Coronanijs fan 28 april: Lanlik tal ic-pasjinten sakket, Fryslân wol stim hawwe yn ferdieling needhelp kultuer

Op grutte reade posters op in soad ruten yn Fryslân stiet: Houd moed, heb lief. It idee dêrfan komt fan in jonge dûmny op It Hearrenfean. It is lanlik in sukses.

Sportferienings meitsje har klear om stadichoan wer foar it earst te trainen mei de bern. Mar foar jongeren fan 13 oant 18 jier jildt noch in needferoardering: op syn meast mei trije minsken wêze en op minimaal oardel meter ôfstân bliuwe. Der wurdt no wurke oan in nije needferoardering, mar it is de fraach oft dy op 'e tiid klear is. Direkteur Kleinhuis fan de Veiligheidsregio tinkt dat sportklups net te bot ynsitte moat oer boetes. Hy tinkt dat "as sportklups mei de gemeente oerlis hân hawwe en ûnder de nije betingsten, dy't deroan komme, oan de slach gean, kinne sy mei de gemeente ôfprate dat der net altyd strang konrolearre wurdt."

Giet de oerheidsstipe aanst net allegearre nei de wat gruttere, kulturele ynstellings yn it lân en snije de regionale, lytsere organisaasjes ûnder? De tolve provinsjes meitsje harren dêr bot soargen oer. Se hawwe in brânbrief nei de fêste keamerkommisje fan kultuer stjoerd. Fan it needfûns fan 300 miljoen giet tsien prosint nei de "vitale, regionale infrastructuer". Deputearre Sietske Poepjes: "Wy wolle dat se de ferdieling op ús advys dogge en net yn Den Haag beslute oer wa wol en wa gjin subsydzje."

It lanlike tal pasjinten dat mei corona op de ic leit, is tebekrûn nei 861. Dat binne 44 minder as op moandei, meldt it Landelijk Coördinatiecentrum Patiënten Spreiding. In wike ferlyn wiene der noch 1087 ic-coronapasjinten. Fan dy 861 fan no lizze 29 op ic's yn Dútslân.

Ek lizze der 399 minsken mei oare oandwaningen op de Nederlânske ic's. Dat binne 32 mear as moandei. In goed teken, fynt Ernst Kuipers fan it Landelijk Netwerk Acute Zorg.. De sikehuzen wolle de reguliere soarch stadichoan wer oppakke.

De organisaasje fan Fryslân fan Boppen hat besletten om de lêste draaidei foar it projekt stil te lizzen. Hast twa wiken lang filmen drones alle wurkdagen rûtes boppe Fryslân. Minsken koenen dan sels in boadskip yn de tún skriuwe of wat kreatyfs meitsje. Reinbuien boppe de provinsje smite no lykwols roet yn it iten. De organisaasje kin de feilichheid no net mear garandearje, sa seit Lieuwe Krol. Minsken kinne harren bydrage noch wol de hiele middei sels ynstjoere. Sy kinne dy maile nei fanboppen@gmail.com. De organisaasje sil dy bylden dan meinimme yn de montaazje.

Tradisjonele syl- en motorskippen lykas tsjalken, klippers en seeskippen driigje kopke ûnder te gean troch de coronakrisis. De float telt fjouwerhûndert skippen. In soad dêrfan bestean fan reiskes mei gasten. Dy gean net troch en fanwege de annulearringen en werombetellingen fan it reisjild komme se no yn de knipe. De Vereniging voor Beroepschartervaart (BBZ) wol dat der in needfûns komt

De plicht om mûlkapes op te hawwen jildt no foar winkels yn hiel Dútslân. As lêste gie it bûnslân Berlyn akkoart. De mûlkapkesplicht jildt dus ek foar boadskippen dwaan yn de supermerk. Samar efkes de grins oerwippe mei net, of der moat al in wichtige reden foar wêze.

Undernimmersferieningen MKB Nederlân en VNO-NCW komt mei yogasesjes op ynternet. Thuiswerken is topsport, sa hjit de site. Dêr stiet ynformaasje en tips op lykas bygelyks ûntspanningsoefeningen en resepten, mar ek hoe in goede belâns te finen tusken wurk en privee. It platfoarrm is opset yn gearwurking mei de stichting NL Onderneemt Maatschappelijk! en mei help fan de ministearjes.

