Liveblog
|
7 maaie 2020
Coronanijs fan 7 maaie: Gjin nije coronastjergefallen; oantal IC-pasjinten ûnder de 600
Yn dit liveblog melde we it lêste nijs oer it coronafirus.
Lêst bywurke: 2 novimber 2020, 16:19
22:45
Ein fan dit liveblog
Oant safier dit liveblog fan tongersdei 7 maaie oer it coronafirus. Tank foar it folgjen fan dit liveblog. Freedtemoarn is der wer in nij liveblog mei dêryn it lêste coronanijs.
20:23
Smoardrok foar kappers
Sûnt it kabinet woansdeitejûn bekend makke dat de kappers fan kommende moandei ôf wer iepen meie, stiet de telefoan by in soad kappers net mear stil. "De telefoon staat hier roodgloeiend", seit Carolien de Groot fan Caro-Line Hair & Make-up yn Frjentsjer. Har kapsalon sit de hiele moanne maaie dan ek al sawat fol.
19:50
Frou Zuidema krijt vlogs fan har soan mei kanker
Se krupt sawat yn de laptop as har soan Adriaan (47) yn byld ferskynt. Neel Zuidema fan Gytsjerk hat leard hoe't se skype moat sûnt de lockdown. It is de iennige manier om inoar 'te sjen' ek al fielt echt kontakt oars fansels. Adriaan seit fia skype fan syn hûs yn Delft út dat er útsjocht nei inoar moetsje. Wat altyd sa fanselssprekkend like sil je no aanst ekstra wurdearje, tinkt er.
19:14
Coronamedalje foar Opsterlanner basisskoallebern
Basisskoallebern yn Opsterlân krije in medalje en oarkonde fan de gemeente, omdat se holpen ha om de fersprieding fan it coronafirus tsjin te gean. Troch acht wiken thús te bliuwen en net nei skoalle te gean ha de bern neffens de gemeente in grutte rol spile by it opkearen fan it firus. De skoalbern fertsjinje in grut komplimint, fynt de gemeente Opsterlân. Dêrom krije se in taastber oantinken oan dizze coronaperioade. Boargemaster Van Selm fan Opsterlân bringt kommende moandei in besite oan basisskoalle De Arke yn Nij Beets om de medalje en oarkonde persoanlik del te bringen.
19:05
Friezinne om utens yn Kataloanië
Krekt as Nederlân giet Spanje hiel stadichoan wer iepen. Friezinne om utens Geartsje de Vries, oarspronklik fan Warkum, wennet yn it Katalaanske Mataró. "We ha hjir wol hân dat de plysje nei it tiidstip seach op dyn kassabontsje fan de supermerk, om te kontrolearjen ofst net te lang bûten wiest."
19:01
Bewenners Talmahoeve wolle nei bûten
Der komt foarearst gjin ferromming fan de coronaregels by de fersoargingshuzen. Dat is de bewenners fan fersoargingshûs Talmahoeve yn Feanwâlden min nei it sin. Se wolle wer nei bûten en de bewenners lieten dat tongersdeitemoarn dúdlik witte oan Kommissaris fan de Kening Arno Brok, dy't dêr op wurkbesite wie.
18:58
Hoe komt it mei Oerol?
Fan it Ryk meie grutte publykseveneminten pas wer as der in faksin is. Dat hat in soad ynfloed. Want hoelang kin it wol net duorje foardat dat der is? It kultuerele festival Oerol dat yn juny wer op Skylge wêze soe, soe dit jier al net trochgean yn syn oarspronklike foarm. Mar wat as it faksin der takom jier noch net is?
18:23
De Harmonie giet net iepen foar tritich man publyk
Wy kinne net iepen mei tritich man publyk. Lit dat dúdlik wêze. Direkteur Marijke van der Woude van skouboarch De Harmonie is net sa posityf oer it nijs foar de kulturele sektor dat it kabinet woansdei bekend makke hat.
