Sulver foar Schulting en brûns foar Prins op NK sprint

De folleyballsters fan Friso Snits binne der fan 'e middei net yn slagge de BeNe Cup te winnen. Yn sportkompleks Maaspoort yn Den Bosch ferlear de ploech mei 3-1 yn sets fan Asterix Avo út Beveren (België).

De earste set gie mei 25-21 nei de Belgyske klup. Dêr't it earst noch wol spannend wie, pakte Asterix Avo de twadde set frij ienfâldich: 25-13. Dêrnei kaam Snits yn de tredde set kreas werom: 25-22.

It like derop dat de Friezen dy line trochlûke koene, mar se moasten healweis de fjirde set de Belgen dochs gean litte. Dy pakten mei 25-12 de set en dêrmei de titel.

Joy Beune is Nederlânsk kampioen allround wurden. Se waard tredde op de 5.000 meter yn 6.55,67 en hold dêrmei krekt genôch foarsprong op Merel Conijn. Dy lêste stie foar de lêste ôfstân noch op it tredde plak, mar ferraste troch op de 5.000 meter in persoanlik rekôr te riden mei 6.48,96. Dêrmei wie Conijn de fluchste op dy ôfstân en giet se nei it twadde plak yn it klassemint.

Antoinette Rijpma-de Jong stie foar it yngean fan de lêste ôfstân twadde, mar waard yn it einklassemint tredde troch in stadige 5.000 meter: 7.10,11.

It wie net it wykein foar Marijke Groenewoud. Sneon stie se nei twa ôfstannen al op efterstân fan de top trije en dat waard snein allinnich mar grutter. Groenewoud waard fjirde, al ried se noch wol in goeie 5.000 meter wêrop se twadde waard.

Groenewoud mei troch har fjirde plak net meidwaan oan it Europeesk kampioenskip allround. Beune, Conijn en Rijpma-de Jong ha harren pleatst foar it EK allround op It Hearrenfean, dat oer twa wiken is.

Femke Kok giet hjoed net fan start op de twadde dei fan it NK sprint. De Nij Beetse hat har fan 'e moarn ôfmeld foar de twadde 500 en 1.000 meter. Kok sei juster nei de earste dei al te twiveljen oft se de twadde dei wol ride soe.

Dat hat te krijen mei har herstel. De earste moannen fan it reedrydseizoen miste Kok fanwege it cmv-firus.

Juster makke se har rentree en ried se de earste offisjele wedstriden fan it seizoen. Dat die Kok goed mei de winst op de 500 meter en in tredde plak op de 1.000 meter. Yn it klassemint stie se twadde nei de earste dei en dêrmei makke se ek in goeie kâns op pleatsing foar it EK sprint.

Troch har no ôf te melden, giet der yn prinsipe in streek troch de EK-kânsen fan Kok. Se moast dêrfoar op it poadium einigje fan it NK sprint, mar dat is no dus net mear mooglik. Se soe troch it reedrydbûn KNSB noch wol oanwiisd wurde kinne foar it EK.

Antoinette Rijpma-de Jong is twadde wurden op de 1.500 meter fan it NK allround. Se ferlear yn in streekrjocht duel fan Joy Beune, dy't hast in sekonde flugger wie as Rijpma-de Jong. Dêrtroch nimt Beune de kopposysje oer yn it klassemint fan it NK allround.

Op de ôfslutende 5.000 meter ferdigenet Beune in foarsprong fan mear as twa sekonden op Rijpma-de Jong. Op it tredde plak stiet Merel Conijn. De earste trije pleatse harren foar it Europeesk kampioenskip allround.

De kâns is grut dat Marijke Groenewoud dêr net by sit. Op de 1.500 meter waard se sânde, wêrtroch't se yn it klassemint fjirde stiet. Se moat lykwols in ferskil fan hast fjirtjin sekonden goedmeitsje op Conijn om it poadium te heljen.

De iishockeyers fan It Hearrenfean ha thús ferlern fan de Eaters Geleen, der moast wol overtime oan te pas komme. It waard 4-5 foar de ploech út Limboarch.

Doelpuntemakkers foar de Flyers wiene Tuukka Rajamäki, Tony Demelinne en Tom Speel. By Geleen spile Steinmetz in goeie wedstriid, hy iepene de skoare en makke de winnende goal yn de ekstra tiid.

It wie de tredde kompetysjewedstriid foar de Flyers yn de CEHL, in kompetysje mei klups út Nederlân, België en Dútslân. De Flyers ha ien wûn en no twa ferlern.

Tim Prins hat him op it NK sprint revansearre foar syn minne 500 meter. Op de 1.000 meter wie er mei in tiid 1.07,56 it rapst fan allegear.

Troch syn goede 1.000 is Prins opklommen nei it fjirde plak yn it algemien klassemint. It ferskil mei koprinner Jenning de Boo is noch wol grut. Op de 500 meter fan snein ferdigenet De Boo in foarsprong fan 0,94 op Prins.

Jouster Rem de Hair koe net ferrasse op de 1.000. Mei in tiid fan 1.11,14 waard er njoggentjinde.

Femke Kok stiet nei de earste dei fan it NK sprint op it twadde plak. Op de 1.000 meter wie Jutta Leerdam in stik flugger as Kok, wêrmei't se har foarby gie yn it klassemint.

It wie foar Kok de earste 1.000 meter fan it seizoen. Se notearre in tiid fan 1.15,23 en waard dêrmei tredde. Leerdam kaam oer de streek yn 1.14,15 en pakt dêrmei de lieding.

