Formule E-koereur Nyck de Vries wer fjirde yn Berlyn
Autokoereur Nyck de Vries is yn de njoggende Formule E-wedstriid fan it seizoen as fjirde einige. De Snitser kaam goed twa sekonden tekoart foar in poadiumplak. De winst yn de race gong nei Jean-Éric Vergne. António Félix da Costa waard twadde en is dêrmei wis fan de einoerwinning yn it klassemint.
It is in opstekker foar De Vries, dy't de lêste twa wedstriden bûten de punten einige. Nei syn fjirde plak fan woansdei foel er tongersdei út en einige er sneon as sechstjinde.
De Vries kwalifisearre him as fiifde foar de race fan snein. Hy makke ûnderweis in plakje goed troch Oliver Rowland yn te heljen, yn de race wêryn't it reinde. De Vries koe de Brit dêrnei flak achter him hâlde. Hy klimt nei it tolfde plak yn it klassemint.
Klassemint nei 9 fan 11 races
Koereur | Punten |
1. António Félix da Costa | 156 |
2. Jean-Éric Vergne | 80 |
3. Maximilian Günther | 69 |
4. Lucas di Grassi | 69 |
5. Sébastien Buemi | 67 |
6. Mitch Evans | 65 |
7. André Lotterer | 59 |
8. Stoffel Vandoorne | 57 |
9. Oliver Rowland | 54 |
10. Sam Bird | 52 |
11. Alexander Sims | 49 |
12. Nyck de Vries | 42 |
Foar de coronakrisis wiene der fiif races ferriden yn de Formule E. Op it âlde Tempelhof-fleanfjild yn Berlyn wurdt dizze wiken it seizoen ôfmakke. Woansdei wie de earste fan seis races op dat plak. Der komme noch twa: kommende woansdei en tongersdei.