Kening Tjisse Steenstra: "It rûn as in trein"

Tjisse Steenstra waard foar de twadde kear op rige útroppen ta kening. It wie ek de twadde kear op rige dat hy de PC wûn. "De earste is spesjaal, mar dizze is ek wol hiel moai."

"We wienen de hiele dei yn topfoarm en we rûnen der sa oerhinne. It rûn as in trein", seit Steenstra.

"Ofrûne wike hie ik lêst fan de nekke, mar dat wie no klear en dan kinne je gean." It is de lêste kear dat dit partoer op de PC stie. Hans Wassenaar en Renze Hiemstra hâlde op. Steenstra giet nei in oar partoer. "Sy binne hiel bliid, om sa ôf ts sluten, se binne echte bazen. Ik bin hjir noch wol even. Der binne mear dreamen."

"Ik ha it idee dat it oan my lei"

Hessel Postma baalt, nei it ferliezen fan de finale.

"We koene net genôch tsjinstân biede yn de finale. En ik ha it idee dat dat oan my lei. Myn fuotten fielden sa swier dat ik net mear oansette koe.

Patrick Scheepstra: "Ze waren niet te bekaatsen vandaag"

Patrick Scheepstra fan it ferliezende partoer hie al gau troch dat it der yn de finale net yn siet. "Die mannen waren niet te bekaatsen vandaag."

"Tjisse (Steenstra, red.) moest van de bal. Dat was de bedoeling ook, maar als die jongen zo opslaat, dan kun je van alles willen, maar dan moet je die ballen ook maar raken."

Dat Scheepstra syn partoer de finale helle, wie al in goede prestaasje. "Vanaf de loting hadden we al gezegd: het wordt lastig, maar we stonden vliegend te kaatsen. Vandaag zijn we niet blij, maar dat zal morgen anders zijn."

Renze Hiemstra woe "op de Olympus" ôfskied nimme

Renze Hiemstra hie mar ien dream, seit er. Op de Olympus ôfskied nimme. Hiemstra hâldt dit jier op as keatser, mar hy slút net út dat er oait noch op de PC stean sil.

It is de twadde kear op rige dat Hiemstra mei syn partoer de PC wint. No wie it in hiele maklike finale. Foarich jier wie dat oars, doe wie it in thriller.

"Toen zei ik ook al: zonder wrijving geen glans. Deze glimt ook wel, maar die van vorig jaar blonk veel mooier."

Tjisse Steenstra is de terjochte kening, seit Hiemstra. "Hij heeft de hele dag koninklijk opgeslagen."

Tjisse Steensra útroppen ta kening

Tjisse Steenstra is útroppen ta kening fan de 170ste PC.

Steenstra is de iennige fan syn partoer dy't trochgiet. Hans Wassenaar en Renze Hiemstra hâlde der mei op.

It is de twadde kear op rigfe dat Steenstra kening wurdt fan de PC. "We wiene hast foutleas hjoed, alle trije. Sa yn foarm. It gie hiel goed, en dan winne je."

En dan ek noch kening. "Dat is hiel moai. Echt geweldich. Ik hie de bal thús al even poetst, want ik tocht: miskien mei ik 'm wol wer meinimme."

It hie ek samar ien fan de oaren wêze kind, seit Steenstra. "Hans hie it ek wurde kind. Hy hat net in soad flaters makke. En Renze ek, mar in foarynse wurdt hast noait kening."

Sjoch hjir nei de lêste slach en de earste reaksje fan Hans Wassenaar

De finale wie net spannend, fûn ek winner Hans Wassenaar. "Ik fielde it wol oankommen. Dat makket it wol oars as wannear't je in spannende partij winne."

It makket it foar Wassenaar lykwols net minder moai. "Dit is gewoan super." Foar Wassenaar wie it syn lêste PC: "Moaier kin net. We wienen hjoed alletrije goed. We stienen der op de goede mominten. As je him yn it foar úttekenje mochten, dienen je it sa."