De kulturele sektor mei, mei in soad beheinings, de doarren per 1 juny wer iependwaan. Ynearsten meie der net mear as tritich minsken yn it publyk sitte. As dat goed giet en it tal besmettingen net omheechgiet, giet dat getal omheech nei hûndert. De maatregels betsjutte in finansjele strop dy't boppe-op de tekoarten komt dy't der al wiene by De Harmonie.
17:42
Premier Rutte: stiet net fêst dat hoareka iepen kin op 1 juny
Neffens premier Rutte stiet it net fêst dat hoareka op 1 juny wer iepen kin. "Het moet verantwoord kunnen, anders doen we het niet", sei hy yn it debat oer corona yn de Twadde Keamer.
Rutte sei dat hy der pas in wike fan te foaren wis fan is. "We moeten ons baseren op cijfers van virologen." Sy hâlde de fersprieding fan it firus yn de gaten en sjogge oft de opnamen yn it sikehûs en de intensive care leech genôch bliuwe.
17:31
Izore: elkenien teste mei klachten is helber
Neffens Izore is it plan fan it kabinet om fan juny ôf alle minsken mei klachten dy't hearre by it coronafirus te testen helber yn Fryslân.
"Wij verwachten de toename van monsters voor coronavirus-diagnostiek goed aan te kunnen", seit direkteur Anne-Marie van Elsacker.
17:23
Bewegingscentrum Ljouwert: wy binne der wól klear foar
Nettsjinsteande de fersoepelingen fan de coronamaatregels meie de sportskoallen foarearst noch net iepen, dit ta grutte teloarstelling fan ûnder mear Bewegingscentrum Ljouwert. Sy ha derom in fideo online setten wêryn't se sjen litte dat sy neffens har wól klear binne foar weriepening. Sy hoopje dat it kabinet it beslút oer de sportskoallen derom noch oanpasse sil.
Besjoch de fideo hjirûnder:
17:11
'Tour de Hoop' yn Aldeboarn
De protestantske gemeente fan Aldeboarn hâldt op 17 maaie in 'Tour de Hoop.' Dêrmei wol de tsjerke minsken stypje yn dizze coronatiid. Der sil in karavaan troch it doarp ride, sa't eltsenien op it eigen hiem sjen kin nei livemuzyk en bydragen fan hoop fan de dûmny. Eltsenien kin in fideoboadskip ynstjoere en de tour is ek op ynternet te folgjen.
17:03
Golfers wer wolkom yn Beetstersweach
Mei in flink pakket maatregels binne golfers fan moandei ôf wer wolkom by Golfclub Lauswolt yn Beetstersweach. Harren kluphûs bliuwt foarearst ticht, minsken wurdt frege nei it golfen sa gau mooglik nei hûs te gean. Premier Rutte lei woansdeitejûn út dat net-kontaktsporten lykas golf en tennis fan 11 maaie ôf wer tastien binne. Wedstriden noch net.
16:50
Autorydskoallen meie wer
Premier Rutte kaam woansdeitejûn foar autorydskoallen mei it ferlossende wurd: se meie fan kommende moandei ôf wer los. Der moatte hiel wat maatregels naam wurde, mar it stof kin fan de auto's.
16:44
Buma: net alles moat ôfhingje fan hanthavening
Gemeenten moatte goede ôfspraken mei alle sektoaren meitsje oer hoe't se sa folle mooglik wer iepen kinne en besjen wat der gebeure moat as it net goed giet. Dat is de útkomst fan in oerlis dy't de boargemasters fan alle Fryske gemeenten tongersdei hân ha.
Dat oerlis komt nei de ferromming fan de coronamaatregels, sa't premier Rutte dy oankundige. "Het belangrijkste is dat er nu meer open kan", seit Sybrand Buma, boargemaster fan Ljouwert en foarsitter fan de Veiligheidsregio Fryslân. "En het kan ook allemaal iets sneller open dan we eerst verwachtten. Er is nog veel te wensen over, maar de richting waar we opgaan is heel gunstig."
