Fryslân fan boppen: hjir fleane de drones woansdei en tongersdei del

Yn dizze bysûndere en spannende tiden dy't in soad oanpassingen freget fan elkenien, wolle de boargemasters fan ús provinsje de Friezen in hert ûnder de riem stekke. Alle wurkdagen sille de drones in rûte oer ús provinsje fleane, om alle hertferwaarmjende stipe yn byld te bringen dy't ynwenners, bedriuwen en oare organisaasjes út de eigen tún sjen litte kinne.

De drones sille woansdei 15 april de befrijingsrûte fleane fan Appelskea nei Ljouwert, fia Easterwâlde, Donkerbroek, Wynjewâld, Oerterp, Drachten, Surhústerfean, De Harkema, Koatstertille, Twizel, Noardburgum, Hurdegaryp en dan troch nei it Aldehoustertsjerkhôf yn Ljouwert. Op de Aldehou sil in flagge hyst wurde.

In Kanadeeske jeep sil de rûte fan de drones ride. It is de rûte dy't de Kanadeeske befrijers 75 jier ferlyn rieden. Der wurdt flein tusken 9.00 en 11.30 oere. Fan 9.00 oant 10.00 oere fleane de drones fan Appelskea nei Drachten en fan 10.00 oere ôf fan Surhústerfean nei Ljouwert.

Op dei twa, tongersdei 16 april, sille de drones de Slachterûte fleane, dy't fan Easterbierrum nei Raerd giet. Tusken 9.00 en 10.00 oere fljocht er fan Easterbierrum nei Tsjummearum, Seisbierrum, Wynaam, Hjerbeam, Hitsum, Achlum, Arum, Lollum en Tsjom. Fan 10.00 oere ôf sille de drones boppe Kûbaard, Wommels, Easterein, Hidaard, Reahûs, Itens, Rien, Lytsewierrum, Boazum, Britswert, Wiuwert, Easterwierrum, Reduzum en Raerd fleane.

De Slachtemaraton soe dit jier op 13 juny wêze, mar troch it coronafirus is dizze útsteld nei takom jier. Om praktyske redenen sil de rûte oarsom flein wurde. De bewenners wurde frege om tongersdei de wite wask bûten te hingjen.

Elkenien dy't in aksje ûnderweis opset, kin it oanmelde fia dit formulier. Wy kinne net garandearje dat elkenien yn byld komt, der sil in kar makke wurde moatte fanwegen de beskikbere tiid. Mooglik ûnferwachtse omstannichheden meitsje dat minsken (yn de doarpen) oan de rûte rekken hâlde moatte mei in healoere speling, sawol earder as letter.