STEENSTRA WINT PC!

It partoer fan Tjisse Steenstra wint de PC!

Yn de finale wienen Steenstra-en-dy mei 5-1 6-2 te sterk foar Haye Jan Nicolay, Hessel Postma en Patrick Scheepstra.

Harkje nei de lêste slach en alle reaksjes

Lês ek:

Steenstra, Hiemstra en Wassenaar prolongearje PC-titel nei iensidige finale

Nicolay pakt in punt (5-1)

It partoer fan Nicolay pakt in punt: it is 5-1.

It giet hurd: 5-0

Nicolay hellet yn dit spul net ien punt. It is 5-0.

Steenstra walst oer Nicolay hinne

En it is 4-0. Mei in stân fan 6-4 like it even spannend te wurden, mar Steenstra-en-dy walse oer Nicolay hinne. It liket no wol dúdlik wa't de PC wint.

It wurdt iensidich: 3-0

Mei in boppeslach fan Renze Hiemstra wurdt it 3-0. It wurdt iensidich.

Kin Nicolay noch wat werom dwaan?

Twadde spul foar Steenstra

It twadde spul is ek foar Steenstra-en-dy.

Nicolay kaam op in 4-0 foarsprong, mar Steenstra-en-dy koene it spul keare. It waard 4-6.

Steenstra op foarsprong yn finale: 1-0

It earste earst is foar it partoer fan Steenstra.

De beide partoeren binne oan mekoar weage. Pas by in stân fan 6-6 waard it 1-0.

Finale begjint mei drûch waar

We binne los. It is drûch op it Sjûkelân by it begjin fan de finale.

Titelferdigeners Tjisse Steenstra, Renze Hiemstra en Hans Wassenaar nimme it op tsjin Haye Jan Nicolay, Hessel Postma en Patrick Scheepstra. Nicolay-en-dy fersloegen yn de earste omloop it favorite partoer Van der Bos.

Finale begjint om 17:10 oere

De keatsers ha no in koarte pauze, de finale begjint om 17:10 oere hinne.

"As je yn de earste omloop Van der Bos pakke, komme je yn de flow"

"As je yn de earste omloop Van der Bos pakke, komme je yn de flow." Dat seit Hessel Postma nei ôfrin fan de heale finale. Mei Haye Jan Nicolay en Patrick Scheepstra giet er as 'underdog' de finale yn.

Foar Postma-en-dy begûn de dei op de byfjilden. "It PC-gefoel wie der net echt. Miskien winne we dêrom wol fan Van der Bos. Wy binne it wat mear wend om op sokke fjildsjes te spyljen."

Yn de finale stiet Postma tsjinoer de titelferdigener. "We wolle lekker keatse, en dan sjogge we it wol."

Sa kamen Steenstra en Nicolay yn de finale

Yn dit oersjoch steane de útslaggen fan de 170ste PC. Wy wurkje dit oersjoch hieltyd by.

Klik op it blauwe pylkje om de rest fan it skema te sjen:

Reuzedeader Nicolay yn finale tsjinoer titelferdigener Steenstra

It partoer fan Haye Jan Nicolay is de twadde finalist fan de PC. Yn de heale finale wûnen Nicolay-en-dy mei fan Remmelt Bouma, Allard Hoekstra en Evert Pieter Tolsma.

Haye Jan Nicolay, Hessel Postma en Patrick Scheepstra fersloegen yn de earste omloop it favorite partoer fan Gert-Anne van der Bos, Taeke Triemstra en Erwin Zijlstra.

Gjin bekroaning fan ynhelrace

Evert Pieter Tolsma fan it ferliezende partoer baalt. "Wy hienen in geweldige ynhelrace. De finale siet der echt yn, dus no is it bale."

Tolsma hâldt op mei keatsen. "Ik fyn it spultsje noch hartstikke moai, mar ik ha ek oare dingen te dwaan dêr't ik tiid foar meitsje wol. Mar as se nochris in ynfaller nedich hawwe, meie se my belje."

