Coronanijs 2 april: Gjin ekstra maatregels foar Waadeilannen, Hearrenfean wol trochspylje

Undenimmers kinne no ek útstel oanfreegje foar in fiiftal belestingen, nammentlik miljeubelesting, assurânsjebelesting, kânsspulbelesting, aksyns en de ferhiedersheffing. Steatssekretaris Vijfbrief hat dat bekend makke. De maatregel is bedoeld om bedriuwen dy't wol kosten meitsje, mar gjin of hast gjin ynkomsten hawwe, yn 'e mjitte te kommen.

Yn de finzenis jilde njonken it algemiene advys fan it RIVM ek oare maatregels. Finzenen kinne gjin besite krije, mar wol in iPad, sadat se skype kinne. Se krije ek ekstra beltegoed om yn kontakt te bliuwen mei it thúsfront. Dat seit Harry Lefferts fan de Ljouwerter finzenis.

De finzenen wurde dêr yn lytse, aparte groepkes hâlden, sadat de kâns op ferprieding fan it firus lytser is, en der binne minder aktiviteiten. It jûnsprogramma is hielendal ferfallen.

De strange isolaasjemaatregels soargje der foar dat it wurk op de earste help 'intensief' is. Dat seit Sandra Di Rocco. Se is ferpleechster op de earste help fan sikehûs Nij Smellinghe yn Drachten, en foar Omrop Fryslân hâldt se in fideodeiboek by.

Der binne ekstra misken ynsetten op de earste help, seit se. En der wurdt in heger berop dien op it personiel as normaalwei. "Nu zien we hoe hard we elkaar nodig hebben."

Rutte ropt Dútsers en Belgen op om de peaskedagen net nei Nederlân te kommen.

AZ en PSV wolle krekt as Ajax dat de earedifyzje fuortendaliks ophâldt. Dat ha de klups oan it fuotbalbûn KNVB witte litten. "Wij snappen als geen ander dat dit een zeer lastig besluit zal zijn", seit de direkteur fan AZ, "maar wij vinden de huidige corona-situatie dusdanig zorgwekkend dat het uitspelen van het restant van de wedstrijden zonder publiek voor ons van ondergeschikt belang is."

PSV neamt it útspyljen fan it restant fan de wedstriden "op geen enkele manier te verantwoorden". Eindhoven leit yn de regio dy't it hurdst troffen is troch it coronafirus. "Bijna iedereen kent wel iemand die ziek is, ziek is geweest of overleden is. Dan heeft voetbal geen prioriteit meer."

SC Hearrenfean wol wol besykje om de kompetysje noch út te spyljen. Dat seit de algemien direkteur fan de klup, Cees Roozemond, tsjin Omrop Fryslân. Mar hy wol it allinne as de sûnens net yn gefaar komt, seit er. "Die moet honderd procent gegarandeerd zijn. Niet 99 procent, maar honderd."

Dat Ajax juster al fûl reagearre op it nijs dat de KNVB besykje wol om de kompetysje út te spyljen, fynt Roozemond in minne saak. De earedivyzjeklups soene mei ien stim prate moatte, seit er. "Daar hadden we duidelijke afspraken over gemaakt.

By sikehûs MCL yn Ljouwert ha plysjeminsken en brânwachtlju tongersdeitemiddei de meiwurkers fan it sikehûs betanke. De plysje en de brânwacht sammelen har mei tsientallen minsken en auto's. Se setten it sikehûspersoniel mei loeiende sirenes en lûd applaus yn it sintsje.

Der komme gjin ekstra maatregels om toeristen fuort te hâlden fan de Waadeilannen. Dat seit foarsitter Buma fan de Veiligheidsregio Fryslân. Der binne hast gjin boekingen en ekstra easken binne net needsaaklik, omdat de minsken hâlde harren goed oan it advys fan it RIVM hâlde. Dus net reizgje as dat net nedich is. Mar lytse ôfstannen ôflizze kin yn guon gefallen wol, bygelyks as soarchpersoniel op in steancaravan efkes bykomme wolle.

