Bergsma-en-dy pakke de krânsen yn Sint-Anne | Wrâldtitel foar Kyakonye mei knockout

Al nei fjouwer minuten kaam sc Hearrenfean yn it eigen stadion op foarsprong tsjin de nûmer trije fan de earedivyzje: Feyenoord. Christijan Petrov sette syn ploech op 1-0. Ut de alderearste corner fan de partij koppe de Bulgaar binnen.

Nei de kreaze start wie der al gau minder nijs foar de thúsploech. Nei in ûngelokkige botsing mei teamgenoat Petrov moast doelman Andries Noppert krekt al nei in kertier fan it fjild. De blessearre Noppert waard ferfongen troch Mickey van der Hart.

De tuskenstân: 1-0.

Willy Kyakonye is wrâldkampioen boksen fan de World Boxing Federation. De 30-jierrige swiergewicht-profbokser makke sneontejûn yn ien ronde dien wurk op it boksgala yn it Kealledykje yn Ljouwert.

Foar't de einbel dy't fan de earste ronde klonk, lei hy syn goed fjirtich kilo swierdere tsjinstanner Wilmer Vásquez om. Der stiene tolve rondes op de planning. De Venezolaan kaam net mear oerein binnen de stelde tiid en dat betsjutte dat Kyakonye de winner wie.

"Ik bin sa bliid. Dit draait net om my. Ik bin gjinien. Elkenien om my hinne hat dit mooglik makke", spruts de Ingelskpratende Kyakonye nei de wedstriid yn nederige wurden.

It fierljepseizoen is offisjeel wer los. Fan 'e jûn waard de earste wedstriid ljept. Rutger Piersma wie de úteinlike winner yn Burgum (19.70 meter).

"Dit is wol hiel noflik om sa wer te begjinnen", sei Piersma nei de wedstriid. "Ferline jier siet ik der hielendal net noflik yn troch drokte op it wurk. Dat mentale aspekt ha ik no wat farre litte kinnen en ik spring no frijer."

Op de earste wedstriid yn Burgum kaam in hantsjefol publyk ôf. Benammen de wyn makke it kâld en dus bleaune in soad leafhawwers earst thús.

Foar de ljeppers sels moast de earste wedstriid ek wer wenne. Hast elkenien ljepte wol in kear wiet.

"Ja, dat moat dan altyd efkes wenne as je de hiele winter op de eigen skâns traine. No stean je wer op in oare en dus moatte je der efkes ynkomme", neffens Piersma.

By de froulju wie Inger Haanstra mei 15.66 meter de bêste. Germ Terpstra, de sensaasje fan ferline jier by de junioaren, wûn no ek wer yn syn kategory (19.54 meter).

ONS Snits hat mei 1-0 ferlern fan DZC '68 út Doetinchem.

Cas Evers makke de iennige goal fan de wedstriid.

Harkemase Boys hat mei 2-4 wûn fan SV Urk.

De Boys giene mei in 0-2 foarsprong it skoft yn troch goals fan Joris Adams en Rik de Boer, mar liken de winst dêrnei fuort te jaan: Urk skoarde twa kear.

Yn de 85e minút soarge Bart Kooistra der lykwols foar dat Harkema dochs wer op foarsprong kaam op Urk. Kian Visser makke yn de blessueretiid sels noch de 2-4.

It is dêrtroch wis dat Harkema op it twadde plak einiget yn de tredde divyzje. Se sille dêrtroch meidwaan oan de play-offs om promoasje nei de twadde divyzje.

Oare wike stiet earst noch de lêste kompetysjewedstriid tsjin HSC '21 op it programma.

De froulju fan sc Hearrenfean hawwe harren lêste kompetysjewedstriid yn de earedivyzje mei 2-0 ferlern fan Telstar.

Nicci Berrevoets en Jannette van Belen makken yn de twadde helte de doelpunten yn Velsen-Zuid.

De froulju fan Hearrenfean einigje op it njoggende plak yn de kompetysje. FC Twente is kampioen wurden. Sy wûnen mei 3-2 fan AZ en dat wie genôch foar de titel.

Willem Wiersema hat dochs de gouden medalje ferôvere op it WK yn de Ilca 7-klasse, earder bekend as de Laser-klasse.

De 23-jierrige Eastermarder like him yn it Sineeske Qingdao tefreden stelle te moatten mei sulver, mar nei in protest gie de wrâldtitel dochs noch nei Wiersema.

Willem Wiersema hat foar in ferrassing soarge troch twadde te wurden op it WK silen. It is foar de Eastermarder de earste medalje op in wrâldkampioenskip.