Nicolay nimt grutte foarsprong

It sil net lang mear duorje foardat we de twadde finalist fan de 170ste PC kenne.

It is yntusken 2-5 yn it foardiel fan Haye Jan Nicolay, Hessel Postma en Patrick Scheepstra yn harren heale finale tsjin Remmelt Bouma, Allard Hoekstra en Evert Pieter Tolsma.

As favoryt de finale yn: "Dêr wurde wy net oars fan"

It partoer fan Tjisse Steenstra, Renze Hiemstra en Hans Wassenaar giet as favoryt de finale yn. "Dêr wurde wy net oars fan", seit Renze Hiemstra.

Steenstra earste finalist yn 170ste PC

De earste finalist fan de 170ste PC is it partoer fan Tjisse Steenstra, Renze Hiemstra en Hans Wassenaar.

Steenstra-en-dy fersloegen Paul Dijkstra, Steven Koster en Rick Minnesma mei 5-3 6-6.

It partoer fan Steenstra is titelferdigener. Steenstra, Hiemstra en Wassenaar wûnen de PC fam 2022.

Steenstra draait it om

It partoer fan Tjisse Steenstra, Renze Hiemstra en Hans Wassenaar hat de efterstân omdraaid yn in foarsprong. It is no 5-3 tsjin Paul Dijkstra, Steven Koster en Rick Minnesma.

By Remmelt Bouma, Allard Hoekstra en Evert Pieter Tolsma tsjin Haye Jan Nicolay, Hessel Postma en Patrick Scheepstra is it 2-2.

Steenstra-en-dy op efterstân

De winners fan de PC fan ferline jier, en de grutte favoryt om de wichtichste keatswedstriid fan it lân wer te winnen, stiet op efterstân yn de heale finale.

Tjisse Steenstra, Renze Hiemstra en Hans Wassenaar steane ferrassend mei 2-3 efter tsjin Paul Dijkstra, Steven Koster en Rick Minnesma.

By Bouma - Nicolay is it 1-1.

Reuzedeaders tsjinoer mekoar yn twadde heale finale

Op it Sjûkelân is de twadde heale finale ek begûn. Dy striid giet tusken de partoeren fan Remmelt Bouma, Allard Hoekstra, Evert Pieter Tolsma en dat fan Haye Jan Nicolay, Hessel Postma en Patrick Scheepstra.

Dizze partoeren ha beide in favoryt ferslein. Bouma-en-dy fersloegen it partoer fan Van Zwieten mei 4-5 6-6, en Nicolay-en-dy fersloegen it partoer fan Van der Bos mei 5-5 6-6.

Earste heale finale los

De earste heale finale is los. It partoer fan Tjisse Steenstra, Renze Hiemstra en Hans Wassenaar nimt it op tsjin Paul Dijkstra, Steven Koster en Rick Minnesma.

Fan no ôf wurde alle wedstriden spile op it Sjûkelân.

Menno van Zwieten: "It fielt net as in PC"

Nei de útskeakeling fan syn partoer yn de twadde omloop sitte de emoasjes heech by Menno van Zwieten. Hy en Gabe-Jan van Popta keatse takom jier mei Tjisse Steenstra yn stee fan mei Pieter Jan Leijenaar.

"Ik gunde Pieter Jan in moai ôfskied", seit Van Zwieten. "We keatse it hiele jier al lekker en dan wolle je hjir ek foar de prizen keatse. Ast sjochst nei hoe't it ferrûn is, hie ik mear jaan moatten."

Syn partoer ferlear mei 4-5 6-6 fan Remmelt Bouma, Allard Hoekstra en Evert Pieter Tolsma, wylst Van Zwieten-en-dy ta de favoriten rekkene waarden. "Dy jonges slaan mear as de helte boppe. Alle lof foar harren."

Van Zwieten hat net op it Sjûkelân west mei syn partoer. "Dit is net PC-weardich. Ik nim it de organisaasje net kwea ôf, mar ik ha net it PC-gefoel hân. Ik hie mear it idee dat ik in benefytwedstriid of in potsje yn de earste klasse keatste."

Perken wurde ferlein

De partoeren meitsje harren no op foar de heale finales. Dy sille beide op it Sjûkelân wêze. Op dit stuit wurde de perken ferlein om't de wynrjochting feroare is.

Fysioterapeut warskôget foar baggerfjild: "Kinst dy samar ferstappe"

It kin hiel gefaarlik wêze om op in wiet fjild te keatsen. Dat seit fysioterapeut Jelle Eijzenga. "Der hoegt mar in bytsje te gebeuren, en je ha in blessuere te pakken."

Eijzenga is der hiel wiis mei dat de organisaasje besletten hat om in part fan we wedstriid op de fuotbalfjilden te ferkeatsen. "Al dy partijen hjir, dat hie absolút net kind."

Alle healefinalisten bekend

De twadde omloop is dien. Nei in pear spannende partijen hawwe de partoeren fan Tjisse Steenstra, Paul Dijkstra, Remmelt Bouma en Haye Jan Nicolay harren pleatst foar de heale finale.

Paul Dijkstra, Steven Koster en Rick Minnesma wienen mei 5-5 6-6 te sterk foar Corné Tuinenga, Bauke Dijkstra en Jelmer Miedema.

Haye Jan Nicolay, Hessel Postma en Patrick Scheepstra fersloegen Bauke Triemstra, Hendrik Jan van der Velde en Riemer Hoekstra mei 5-3 6-6.

Bouma ferslacht Van Zwieten

Remmelt Bouma, Allard Hoekstra en Evert Pieter Tolsma soargje foar de twadde ferrassing fan de dei. It partoer klopt Menno van Zwieten, Gabe-Jan van Popta en Pieter Jan Leijenaar mei 4-5 6-6.

Dêrmei sneuvelet in twadde favoryt. Bouma-en-dy geane troch nei de heale finale.

Van Zwieten hat it dreech

Menno van Zwieten, Gabe-Jan van Popta en Pieter Jan Leijenaar spylje yn de twadde omloop tsjin Remmelt Bouma, Allard Hoekstra en Evert Pieter Tolsma.

Van Zwieten-en-dy hearre by de favoriten, seker no't it partoer fan Van der Bos der al út leit, mar sy hawwe it hiel dreech.

Van Zwieten, Van Popta en Leijenaar joegen in 4-2-foarsprong fuort. It is no 4-4.

Foarsitter PC: Mear drokte op byfjilden as ferwachte

De organisaasje fan de PC hie net ferwachte dat der safolle minsken op de byfjilden komme soene. Dat seit foarsitter Ids Hellinga.

Hellinga seit dat it publyk op de byfjilden twa rigen dik stie. "Dat hiene wy net sa ynskatten. Mar der wiene ek hiele moaie partijen, miskien wol de moaisten oant no ta."

It wie op ien fan de fuotbalfjilden dat it favorite partoer Van der Bos der ôf gie tsjin dat fan Haye Jan Nicolay.

Op it Sjûkelân komt de earste drek al boppe it gers út. Neffens Hellinga bewiist dat dat it in goed beslút wie om út te wiken nei de fuotbalfjilden.

"Net allinne it waar wie ús soarch, mar ek it fjild. Fyftjin partijen kinne we hjir net ferkeatse." Hellinga seit dat it fjild op it Sjûkelân ek noch ferlein wurde kin. "Dan wurdt de belesting ferdield."

Earste healefinalist bekend

De topfavoryt foar de einoerwinning, it partoer fan Tjisse Steenstra, Renze Hiemstra en Hans Wassenaar hat mei 3-5 4-6 wûn fan Marten Bergsma, Kees van der Schoot en Hendrik Kootstra.