It twadde plak op de 1.000 meter wie foar Suzanne Schulting, sy wie ien hûnderste rapper as Kok. Yn it klassemint stiet Schulting no tredde.

Tim Prins is op de earste 500 meter fan it NK sprint as tolfde einige. Ploechgenoat Jenning de Boo wie mei 34,30 mear as in sekonde flugger as Prins.

Yn syn rit tsjin Kjeld Nuis hie Prins op de earste hûndert meter in flinke misslach. Dat koste him in bulte tiid en dêrmei wie in goede útslach net mear mooglik. Hy kaam oer de streek yn 35,33.

Jouster Rem de Hair ried 35,44 en waard dêrmei trettjinde.

Sneontemiddei ride de manlju ek noch in 1.000 meter.

Femke Kok hat yn har earste offisjele wedstriid fan it seizoen fuort in goede tiid delset: mei 37,39 wûn de Nij Beetse de earste 500 meter op it NK sprint yn Thialf.

Kok miste it begjin fan it seizoen, omdat se besmet wie mei it cmv-firus. Ferline wike makke se al yndruk op in trainingswedstriid, doe't se 37,45 ried. Hjoed wie se noch wat rapper.

Op it twadde plak, 0,35 seconde efter Kok, einige Jutta Leerdam op it twadde plak.

Suzanne Schulting waard fjirde (37,98), Marrit Fledderus fiifde (38,15), Myrthe de Boer tsiende (39,20). Michelle de Jong melde har juster ôf foar it toernoai.

Marwin Talsma hat wat goed makke op de 5.000 meter. Hy einige as fjirde mei in tiid fan 6.19,45, dêrmei stiet er yn it klassemint as trettjinde.

De oare Friezen einigen bûten de top tsien: Jur Veenje kaam as alfde oer de streek, Gert Wierda dêr lyk achter. Hidde Westra waard fyftjinde.

Chris Huizinga wûn de ôfstân en liedt no ek it klassemint.

By de manlju is de 500 meter op it allroundtoernoai in proai wurden foar Ties van Seumeren. Hy ried de koartste ôfstân yn 36,46. Jur Veenje wie de bêste Fries: mei 37,09 einiget er krekt njonken it poadium: fjirde.

Hidde Westra waard fiifde yn 37,16, Gert Wierda alfde yn 37,60. Marwin Talsma, spesjalist op de langere ôfstannen, waard yn 39,21 lêste op de 500 meter.

Op it stuit ride de manlju de 5.000 meter.

Antoinette Rijpma-de Jong giet nei de earste dei fan it Nederlânsk kampioenskip allround oan de lieding. Se wûn de 500 meter en wist op de 3.000 meter de skea te beheinen. Rijpma-de Jong einige as fjirde yn 4.04,80 op de 3.000 meter, mar hie genôch marzje troch de earste 500 meter.

Dat jildt net foar Marijke Groenewoud. Op de 500 meter moast se al behoarlik tiid ynleverje en op de 3.000 meter joech se mei 4.05,89 ek net thús. Dêrtroch stiet Groenewoud nei de earste dei fan it NK allround op it fjirde plak. Joy Beune is yn it klassemint de nûmer twa en Merel Conijn stiet tredde.

Snein ride de allrounders de 1.500 en de 5.000 meter.

Reedrydster Antoinette Rijpma-de Jong is it NK allround begûn mei in oerwinning. Se wûn de 500 meter yn Thialf yn it tiid fan 38,73 sekonden. Dêrmei naam se ôfstân fan har wichtichste konkurrinten Joy Beune en Marijke Groenewoud.

Beune, de regearjende wrâldkampioene allround, waard mei 39,44 sekonden tredde. Groenewoud sette mei 39,67 de fyfde tiid del, krekt efter ploeggenoate Elisa Dul.

Rijpma-De Jong hie in drege krusing yn har rit tsjin Kim Talsma. Hielendal oan de ein fan it rjochte stik gie se by har tsjinstanner del.

Michelle de Jong docht kommend wykein net mei oan it Nederlânsk kampioenskip sprint. De Rottumse hat har freedtemiddei ôfmeld. Neffens har coach Martin ten Hove fan Team IKO-X2O is De Jong 'helaas niet fit'.

De Jong pleatste har earder dit seizoen wol foar de wrâldbekerwedstriden op de 500 meter. Dêryn wie it njoggende plak har bêste resultaat. De Jong is dit seizoen in stik foarsichtiger yn de wedstriden dy't se rydt, om't se oan de begjin fan dit jier in slimme skynbonkeblessuere hân hat. Dêrtroch ried se twa wiken lyn bygelyks pas har earste 1.000 meter.

Op it NK sprint ride de dielnimmers in 500 en in 1.000 meter op beide dagen. Foar Femke Kok wurdt it har rentree. Se ried dit seizoen noch gjin wedstriden trochdat se lêst hie fan it cmv-firus.

Net allinnich de sprinters komme yn aksje, yn Thialf is dêrneist ek it NK allround.

Leonie Bentveld is by it fjildriden yn Gavere (België) tolfde wurden. De 20-jierrige Burgumse kaam in lytse fiif minuten letter oer de finish as Fem van Empel.

It wie de sechsde wrâldbekerwedstriid fan it seizoen. Yn it klassemint stiet Bentveld no njoggende.

Hjir hâlde wy dy op de hichte fan de lêste ferrjochtingen yn de Fryske sport.

Lês hjirûnder it sportblog fan de ôfrûne wike: