Liveblog
|
8 maaie 2020
Coronanijs 8 maaie: útbraak yn azc Snits; tolve minsken op intensive care yn Fryslân
Yn dit liveblog melde we it lêste nijs oer it coronafirus.
Lêst bywurke: 2 novimber 2020, 16:22
freed 8 maaie 2020
22:30
Ein fan dit liveblog
Wy binne oan de ein kaam fan dit liveblog fan freed 8 maaie 2020 oer it coronafirus. Elkenien tank foar it folgjen! Dit wie it wichtichste nijs fan dizze freed:
22:14
Takom jier gjin EK's yn hynstesport
It ynternasjonale hynstesportbûn FEI hat bekend makke dat der yn 2021 gjin Europeeske kampioenskippen springe, dressuer, para-dressuer en eventing foar senioaren ferriden wurde. Troch it ferpleatsen fan de Olympyske Spelen nei 2021 passe al dizze eveneminten net mear yn de kalinder. De EK's yn de net-olympyske disiplinen geane, sa't it no liket, wol gewoan troch.
22:02
FIDEO: Jonge Cambuurfans sjogge nei koart pleit
Yn de rjochtbank fan Utrecht stie freedtemoarn it koart pleit fan fuotbalklups SC Cambuur en De Graafschap tsjin it fuotbalbûn KNVB op it programma. In rjochtsaak dy't thús, fia in livestream, te sjen wie. Dat waard troch in soad Cambuursupporters manmachtich dien. Ek de 11-jierrige Lars en syn 13-jierrige sus Brigitte seagen op de laptop mei, yn de hoop dat Cambuur dochs noch promovearret.
21:34
Fergoeding foar bedriuwen iepenbier ferfier
Bedriuwen yn it iepenbier ferfier krije in fergoeding fan it kabinet fanwegen de coronakrisis. Koepelorganisaasje OV-NL seit dat bedriuwen, it kabinet en oerheden oerienstimming berikt hawwe oer in saneamde 'beskikberheidsfergoeding'. Trems, metro's, treinen en bussen moatte fan 1 juny ôf yn prinsipe wer neffens de reguliere tsjinstregelingen ride. In soad minsken bliuwe lykwols thús wurkje en de ferwachting is dat it tal reizgers beheind bliuwt. It finansjele tekoart dat dêrtroch ûntstiet, moat opfolle wurde, fynt Pedro Peters fan OV-NL.
21:06
It camperplak by Swarte Haan stiet flink fol, mar wol op ôfstân
20:06
Fideodeiboek út it MCL: "Ik moast yn de auto in trienstje litte"
Ferpleechkundige Aly de Vries fan it MCL sjocht yn har vlog werom op 22 maart. De dei dat der in soad pasjinten fan Uden nei har sikehûs kamen. It die in soad mei har en dêrom is it foar har sa wichtich dat se nei in tsjinst de natuer yn kin.
19:03
Ek by Doeksen binne tenei mûlkapkes ferplichte
Earder waard bekend dat by rederij Wagenborg mûlkapkes ferplichte wurde nei It Amelân en Skiermûntseach ta. Mar ek nei Flylân ek Skylge moat dat, sa hat Doeksen witte litten.
18:23
Kadootsjes foar skoalmeiwurkers yn Dantumadiel
Wethâlder Gerben Wiersma fan Dantumadiel sil takom moandei by alle basisskoallen, berne- en pjutte-opfangen del yn de gemeente. Ut namme fan it kolleezje sil Wiersma de learkrêften en meiwurkers in kadootsje jaan, as hert ûnder de riem yn de coronatiid. "Ook wil hij hen bedanken voor de creatieve en vindingrijke manier, waarop zij de afgelopen weken hebben gewerkt om de kinderen toch les te kunnen geven of op te kunnen vangen", sa skriuwt de gemeente.
18:00
Measte bewenners azc Snits hawwe mylde klachten: "Grip op de uitbraak"
"De meeste inwoners van het azc in Sneek hebben milde klachten. Ze maken het relatief goed, en sommige mensen hebben helemaal geen klachten." Dat sei lokaasjemanager Benny Schonewille fan it asylsikerssintrum freedtemiddei op de parsekonferinsje fan de Feilichheidsregio oer de corona-útbraak. Der binne 22 minsken posityf test, en dat oantal rint nei alle gedachten fierder op.