Dêrmei is de earste healefinalist bekend.

Gert-Anne van der Bos baalt fan omstannichheden

Nei de pynlike útskeakeling fan syn partoer yn de earste omloop fan de PC is Gert-Anne van der Bos min te sprekken oer it beslút fan de PC-organisaasje om wedstriden nei de fuotbalfjilden te ferpleatsen.

Hy hie leaver hân dat de PC op in oare dei keatst wurde soe. "As je sokke waarsomstannichheden hawwe dan komme de nivo's tichter by elkoar."

"Hjir bale je fan. De toppartoeren hienen hartstikke moai lotte. Ik fyn it spitich dat it op de fuotbalfjilden keatst wurdt. Ik hie it ek wol op freed dwaan wollen."

Alle útslaggen fan de earste omloop op in rychje

Alle útslaggen fan de earste omloop binne bekend. Hjirûnder alle útslaggen op in rychje:

Marten Bergsma, Kees van der Schoot en Hendrik Kootstra - Peter van Zuiden, Gerben de Boer en Willem Heeringa 5-1 6-2
Tjisse Steenstra, Renze Hiemstra en Hans Wassenaar - André van Dellen, Pieter Jan Plat en Jurrit Osinga 5-1 6-2
Wierd Baarda, Michel van der Veen en Jari Visser - Corné Tuinenga, Bauke Dijkstra en Jelmer Miedema 3-5 4-6
Paul Dijkstra, Steven Koster en Rick Minnesma - Youri de Groot, Jelle Cnossen en Johan Sipma 5-2 6-0
Johannes van der Veen, Jorn Lars van Beem en Kevin Jordy Hiemstra - Menno van Zwieten, Gabe-Jan van Popta en Pieter Jan Leijenaar 4-5 0-6
Remmelt Bouma, Allard Hoekstra en Evert Pieter Tolsma - Patrick van Dellen, Thomas Dijkstra en René de Haan 5-4 6-2
Gert-Anne van der Bos, Taeke Triemstra en Erwin Zijlstra - Haye Jan Nicolay, Hessel Postma en Patrick Scheepstra 5-5 6-6
Bauke Triemstra, Hendrik Jan van der Velde en Riemer Hoekstra - Jelle Attema, Gerrit Jan Duiven en Hendrik Bouwhuis 5-3 6-4

Van der Bos sneuvelet yn earste omloop

It partoer fan Gert-Anne van der Bos, Taeke Triemstra en Erwin Zijlstra is sneuvele yn de earste omloop. It waard 5-5 6-6 yn it foardiel fan Haye Jan Nicolay, Hessel Postma, Patrick Scheepstra.

Van der Bos-en-dy jilden as ien fan de favoriten foar de winst fan dizze PC. Triemstra is earder dit jier koprinner wurden fan it ivich klassemint.

"We hawwe it yn it begjin fan de partij lizze litten", seit Gert-Anne van der Bos. It partoer kaam mei 5-2 efter. "Patrick (Scheepstra, red.) sloech hiel goed op en dêr hie Taeke (Triemstra, red.) mear muoite mei as gewoan."

Dêrnei kamen Van der Bos-en-dy knap werom oant 5-5. "Wy wienen oan ús stân ferplichte om de earste twa omlopen te winnen, mar wy hellen ús eigen nivo net. Dy lêste bal glied my út de hannen wei."

De lêste slach en de earste reaksje fan Gert-Anne van der Bos

Van der Bos op likense hichte mei Nicolay

It partoer Van der Bos komt werom fan de dea, en stiet no op likense hichte mei it partoer Nicolay. It is 5-5.

Van der Bos-en-dy wurkje trije matchpoints fuort

Trije kear stiene Van der Bos-en-dy op de dea, mar se libje noch. It is no 5-3 yn it foardiel fan Haye Jan Nicolay, Hessel Postma en Patrick Scheepstra.