It tal coronapasjinten op de intensive care yn Nederlân is oprûn nei 1273. As it sa trochgiet, kinne de ic's de tastream de kommende twa wiken oan. neffens it Landelijk Netwerk Acute Zorg. It tal ic-bêden wurdt útwreide ta 2400. It is no al tanaam ta sawat 2100 bêden.

Der is corona konstatearre yn soarchsintrum Beuckelaer yn Sint-Anne. De coronapasjinten sitte op in aparte ôfdieling. Net alle personiel fan it soarchsintrum kin test wurde, want de testkapasiteit is beheind, seit Atsje Tadema fan Beuckelaer.

Der lizze op it stuit 96 coronapasjinten yn de Fryske sikehuzen. Fan har lizze 27 minsken op de intensive care, meldt it Regionaal Orgaan Acute Zorg. Sjoch hjir foar it folsleine berjocht.

Foar it programma 'Democratie in Actie' is yn gemeente Hearrenfean in filmke makke oer hoe't de ried op dit stuit wurket no't de riedsleden net gearkomme meie.

De Europeeske Kommisje stelt foar de besteande EU-fûnsen foar lânbou en fiskerij maksimaal te brûken. Troch de coronakrisis hawwe fiskers en boeren minder ynkommen. Sa leit de float garnalefiskers foar de wâl. De garnalen kinne net peld wurde en omdat de restaurants ticht binne is dêr ek gjin fraach nei fisk en skulpdieren.

Foar de boargemasters fan de Waadeilannen wurdt it kommend wykein spannend. Sil it stoarm rinne as it kwik oprint en de maitiid echt losbarst? Of hâldt elkenien him oan de oprop fan premier Rutte om safolle mooglik thús te bliuwen en sa min mooglik troch it lân te reizgjen? De boargemasters oerlizze tongersdeitemiddei op It Hearrenfean.

Der binne yn Nederlân de ôfrûne 24 oeren 1.083 nije positive pasjinten bykaam. Dat meldt it RIVM. It totaal oantal positive coronatests stiet dêrmei lanlik op 14.679. It ôfrûne etmiel binne der 625 minsken opnaam of hawwe dat west yn it sikehûs. Der binne yntusken nochris 166 minsken ferstoarn oan de gefolgen fan it coronafirus. Dêrmei komt it totaal oantal deadlike slachtoffers op 1.339.

It wurdt dit wykein moai waar en by guon begjint it dan te kribeljen; lekker swimme yn it bûtenbad. Mar de swimbaden bliuwe oant 1 juny ticht. En dat hat grutte gefolgen foar de ynkomsten fan de swimbaden, benammen om't se it ha moatte fan dizze kommende moannen. Joke van der Vliet fan swimbad Mounewetter yn Wytmarsum makket har soargen. "We kinne dit nea mear ynhelje", seit Van der Vliet.

In soad Nederlanners dy't op it stuit yn it bûtenlân binne en werom nei hûs wolle, hawwe gjin idee oft en wannear't dat kin. Dat jildt ek foar Froukje Nijholt fan It Hearrenfean. Sy is trije wike lyn nei Nepal gien, yn it ramt fan in helpferlieningsprojekt foar Nepaleeske studinten.

De brêgen en slûzen yn Fryslân bliuwe ticht fanwege de coronakrisis, dus it wetter op sil 'm de kommende tiid net wurde, ek mei it each op de oprop fan it kabinet om sa folle as mooglik thús te bliuwen. Mar wa't dochs genietsje wol fan de Fryske marren, fearten en kanalen, kin fan sneon ôf ynskeakelje by FryslanBoppe. It is in bysûnder projekt yn gearwurking mei twa SKS-skippers.

De plysje wurket yn dizze tiden fan it coronafirus safolle mooglik gewoan troch, mar hat it wol minder drok mei de gewoane saken. Want it is minder drok op de dyk en ynbrekkers kinne bygelyks net safolle, om't hast eltsenien thús sit. Mar mei in wykein mei moai waar foar de doar hat de plysje wol noed oer groepsfoarming.

De GGZ-klinyk op It Hearrenfean hat in spesjale coronaromte ynrjochte. It is foar de measte pasjinten nammentlik net maklik om sels thús yn isolaasje te gean. Dit yn ferbân mei de diagnoaze fan dizze minsken. De romte hat alle fasiliteiten om in pasjint op te fangen dy't corona hat. Foar it ferpleegjend personiel is dat wol efkes wenne.