17:50
AquaZoo wer stadichoan iepen
Dierepark AquaZoo yn Ljouwert kin moandei 11 maaie de doarren wer iepenje foar abonneminthâlders. In wike letter, op 18 maaie. is eltsenien wer wolkom. Om de maksimumkapasiteit te garandearjen, is besite allinnich mooglik nei in online oanmelding. AquaZoo hat dit freed besletten nei oerlis mei de Veiligheidsregio. It park is sa ynrjochte dat besikers en meiwurkers feilich yn it park rinne kinne, bygelyks mei ienrjochtingsferkear en spesjale crowdmanagers. Der sille gjin demonstraasjes jûn wurde en terrassen bliuwe foarearst ticht. Ek is der in maksimum tal besikers en sil der wurke wurde mei tiidslotten. AquaZoo is al sûnt 14 maart ticht.
17:33
Ek mûlkapkes by Wagenborg
Reizigers op de fearboaten fan rederij Wagenborg en it personiel fan de rederij moatte fan 1 juny ôf ferplichte in mûlkapke op hawwe op de boaten nei It Amelân en Skiermûntseach. It jildt ek foar alle terreinen en gebouwen fan Wagenborg. Neffens de rederij is in mûlkapke fan 'tafoege wearde', as it net mooglik is om oardel meter ôfstân te hâlden.
17:32
Kaartsjes Slachtemaraton dochs net jildich foar 2021
Kaartsjes fan de Slachtemaraton 2020 binne takom jier dochs net jildich. Doe't de Slachtemaraton fan dit jier skrast waard, sei de organisaasje noch dat dielnimmers harren kaartsje yn 2021 op 'e nij brûke koene. Dêr komme se no op werom.
17:19
Corona-útbraak yn azc Snits: 22 minsken besmet
Yn it azc yn Snits binne 22 minsken besmet mei it coronafirus. Begjin dizze wike waard al dúdlik dat der ien besmetting fêststeld wie. De GGD hat doe besletten om wiidweidich testen oan te bieden oan it asylsikerssintrum. Der binne yn totaal hûndert minsken test; fan har binne 22 minsken besmet. Der wenje yn totaal sa'n fiifhûndert minsken yn it azc. De GGD tinkt dat noch mear minsken siik binne.
16:38
De nijste sifers yn de kaart
16:27
"Tichtbliuwen rekreaasjebedriuwen oant 1 july ûnakseptabel"
Rekreaasjebedriuwen yn Noard-Nederlân fine it ûnakseptabel dat se oant 1 july noch foar in part tichtbliuwe moatte. Se hawwe har der hielendal op taret om iepen te gean en binne dêr ek hielendal klear foar, seit regiomanager Petra Ellens fan branche-organisaasje Hiswa-Rekron. De rekreaasjebedriuwen sizze dat se de romte ha en dat har mienskiplike sanitêr der ek geskikt foar is. It is net út te lizzen dat minsken wol manmachtich by grutte wenwarehuzen nei it húske gean, mar dat in gast op in camping dat net mei.
De organisaasje wiist der ek op dat de gasten fan de noardlike rekreaasjebedriuwen foar in grut part út it noarden sels komme. Dan wurdt der ek net in soad reizge en is it gefaar fan fersprieding fan it coronafirus ek minder grut. De Hiswa-Recron freget alle gemeentebestjoeren yn Fryslân om it regear dúdlik te meitsjen dat de rekreaasjesektor der klear foar is om wer iepen te gean.
16:07
Freedsmerk oer fakânsje: "Dat wurdt 'm no earst efkes net"
Hagelwite strannen en wapperjende palmbeammen moatte foarearst noch efkes wachtsje. De besikers fan de Ljouwerter freedsmerk fertelle dat se it fanwegen it coronafirus no tichter by hús sykje: "Ús tún is grut genôch, dus wy fermeitsje ús wol".
15:00
Tolve minsken op intensive care yn Fryslân
Der lizze op dit stuit tolve minsken mei it coronafirus op de intensive care yn de Fryske sikehuzen. Dat is ien mear as earder dizze wike, doe't de sikehuzen ek mei sifers nei bûten kamen, mar flink minder as in wike lyn. It tal coronapasjinten dat wol yn it sikehûs, mar net op de IC leit, stiet no op 22. Ek dat is wat mear as earder dizze wike.