De PC fan Gert-Anne van der Bos, Taeke Triemstra en Erwin Zijlstra hinget oan in hiel tin triedsje.

Earste útslaggen bekend

It partoer fan Tjisse Steenstra, Renze Hiemstra en Hans Wassenaar docht wat it dwaan moat. It wint mei 5-1 6-2 fan André van Dellen, Pieter Jan Plat en Jurrit Osinga.

Van der Bos-en-dy derôf yn de earste omloop?

It partoer fan Gert-Anne van der Bos, Taeke Triemstra en Erwin Zijstra stiet op in 5-2 achterstân tsjin Haye Jan Nicolay, Hessel Postma en Patrick Scheepstra.

It partoer fan Van der Bos is ien fan de titelfavoriten. Triemstra stiet boppe-oan yn it ivich klassemint. Fan alle keatsers dy't der ea west ha, hat hy de measte punten helle.

Waarfrou: "Hâld de paraplu derby"

No reint it noch folop yn Frjentsjer, mar neffens waarfrou Tjitske Wiebenga wurdt it fanmiddei better. "Yn de súdwesthoeke is it al drûch. Nei it buiegebiet fan no komt de sinne derby."

"Der binne drûge perioaden, mar in spetterke is net útsletten. Hâld de paraplu derby." As de sinne derby komt, kin it wolris brodzich oanfiele, seit Wiebenga.

No ek los op it Sjûkelân

De perken lizze goed, de keatsers binne der klear foar; we binne los op it Sjûkelân.

Op dit stuit spylje de partoeren fan Marten Bergsma en Peter van Zuiden en de partoeren fan Tjisse Steenstra en André van Dellen tsjin elkoar.

It reint noch hieltyd yn Frjentsjer. De tribunes sitte lang net fol.

Titelfavoryt Van der Bos ferliest earste earst

It earste earst is foar it partoer fan Haye Jan Nicolay, Hessel Postma en Patrick Scheepstra. Se spylje tsjin ien fan de favorite partoeren, dat dan Gert-Anne van der Bos, Taeke Triemstra en Erwin Zijlstra.

PC is los op byfjilden, op haadfjild wurde perken noch ferlein

Better let as net: de 170ste PC is begûn. De earste slach wie foar Bauke Triemstra op ien fan de byfjilden. Hy sloech bûten.

Op it Sjûkelân wurdt noch net keatst. Dêr wurde de perken op dit stuit noch ferlein.

Neffens ferslachjouwer Hijlko Broersma wie it nedich de perken te ferlizzen omdat de wyn draaid wie.

It kin noch wol even duorje foardat de keatsers op it Sjûkelân los binne. Se moatte aanst ek noch foarsteld wurde.

Frysk folksliet klink op fuotbalfjilden

Sa sjocht de lotting derút

Oer in pear minuten fleane de earste ballen troch de loft yn Frjentsjer. De partoeren fan Tjisse Steenstra en Gert-Anne van der Bos wurde sjoen as de favoriten. Sy soenen elkoar yn de finale treffe kinne.

Lês ek:

Lotting 170e PC fan Frjentsjer bekend: dizze partoeren nimme it woansdei tsjininoar op

Noch in healoere: op hokker partoeren moatte we lette?

De earste omlopen fan de 170ste PC sette oer in healoere útein. Hokker partoeren meitsje kâns op de winst? En wa binne de outsiders?

Lês it hjir:

Lês ek:

Q&A mei keatsanalisten oer de PC: "Triemstra is de Djokovic fan it keatsen"

Doe't it fjild feroare yn in modderpoel: de PC fan 2010

It is net de earste kear dat it bot reint by de PC. Ek yn 2010 wie it tige wiet: it fjild op it Sjûkelân feroare yn in modderpoel.

