Coronanijs 18 maaie: Gjin nije stjergefallen, wol seis nije besmettingen fêststeld

Trije fans fan it muzykfestival Oerrock komme mei in alternatyf foar de edysje fan dit jier. Dy hie oars tongersdei begjinne sillen, mar dat kin fansels net fanwegen de coronakrisis. Trije manlju út Bakkefean komme no mei in spesjale radio-útstjoering fan seis oeren, mei in soad omtinken foar Oerrock. De trije makken al radio, mar ha no Radioafzetlint yn it libben roppen. Yn gearwurking mei it festivalbestjoer meitsje se no Himelfeartsdei fan middeis fjouwer oant jûns tsien oere in spesjale live útstjoering hielendal yn it ramt fan Oerrock.

Foarsitters fan de ûndernimmersferienings fan Skylge en Flylân hawwe direkteur Paul Melles fan Doeksen in lulke brief skreaun. De ûndernimmers op it eilân krije nochal wat annulearringen omdat de boaten mar in beheinde kapasiteit hawwe troch alle coronamaatregels.

De ûndernimmers wolle dat Doeksen faker fart en der yn alle gefallen foar soarget dat de kapasiteit de kommende simmerfakânsje wer op peil is. De ûndernimmers wolle hjir op koarte termyn oer prate mei Rederij Doeksen en mei deputearre Avine Fokkens fan toerisme. Twa petearen tusken de ûndernimmers en Doeksen brochten de partijen ôfrûne wike net tichter byinoar.

Boargemasters út it hiele lân oerlizze moandeitejûn oer de coronakrisis. Ek minister fan Justysje Ferd Grapperhaus en Eric Wiebes fan Ekonomyske Saken binne dêrby oanwêzich.

It tal pasjinten mei coronaklachten op de IC's is mei 26 daald. Dat meldt de NOS. Der binne no noch 323 Nederlanners mei covid-19 opnaam. Dêrfan lizze 320 pasjinten yn Nederlân en trije yn Dútske sikehuzen. It Landelijk Coördinatiecentrum Patiënten Spreiding, dat de IC-opnamen byhâldt, ferwachtet dat it tal opnamen de kommende wike fierder dale sil.

Der lizze ek 477 non-covidpasjinten op de IC's. Snein naam it tal pasjinten sûnt lange tiid wer wat ta. Der kamen doe trije coronapasjinten by.

Keunst- en kultuerynstellingen dy't troch it Ryk subsidiearre wurde, moatte ek yn 2021 rekkenje kinne op linigere regels foar oerheidsbydragen. Dat is nedich om te oerlibjen, oan te passen én te fernijen, skriuwt de Raad voor Cultuur oan minister Ingrid van Engelshoven.

De coronakrisis is neffens de ried foar de sektor in nachtmerje, dy't al hast 1 miljard euro oan ynkomsten koste hat. It wurdt neffens de ried noch slimmer, benammen troch de festivals dy't dizze simmer net trochgean kinne.

"Door het verlengen van het huidige coulancebeleid door de minister krijgen de gesubsidieerde instellingen een jaar de tijd om hun activiteitenplannen bij te stellen en de nodige innovaties voor te bereiden", sa seit it advysorgaan.

De ynskriuwing foar it Frysk sjongfestival Liet 2020 is dizze wike 'gewoan' úteinset. Muzikanten dy't meidwaan wolle, kinne foar 1 july in liet ynstjoere. It liet moat yn it Frysk of yn in Fryske streektaal skreaun wêze. De finale fan it festival fynt dit jier plak op freed 6 novimber yn Poppoadium Neushoorn yn Ljouwert.

Fanwegen de coronakrisis is it noch ûnwis oft der publyk by de finale oanwêzich wêze mei. "It hat fansels ús foarkar dat de dielnimmers spylje kinne foar in folle seal. Mar mocht dat ûnferwachts net mooglik wêze, gean wy der foar soargje dat elkenien de finale thús folgje kin", sa seit foarsitter Gerard van der Veer fan Liet.