13:48
Oantal coronapasjinten opnaam bûten de IC
13:40
Oantal coronapasjinten opnaam op de IC
12:31
Spiel de kranen troch
12:00
GGD-update
Der binne de ôfrûne 24 oeren yn Fryslân gjin nije coronastjergefallen meld. Dat nijs bringt GGD Fryslân. Dêrmei bliuwt it oantal minsken dat ferstoarn is oan de gefolgen fan it coronafirus op 63 stean. Der binne it ôfrûne etmiel wol seis nije positive tests bykaam. By 532 Friezen is it firus no offisjeel fêststeld.
11:37
Boarstkanker yn coronatiden
It binne ûnwisse tiden, foar elkenien. Mar foar wa't dan noch de diagnoaze kanker krijt, is it in ekstra swiere opjefte. Tine Terpsma fan Minnertsgea is 45 en hat te hearren krigen dat se boarstkanker hat. Tagelyk mei de lockdown is sy oan har behanneltrajekt begûn. En dat is dreech. Want gemo's kinne it ymmúnsysteem flink oantaaste en dus hawwe je mear kâns om corona te krijen. De kommende moannen bliuwt de húshâlding mei twa bern hoe dan ek yn thúsisolaasje.
Dat der no in lockdown is, is in foardiel: der komme net in soad minsken del en dat makket dat der minder kâns is om in firus op te rinnen. It neidiel is dat je je ferhaal net kwyt kinne. "Oars tref je noch wolris minsken by de winkel of it skoalplein, dat is no ek net sa. Ach, ek wol wer lekker rêstich, juh."
10:42
Fideodeiboek: "In één zo'n bed moest soms wel een hele familie slapen"
It is maaiefakânsje en de famylje Lont giet mei de bern nei Kamp Westerbork. Der is in soad ticht, mar se meie der noch wol gewoan rûn rinne. Foaral Rixt fan tsien jier wol dit al hiel lang en fynt it ynteressant om te sjen wêr't de minsken slepten yn it kamp.
09:46
Bloedprikke op It Hearrenfean
Fan 11 maaie ôf kinne minsken op It Hearrenfean en omkriten dy't troch harren húsdokter, ferloskundige of Trombosetsjinst trochferwiisd wurde foar bloedûndersyk, telâne by in spesjaal ynrjoche tinte op it parkearterrein fan sikehûs Tjongerskâns.
De nije priklokaasje fan HAL Fryslân en Certe ferfangt de tydlike oplossing yn Sportstad Heerenveen en is elke dei iepen fan 8.00 oant en mei 16.00 oere. Pasjinten dy't bloed ôfnimme litte moatte op fersyk fan in spesjalist yn it sikehûs kinne krekt as earder telâne by de prikpoly yn Tjongerskâns.
09:35
750 miljoen euro ekstra foar corona-oerbrêgingskredyt rjochte op lytse bedriuwen
De Nederlânske steat makket 750 miljoen euro ekstra oerbrêgingskrediten mooglik foar ûndernimmings mei in relatyf lytse finansieringsbehoefte (fan 10.000 oant 50.000 euro). De regeling krijt de namme Kleine Kredieten Corona garantieregeling (KKC) en is mei op inisjatyf fan de banken ta stân kaam. De oerheid stiet foar 95 persint garant (713 miljoen euro).
De lienings sille jûn wurde troch banken en in rinte hawwe fan maksimaal 4 persint. Ek net-bankêre akkreditearre finansiers kinne de liening jaan. Nei ferwachting kinne inkelde tsientûzenen ûndernimmings gebrûk meitsje fan de liening.
09:15
Tien persint sportferienings yn noed oer fuortbestean troch coronakrisis
De Nederlânske sportwrâld makket him grutte soargen oer de ympakt fan de coronakrisis. Tsien persint fan de sportferienings fielt him by de sluting fan de sportakkomodaasje op koarte termyn (oant de simmer) yn syn fuortbestean bedrige. Dat is de wichtichste konklúzje dy't it Mulier Instituut lûkt út in ûndersyk dat útfierd is yn opdracht fan sportkoepel NOC*NSF.