It grutste part fan it hoarekapersoniel dat fanwegen de coronakrisis ferplicht thús sit, makket him soargen oer de baan. Dat meldt fakbûn FNV op basis fan in enkête oer 4000 wurknimmers. Hast twa op de trije dy't ûnderfrege binne, freegje har ôf oft der aanst noch wol wurk is.

Om ek de kommende jierren coronapasjinten opfange te kinnen, moat de kapasiteit fan de intensive cares struktureel omheech fan 1.150 bêden nei 1.531. Dat ha de Nederlandse Vereniging voor Intensive Care (NVIC), it Landelijk Coördinatiecentrum Patiënten Spreiding (LCPS) en it RIVM berekkene.

It lanlike deadetal as gefolch fan it coronafirus is tiisdei mei 48 omheech gien. It totaal komt no op 4.566 stjergefallen, sa hat it RIVM bekend makke. Der binne de ôfrûne 24 oeren 88 minsken opnommen yn it sikehûs mei it firus.

Studinten meitsje har soargen oer de digitale surveillânse by it meitsjen fan tentamens. Se binne foaral benaud dat harren privacy yn gefaar komt troch it programma dat se op har kompjûter downloade moatte. Ferskate jongerein- en studinte-organisaasjes ha dêrom in brief stjoerd nei ûnderwiisynstânsjes en it ministearje fan Underwiis.

Der komt yn dizze coronatiden in kwart mear ôffal binnen by de fêstigingen fan ferwurker Omrin. Dat soarget derfoar dat de wurknimmers fan de ôffalferwurker it op dit stuit folle drokker hawwe as oars. "It is fol gas wurkjen mei syn allen, mei dûbele ploegen", fertelt plantmanager Rein van der Zwaag fan Omrin.

Op Curaçao, sa'n 10.000 kilometer fan Fryslân, wurdt lykas hjir ek altyd Keningsdei fierd, mar der wie dizze edysje gjin oranje te bekennen, fertelt âld-Drachtster en NOS-korrespondint Dick Drayer. "Het is nog nooit zo saai geweest als dit jaar. Ik kijk altijd erg uit naar Koningsdag op Curaçao. Dat wordt hier altijd uitbundig gevierd, maar dit jaar was het wel echt oersaai."

Der binne de ôfrûne 24 oeren yn Fryslân ien coronastjergefal en twa nije positive tests meld. Dat meldt GGD Fryslân. Yn totaal binne der no 59 minsken ferstoarn oan it coronafirus en 504 minsken binne posityf test.

"We zien al een hele tijd een ongeveer gelijk beeld met niet meer stijgende cijfers, dus in die zin is het op dit moment onder controle", seit Everhard Hofstra, dokter ynfeksjebestriding by GGD Fryslân. Mar dat giet neffens him wol ten koste fan de maatskippij, want dy bliuwt op slot.

De jierlikse deadebetinking yn it Kazemattemuseum yn Koarnwertersân giet dit jier troch, mar mei folle minder minsken as oars. Gewoanwei lizze minsken fan de gemeente, provinsje, definsje en skoallen op 4 maaie krânsen en blommen del. No dogge allinnich de bestjoerders fan it museum dat.

By de betinking hâldt dûmny Corry Nicolay in koarte taspraak en wurdt The Last Post spile. Dêrnei binne de twa minuten stilte en it Wilhelmus. De betinking wurdt wol opnommen en is dan te sjen op de webside fan it museum.

Samantha Pereira Arias rûn staazje op in deibesteging foar minsken mei in beheining doe't har frege waard om by te springen yn ferpleechhûs Maeykehiem yn Langwar. Dêr wie in oantal coronabesmettingen fêststeld en se koene wol minsken brûke. Hoewol't Samantha de gefaren seach, besleat se it dochs te dwaan.

No't de hoareka ticht is, fernimme ek in protte oare sektoaren de gefolgen dêrfan. De ierdappel- en de sauzesektor bygelyks, dy bliuwe mei in protte fan it guod sitten. Om wat fan dat oerskot kwyt te reitsjen, geane patatkarren de hiele moanne by fitale sektoaren del om patatsjes mei saus út te dielen.