Net alles moat aanst ôfhingje fan de hanthavening, seit Buma. Minsken moatte foaral sels ferantwurdlikheidsbesef ha. "Dus thuisblijven bij klachten, niet de drukte opzoeken, afstand houden. Als mensen dat doen, dan komen we er. Als we het alleen van de handhaving moeten hebben, dan is er nooit genoeg om alles te kunnen handhaven."
16:29
Advys: middelbere skoalbern spraat nei skoalle
As de middelbere skoallen op 2 juny wer iepen sille, moatte alle learlingen spraat nei skoalle. Dat stiet neffens de NOS yn in protokol fan ûnderwiisorganisaasjes wêrûnder de VO-ried en de ûnderwiisbûnen.
Inkelde advizen út it protokol:
16:28
Kommissaris fan de Kening Arno Brok op besite yn Feanwâlden
16:28
Fryske musea wiis mei stipe Museumvereniging
De Museumvereniging hat as brânsj-organisaasje sa'n 400 musea yn Nederlân in foarskot jûn fan yn totaal 10 miljoen euro. De feriening jout de Museumkaart út en de musea dy't dizze kaart akseptearje, krije in foarskot like grut as twa moannen kaartbesite. De hichte fan it foarskoat hinget gear mei de besitefergoeding oer 2019. De Museumvereniging wol der sa foar soargje dat musea noch wat jild yn kas hâlde yn de coronakrisis.
16:19
Tal coronapasjinten op IC ûnder 600
It tal coronapasjinten op de intensive care is sakke ta ûnder de 600. Op dit stuit lizze der noch 584 pasjinten op de intensive cares. Dat binne der 42 minder as woansdei, sa seit it Landelijk Coördinatiecentrum Patiënten Spreiding (LCPS).
Fan de coronapasjinten lizze 566 op Nederlânske ic's, 39 minder as woansdei. Op de intensive cares yn Dútslân lizze 18 Nederlânske coronapasjinten. Trije minsken binne werombrocht nei Nederlân. Fierder lizze 440 minsken mei oare oandwaningen op de intensive care. Dat is in stiging fan 43 yn fergeliking mei woansdei.
Bûten de intensive cares, dus op de ferpleechôfdielingen, lizze 1.286 minsken mei corona. Dat binne der 45 mear as woansdei.
16:08
'Koart pleit is de wedstriid fan it jier'
It koart pleit fan freed dêr't Cambuur promoasje nei de earedifyzje mei ôftwinge wol, is foar de klup de wedstriid fan it jier. Dat seit algemien direkteur Ard de Graaf op SCCambuurTV.
It koart pleit tsjinnet freed om 10.00 oere yn Utrecht. Publyk kin der net by wêze, mar it koart pleit is wol live te folgjen op omropfryslan.nl en yn de Omrop-app.
14:55
Filmteäters meitsje harren soargen oer weriepening
De Nederlânse filmteäters meitsje harren soargen oer in weriepening nei 1 juny. It Nederlands Filmtheater Overleg, de koepel fan 24 grutte arthousebioskopen yn Nederlân, hat freed in oerlis oer de fraach oft de sealen wer iepen kinne binnen de restriksjes dy't de oerheid bioskopen opleit fanwegen de coronakrisis. Dat hat in wurdfierder tongersdei meldt. "Er was al veel twijfel of een protocol kon worden ontwikkeld voor de kleinere bioscopen waarin anderhalve meter afstand kan worden gehouden. Maar de mededelingen van het kabinet van woensdag hebben alleen maar meer vragen opgeworpen voor veel filmtheaters."
Undúdlik is oft de filmteäters nei weriepening noch yn oanmerking komme foar de finansjele kompensaasje dy't de oerheid biedt. Ek binne in soad lytsere bioskopen ôfhinklik fan de gemeentlike subsydzjes dy't yn dizze coronatiid hiel ûnwis wurden binne.