Mocht de krisis langere tiid oanhâlde dan tinke sels fjouwer op de tsien sportferienings, troch ûnder mear it ferlies fan leden en ynkomsten, úteinlik te ûnder gean te sillen.
It ûndersyk waard útfierd yn de perioade fan 1 oant en mei 13 april. Sportferienings koene yn de enkête oanjaan mei hokker problemen en fraachstikken se wrakselje as gefolch fan de kabinetsmaatregels om it coronafirus te bestriden en yn hokker mjitte se stipe nedich hawwe soene om de krisis te oerlibjen. Der diene goed 3.200 sportklups mei oan it ûndersyk.
Lês hjir mear oer it ûndersyk.
08:04
Ynkompleet team op mear as de helte fan de basisskoallen
Goed de helte fan de basisskoallen, 57 persint, set kommende moandei útein mei in ynkompleet team. Op dizze skoallen komme gemiddeld trije learkrêften net nei skoalle op 11 maaie. Dat meldt DUO Onderwijsonderzoek & Advies nei ûndersyk tegearre mei it AD ûnder 1.250 basisskoallen.
De grutste mearderheid fan de learkrêften (92 persint) dy't starte mei in ynkompleet team, jout oan dat dit gjin problemen opleveret of dat de problemen te oersjen binne. In grutte mearderheid fan de learkrêften, 80 persint, hat der in soad sin oan om op 11 maaie wer oan de slach te gean mei har learlingen. De rest fan de learkrêften fynt foaral dat it eins net ferantwurde is om de skoallen moandei wer te iepenjen.
Goed taret
In lytse trijekwart fan de learkrêften fynt dat de skoalle goed taret is op de nije situaasje, 9 persint fynt dat net. Trijekwart seit dat de skoallieding der alles oan docht om it skoalteam te ûnderstypjen, 9 persint stelt fan net. Fierder hat 72 persint der in soad fertrouwen yn dat de skoalle goed taret is op de nije situaasje fan it diels op skoalle en diels op ôfstân fersoargjen fan ûnderwiis, mar 9 persint hat dat fertrouwen net.
Ofspraken
De learkrêften jouwe ek oan dat op hast alle skoallen dúdlike ôfspraken makke binne om de iepening in sukses te meitsjen. It giet dêrby bygelyks om hoe't âlden har bern ôfleverje op skoalle; 99 persint fan de learkrêften jout oan dat dêr (reedlik) dúdlike ôfspraken oer makke binne. Oare ôfspraken gean ûnder mear oer it fersprieden fan de pauzes oer de groepen/learlingen (96 persint) en hoe't learkrêften mei de âlden kommunisearje oer har bern (96 persint).
07:56
Minsken ûnderfine mear psychyske klachten
Troch de coronakrisis hat in grutte groep Nederlanners lêst fan slimmere psychyske klachten, skriuwt Trouw op basis fan in enkête fan it Trimbos-ynstitút. Dêryn seit in tredde mear lêst te hawwen fan depressive gefoelens, sliepproblemen en eangst.
It ynstitút ûnderfrege 3.000 Nederlanners fan 18 jier âld ôf. Hast 40 persint ûnderfûn mear stress sûnt de corona-útbraak. Se meitsje har bygelyks mear soargen oer har finansjele situaasje. Fan de groep dy't mear stress ûnderfynt, hat 60 persint lêst fan eangstklachten en depressive gefoelens. De helte hat faker lêst fan sliepproblemen en ien op de tsien tink wol ris oan de dea.
It ûndersyk is net represintatyf: 83 persint fan de respondinten is frou en der die relatyf sjoen net in soad jongerein mei oan de enkête.
07:37
Heechste syktefersom yn 17 jier
It syktefersom yn Nederlân is yn it lêste kwartaal fan dit jier oprûn nei 5,2 persint. Dat is it heechste fersom yn santjin jier, meldt it Centraal Bureau voor de Statistiek op basis fan foarriedige sifers. Yn hast alle bedriuwtûken wie in taname fan it fersom te sjen. It CBS seit net wat de ynfloed fan de útbraak fan it coronafirus op it fersom is, om't it buro gjin ûnderskied makket tusken de ferskillende moannen of wiken.
