Coronanijs 11 april: Gjin nije stjergefallen, wol 22 nije besmettingen

De Hynstedagen yn Driezum-Wâlterswâld dy't yn july hâlden wurde soene, geane net troch. Dat hat it bestjoer sneontejûn bekend makke. De 31ste edysje wurdt ferskood nei takom jier.

De feilichheidsregio's yn Nederlân binne oer it algemien tefreden oer de wize wêrop't de maatregels tsjin it coronafirus sneon neilibbe binne. It wie wat drokker by guon wenwinkels en túnsintra, mar dat smiet gjin grutte problemen op. As de winkels harren oan de maatregels holden, lykas in maksimumtal klanten, wie it gjin probleem dat it wat drokker wie.

In nij ferdielmodel moat derfoar soargje dat mûlkapkes en letter ek oare beskermingsmiddelen op it plak terjochte komme dêr't se it hurdst nedich binne. It nije model dat moandei yngiet, hâldt minder rekken mei sektoaren, mar sjocht benammen nei de besmettingsrisiko's.

It kabinet kundige it nije model oan nei't de Twadde Keamer krityk hie dat der te min beskermingsmiddelen wiene foar de ferpleech- en thússoarch.

De Berenloop Maraton op Skylge hat hûnderten spesjale t-shirts donearre oan Fryske sikehuzen. Ferskate IC-doktoaren hiene in oprop dien foar dizze shirts. De sportshirts binne makke fan azemjend materiaal, dat foar de doktoaren tige noflik is ûnder alle oare klean. De Berenloop wurdt yn 'e hjerst hâlden op Skylge.

Der lizze sneon 27 minsken op de intensive cares yn Fryslân. Dat hat it Acute Zorg Netwerk nei bûten brocht. Bûten de IC's lizze nochris 40 minsken yn it sikehûs. It giet om minsken mei it coronafirus, of minsken wêrfan't tocht wurdt dat sy it firus hawwe.

Online boadskippen bestelle is troch it coronafirus tige populêr wurden. Sa populêr dat je faak dagen lang wachtsje moatte oant dat de supermerk it besoargje kin. Fenna en Ymkje út Grou springe dêr op yn.

De ambulânsehelikopter kin wer ynset wurde foar it pasjinteferfier fan de Fryske Waadeilannen. Dat makke ambulânseferfierder Kielstra sneontemiddei bekend. In lytse wike lyn joech it ministearje fan Folkssûnens de opdracht om de ambulânsehelikopter beskikber te stellen oan it ferfier fan coronapasjinten. De helikopter is de ôfrûne wike trettjin kear ynset foar IC-ferfier. Under oare ek nei Dútslân. Om't de druk op de IC's ôfnimt, mei de ambulânse wer werom nei syn oarspronklike taak.

It tal coronapasjinten op de intensive care is omheech gien nei 1.391. Freed wiene it der noch 1.384, en dat tal is dus mei 7 pasjinten omheech gien. Dat makke it Landelijk Coördinatiecentrum Patiënten Spreiding (LCPS) sneontemiddei bekend.

Caroline Sandberg út Ljouwert bliuwt foarearst yn Grikelân, dêr't se mei har dochter iten makket foar flechtlingen. Yntusken hat der in flechtling posityf test op it coronafirus en dat soarget der foar dat de wurkwize feroare is. "Het kamp is nu afgesloten. Je kunt er sowieso niet uit en naar binnen kan alleen in beperkte mate om hulp te verlenen", fertelt Sandberg.

Oant no ta hat it nije coronafirus lanlik 2.643 deadlike slachtoffers easke, 132 mear as in etmiel lyn bekend wie. Dat hat it RIVM bekend makke. Sûnt de útbraak ha 8.386 minsken opnommen (west) yn it sikehûs. It totale oantal besmettingen is oprûn nei 24.413.

Ynke en Arie Stok binne wer werom yn Gau, in lyts doarpke ûnder Snits. Twa wiken letter as de bedoeling wie, want it stel siet fêst yn in lockdown yn in Súd-Afrikaansk bêd en brochje. It stel reizge begjin maart nei Súd-Afrika en op dat stuit wie der noch net it measte oan 'e hân, sa like it alteast. Healweis de reis feroare dat wol wat, mar der wie noch gjin yndikaasje dat de weromreis in probleem wurde soe. Dat barde op in alderlêste momint, sa fertelt Arie Stok. It stel is goed te sprekken oer de help dy't se krigen hawwe. De weromreis duorre njoggentjin oeren, mei in mûlkapke en net de measte fersoarging ûnderweis. "Mar dat hawwe je der wol foar oer, want je wolle nei hûs."

