LIVEBLOG: Alternative PC-dei op it Sjûkelân

It keatsmuseum oan de Voorstraat is woansdei de hiele dei iepen. Neffens de gastfrou fan it museum is it in frjemde dei fanwegen it coronafirus. Dochs hat sy wol hope dat der noch wat toeristen nei it museum komme. Neffens gastfrou Joke komme de frijwilligers sawiesa foar in bakje kofje. In bysûnder item yn it museum is de sulveren keatsbal. Gewoanwei giet de keningsbal elts jier foar de PC efkes út it museum wei, mar dit jier bliuwt er hingjen.

Oan de Foarstrjitte 59 is in plakette foar master Klaas Bijlsma ûntbleate. Op dit adres wie syn wenhûs. Bijlsma wie foarsitter fan de PC, en net samar ien. Hy hat de foarsitter west dy't it langst de funksje op him nommen hat. Syn hûs wie oant no ta net werkenber, mar in stichting hat dêr woansdei feroaring yn brocht.

Der skowe trije supporters by Geert van Tuinen oan dy't al lang oan it keatsen en de PC ferbûn binne. Sa is âld-boer Foppe de Vries al jierren mei it keatsen ferbûn, en ek Wietske jout oan dat sy al jierren 'besmet' is mei it keatsfirus. Wietske is dan ek tige earlik oer it foarjier: "Wy hawwe echt in minne maitiid hân, dan meist wol witte. It falt wol duvels ôf." Ek Johannes Duhoux is net by it spul wei te baarnen, yn it ferline mocht er de sport graach beoefenje.

Geert van Tuinen praat mei Jarich van der Veen (1946) en Simon Minnesma (1973), twa manlju dy't net perfoarst út keatshoeken komme. Van der Veen wenne earst yn Driezum en letter yn Damwâld. Minnesma komt út Winschoten.

Yn 1971 wûn Van der Veen de PC mei Gerrit de Jong en Reitse Mienstra. Trije jier letter pakte Van der Veen wer de haadpriis, doe mei De Jong en Flip Soolsma. Van der Veen waard dy dei útroppen ta kening.

Simon Minnesma waard kening yn 1995, doe't er mei Sake Porte en Klaas Anne Terpstra de PC wûn.

Enno Kingma en Johannes Brandsma skowe oan by Geert van Tuinen. Enno fertelt in persoanlik ferhaal oer syn pake Herre, dy't ek in grutte rol yn de keatssport spile hat. Foar Fryslân, mar ek foar Enno sels. En ien fan Enno syn gruttere leafhawwers is Johannes Brandsma. "Us wize fan keatsen wie hiel oars. Enno is in type opslagger dy't my leit. Hy wit wat er docht."

Heiten Hendrik Dijkstra en Piet van Popta stean lâns de râne fan it Sjûkelân. Harren bern spylje in junioarepartij op de dei fan de PC. "Ik fyn de junioaren altyd in hiele moaie kategory, ek om't myn soan der yn spilet natuerlik", fertelt Dijkstra. "It is wol in aparte dei, it is syn twadde wedstriid noch mar."

De sfear op it fjild liket it goed, al is it gjin PC. "It is gesellich, mar dêr kin neat tsjinop. Dan stappe je moarns al yn de auto mei in hiel prettich gefoel foar in hiele moaie dei. Dat mis je seker."

De âldste noch libbene PC-kening is Jan Sijtsma. Hy die alve kear mei oan de PC. Yn 1957 sloech Sijtsma, frij ferrassend, it partoer - mei Rinia en Faber - nei it heechste plak op it poadium. Hy waard útroppen ta kening.

"It wie in geweldich jier, beslist. Mar it wie wol hiel ûnferwachte dat we it wûnen, want sa fier wiene we noch net. Mar it klikte hartstikke goed", fertelt er oan Geert van Tuinen:

Ferline jier wie de winst foar it partoer Marten Bergsma, Renze Pieter Hiemstra en Hans Wassenaar. Se wiene yn de finale mei 5-2 6-4 te sterk foar favoriten Gert-Anne van der Bos, Taeke Triemstra en Tjisse Steenstra. Mar no kinne se harren titel net ferdigenje, hoe is dat? Dêrnjonken leveret de kening fan ferline jier, Hans Wassenaar, syn keningsbal yn by PC-foarsitter Ids Hellinga:

Gerrit Okkinga, Klaas van Wieren en Dirk Talsma wûnen de PC fan 1970. Dat waard doe ek tiid, want se hearden al langer by de bêste partoeren. "We ha in soad yn de prizen sitten, mar it giet eins allinnich mar om de haadpriis", seit Okkinga. "En wy ha 'm mar ien kear wûn, wylst we altyd it bêste partoer hiene. Dat siet my noch hieltyd dwers."

Ek al hiene se it bêste partoer, de senuwen wiene altyd oanwêzich. Okkinga: "As ik hjir op it fjild kaam, gong ik stikken fan de senuwen. We hiene wol partijen tsijn twaddeklaspartueren en dan gong it noch hiel dreech. De PC is wat aparts."

Okkinga wie net de iennige mei senuwen, dat hie syn maat Talsma likegoed. "Ik sliep altyd myn. Ik keatste al seis jier mei Gerrit, en al fiif jier mei Klaas. Dan mocht der ek wolris in PC-winst komme. En ik hie in dûbele spanning, want in pear jier dêrfoar wiene we der frij hurd ôffage. Ik hie noch noait in goede PC draaid."

Geert van Tuinen praat ûnder oare mei it winnende partoer út 1970: Gerrit Okkinga, Klaas van Wieren en Dirk Talsma. Hoe is it no mei de manlju, hoe sjogge sy werom op harren PC en is der in soad feroare yn it keatsen?

Ferline jier wie it partoer Marten Bergsma, Renze Pieter Hiemstra en Hans Wassenaar mei 5-2 6-4 te sterk foar favoriten Gert-Anne van der Bos, Taeke Triemstra en Tjisse Steenstra. Hoe is it foar harren dat se no gjin titel ferdigenje kinne? En dat der dit jier mar sa'n bytsje keatst wurde kin?

Dêrnjonken komt de âldst noch libjende PC-kening oan it wurd, Jan Sijtsma, dy't de PC yn 1957 wûn. We prate ek mei fêste supporters en frijwilligers. En fierder noch in hiel soad moaie ferhalen, muzyk en sfear.

PC-foarsitter Ids Hellinga ropt op om woansdei net nei it Sjûkelân te kommen. "Wy roppe minsken op om perfoarst net te kommen, mar ôf te stimmen op Omrop Fryslân radio en telefyzje."

Der binne wol minsken útnûge, mar der meie net mear as 150 minsken op it terrein fanwegen de coronamaatregels. "Wy hoopje op begryp fan de keatsleafhawwers om dizze dei thús te belibjen. Wy ha in prachtich moai programma betocht om fia radio of tv thús te genietsjen."

Fan 8.00 oant 18.00 oere is presintator Geert van Tuinen live op it Sjûkelân mei live bydragen en ferhalen fan (âld-)keatsers, frijwilligers en supporters. Meisjen kin hjir.

Dêrnei is der noch it PC Kafee mei nostalgy, sterke ferhalen, muzyk fan Te Gare en in kollum. Ek dat is live te folgjen op radio en ynternet.