Der is yn Fryslân noch ien persoan ferstoarn oan de gefolgen fan it coronafirus. Dat hat de GGD niiskrekt nei bûten brocht. Yn totaal binne der yn Fryslân no tolve minsken ferstoarn oan corona. Der binne de ôfrûne dei yn totaal achttjin nije minsken posityf test op it firus. Dat is de heechste taname op ien nei, seit de GGD.

De plysje yn noardwest-Fryslân organisearret in spesjale speuraksje foar bern. Bern dy't efkes in frisse noas helje wolle, kinne yn Sint-Anne op 'bearejacht'. Op ferskate plakken yn it sintrum fan it doarp binne plysjebearkes achter de ruten setten.

Bedoeling is dat bern alle bearkes telle en dêrnei in moaie tekening meitsje. Op de achterkant fan dy tekening moatte se dan harren namme, adres, leeftyd en it oantal plysjebearkes dat se sjoen hawwe, skriuwe. De tekening kin yn de brievebus by it plysjeburo oan de Hemmemawei 28A yn Sint-Anne smiten wurde. Elke dielnimmer krijt dan in lyts aardichheidsje tastjoerd.

De Ljouwerter wethâlder fan kultuer Sjoerd Feitsma hat grutte soargen oer de kulturele sektor op de langere termyn. "Ik bin tige wiis mei de maatregels dy't no nommen wurde, mar hoe komt it oer twa moanne? We moatte no echt mei ús allen foarút sjen, wat betsjut dit foar ús ynstellings en festivals oer in healjier of in jier?" De gemeenten hawwe in soad oerlis mei de minister fan kultuer, mar dat giet noch hieltyd oer de koarte termyn.

Fakbûn CNV wol dat alle rinnende oanbestegings foar it ferfier fan passazjyrs yn it iepenbier ferfier mei minimaal in jier útsteld wurde. Op dit stuit rinne der meardere oanbestegings foar ûnder mear it busferfier yn Fryslân. De coronakrisis en de gefolgen op langere termyn liede ta grutte ûnwissens by ferfiersbedriuwen, seit it fakbûn: "Hoe gaat dit allemaal aflopen? Wat betekent dat voor investeringen die nodig zijn? Wij vinden het in deze crisistijd zeer onverstandig om door te gaan met aanbestedingstrajecten, omdat het slecht zal uitpakken voor reizigers en werknemers."

It CNV wiist derop dat oanbestegings ek gefolgen hawwe foar personiel dat net op de bus of trein sit, mar bygelyks op kantoar. "Door de coronacrisis zullen ov-bedrijven niet meer de financiële ruimte hebben om voor een goed vangnet te zorgen."

De coronamaatregels fan it kabinet hawwe ek gefolgen foar de skûtsjewedstriden yn it foarseizoen fan de SKS. De sprintwedstriden fan 9 maaie wiene al skrast, mar ek de Rabo Hurdsilerij op 12 juny en de Skûtsje Undernimmersdei op 19 juny gean dit jier net troch. Fierder hat it SKS-bestjoer besletten de aktiviteiten rûnom de jubileumwedstriid fan 4 july te skrassen en sil de iepening op 4 juny fan de eksposysje rûnom it 75-jierrich jubileum fan de SKS 'in sober karakter' hawwe.

It bestjoer giet der noch hieltyd fan út dat it SKS kampioenskip 2020 trochgiet en hâldt de data 12 en 19 juny en 4 july frij foar oefenwedstriden, om't it seizoen no hieltyd koarter wurdt.

Minsken dy't yn de finzenis, Forinsyske Soarch en justisjele ynrjochtings sitte, meie oant en mei 28 april gjin besite ûntfange. De Dienst Justitiële Inrichtingen (DJI) ferlinget dêrmei de earder nommen maatregels. Dêrby sil der ek minder ferfier wêze fan en nei rjochtbanken. Dêrneist is ek it belied rûnom besite yn justisjele jongereinynrjochtings oanskerpe om de fersprieding fan it coronafirus tsjin te gean. Jongerein mei fan 1 april ôf gjin besite mear ûntfange.