14:41
Sels de Alvestêdeferiening tinkt nei oer coronafirus
De simmer komt der stadichoan oan, dus in Alvestêdetocht leit op it stuit net foar de hân. Dochs hat it bestjoer fan de feriening Friesche Elf Steden wol kontakt oer hoe't it komt as der genôch iis leit, mar it coronafirus noch net fuort is.
Want grutte eveneminten meie net trochgean, salang't der gjin faksin is. En dat kin noch wol even duorje. Mocht it takom winter foar it earst sûnt 1997 kâld genôch wêze, dan is it dus noch mar de fraach oft der riden wurde kin. "We ha it hjir mei it bestjoer ek oer hân", seit foarsitter Wiebe Wieling. "Hoe moatte je dit yn himelsnamme adressearje as de situaasje him foardocht? Ik ha der noch gjin antwurd op, mar we moatte der wol oer neitinke."
14:09
Goed in tredde mear failliseminten
It oantal falliseminten yn Nederlân is yn april middenyn de coronakrisis mei goed in tredde tanaam. Ek naam it oantal nije oprjochte bedriuwen ôf, meldt de Kamer van Koophandel (KvK). April wie de earste folsleine moanne wêryn't Nederlân maatregels tsjin it nije coronafirus fan krêft wiene.
Neffens de KvK giene yn april 343 bedriuwen en selsstannich ûndernimmers fallyt, 36 persint mear as yn deselde moanne foarich jier. Tagelyk weagen folle minder minsken de stap nei ûndernimmerskip, 34 persint minder.
De KvK weaget him sels net oan in ferklearring foar de taname fan it oantal bankerotten. It soe neffens juriste Karen Harmsen lykwols wol foar de hân lizze.
14:01
Nije RIVM-sifers: 84 nije stjergefallen
Yn it ôfrûne etmiel hat it Rijksinstituut voor Volksgezondheid en Milieu (RIVM) 84 stjergefallen troch it coronafirus trochkrigen. It offisjele deadetal is dêrmei oprûn ta 5.288. It Oantal sikehûsopnames rûn mei 39 op ta 11.192. De sifers binne net hielendal aktueel, omdat ferstjerrens en opnames somtiden pas nei in pear dagen trochjûn wurde.
It oantal fêststelde coronabesmettings rûn op ta 41.774. Dat binne der 455 mear as woansdei. It werklike oantal pasjinten leit heger, om't net elkenien test wurdt.
13:30
NS: kondukteurs sille mûlkapkesplicht hanthavenje
Kondukteurs moatte de mûlkapkesplicht foar passazjiers hanthavenjen gean yn de treinen, seit in wurdfierder fan de Nederlandse Spoorwegen (NS). Dêroer binne neffens him ôfspraken makke mei de oerheid. Fakbûn foar spoarweipersoniel VVMC pleatste dêr earder tongersdei fraachtekens by.
"Wie vanaf juni in de trein reist en geen mondkapje draagt, kan bijvoorbeeld worden gevraagd om de trein bij het volgende station te verlaten en daar een mondkapje aan te schaffen", seit de NS-wurdfierder mei ferwizing nei in útspraak fan steatssekretaris Stientje van Veldhoven (Ynfrastruktuer en Wettersteat) woansdei yn it tv-programma Op1.
12:04
GGD: Gjin nije coronastjergefallen, twa nije positive tests
Der binne de ôfrûne 24 oeren yn Fryslân gjin nije coronastjergefallen meld. Dat nijs bringt GGD Fryslân. Dêrmei bliuwt it oantal minsken dat ferstoarn is oan de gefolgen fan it coronafirus op 63 stean. Der binne it ôfrûne etmiel wol twa nije positive tests bykaam. By 526 Friezen is it firus no offisjeel fêststeld.