"Dat wie de bizarste PC yn de resinte skiednis. Want 1969 wie wiet, 1985 ek, mar 2010 sloech alles. Ik ha tafrielen sjoen dy't je je net foarstelle kinne. It moast en soe trochgean, mar mei de kennis fan no, hienen se de dei skrast", seit sportferslachjouwer Geert van Tuinen oer de edysje fan doe.

It wie ek it jier dat Alle Jan Anema in swiere krúsbânblessuere oprûn. Van Tuinen: "En de priisútrikking wie dy dei pas om 21.45 oere, it wie al tsjuster."

Start PC definityf om 12:00 oere

De 170e PC begjint definityf om 12:00 oere. Dat meldt de KNKB. De partoeren 1 o/m 4 starte op it Sjûkelân. Partoeren 5 o/m 16 starte op de fuotbalfjilden.

"Dit is wol in unikum", sei PC-foarsitter Ids Hellinga dêr juster al oer. "Der binne twa dingen dy't spylje: it fjild leit der goed by, mar it kin gjin fyftjin partijen drage. Boppedat komt der in reingebiet oer Frjentsjer, tusken 9.00 en 12.00 oere. Dêr sitte hiel dikke buien by, mei kâns op tonger. Dan moatte we hjir gjin publyk nei Frjentsjer helje."

Dêrom begjint it keatsen pas yn de middei. "Allinnich ha je dan net genôch tiid om de partijen allegear te keatsen, dus dêrom wike we ek út nei de fuotbalfjilden."

Protte haatmails om twadde lokaasje

De organisaasje fan de PC krijt in protte haat-mails no't der foar keazen is om de PC op twa lokaasjes te ferkeatsen. Dat seit ferslachjouwer Hijlko Broersma.

De organisaasje hat oant healwei ienen fannacht dwaande west mei it beäntwurdzjen fan de mails. Der binne minsken dy't har jild werom ha wolle. "Ik ga niet voor zeven potjes naar het Sjûkelân", skriuwt ien fan har.

De tagong by de fjilden oan de Hertog van Saxenlaan is fergees foar it publyk. By it Sjûkelân is der wol kontrôle.

Ek de rydtoer troch de stêd mei de winners fan ferline jier giet net troch.

Omtinken foar nij kolleezje en Koornbeurs yn taspraak Hellinga

Yn de taspraak fan foarsitter Ids Hellinga kaam ûnder mear it nije kolleezje oan bod. Hellinga ferlike Kommissaris fan de Kening Arno Brok mei in keatscoach, dy't de deputearren fan de nije generaasje, sa as gasten Femke Wiersma en Eke Folkerts, de wei wize kin.

Ek wie der omtinken foar teäter De Koornbeurs. Der sil fan de gemeente Waadhoeke út mear jild op it kleed komme moatte om it teäter behâlde te kinnen.

It reint yn Frjentsjer

Arriva komt mei fjouwer spesjale buslinen

Fanwege de PC hat Arriva, krekt as oare jierren, fjouwer spesjale buslinen yn it libben roppen. Dizze ride fan en nei Frjentsjer.

De retoertickets kinne besikers sawol online keapje as by de bussjauffeur (allinnich mei pin). Omdat de PC letter úteinset, binne de bustiden ek oanpast. Hjirtroch slute dizze oan op de starttiden fan de wedstriid.

It oersjoch fan de tiden is hjir te besjen.

Wolkom

It is de dei fan de PC. In reinige PC dit jier. Dêrom is de start fan de keatserij yn Frjenstjer útsteld nei 12.00 oere en wurdt der op meardere fjilden tagelyk keatst.

De resepsje sil plak hawwe om 10.00 oere. Der is gjin optocht troch de stêd.

Oant fan 'e moarn betiid binne der noch tariedingen oan it fjild dien.

"Der is in hiel soad oan dien om it fjild sa goed as mooglik te krijen, der is in hiele bult wetter op fallen fansels. Sa hawwe wy apparatuer by sc Hearrenfean weihelje kinnen", sei foarsitter Ids Hellinga fan 'e moarn.