Coronanijs 12 maaie: Mear pasjinten sûnder corona as mei corona op intensive care

12 maaie 2020 - 22:00

Yn dit liveblog melde we it lêste nijs oer it coronafirus.

  • Der binne yn Fryslân 63 minsken ferstoarn oan it firus, en der binne 564 besmettingen fêststeld;
  • Op de intensive cares yn Nederlân lizze op it stuit mear pasjinten sûnder it coronafirus as mei;
  • Al it nijs oer it firus is te finen yn ús coronadossier;
  • Sjoch op de kaart foar de aktuele situaasje yn dyn gemeente.

Dit liveblog is ook in het Nederlands te volgen.

22:00
Ein fan dit liveblog

Wy binne oan de ein kaam fan dit liveblog fan tiisdei 12 maaie oer it coronafirus. Dit wie it wichtichste nijs:

  • Der binne yn Fryslân 63 minsken ferstoarn oan it firus, en der binne 564 besmettingen fêststeld;
  • Op de intensive cares yn Nederlân lizze op it stuit mear pasjinten sûnder it coronafirus as mei;
  • Talma Hûs yn Feanwâlden hat him klear makke foar de earste besite dy't dêr woansdei wolkom is;
  • De besmette bewenners fan it asylsikersintrum yn Snits wurde sa gau as mooglik oerpleatst nei Zoutkamp.

Elkenien tank foar it folgjen! Woansdeitemoarn binne we der wer mei in nij liveblog.

21:37
Bern mei glydbaan bernedeiferbliuw yn

De bernedeiferbliuwen moatte dizze dagen kreatyf wêze: se moatte itselde tal bern opfange as foar de coronakrisis, mar moatte wol rekken hâlde mei alle regels dy't it RIVM opsteld hat. It freget in soad fan de ferbliuwen, benammen yn it kontakt mei de âlders en yn de deistige praktyk by it fersoargjen fan de bern.

21:04
Fideodeiboek ferpleechkundigen Aly en Anouk

Ferpleechkundigen Aly de Vries en Anouk Bouius fan it MCL sjogge no't it rêstiger wurdt yn it sikehûs werom op de coronatiid. It hat in soad yndruk op harren makke. Foaral dat it minsklike part fan it ferplegen, wat se gewoanwei wend binne, fuortfoel. Mear vlogs fan Aly, Anouk en de oare vloggers fan de rige 'Berjochten út it hert' sjen? Dat kin fia dizze dossierside.

19:00
Hoareka bliid mei nije rjochtlinen

De Koninklijke Horeca Nederland hat de konkrete rjochtlinen foar in besite oan hoareka bekend makke. Sa sitst aanst mei maksimaal fjouwer minsken oan in taffeltsje. As dyn húshâlding út mear minsken bestiet, mei dat ek. Fierder is it ferplichte om te reservearjen, dat kin ek oan de doar, en wurde der foarôf fragen steld oer dyn sûnens. It personiel nimt de bestelling op oan tafel en betsjinnet dy ek wer. Nei de besite wurdt alles wer skjinmakke.

De maatregels jilde fan 1 juny ôf foar alle hoarekasaken. Corné van de Erve, foarsitter fan de Koninklijke Horeca yn Fryslân is bliid mei it nije protokol.

Corné van de Erve, foarsitter fan de Koninklijke Horeca yn Fryslân

17:33
Besite oan Talma Hûs kin hast los

It Talma Hûs yn Feanwâlden makket him klear foar de earste besite dy't dêr wolkom is. Acht wiken lang wiene alle ferpleechhûzen yn Nederlân ticht fanwegen it coronafirus. It Talma Hûs is no it earste ferpleechhûs yn Fryslân dat foarsichtich iepen mei, as ûnderdiel fan in proef. De belangstelling is grut. Minsken dy't op besite komme wolle, moatte yn it foar in ôfspraak meitsje. Dat is ien fan de betingsten om wer nei heit, mem of partner te meien.

16:36
Slob en Keamer net iens oer eksamen spesjaal ûnderwiis

De Tweede Kamer en minister Slob fan Underwiis kinne it net iens wurde oer it eineksamen yn it fuortset spesjaal ûnderwiis. Dat is de oplieding foar bern mei in lichaamlike of psychyske beheining op in middelbere skoalle.

Slob wol dat dy learlingen eineksamen dogge, yn de foarm fan in mûnling eksamen. In grutte mearderheid fan de Keamer wol dat net. Moarn komt der in spoeddebat oer it ûnderwerp.

16:32
Mear pasjinten sûnder as mei corona op ic

Op de intensive cares yn Nederlân lizze op it stuit 451 pasjinten mei it coronafirus en 462 minsken mei in oare oandwaning. "Voor het eerst in lange tijd liggen er meer non-Covid- dan Covid-patiënten op de Nederlandse ic's", seit Ernst Kuipers, foarsitter fan it Landelijk Netwerk Acute Zorg.

16:14
RIVM: Fluchtesten net betrouber

Fluchtesten om der binnen in healoere achter te kommen oftst besmet bist of wiest mei it coronafirus, binne net betrouber en moatte dêrom ôfret wurde. Se jouwe te faak in ferkearde útslach.

Dat meldt it Rijksinstituut voor Volksgezondheid en Milieu (RIVM), op basis fan ûndersyk nei testen fan ûnôfhinklike laboratoaria, útfierd troch de Taskforce Serologie van de Landelijke Coördinatie Testcapaciteit. Dat is in gearwurking fan it RIVM, sikehuzen en laboratoaria.

De wrâldsûnensoarganisaasje WHO rette it gebrûk fan de fluchtesten ferline moanne al ôf.

16:05
Fitnessbedriuw nei de rjochter

Fitnessketen BigGym, mei ek in fêstiging yn Ljouwert, stapt nei de rjochter om in ein te meitsjen oan de twongen sluting fanwege it coronafirus. Se fine de maatregels fierstente strang.

15:29
Heger stjertesifer

It coronafirus soarget ek yn Fryslân foar mear stjergefallen as gemiddeld, docht bliken út sifers fan it Centraal Bureau voor de Statistiek oer de lêste fjouwer jier. Mar út dy sifers docht ek bliken dat de grypweach fan twa jier lyn yn Fryslân foar mear slachtoffers soarge as it coronafirus, oant no ta.

Lês mear: Ek yn Fryslân heger stjertesifer, mar noch leger as grypweach fan 2018

Trefwurden: 
coronafirus COVID-19
(advertinsje)
(advertinsje)