De 23-jierrige Wiersema sylt yn de ILCA7-klasse. Dat is de eardere Laser Radial, dêr't Marit Bouwmeester ek yn sylde.

It WK kaam stadich op gong, want de earste fjouwer dagen wie der yn it Sineeske Qingdao net genôch wyn om te silen. Freed koe der pas úteinset wurde. Uteinlik koene der noch fjouwer wedstriden syld wurde.

Wiersema hie yn in dielnimmersfjild mei 138 silers ien minne wedstriid (24e), mar dy mocht er ôflûke. Uteinlik einige de Fries op likefolle punten as de Syprioat Pavlos Kontides, âld-olympysk kampioen. Mar omdat dy twa wedstriden wûn hie en Wiersema ien, gie it goud nei Kontides.

De sulveren medalje is boppe ferwachting foar Wiersema. Foarôf wie syn doel om de top acht te heljen, sadat er in A-status krije soe fan NOC*NSF. Dêr is er dus glânsryk yn slagge.

"Ik ben ongelofelijk blij. Mijn eerste medaille op een senioren-EK. Ik ben heel erg trots dat het is gelukt", seit Wiersema. "Wat daaruit volgt, is allemaal op weg naar een Olympysche medaille natuurlijk."

De Ljouwerters lizze út de play-offs. Tsjin Den Bosch waard it nei de ferlinging 1-1.

Omdat Cambuur earder dizze wike al ferlear yn Den Bosch, is it aventoer foarby.

De 14.027 taskôgers yn it Kooi Stadion moatte noch even geduld hawwe oant se witte oft harren ploech yn de race bliuwt foar in plak yn der earedivyzje.

Tsjin Den Bosch stiet it 1-0, mar omdat Den Bosch earder dizze wike thús al mei 1-0 wûn hat, stiet it eins lyk.

Cambuur domniearret de wedstryd: yn balbesit én yn kânsen. Se witte lykwols lang net alle kânsen te benutten. Allinnich oanfierder Mark Diemers wist in frije traap yn de goal te sjitten.

En dus wurdt it in ferlinging.

Tiny Hoekstra (28) út Rinsumageast set nei dit seizoen in punt efter har profkarriêre. De oanfalster fan Ajax spile sûnt 2012 op it heechste nivo yn Nederlân. Hoekstra begûn har karriêre by sc Hearrenfean. Yn 2021 makke se de oerstap nei Ajax.

Foar de Amsterdamske klup spile se 114 wedstriden en skoarde 49 doelpunten. Dêrmei heart se ta de fiif topskoarders fan alle tiden fan de Ajax Froulju.

Trainer Robin Veldman fan sc Hearrenfean giet derfan út dat syn ploech him kommende snein kwalifisearret foar de play-offs foar Europeesk fuotbal.

"We hebben nog geen vakantieplanning doorgestuurd of afscheidsberichten van spelers klaar staan", seit Veldman.

"Wij willen ons richten op de volgende wedstrijden. Eerst op zondag en daarna op donderdag (earste wedstriid play-offs, red.). We hebben de hele agenda tot en met volgende week maandag vol staan."

Hearrenfean hat it noch altiten yn eigen hân om de play-offs te heljen, mar dan moat der yn it eigen Abe Lenstra stadion wol wûn wurde fan Feyenoord. By elts oar resultaat is de ploech ôfhinklik fan de resultaten op de oare fjilden.

"We hebben op de bank iemand met de "teletekst-app" en zo kunnen we tijdens de wedstrijd de resultaten op de andere velden in de gaten houden", seit Veldman.

"Eventueel kunnen we daar naar handelen, want we willen vooral zelf een goede prestatie neerzetten."

Nei de twa ferliespartijen tsjin RKC Waalwijk en Go Ahead Eagles hat Hearrenfean himsels yn in lêstige posysje manoeuvrearre. NEC, Sparta, FC Grins, PEC Zwolle en Heracles meitsje allegear noch kâns op in play-off ticket.

Oanfierder Luuk Brouwers jout oan dat it him bot dwaande hâldt. "Alle scenario's zijn tijdens het ontbijt en de lunch wel besproken. Een gelijkspel tegen Feyenoord zou misschien genoeg kunnen zijn, maar laten we daar niet naar kijken. We gaan vol voor de winst, dan zijn we 100% zeker en niet afhankelijk van anderen."