Op tsientallen plakken yn Fryslân, Flevolân en Noard-Hollân is freed de oprop ta it islamityske middeisgebed te hearren. "We doen dit om onze samenleving een hart onder de riem te steken en wij vragen onze Schepper om ons bij te staan en ons standvastig te laten zijn in deze lastige periode", lit de Raad van Marokkaanse Moskeeën Noord-Holland witte.

De oprop begjint om 14.00 oere en is te hearren by hast fjirtich moskeeën yn ûnder oare Ljouwert en It Hearrenfean. Normaal sprutsen wurdt oan moslims frege nei de moskee te kommen foar it gebed, no wurde se oproppen om thús te bidden.

Elkenien is yn meardere of mindere mjitte yn de rou. Dat skriuwt Botte Jellema yn syn kollum fan tongersdei. "We ha de wrâld en it libben dat we hiene ferlern." Lês de folsleine kollum hjir.

'Kwetsbaarheid', 'Over troosttelevisie en Sabatsrust' en 'Geen bloemen, geen bezoek'. It binne titels fan kollums dy't dûmny Harrie Strubbe skriuwt foar de webside fan syn protestantske gemeente Terpoarte. Strubbe brûkt de kollums om yn kontakt te bliuwen mei de leden fan dy gemeente en om harren in hert ûnder de riem te stekken, no't der gjin tsjerketsjinsten binne. Hy krijt der aardich wat reaksjes op en minsken kinne syn wurden bot wurdearje.

Strubbe fergaderet yntusken ek online. "Het is wel prettig dat je mensen weer even ziet. Ik woon niet in mijn gemeente en kom de mensen ook niet op straat tegen." De Wite-Tongersdeitsjinst en de peaskewake wurde fan tefoaren opnaam en dêrnei online setten. "Het is een hele onwerkelijke situatie. Je neemt de dienst op en de beleving moet later pas komen." Oft der mear tsjinsten opnaam wurde sille, hinget ôf fan de reaksjes dy't derop komme.

Neffens Strubbe libje de soargen oer it coronafirus wol yn it doarp, mar hat it de minsken net yn de besnijïng. Se binne foarsichtich, mar bliuwe nochter. De minsken passe goed op elkoar, neffens Strubbe. "We merken dat mensen eenzaam zijn, maar de sociale netwerken functioneren heel aardig." Yn de takomst wol de tsjerke minsken miskien ek helpe as sy finansjeel troffen wurde troch it coronafirus. "Dan gaan we een beetje terug naar vroeger, met armenzorg. Dat zou zomaar kunnen."

Muzykdosint Gatse Hylkema mist syn learlingen en it kontakt mei harren. Yn syn fideodeiboek fertelt Hylkema oer de wize dat hy no syn lessen jout. Hy docht mei oan it vlogprojekt fan Omrop Fryslân 'Berjochten út it Hert'.

Der moat yn dizze coronatiden mear jild komme foar doarpshuzen en wyksintra yn de provinsje. Dat fynt de FNP yn Provinsjale Steaten. De fraksje wol dat it provinsjebestjoer jild frijmakket út it Iepen Mienskipsfûns. Doarpshuzen en wyksintra komme hieltyd mear yn 'e knipe, no't se net mear iepen binne as gefolch fan de maatregels.

Zorgbelang Fryslân is mei in meldpunt begûn foar minsken dy't fan soarch ôfhinklik binne. It is bedoeld om positive en negative ûnderfinings te dielen. De druk op de soarch is hiel grut op dit momint, troch de corona. Soarchferliening wurdt yn oanpaste foarm oanbean. Zorgbelang-direkteur Esther de Vrij: "De reden waarom wij dit signaalpunt hebben opgezet, is dat de route voor inwoners naar de zorg gewoon anders is. Wij willen graag weten of de zorg bereikbaar en toegankelijk genoeg blijft."

Goeiemoarn en wolkom by dit liveblog fan tongersdei 2 april oer it coronafirus. Dit wie it wichtichste nijs fan woansdei:

Hjir kinne jo it folsleine liveblog fan woansdei 1 april noch ris werom lêze.