Hieltyd mear sektoaren kinne in bytsje los, mar allegear wol ûnder foarbehâld, sadat it net de ferkearde kant wer útgiet mei it oantal besmettingen. De GGD is hjirop taret mei in saneamde 'exit-strategy'. "We spreken zelf liever van een transitiestrategie, want helemaal eruit komen we voorlopig niet", seit Margreet de Graaf fan GGD Fryslân. "Dat zei minister De Jonge ook in de persconferentie: pas als er een vaccin is, kun je opnieuw bekijken of je het helemaal los kunt laten."
11:34
Hoe kinst fan in sok in mûlkapke meitsje? Jaantje Olijnsma leit it út yn Muzyk yn Bedriuw
11:29
Musea risse har ta op oardelmeterbesites
De musea yn Fryslân binne op 1 juny klear om mei oanpassingen wer publyk te ûntfangen. Dat is de fêste oertsjûging fan Mirjam Pragt, direkteur fan de Museumfederaasje Fryslân dêr't 74 musea by oansletten binne. "Ik ben zo blij, dat we weer open kunnen."
Fuortendaliks nei it bekend wurden fan de datum wêrop't ek musea wer los meie, kamen de fragen al binnen oer bygelyks beskermingsmaterialen, rûtes en hoe om te gean mei frijwilligers. De kommende wiken sille alle needsaaklike oanpassings dien wurde.
11:17
RIVM kritysk op mûlkapkes
RIVM-baas Jaap van Dissel is kritysk oer it advys om mûlkapkes te brûken as 1,5 meter ôfstân hâlde net mooglik is. Hy bliuwt derby dat de kapkes "gering effect" ha en dat se net geskikt binne as ferfanging foar it ôfstân hâlden.
It beslút kin ek negatyf útpakke, omdat minsken mei mylde klachten no miskien tinke dat se dochs nei bûten kinne. Boppedat drage minsken de kapkes geregeld ferkeard. Smoke, ite of drinke mei in masker ferheget ek it risiko op fersprieding, seit Van Dissel: "Men raakt dan eerst het masker aan en vervolgens de ogen of de mond, wat weer kan leiden tot besmetting."
10:50
Ferkeap mûlkapkes op stasjon
De HEMA sil mûlkapkes ferkeapje op treinstasjons. "Het gaat niet om medische maskers maar om gewone exemplaren", seit in wurdfierder fan it bedriuw. "De HEMA heeft de beschermingsmiddelen al in bezit, de inkoopafdeling liep vooruit."
Wannear't de mûlkapkes krekt te keap binne, wit de wurdfierder noch net, mar yn alle gefallen foar 1 juny. Fan dy dei ôf is it ferplicht om in mûlkapke op te hawwen yn it iepenbier ferfier. HEMA ferwachtet dat de fraach nei de mûlkapkes ekstreem heech wêze sil. Dêrom is it net dúdlik oft der genôch binne. "Gun elkaar een exemplaar", seit de wurdfierder.
10:33
OVV docht ûndersyk
De Onderzoeksraad voor Veiligheid (OVV) ûndersiket hoe't de Nederlânske oerheid en oare belutsen partijen de coronakrisis oanpakt ha. It giet dan om de tarieding op de pandemy, it behearskjen fan de krisis, de maatregels en de 'exitstrategy'. De OVV hopet oer goed in jier mei de resultaten te kommen.
10:13
KEaRN krijt 10.000 euro fan it Oranje Fonds foar Berne Bag
Wolwêzenorganisaasje KEaRN krijt in bydrage fan 10.000 euro fan it Oranje Fonds foar de 'Berne Bag', mei dêryn materialen om te boartsjen en te nifeljen. De Berne Bag is troch KEaRN ûntwikkele foar bern yn Achtkarspelen en Tysjerksteradiel, dy't neffens harren yn dizze coronatiid wol wat ekstra's fertsjinje. Om't alles no oars is as oars wolle se de bern in hert ûnder de riem stekke.