It jongereinfuotbal mei fan woansdei ôf wer los. Bern oant en mei 12 jier meie foarearst wer traine en oefenpotsjes mei harren eigen team spylje. De nije maatregels fan it kabinet lykje simpel, mar binne neffens Folkwin Holtrop fan vv Heerenveense Boys noch net sa maklik om út te fieren: "Er zit aan de achterkant een hele organisatie om dat in te regelen."

Sa meie âlden net op it fjild komme, moatte de bern wol oardel meter ôfstân fan de trainer hâlde en binne de klaaihokken en dûsen noch ticht. En de bern wer nei it fuotbalfjild krije is ien, mar de trainers moatte ek ree wêze om wer te fuotbaljen.

Anyke Lont hat har eigen winkel yn Ljouwert dy't in oantal wiken ticht moast yn ferbân mei corona. Se filmet tegearre mei harren famylje wat se belibje yn de coronatiid foar de rige 'Berjochten út it hert'.

Foar mbo'ers dy't harren nei de stúdzje omskoalje litte wolle, soe in basisbeurs beskikber bliuwe moatte. Mei sa'n beurs kinne sy derfoar kieze om in oare oplieding, mei bettere kariêreperspektiven te folgjen. Dat is wichtich no't de arbeidsmerk sa bot feroare is troch de coronakrisis, fynt de MBO Raad.

Fjirtich dagen lyn gongen alle ferpleech- en fersoargingshuzen op slot foar minsken dy't der net wenje of wurkje. Dat betsjut ek dat bewenners yn dy sintra al fjirtich dagen gjin besite hân ha. En dat wurdt hieltyd dreger. "Ik kan hooguit het raampje even opendoen als er bezoek voor de deur staat, maar ik mag ze niet aanraken", fertelt de 79-jierrige Louis Wijman, bewenner fan Saxenoord yn Frjentsjer.

Mooglik stappe Sportklup Cambuur en De Graafschap tegearre nei de rjochter om it beslút fan de KNVB, om beide klups net promovearje te litten nei de earedifyzje, oan te fjochtsjen. De Graafschap lit witte dat der meardere opsjes ûndersocht wurde, mar dat se noch neat sizze oer de ynhâldlike stappen dy't se mooglik nimme sille. Cambuur nimt dêr tiisdei in beslút oer. De Ljouwerter fuotbalklup stie boppe-oan yn de earste difyzje en De Graafschap wie de nûmer twa doe't it coronafirus in ein makke oan it seizoen.

De drones fan it projekt Fryslân fan Boppen sille ek tiisdei gewoan de loft yn. Ek al wurde yn de rin fan tiisdei stevige reinbuien ferwachte, de organisaasje fan Fryslân fan Boppen doart it oan. Dêrmei kin de lêste dei fan it droneprojekt úteinsette. Besjoch hjir de fleanrûte fan tiisdei fan de drones fan Fryslân fan Boppen.

De hoareka yn de Ljouwerter binnenstêd moat gruttere terrassen krije, sadat se op ferantwurde wize - mei oardel meter tuskenromte - likefolle gasten ûntfange kinne as op de romte dy't se no hawwe. Dêrfoar pleitet binnenstêdmanager Hayo Galema. Galema sjocht wol mooglikheden foar gruttere terrassen op it Gouverneursplein, it Waachplein en it Saailân. "It giet my derom dat de hoareka wer wat fertsjinje kin, sadat der net mear bedriuwen kapot gean as nedich", seit Galema.

It waar liket tiisdei spulbrekker te wurden foar de lêste ôflevering fan de rige Fryslân fan Boppen. Der wurde swiere reinbuien ferwachte en dan kinne de drones net de loft yn. Tiisdeitemoarn om 07.00 oere nimt de organisaasje it beslút oft der al of net flein wurdt. Hâld Omrop Fryslân radio en de berjochtjouwing op de Omrop webside, app en sosjale media yn de gaten!

Goeiemoarn en wolkom yn it liveblog fan tiisdei 28 april oer it coronafirus. Dit wie it wichtichste nijs fan moandei:

It folsleine liveblog fan moandei nochris neilêze? Dat kin hjir.