Middenfjilder Marcus Linday keart nei alle gedachten werom yn de wedstiidseleksje. De Sweed krige tsjin RKC Waalwyk in traap tsjin syn holle en miste dêrtroch de wedstriid tsjin Go Ahead Eagles.

Freed hat Linday wer folslein mei de groep meitraind. "Hij heeft alles mee kunnen doen en het ziet er positief uit", seit Veldman.

Alireza Jahanbakhsh is der tsijn Feyenoord hoe dan ek net by. Foar fleugeloanfaller Ché Nunnely is it in race tsjin de klok en ek achter de namme fan doelman Mickey van der Hart stiet in grut fraachteken.

De tsjinstanner fan LWD Basket yn de heale finale fan de play-offs is ZZ Leiden. De earste wedstriid yn in 'best of five' tusken de Ljouwerter basketballers en dy út Leiden wurdt tiisdei spile. LWD Basket hat dan it thúsfoardiel.

Trainer Henk de Jong hat syn seleksje dizze wike op skerp set foar de return tsjin FC Den Bosch. SC Cambuur moat freed in 1-0 efterstân goed meitsje om nei de twadde ronde fan de play-offs te gean.

"Play-offs is 'de dood of de gladiolen'", seit De Jong. "Dêr moatte we ek nei spylje en hannelje. Dêr ha ik mei dwaande west en dat wie ek te fernimmen foar de spilers."

Benjamin Pauwels keart werom yn de basis. Hy miste moandei noch fanwegen in blessuere, mar is der foar de twadde wedstriid wer by. Dêrtroch sit Ilias Alhaft wer op 'e bank. De Jong woe net sizze oft er fierder noch wikselet yn syn opstelling.

Yn alle gefallen hat er wer wat mear te kiezen, want yn fergelyk mei de wedstriid fan moandei kinne Maikel Kieftenbeld en Jeredy Hilterman wer diel útmeitsje fan de seleksje.

Cambuur moat mei twa doelpunten ferskil winne om hoe dan ek troch te gean. At Cambuur mei ien goal ferskil wint, dan wurdt it ferlinging en eventueel strafskoppen. Dêrom hat De Jong syn ploech dêr woansdei en tongersdei ek op traine litten.

Sportklup Hearrenfean hat mei 1-0 ferlern op besite by Go Ahead Eagles yn Deventer.

Hearrenfean begûn mei in flink tal wizigingen oan de wedstriid yn Deventer. De opfallendste dêrfan wie dat Mats Köhlert yn de oanfal stie. Dêr spile hy by Willem II ek wol, mar by Hearrenfean spilet de Dútser as ferdigener.

Yn de earste helte wie Hearrenfean de ploech dy't de measte kânsen kreëarre. Milos Lukovic skeat krekt oer de goal, wylst in kopbal fan Hristiyan Petrov pakt waard troch keeper Jari de Busscher. Jacob Trenskow krige ek in grutte kâns, mar syn skot waard ek tsjinholden troch De Busscher.

Yn de twadde helte gie Hearrenfean fierder mei it kreëarjen fan kânsen. In skot fan Levi Smans einige yn de hannen fan De Busscher.

Trenskow, Smans en Oliver Braude seagen harren skotten dêrnei neist of oer de goal fleane, wylst Petrov opnij de bal mei in kopbal net lâns De Busscher krige.

Tsjin de ein fan de wedstriid waard Go Ahead gefaarliker. Spits Victor Edvardsen wie ticht by de 1-0, mar Andries Noppert pakte de bal. Yn de lêste minuten krige Hearrenfean dochs noch in tsjingoal. Mathis Suray skeat de bal achter Noppert.

De Feansters besochten dêrnei noch om de lykmakker te meitsjen, mar dat slagge net.

Hearrenfean spilet takom snein de lêste wedstriid fan it seizoen yn it Abe Lenstra Stadion tsjin Feyenoord. Yn dy wedstriid moat de ploech besykje om him te pleatsen foar de play-offs om Europeesk fuotbal.

Op it stuit stiet Hearrenfean njoggende yn de earedivyzje.

Hearrenfeanmiddenfjilder Marcus Linday kin woansdei net meidwaan yn de útwedstriid tsjin Go Ahead Eagles. Ofrûne sneon foel de Sweed blessearre út, nei't er in traap tsjin 'e holle krigen hie.

"Dan gaat het hersenschuddingsprotocol in", seit trainer Robin Veldman. "De dokter beslist. We nemen geen enkel risico. Hij heeft ook licht getraind deze week en we bellen geregeld om contact te houden en en ervoor te zorgen dat hij niet steeds naar een scherm kijkt."

