Marrigt van der Valk: "Fan jongs ôf oan ha ik te krijen hân mei rasisme"

Marrigt van der Valk wennet yn Ljouwert, is frijwilliger by Natuurmonumenten en komt oarspronklik út Yndonezië. "Fan jongs ôf oan ha ik te krijen hân mei rasisme. Ik kom fan De Westereen en yn de tiid fan Marianne Vaatstra bin ik echt bespuid en útskolden. Der wie echt in eangst foar donkere minsken. It is no net sa slim as yn dy tiid. Mar der wurde noch genôch dingen tsjin my sein."

Rasisme hjir yn it Noarden is der, seit Marrigt. Mar der is ek in soad ûnwittendheid. "Yn it Noarden binne wy konservativer, dêrom woe ik ek graach nei de stêd doe't ik âlder waard. Doe't ik yn Ljouwert op skoalle kaam, wie ik bliid dat ik by bern mei myn kleur op skoalle kaam. It is muoisumer om mei minsken út Fryslân it hjiroer te ha."

Sels fynt Marrigt de rasisme dy't sy meimakket hiel oars as wat der yn Amearika geande is, mar it docht har wol sear. "Eartiids ha ik sels altyd tocht dat it wol wat tafalt. Wylst ik my der altyd net goed by fielde. No bin ik âlder en doar ik der wat fan te sizzen. Der wurdt dan gau sein dat ik gjin gefoel foar humor ha, mar it docht my wol sear en ik bin der klear mei."

Dêrom besiket Marrigt har dochter wat oars mei te jaan as it giet om útsprekken. "Myn dochter is heal Yndysk. Dy wurdt der mei pest op skoalle. Eins is it rasisme. Dat is ek in lestige diskusje, mar ik kom wol foar har op. Yn plak fan datst seist datst fuortrinst, wol ik der no wol mear fan sizze. By myn dochter dan ha wy it deroer. Dat dat echt net kin en net mei. Dan mei se fan my sizze dat it har sear docht."

Sa is dat net tsjin Marrigt sein. "Lit se lekker gean, dêr moast boppe stean. Dat waard altyd tsjin my sein. Mar it hat my ûnderhûdsk altyd wat dien."

Dêrom wol Marrigt har no útsprekke. "Ik ha in stim en dy wol ik brûke. Wy ha altyd wat rasisme yn ús, mar wy bepale sels wat wy dêr mei dogge."