As de maatregels om de folkssûnens te beskermjen noch langer duorje, dan hat de folsleine kwaliteit fan it libben dêrûnder te lijen. Dat stelt it Sociaal en Cultureel Planbureau (SCP) yn in advys oan it kabinet oer in útwei út de coronakrisis. It SCP sjocht by maatregels dy't langer duorje ek it risiko fan mear ûngelikensens, gruttere ferskillen yn wolfeart en ûnderwiisefterstannen groeie.

Hoe langer de situaasje duorret, hoe dúdliker it wurdt "dat het beschermen van de volksgezondheid voor veel groepen ten koste gaat van de algehele kwaliteit van leven". Dy is neffens it planburo ôfhinklik fan saken dy't no gehiel of diels weifalle, lykas sosjale kontakten, wurk en ferskate foarms fan ferdivedaasje. Dat jildt net allinnich foar kwetsbere groepen, lykas âlderen, mar foar hast elkenien yn de mienskip.

No't elkenien op fakânsje moat yn eigen lân, witte ferskate BN'ers Noardeast-Fryslân goed te finen. Sa sochten dj Martin Garrix en kickbokser Rico Verhoeven de golfen op fan de Iselmar en waarden efkes letter spot by supermerk Jumbo yn Dokkum.

"Coronamaatregels? Wy fernimme der noch neat fan." Dirk Dijkstra is Fries-om-utens en wennet al 20 jier yn de Sweedske stêd Halmstad. Wêr't oare lannen in komplete lockdown ynfierd hawwe, hat it regear yn Sweden allinnich mar lichte corona-maatregels naam: sa binne kafees en winkels gewoan iepen bleaun. "Wy priizgje ús gelokkich dat wy alles noch dwaan meie."

De winners fan de skriuwwedstriid fan StUFT, Stifting Utjouwerij Frysk Toaniel, binne bekend. De winners soene bekend makke wurde op it jubileumfeest, mar dat kin net trochgean fanwege it coronafirus. Der binne winners yn trije kategoryen. Sietse de Vries skreau mei 'Warschau is sa'n moaie stêd ' it bêste stik yn de kategory "Beste jûnfoljende stik". André Beeksma hat wûn yn de kategory "Beste ienakter" mei 'Pake wol wer heit wêze'. Aly Cnossen skreau it bêste bernestik mei 'Drakebloed'. De priisfraach waard nei oanlieding fan it 50-jierrich bestean fan stifting StUFT útset.

Der binne de ôfrûne dagen seis minsken posityf teste op it coronafirus yn Fryslân. Dat meldt GGD Fryslân. Dêrmei komt it folsleine oantal minsken by wa't it firus mei in test fêststeld is yn Fryslân út op 577 minsken. By de GGD binne gjin nije stjergefallen melden. Dat betsjut dat oant no ta 64 minsken yn Fryslân neffens de offisjele gegevens ferstoarn binne oan it coronafirus.

Basisskoallelearlingen kinne wer nei skoalle en learlingen fan middelbere skoallen meie oer twa wiken wer it klaslokaal yn. Mar foar MBO-learlingen is it in hiele ûnwisse tiid. It beropsûnderwiis sit nammentlik mei in grut probleem: de measte learlingen kinne op dit stuit gjin staazje rinne. En hoe komt it aanst mei harren kânsen op in baan?

Der bliuwt in soad ûndúdlikheid en foaral ek frustraasje by rekreaasje-ûndernimmers oer it iepenstellen fan hûskes foar deirekreanten. Guon minsken dienen harren behoeften yn de natoer doe't der gjin hûskes iepen wienen. Boargemaster Sybrand Buma fan Feilichheidsregio Fryslân snapt dat it lestich te begripen is wêrom't in deitoerist wol nei it hûske mei, mar in kampinggast net. "We wilden juist die vervuiling en overlast in de natuur tegengaan."

Hasto ek in ticket foar in teaterfoarstelling of konsert dat net trochgiet? En hast dyn jild werom frege? Dan bist ien fan de iennigen. Mar in hiel pear minsken freegje harren jild werom, docht bliken út ûndersyk. Se bewarje harren kaartsjes of ruilje 'm yn foar in voucher.

