Coronanijs fan tiisdei 5 maaie: Corona fêststeld yn it azc fan Snits

05 maaie 2020 - 22:45

Yn dit liveblog melde we it lêste nijs oer it coronafirus.

  • Neffens de lêste sifers binne der yn Fryslân 63 minsken ferstoarn oan it firus, en der binne 521 besmettingen fêststeld;
  • Der lizze 18 minsken op de intensive care yn Fryslân, dêrneist lizze der 15 coronapasjinten op oare ôfdielings;
  • Al it nijs oer it firus is te finen yn ús coronadossier;
  • Sjoch op de kaart foar de aktuele situaasje yn dyn gemeente.

Dit liveblog is ook in het Nederlands te volgen.

22:45
Ein fan dit liveblog

Oant safier dit liveblog fan tiisdei 5 maaie oer it coronafirus. We sette noch ien kear it wichtichste nijs op in rychje:

  • Neffens de lêste sifers binne der yn Fryslân 63 minsken ferstoarn oan it firus, en der binne 521 besmettingen fêststeld;
  • Der lizze 18 minsken op de intensive care yn Fryslân, dêrneist lizze der 15 coronapasjinten op oare ôfdielingen;
  • By in bewenner fan it asyslsikerssintrum yn Snits is it coronafirus fêststeld. Dat hat in wurdfierder fan it COA sein;
  • De SP-steatefraksje fynt it ûnferstannich dat provinsje Fryslân selsmakke mûlkapkes foar de soarch oanpriizget.

Tank foar it folgjen fan dit liveblog. Woansdeitemoarn is der wer in nij liveblog mei dêryn it lêste coronanijs.

22:04
Miljoen nije tests foar ûndersyk nei groepsymmuniteit

Sanquin sil in miljoen bloedtests ynsette foar ûndersyk nei ymmuniteit tsjin it coronafirus. It rinnende ûndersyk wurdt sa flink útwreide, meldt de bloedbank. Tegearre mei it ministearje fan Folkssûnens hat de organisaasje in miljoen tests ûntfongen út Sina.

It giet om bloedtests dy't de oanwêzigens fan antystoffen tsjin it coronafirus oantoane. Dy tests binne ekstra weardefol, om't se neffens Sanquin trije ferskillende typen antystoffen mjitte. De antystoffen spylje alle trije krekt in oare rol yn it ymmúnsysteem. Mei de tests kin ûnder mear ûndersocht wurde hoe't de sykte him beweecht troch de befolking en leeftydsgroepen.

20:56
Maatregels foar kappers mooglik ferromme

Om't it kabinet mooglik de coronamaatregels ferromje wol, hawwe ek de kappers de hope dat sy ynkoarten wer knippe meie. Kapster Aly-Marij fan Ljouwert: "Eltsenien wol it leafst sa gau as mooglik wer knipt wurde."

Aly-Marij hat de hope dat se ynkoarten wer útein sette kin, mar de kapster wol ek net op de saken foarútrinne. "Ik hoopje it, mar wy binne ôfhinklik fan wat sy sizze", seit de kapster oer de maatregels fan it kabinet.

Lês mear: Kappers wolle graach wer iepen, mei pleksyglês of net

19:36
Fideodeiboek: "Teäter is júst yn dizze tiid en nei de corona hiel wichtich om inoar wer op te sykjen"

Gelokkich leit net al it wurk fan teaterregisseur Janneke de Haan stil. Yn har vlog foar de rige 'Berjochten út it hert' lit Janneke sjen hoe't se efter de skermen dwaande binne mei de lokaasjefoarstelling 'Rjocht oer it wetter'.

18:35
Coronafirus yn azc yn Snits

By in bewenner fan it asyslsikerssintrum yn Snits is it coronafirus fêststeld. Dat meldt in wurdfierder fan it COA (Centraal Orgaan opvang asielzoekers). Oft it om in man of frou giet, is net bekend. De persoan is yn it azc sels yn karantêne pleatst. Neffens de wurdfierder wurdt woansdei bekend oft der fierdere maatregels nedich binne. Yn it azc yn Snits wenje in lytse 600 minsken.

16:39
Kabinet ferrommet mooglik maatregels foar hoareka

It kabinet ferrommet mooglik de maatregels foar de hoareka. Yn Den Haag gean gean geroften dat Rutte woansdeitejûn yn in parsekonferinsje melde sil dat terrassen en strântinten mei yngong fan 1 juny ôf wer iepen meie.

Corne van de Erve, foarsitter fan de Fryske ôfdieling fan Koninklijke Horeca Nederland fertelt dat er de hiele dei al tillefoantsjes krijt fan entûsjaste hoareka-ûndernimmers yn de provinsje dy't der al fan oertsjûge binne dat de terrassen en strântinten wer iepen sille.

"En dan moet ik dat wel een beetje temperen, want het zijn natuurlijk nog geruchten, want we weten nog helemaal niets. Maar het is wel een fantastisch begin om de horeca weer open te krijgen. Je ziet ook dat gasten al bellen met de vraag of ze al weer kunnen reserveren."

Lês mear: Corné van de Erve: "De horeca kon binnen 20 minuten sluiten. Leuke uitdaging om binnen 20 minuten weer te openen"

16:05
16:04
Boalsert op 'e Strún ferpleatst nei 2021

De kuiertocht 'Boalsert op 'e Strún' giet dit jier net troch. De tocht soe eins pas op 31 oktober wêze, mar neffens de organisaasje is de situaasje troch it coronafirus te ûnwis om útein te setten mei it tarieden fan de tocht. 'Boalsert op 'e Strún' giet troch ferskate steechjes, strjitten, bedriuwen en gebouwen. "We pakken de organisatie voor 'Boalsert op 'e Strún' 2021 op zodra de situatie het weer toelaat", skriuwt de organisaasje.

Boalert op 'e Strún - Foto: Boalert op 'e Strún
14:27
Dichter fan Fryslân Nyk de Vries hat trije gedichten makke foar de tentoanstelling 'Oog in oog met Oorlog'
13:59
Lanlike sifers fan it RIVM

It offisjele deadetal troch it coronafirus yn Nederlân is oprûn ta 5186. It RIVM hat yn it ôfrûne etmiel 86 stjergefallen trochkrigen. It oantal sikehûsopnames rûn mei 89 op ta 11.126.

It oantal fêststelde coronabesmettings rûn op ta 41.087. It werklike oantal pasjinten leit heger, om't net elkenien test wurdt.

Trefwurden: 
coronafirus COVID-19
(advertinsje)
(advertinsje)