Inisjatyfnimmer is Alie Klompmakker jongereinwurker by KEaRN: "Er is een grote groep kinderen die het thuis niet ruim heeft. Juist die kinderen willen we met deze Berne Bag laten weten dat we aan ze denken. Een klein lichtpuntje in de coronatijd!" Mei de bydrage fan it Oranje Fonds koenee yn totaal 1.000 tassen folle wurde. Tongersdei set it rûnbringen fan de tassen útein.
10:05
Thúswurkers wurkje langer troch
Fjouwer op de tsien Nederlanners dy't thúswurkje fanwegen de coronakrisis, wurkje thús langer troch as op kantoar. Dat seit LinkedIn op basis fan in ûndersyk ûnder mear as tûzen thúswurkers yn Nederlân.
Ek ûnderfynt 31 prosint fan de thúswurkers mear wurkstress as normaal en hast de helte fan de thúswurkers hat minder beweging as oars. Dêrby liket konsintraasje in útdaging: 37 prosint kin him thús dreger fokusje en mear as in kwart krijt minder wurk dien.
10:03
Ferpleechhûsbewenners en har neisten ha ferlet fan mear kontakt
Likernôch 2.200 Nederlanners follen de enkête fan senioare-organisaasje KBO-PCOB yn, wêrmei't de organiaasje efterhelje woe wat de gefolgen fan de beheinde besiteregeling binne foar de bewenners fan ferpleechhûzen en harren neisten. De measte respondinten ha begryp foar de maatregels, mar ha it der ek dreech mei en wolle har famyljeleden wer sjen.
It grutste part fan de respondinten seit ferlet te hawwen fan mear kontakt. Hast santich persint seit begryp te hawwen foar de lockdown om it coronafirus te bestriden, mar ûngefear de helte seit ek dat der te min mooglikheden binne om kontakt te hâlden mei harren famyljelid yn it ferpleechhûs.
By in grutte mearderheid is der fertriet (73%) dat se net by har neiste op besite meie en der is ek eangst (26%). Ek foar de bewenners sels sjogge sy dy effekten. Sa is der iensumens (76%), fertriet (66%), hat it gefolgen foar de kwaliteit fan libjen (62%) en is der eangst (35%).
09:39
Earst gjin grutte eveneminten
Grutte eveneminten kinne pas trochgean as der in faksin is tsjin it coronafirus. Oant dy tiid is it gefaar te grut dat it firus wer grutter wurdt, tinkt it kabinet.
In protte maatregels wurde de kommende tiid lichter: sa kinne skoallen, hoareka, sportferienings en kulturele ynstellingen wer iepen. Mar grutte festivals en "massale evenementen met een landelijke uitstraling" sitte der foarearst net yn, skriuwt minister De Jonge oan de Twadde Keamer. In datum kin er noch net neame: "We hopen natuurlijk op snel, maar een jaar of langer is heel reëel."
09:33
Nijste gegevens
Besjoch hjir de nijste gegevens fan it RIVM, dy't Jaap van Dissel op it stuit presintearret oan de Twadde Keamer.
09:08
Undernimmersorganisaasjes bliid
Undernimmers binne bliid mei de stappen om de ekonomy wer iepen te setten, sizze ûndernimmersorganisaasjes VNO-NCW en MKB-Nederland. "Dit biedt veel ondernemers weer perspectief en we benadrukken al enkele weken dat zo'n stapsgewijze aanpak kan, als iedereen zich aan de 1,5 meter afstand en de hygiënevoorschriften houdt", skriuwe se yn in earste reaksje.
"We delen de zorg van het kabinet dat dit niet tot een nieuwe virusuitbraak mag leiden. Ondernemers zullen al het mogelijke doen om dat te voorkomen en de routekaart volgens plan te laten verlopen en waar mogelijk iets te versnellen. We moeten het virus met elkaar in de hand houden."
09:00
Van Dissel jout updates
Yn Den Haag praat Jaap van Dissel fan it RIVM de leden fan de Twadde Keamer dalik wer by oer de stân fan saken mei it coronafirus. De briefing is fan 9.30 ôf te folgjen op de webside fan de Twadde Keamer.
