Coronanijs 18 maaie: Gjin nije stjergefallen, wol seis nije besmettingen fêststeld

18 maaie 2020 - 23:00

Yn dit liveblog melde wy it lêste nijs oer it coronafirus.

  • Oant no ta binne der 64 minsken ferstoarn oan it coronafirus;
  • By 577 minsken yn Fryslân is it firus fêststeld;
  • Yn de Fryske sikehûzen lizze noch twa coronapasjinten op de intensive care;
  • Op oare ferpleechôfdielingen lizze noch 13 pasjinten mei it coronafirus;
  • Al it nijs oer it firus is te finen yn ús coronadossier.

Dit liveblog is ook in het Nederlands te volgen.

23:00
Ein fan dit liveblog

Wy binne oan de ein kaam fan dit liveblog fan moandei 18 maaie. Dit wie it wichtichste coronanijs:

  • Oant no ta binne der 64 minsken ferstoarn oan it coronafirus;
  • By 577 minsken yn Fryslân is it firus fêststeld;
  • Yn de Fryske sikehûzen lizze noch twa coronapasjinten op de intensive care;
  • Undernimmers Flylân en Skylge wolle gau mear kapasiteit op fearboaten;
  • Doeksen-direkteur Melles kin him lykwols net fine yn de krityk fan de eilanner ûndernimmers

Elkenien tank foar it folgjen!

21:54
KAART: Hokker swimbad yn Fryslân is iepen?

No't de coronamaatregels bytsje by bytsje ferromme wurde, gean ek swimbaden yn Fryslân wer iepen. Hoe sit it mei it swimbad by dy yn 'e buert? Besjoch it op ús oersjochkaart.

21:53
Doeksen-direkteur kin him net fine yn krityk eilanner ûndernimmers

Direkteur Paul Melles fan Rederij Doeksen is it net iens mei de krityk dy't hy krigen hat fan de ûndernimmersferieningen fan Skylge en Flylân. "Dat vind ik niet fair", seit Melles. De ûndernimmers op de eilannen krije nochal wat annulearringen omdat de boaten mar in beheinde kapasiteit hawwe troch alle coronamaatregels.

Lês mear: Doeksen-direkteur kin him net fine yn krityk eilanner ûndernimmers: "Dat is niet fair"

19:54
Ljouwerter middelbere skoalle riedt him ta op 'oardel meter lesjaan'

De coronamaatregels op de Fryske middelbere skoallen soargje der nei alle gedachten foar dat it grutste part fan de learlingen ek de kommende wiken noch gewoan thús is. Tiisdei makket it kabinet nei alle gedachten bekend dat de skoallen wer iepen meie, mar sa maklik is dat noch net. Sa moatte de bern oardel meter ôfstân fan elkoar hâlde en dat is op in soad skoallen fysyk net mooglik. It Leeuwarder Lyceum docht in proef.

Lês mear: Ljouwerter middelbere skoalle riedt him ta op 'oardel meter lesjaan'

18:54
Slieker begjint crowdfundings-aksje

Filmhûs Slieker yn Ljouwert is mei in crowdfundings-aksje begûn. It filmhûs is al twa moannen ticht fanwegen de coronakrisis en mist dus in soad ynkomsten. En as de filmsaal aanst wer iepen mei, is dat mar beheind en smyt dat net genôch op. De crowdfundings-aksje wurdt stipe troch bekende Fryske akteurs lykas Peter Tuinman en Joke Tjalsma.

Lês mear: Crowdfundings-aksje foar Ljouwerter filmhûs Slieker

17:56
Run op filmtickets

Minsken hawwe massaal tickets kocht foar in filmbesite nei de weriepening fan de bioskopen. Pathé, de grutste bioskoopketen fan Nederlân, hat yntusken al mear as 36.000 kaartsjes ferkocht foar de foarstellingen yn de dagen nei de weriepening op 1 juny. Tsientallen sealen binne al útferkocht foar de earste pear dagen. Pathé hat yn Fryslân allinnich twa festigingen yn Ljouwert.

17:39
Alternatyf foar Oerrock

Trije fans fan it muzykfestival Oerrock komme mei in alternatyf foar de edysje fan dit jier. Dy hie oars tongersdei begjinne sillen, mar dat kin fansels net fanwegen de coronakrisis. Trije manlju út Bakkefean komme no mei in spesjale radio-útstjoering fan seis oeren, mei in soad omtinken foar Oerrock. De trije makken al radio, mar ha no Radioafzetlint yn it libben roppen. Yn gearwurking mei it festivalbestjoer meitsje se no Himelfeartsdei fan middeis fjouwer oant jûns tsien oere in spesjale live útstjoering hielendal yn it ramt fan Oerrock.

17:15
Undernimmers Flylân en Skylge wolle gau mear kapasiteit op fearboaten

Foarsitters fan de ûndernimmersferienings fan Skylge en Flylân hawwe direkteur Paul Melles fan Doeksen in lulke brief skreaun. De ûndernimmers op it eilân krije nochal wat annulearringen omdat de boaten mar in beheinde kapasiteit hawwe troch alle coronamaatregels.

De ûndernimmers wolle dat Doeksen faker fart en der yn alle gefallen foar soarget dat de kapasiteit de kommende simmerfakânsje wer op peil is. De ûndernimmers wolle hjir op koarte termyn oer prate mei Rederij Doeksen en mei deputearre Avine Fokkens fan toerisme. Twa petearen tusken de ûndernimmers en Doeksen brochten de partijen ôfrûne wike net tichter byinoar.

Lês mear: Undernimmers Flylân en Skylge wolle gau mear kapasiteit op fearboaten Rederij Doeksen

16:42
Boargemasters oerlizze mei ministers Grapperhaus en Wiebes

Boargemasters út it hiele lân oerlizze moandeitejûn oer de coronakrisis. Ek minister fan Justysje Ferd Grapperhaus en Eric Wiebes fan Ekonomyske Saken binne dêrby oanwêzich.

16:28
Tal IC-pasjinten mei 26 ôfnaam

It tal pasjinten mei coronaklachten op de IC's is mei 26 daald. Dat meldt de NOS. Der binne no noch 323 Nederlanners mei covid-19 opnaam. Dêrfan lizze 320 pasjinten yn Nederlân en trije yn Dútske sikehuzen. It Landelijk Coördinatiecentrum Patiënten Spreiding, dat de IC-opnamen byhâldt, ferwachtet dat it tal opnamen de kommende wike fierder dale sil.

Der lizze ek 477 non-covidpasjinten op de IC's. Snein naam it tal pasjinten sûnt lange tiid wer wat ta. Der kamen doe trije coronapasjinten by.

Trefwurden: 
coronafirus COVID-19
(advertinsje)
(advertinsje)