De Sint Pitersbasilyk yn Rome is fan hjoed ôf wer iepen foar besikers. De basilyk wie twa moannen tiid ticht fanwege de lockdown yn Itaalje. Foar't besikers nei binnen meie, wurdt harren temperatuer opmetten.

In groep ûndernimmers yn Dokkum komt mei ideeën om de binnenstêd gesellich te meitsjen yn in oardelmetermienskip. Troch ûnder oare mear terrasromte en oare ferkearsstreamen hoopje se dat Dokkum wer oantreklik wurdt foar besikers.

Dêr't in hiel soad oandielen troch de coronakrisis sakke binne, is de goudpriis noch opfallend heech. De priis foar goud is yn de ôfrûne acht jier noch nea sa heech west. Dat komt neffens de eksperts omdat minsken just yn dizze krisis sykje nei hâldfêst.

No't elkenien thús wurket, komme der folle minder meldings fan autoskea binnen by fersekerders. It tal claims is mei mar leafst 25 prosint nei ûnderen gong. Opfallend is dat de measte skeaclaims yntsjinne wurde troch 50- en 60-plussers. Dizze griep is faker allrisk fersekere en krije mear jild fan de fersekerder werom.

Heiten en memmen dy't de kontribúsje fan de sportklup fan harren bern net mear betelje kinne fanwege it coronafirus kinne harren melde by it Jeugdfonds Sport & Cultuur. It fûns sil dan de kontribúsje betelje oan de feriening dêr't de bern lid fan binne.

Eveneminten dy't passe yn de coronafoarskriften moatte gewoan trochgean. Dat fine de ChristenUnie en D66. Beide partijen tinke bygelyks oan drive-in bioskopen. Sokke eveneminten kinne de 1,5 meter garandearje. Yn Dútslân en Denemarken mei sokke eveneminten wol trochgean.

Undernimmer Jaap Hoekstra sjocht dat in soad kollega's net witte wat se dwaan moatte. Foar guon is der gjin regeling en dy stean op omfallen. Besjoch syn vlog.

Ek op it wetter is it drok mei boatsjeminsken fernimt De Marrekrite. De organisaasje fersoarget al jierren it ûnderhâld oan kades en oanlisplakken. Mar wat in soad minsken net witte is dat De Marrekrite ek in soad fyts- en kuierrûtes ûnderhâldt.

Swimbad De Wetterstins yn Burgum en Swimfun op De Jouwer sille hjoed wer iepen. Om acht oere moarns wurde de earste swimmers op De Jouwer wolkom hjitten troch wethâlder Boerland fan De Fryske Marren. Yn Swimfun op De Jouwer is in soad ûnderhâld útfierd wylst it bad ticht wie. Sa binne der skilders west en hat it wetter út it bad west. Ek yn Burgum is der is soad tiid frij makke foar oanpassings oan it swimbad om de 1.5-meter ôfstan ta te passen.

Swimbad De Kûpe yn Bûtenpost bliuwt foarearst noch ticht. Dêr is fannemoarn de earste skeppe yn de rûn setten troch wethâlder Spoelstra. De bou fan it nije swimbad is dêrmei úteinsetten. "Ik ben erg blij dat we ondanks de huidige omstandigheden kunnen starten met de bouw van een kwalitatief en duurzaam nieuw zwembad", seit wethâlder Jouke Spoelstra.

Kapster Clara van der Meer sjocht werom op in poerbêste earste knipwike. Ferline wike moandei mocht se har de doarren fan har kapsalon wer iepenje foar klanten. It rûn fuortendaliks stoarm mei minsken dy't mar wat graach yn har stoel lizze woenen. "It hat in wike west om net snel te ferjitten. It wie fantastysk. Wat ús benammen opfoel wie de geweldige wurdearring fan ús klanten. Blommen, sûkelaatsjes, it wie prachtich. As wy oan it knippen wiene, kamen der in hiel soad ferhalen los. Ek dat hat in soad yndruk makke."

Goeiemoarn! It is moandei 18 maaie. Wolkom by dit liveblog oer it coronafirus. Dit wie it wichtichste nijs fan it wykein:

It liveblog fan freed 15 maaie nochris neilêze? Dat kin hjir.