Veldman hopet Linday wol gau werom te hawwen. "Gelukkig is het geen zware hersenschudding en is de kans groot dat-ie zondag tegen Feyenoord wel mee kan doen."

Nikolai Hopland wie dit wykein siik, mar kin yn Deventer wol wer meidwaan. En Luuk Brouwers komt werom fan in skorsing.

Ilias Sebaoui krige tsjin RKC Waalwijk in reade kaart en mist dêrtroch de wedstriden tsjin Go Ahead Eagles en Feyenoord. Wa't him ferfangt, wol Veldman net sizze. Jordy de Wijs trainde dizze wike wer mei en kin mooglik yn de play-offs wer oanslute by de seleksje.

Tennisser Sander Arends fan Ljouwert hat tegearre mei syn maat Luke Johnson ferlern yn de achtste finale fan it ATP-toernoai yn Rome.

Tsjin Marcel Granollers (Spanje) en Horacio Zeballos (Argentinië), it duo dat him as fjirde pleatste, waard it 6-4 3-6 10-4. Dêrmei lizze Arends en Johnson út it toernoai.

It toernoai yn Rome is ien fan de njoggen ATP Masters 1000-toernoaien. Dat binne nei de fjouwer grand slams en de ATP Finals de belangrykste toernoaien yn it jier.

Sportklup Hearrenfean hat in konkurrint minder yn de striid om kwalifikaasje foar de play-offs om Europeesk fuotbal.

Fortuna Sittard sil, op hokker plak oft se ek einigje, net meidwaan oan de play-offs. De klup hat gjin UEFA-lisinsje oanfreegje kinnen en dêrmei is dielnimming oan de play-offs op foarhân útsletten.

Fortuna Sittard stiet op dit stuit op it njoggende plak yn de earedivyzje, dat plak soe rjocht jaan op play-offdielnimming. Hearrenfean stiet in plak heger mei in punt mear.

SC Cambuur hat syn earste play-offwedstriid om promoasje nei de earedivyzje ferlern. Yn it útduel tsjin FC Den Bosch waard it 1-0.

De Ljouwerters begûnen aardich fûl oan de wedstriid, mar koenen yn de earste helte gjin echte kânsen kreëarje. Nei tweintich minuten spyljen sette Konstantinos Doumtsios FC Den Bosch op foarsprong.

In grutte kâns foar Nicky Souren op de lykmakker gie der net yn by Den Bosch. Flak foar it skoft slagge de thúsploech der hast noch yn om fierder út te rinnen. Dat skot gie lykwols heech oer it doel fan Cambuur.

Yn de twadde helte giene de Ljouwerters opnij op syk nei de lykmakker. It reinde lykwols giele kaarten oan beide kanten, mar gjin doelpunten.

Freed spilet Cambuur nochris tsjin Den Bosch, dan is de return yn Ljouwert.

Hearrenfean moat it de lêste twa kompetysjewedstriden fan dit seizoen stelle sûnder Ilias Sebaoui. De oanfaller krige in reade kaart yn de wedstriid tsjin RKC Waalwijk (3-1 ferlies).

Sebaoui mist de wedstriden tsjin Go Ahead Eagles en Feyenoord. Mocht Hearrenfean him pleatse foar de play-offs, dan kin Sebaoui wol wer meidwaan.

Tennisser Sander Arends hat de achtste finales fan it ATP-toernoai yn Rome berikt. Mei syn maat Luke Johnson wie er yn twa sets te sterk foar it Braziliaanske duo Rafael Matos / Marcelo Melo (6-2, 6-3).

Yn de achtste finales spylje Arends en Johnson tsjin Marcel Granollers (Spanje) en Horacio Zeballos (Argentinië). Dat duo is as fjirde pleatst yn Rome.

It toernoai yn Rome is ien fan de njoggen ATP Masters 1000-toernoaien. Dat binne nei de fjouwer grand slams en de ATP Finals de belangrykste toernoaien yn it jier.

IIshockeyer Frits Doop fan Grou ferlit de UNIS Flyers. Doop makket de oerstap nei HIJS Hokij út Den Haag.

Doop is in ferdigener dy't de jeugdoplieding fan de Flyers trochrûn hat en foar dy ploech syn debút makke hat op it heechste nivo.

Wolkom yn it sportbloch fan dizze wike. Wolst yn dyn Omrop-app in melding krije by in nij berjocht? Klik dan op it beltsje boppe-oan dit bloch.

It bloch fan ferline wike kinst hjirûnder weromfine.