestalling.

Ek hat er in grutte box by him om wat sfear by de fytsers te bringen. Artysten as James Last en Captain Cook komme foarby.

Simone Scheffer fytst de tocht foar de tritichste kear, se fytst op it stuit tusken Holwert en Dokkum, mar lei ek al langút. "Ast de skuon net goed út de klikpedalen klikst, dan falst sa opside."

Se fytst foar it goede doel: in duofytsoanhinger foar soarchbuorkerij Veldzicht yn Parregea.

Der binne 14.014 fytsers fan start gien, dat meldt foarsitter Stephan Rekker. Dat betsjut dat in lytse tûzen fytsers net opdagen kommen binne.

"It is frij gebrûklik dat in lytse tsien prosint net fan start giet", seit Rekker.

Sa as alle jierren earet Frjentsjer syn skiednis as universiteitsstêd troch de stimpels útdiele te litten troch professoaren.

It swiertepunt fan de drokte ferskoot no wat nei Holwert, dêr komme grutte kloften fytsers binnen.

En ek it sintsje is derby, dêr't de fytsers it fan 'e moarn al troffen mei it waar set dat dus troch. Wol kin de wyn letter wat oanlûke oant in krêft 4 mei útsjitters nei krêft 5.

Yn Harns binne no in soad fytsers te finen. De ferwachting is dat de lêste fytsers dêr om 09.30 komme, dêrnei giet de kontrôlepost ticht.

Dat betsjut dat de de stimpelinket dêr op it stuit goed brûkt wurdt.

Under mear troch Age Tichelaar, hy sit foar de 49e kear op syn troan. "Het zit heerlijk, ik vind het machtig mooi werk."

Yn Dokkum binne ek de earste fytsers sinjalearre. Nei hast trije oeren fytse, ha guon wol ferlet fan wat kofje en in gebakje.

Dizze fytsers hawwe der 80 kilometer opsitten.

De earste fytser wie om 07.03 yn Holwert en krige in stimpel.

It doarp Wommels hat dit jier regelje kinnen dat de tocht wer troch it doarp komt. Se moasten allinnich wol sels de frijwilligers leverje.

Lês hjirûnder hoe't it doarp him tarette:

It giet as it slydjaget; de earste kleurrike wynjekjes binne al by Harns spot. Dat betsjut dat de earste 19 kilometers derop sitte: noch 216 te gean.

In bekend gesicht foar de fêste fytsers: Akke Terbraak docht foar de 50e kear mei en mocht dus it startskot jaan yn Boalsert.

Under begelieding fan bemoedigjende drummuzyk fan showband Hollandia út Boalsert stapten de earste dielnimmers op 'e fyts.

Yntusken hawwe de earste fytsers yn Boalsert it startskot krigen om oan de tocht útein te setten!

De fytsers starte yn 23 groepen, de lêste groep mei om 08.00 oere fuort. Yn eltse groep sitte sa'n 650 dielnimmers.

Foar de start hie ek it publyk de wekker al betiid te stean: der steane al aardich wat oanmoedigers by de stekken.

Wolkom yn it blog oer de Fytsalvestêdetocht! Hjir folgje wy de fytsers op de foet yn harren tocht troch de provinsje.

Fan 08.00 oere ôf is de dei ek te sjen fia in livestream op ús webside.