Twadde peaskedei is foar de wen- en meubelbûlevaars altyd in topdei. Troch de maatregels yn ferbân mei it coronafirus is it dit jier oars as oars. Sikko Kapenga, eigener fan de wenbûlevaars yn Ljouwert en Wolvegea, ferwachtet minder drokte. De winkels binnen wol iepen, mar der sil tasjoen wurde op it tal besikers en ek nimme Kapenga en syn minsken maatregels om oardel meter ôfstân te hâlden.

Twivel, ja, dy wie der wol om iepen te gean, seit Kapenga. Der wie oerlis binnen de retailbrânsj en ek hat der oerlist west mei de gemeenten. "It RIVM fynt it ek goed, as wy de maatregels mar wol opfolgje. Dat dogge wy fansels. En dat hat ús it fertrouwen jûn om iepen te gean."

By GGD Fryslân binne de ôfrûne 24 oeren 22 nije coronabesmettingen meld. It oantal pasjinten dat sûnt de útbraak fan it firus ferstoarn is yn Fryslân, bliuwt gelyk: 27. Der binne oant no ta yn totaal 323 Friezen posityf test op it coronafirus. Veiligheidsregio Fryslân warskôget dat minsken net ferslappe moatte yn de striid tsjin it firus.

No't soarchpersoniel mear test wurdt, wurdt ek dúdlik hoefolle fan har it coronafirus hat. Neffens bestjoerder Henri Janssen fan soarchgroep Noorderbreedte kin mei de útwreiding fan de testkapasiteit in stik ûngerêstheid by de soarchmeiwurkers fuort nommen wurde. "Mensen maken zich natuurlijk ongerust over hun eigen gezondheid en of ze eventueel mensen kunnen besmetten", fertelt Janssen. De testkapasiteit foar soarchmeiwurkers bûten de sikehuzen is sûnt ferline wike útwreide. "Bij twijfel gaan we veel meer testen, zodat mensen ook wat geruster kunnen zijn op hun eigen gezondheid en er ook wat minder besmettingsgevaar is voor de bewoners."

Yn Nederlân ha der yntusken 49 gefallen fan saneamde 'coronaflibers' west. Ek yn Fryslân binne der al ferskate minsken foar oppakt, sa as ferline wike yn Earnewâld. Coronaflibers kinne selstraffen fan twa oant seis moannen krije.

Strafsaken wurde ynkoarten mooglik ek yn de jûnstiid en wykeinen behannele. Fanwege de coronamaatregels bliuwe der no fiif- oant seistûzen saken de wike lizzen. Dat sei Gerrit van der Burg, foarsitter fan it kolleezje fan prokureurs-generaal fan it Iepenbier Ministearje freed yn it telefyzjeprogramma OP1. It giet dan om de lichtere saken as fernielingen, mishannelingen sûnder swiere ferwûningen en winkelstellerijen, mar ek gruttere fergripen.

De plysje fan Flylân hat freedtejûn in groep minsken in warskôging jûn om't se mei tefolle minsken te ticht byinoar wiene. It gie om in groep fan tolve minsken. Alle oanwêzigen hawwe in offisjele warskôging krigen. By in folgjende oertrêding kinne se in boete fan 390 euro ferwachtsje.

Hoe hâldt in coronapasjint kontakt mei de famylje? Dat kin yn sikehûs Nij Smellinghe yn Drachten mei in iPad. Ferpleechkundige Lo Keers fertelt yn har vlog hoe bysûnder it is dat minsken wer kontakt ha, neidat se elkoar al wiken net sjoen of sprutsen ha. Lo Keers en de oare vloggers folgje? Dat kin fia dizze dossierside.

Fryske boubedriuwen witte hieltyd better it paad nei de klanten wer te finen. De nijbouprojekten gean stadichoan wer troch en ek renovaasjewurksumheden nimme wer ta. Dêrfoar moat der wol handich omgien wurde mei it ferfier fan wurklju en materieel nei de bouplakken ta. Troch de rjochtlinen fan it RIVM moat sawol op it wurk as by de reis der nei ta de oardel meter ôfstân yn acht holden wurde.

Friso Bouwgroep út Snits hat sa'n fiifhûndert meiwurkers en mear as de helte dêrfan moat nei in bouplak ta. Se meie net mear mei-inoar yn in buske. It boubedriuw hat fan needs it weinpark útwreide mei sa'n tweintich ekstra buskes. By boubedriuw Dijkstra Draisma yn Dokkum en Boalsert is derfoar keazen om yn de buskes in plastic skot tusken de sjauffeur en de byriders te setten, sadat der dochs meardere minsken tagelyk yn ride kinne. In protte oare boubedriuwen freegje harren wurknimmers om mei de eigen auto nei it wurkplak te kommen.

Goeiemoarn en wolkom by dit liveblog fan sneon 11 april oer it coronafirus. Dit wie it wichtichste nijs fan freed:

It folsleine liveblog fan freed is hjir nei te lêzen.