08:26
Fideodeiboek fan sprekoere: "Normaal voel je met je blote handen toch iets beter"
In sprekoere sjocht der op dit stuit foar húsdokter Bart Maats hiel oars út. Yn syn vlog foar de rige 'Berjochten út it hert' lit hy sjen hoe't dat no yn syn gong giet. De minsken mei coronaferskynselen moatte nei in aparte romte.
07:03
Campings meie op 1 july wer iepen
Jachthavens en camperplakken meie fuort wer iepen, mar it sanitêre part moat wol sletten bliuwe. Campings meie lykwols pas mei yngong fan 1 july wer iepen. Dat is in moanne letter as de measte campinghâlders hope hiene. Sy wiene it leafst foar himelfeart en de pinksterdagen wer losgien.
De eigeners fan Camping Pasveer yn Snits binne tige optein mei de ferromming fan de lockdown. "It is moai waar en maaiefakânsje, dus ik bin bliid dat der minsken stean", fertelt Louise Hoekstra. "Ferline moanne sieten se wol efkes de hannen yn it hier. "Fan alles is skrast om de peaskedagen hinne, lykas in teäterstik yn it ramt fan 75 jier frijheid dat hjir yn de pleats wêze soe. Wy seagen ús omset down the drain gean."
06:44
Waadeilannen stapke foar stapke wer iepen
It stadichoan ôfbouwen fan de coronamaatregels is in goeie saak foar de Waadeilannen. Dat fynt boargemaster Ineke van Gent fan Skiermûntseach. Van Gent is der wiis mei dat de eilannen wer stapke foar stapke opstarte kinne, mar warskôget wol dat minsken wach bliuwe moatte op de maatregels.
"De verruiming is natuurlijk goed nieuws voor alle Waddeneilanden", seit de boargemaster. "Wij hebben het echt moeilijk. Onze ondernemers hebben het zwaar. Daarom zijn we blij dat we weer kunnen starten en dat we weer mensen kunnen verwelkomen."
06:04
Fryslân fan 'e Moarn
Fan 6.00 oant en mei 9.00 oere kinne jo ús op de radio harkje nei Fryslân fan 'e moarn, presintearre troch Hans Koster. Yn it programma is der omtinken foar ferskate ûnderwerpen dy't mei it coronafirus te krijen hawwe. Der sil wiidweidich weromsjoen wurde nei de parsekonferinsje fan minister-presidint Mark Rutte en minister Hugo de Jonge. Ek binne der ferskate reaksjes op de maatregels te hearren, fan Wim Kleinhuis (direkteur Veiligheidsregio Fryslân), Anne Hettinga (direkteur fan Arriva), Christel Koning (foarsitter fan ôfdieling Hearrenfean fan Koninklijke Horeca Nederland), boargemaster Ineke van Gent as wurdfierder fan de fjouwer Waadeilannen en kapper Paul Kingma.
Fierder prate wy mei Manon Vanderkaa fan senioare-organisaasje KBO-PCOB oer de útkomsten fan in enkête oer it net-talitten fan besite by ferpleechhuzen. It kabinet makke woansdei bekend dat der in proef opset wurdt mei 25 lokaasjes dêr't wol wer besite komme mei.
De eigeners fan Camping Pasveer yn Snits binne tige optein mei de feromming fan de lockdown. Ferslachjouwer Willem de Vries hat by de camping west foar in reaksje. En tongersdeitemoarn sels is ferslachjouwer Timo Jepkema nei de golfbaan yn Beetstersweach om dêr by de golfklup te hearren hoe't de ferromming fan de maatregels dêr fallen binne.
06:00
Goeiemoarn!
Wolkom by it liveblog fan tongersdei 7 maaie oer it coronafirus. Dit wie it wichtichste nijs fan woansdei:
Wolst it folsleine liveblog fan woansdei nochris neilêze? Dat kin hjir.