It fersom wie it heechst yn de sûnenssoarch en de yndustry (6,7 persint). Yn de sûnenssoarch wie dat foarich jier noch 6,1 persint, yn de yndustry 5,8 persint. Mei in persintaazje fan 6,2 is it fersom yn it iepenbier ferfier ek boppegemiddeld. It ferskil mei foarich jier (6,1 persint) is wol nihyl.
07:18
Poppoadia meie foarearst net iepen
Teäters en konsertsealen meie, as se dat wolle, op 1 juny wer iepen foar lytse groepen. Dat jildt lykwols net foar poppoadia. Dy falle ûnder de regeling fan de eveneminten en bliuwe dus yn elts gefal oant 1 septimber ticht. Mar ek dêrnei is de takomst net wis. In fikse teloarstelling foar de poadia, sa fynt ek Yvonne Bleize, direkteur fan Neushoorn yn Ljouwert: "Op basis van de huidige situatie kunnen we absoluut niet vooruitkijken."
Yn de moannen maart, april en maaie besiket Neushoorn in buffer op te bouwen om de rêstige simmermoannen troch te kommen, mar dy buffer ûntbrekt no. "Wij moeten het hebben van tickets en de drankjes die worden verkocht, maar van beide is geen sprake, dus die buffer mist."
06:30
Koart pleit SC Cambuur tsjin de KNVB
Sportklup Cambuur stiet freed yn Utrecht yn in koart pleit tsjinoer de KNVB. De Ljouwerters wolle yn de rjochtseal promoasje nei de earedifyzje ôftwinge. De rjochtsaak begjint om 10.00 oere en is live te folgjen op omropfryslan.nl en yn de Omrop-app.
06:25
Rjochtbank en hôf binne coronaproof
De rjochtbank en it gerjochtshôf yn Ljouwert binne coronaproof. Dat betsjut dat fan takom wike ôf wer saken hâlden wurde kinne. Sûnt de ynfiering fan de coronamaatregels lei de fysike rjochtspraak foar it grutste part stil. Saken waarden sa lang behannele fia ynternet. Sa koe sa'n 80 persint fan de sittingen dochs hâlden wurde.
It is fan grut belang foar de rjochtspraak dat de fertochten fysyk oanwêzich binne, seit tydlik rjochtbank-presidint Herman van der Meer: "De rechter moet een verdachte in de ogen kunnen kijken. Dat ze door hem of haar gezien worden. Dat geldt andersom ook. Dat de verdachte zijn of haar verhaal in de ogen van de rechter kan vertellen."
06:01
Fryslân fan 'e Moarn
Fan 6.00 oant en mei 9.00 oere kinne jo ús op de radio harkje nei Fryslân fan 'e moarn, presintearre troch Hans Koster. Yn it programma is der omtinken foar ferskate ûnderwerpen dy't mei it coronafirus te krijen hawwe. Sa prate wy mei de direkteur fan poppoadium Neushoorn oer de coronamaatregels, dêr't de ynstelling swier ûnder te lijen hat. Op de Waadeilannen is it in stik rêstiger, en dat docht miskien wol fertuten foar de fûgels op it eilân. Dêr wurdt no ûndersyk nei dien. Fierder kin de rjochtbank wer úteinsette, want ek yn de gebouwen fan de rjochtbank en it hôf binne maatregels tsjin it firus troffen. Der is nei seisen ek omtinken foar in frou mei boarstkanker. Dat is al dreech, mar hielendal yn coronatiid.
Ek prate wy live mei Anne-Marie van Elsacker oer it grutskalich teste op it coronafirus. Ferslachjouwer Timo Jepkema is yn Drachten, dêr't in corona-proof speurtocht is foar bern en âlden. Ta beslút ha we kontakt mei sportferslachjouwer Roelof de Vries. Hy is yn Utrecht by it koart pleit fan SC Cambuur en De Graafschap tsjin de KNVB. De Ljouwerter fuotbalklup wol fia de rjochter promoasje nei de earedifyzje ôfwtinge. De Vries sjocht foarút op de saak.
06:00
Goeiemoarn!
Wolkom by it liveblog fan freed 8 maaie oer it coronafirus. Dit wie it wichtichste nijs fan tongersdei:
Wolst it folsleine liveblog fan tongersdei nochris neilêze? Dat kin hjir.