Liveblog
|
24 maart 2020
Coronanijs tiisdei 24 maart: Sintrale eineksamens skrast, Olympyske Spelen útsteld
De sintrale eksamens op middelbere skoallen geane net troch. It totaal tal minsken mei it coronafirus yn Fryslân stiet op 42.
Lêst bywurke: 8 april 2020, 11:05
tiisdei 24 maart 2020
23:00
Ein fan dit liveblog
Oant safier it liveblog fan tiisdei 24 maart oer de coronakrisis. Wy sette noch ien kear de belangrykste punten út dit liveblog op in rychje:
Woansdei is der wer in nij liveblog. Ek op radio en telefyzje kinne jo by ús telâne foar al it lêste nijs.
22:39
Kampearterrein Stortemelk iepenet letter
De Flylanner camping Stortemelk giet dit jier letter iepen yn ferbân mei it coronafirus. It grutste kampearterrein fan de Waadeilannen giet yn stee fan woansdei 1 april no op moandei 1 juny iepen.
21:58
Epke jout Spelen 2021 noch in kâns
Turner Epke Zonderland hat de Olympyske Spelen fan Tokio 2021 noch lang net út de holle setten. Ek net no't dy fanwege de coronakrisis nei folgjend jier ferpleatst binne. Earder sei de Fries dat er noch neitinke soe oer syn sporttakomst."Ik ha wol de yntinsje om troch te gean", seit Zonderland tsjin de NOS.
21:00
Fries Straatfestival giet ek net troch
20:05
Skylger ûndernimmers hawwe spesjaal boadskip
19:54
Dizze Jumbo yn Drachten hat in hiel hânwaskstasjon foar de doar
19:49
"Ook een beetje balen, dit is waar je 4 jaar lang elke dag voor traint"
19:45
Piet Fortuin (CNV): "Fakkefolje is in fitaal berop, mar it moat wol feilich!"
"De hiele detailhannel draait op 15-, 16- en 17-jierrigen, dy't mar in bytsje fertsjinje. It minste dat je dwaan kinne, is harren in feilich wurkplak biede." Dat seit Piet Fortuin fan fakbûn CNV. Syn fakbûn easke moandei maatregels om fakkefollers te beskermjen tsjin mooglike coronabesmetting op it wurk.
18:49
Grutte soargen oer takomst Oerol
It lokaasjeteäterfestival Oerol op Skylge giet net troch yn de hjoeddeiske foarm. De organisaasje slút net út wat lyts te organisearjen. Oft dat mei publyk is of online is noch net wis. Dit jier soe it festival fan 12 oant en mei 21 juny holden wurde. "Hoewel het geen verrassing was, kwam het wel heel hard aan", seit festivaldirekteur Siart Smit.
18:27
Gemeente Ljouwert komt ûndernimmers en zzp'ers yn 'e mjitte
De gemeente Ljouwert komt mei stipe yn de foarm fan ekstra maatregels foar pleatslike ûndernimmers en zzp'ers dy't hurd troffen wurde troch de coronakrisis. De maatregels gean fuortendaliks yn en komme boppe-op it lanlike pakket oan needmaatregels.
17:52
Epke Zonderland tinkt nei oer syn sporttakomst
Turner Epke Zonderland sil efkes goed neitinke oer it ferlingjen fan syn sportive karriêre, no't de Olympyske Spelen in jier útsteld wurde. Zonderland soe nei alle gedachten ophâlden wêze mei syn turnkarriêre nei't er yn aksje kaam wie op de Spelen. No soe dat in jier opskowe. No't der in hiel seizoen bykomt, hat Zonderland tiid nedich om in beslút te nimmen oer wat er wol. Hy baalt fan it beslút fan it IOC, mar hy begrypt it hiel goed. De folkssûnens stiet foarop, fynt ek hy.
17:50
Steatsboskbehear skrast alle ekskurzjes
Steatsboskbehear hat alle ekskurzjes oant 1 juny annulearre, fanwege de coronakrisis. Earder wiene de ekskurzjes oant begjin april skrast. Elkenien dy't in ekskurzje boekt hat, krijt it jild werom. De bûtensintra en ynformaasjesintra fan Steatsboskbehear binne ticht oant en mei 6 april.
De natuer is wol frij tagonklik foar besikers. Mar boskwachters kinne minsken wol oproppe bepaalde plakken te mijen omdat it te drok is. En minsken wurdt frege om safolle mooglik allinnich de natuer yn te gean. Earder tiisdei besleat Steatsboskbehear fjouwer greidefûgelgebieten yn Súdwest-Fryslân te sluten.
17:37
Befeiligers sitte thús, mar by soarchsintra wurdt it drokker
Befeiligingsbedriuwen rinne ynkomsten mis, no't eveneminten fanwege it coronafirus skrast wurde. Mar de lêste wike komme der ek nije opdrachten by. Sa wurdt it Ljouwerter befeiligingsbedriuw Miedema Security faker ynhierd troch âldereinhuzen, soarchsintra en grutte winkelkonserns.
17:34
Middelbere skoallen bliid mei dúdlikheid oer eksamens
De Fryske middelbere skoallen reagearje posityf op it beslút fan minister Arie Slob fan ûnderwiis om de sintrale eksamens dit jier te skrassen. Under oare skoallemienskip Piter Jelles en Simon Vestdijk mar ek de kristlike skoallemienskip Ulbe van Houten begripe dat de sintrale eineksamens net trochgean.
17:17
Skriuwer Willem Schoorstra komt syn boek sels delbringen
17:13
Hokker maatregels nimme supermerken?
17:04
Twa wike sel: man driget plysjeminsken mei it coronafirus te besmetten
In man fan Ljouwert dy't drige plysjeminsken mei it coronafirus te besmetten, is foar twa wiken fêstset. De man hie in portier fan de nachtopfang yn Ljouwert mei de dea bedrige, biten en beflibe. Doe't er op it plysjeburo wie, besmoarge er de flier mei syn eigen snot en drige er plysjes te besmetten. Ien fan har biet er yn de hân. De man is tiisdeitemoarn foarlaat oan de rjochter-kommissaris en dy hat bepaald dat de man twa wiken sitte moat.
16:59
Turnster Sanne Wevers: "útstellen Olympyske Spelen goed beslút"
It is in moedich beslút om de Olympyske Spelen in jier út te stellen. Dat seit turnster Sanne Wevers fan It Hearrenfean. It wie de iennichste goede beslissing, seit se. Se wol no sels it leafst sa gau mooglik skeakelje en sjen hoe't se der foar harsels foardiel út helje kin. Sanne Wevers wûn fjouwer jier lyn Olympysk goud op it ûnderdiel balke. Om te trainen hat se fan 'e wike in balke yn har appartemint komme litten.
16:49
Nij platfoarm 'Leeuwarden Helpt'
De gemeente Ljouwert komt mei it platfoarm 'Leeuwarden Helpt', foar helpferliening yn de coronakrisis. It platfoarm is bedoeld om fraach en oanbod sa goed mooglik op elkoar ôf te stimmen. Dan giet it om boadskipje, de hûn útlitte, nei de apoteek gean of iten rûnbringe. De fragen wurde bondele, sadat frijwilligers maklik sjen kinne wat se dwaan kinne.
Dêrneist wurdt op de webside ek trochferwiisd nei besteande lokale inisjativen, lykas Samen Leeuwarden en lanlike ynstânsjes lykas de Kindertelefooon en it Rode Kruis. It platfoarm is opset yn gearwurking mei kommunikaasjeburo Blauwe Zone.
16:03
KNVB praat fuotbalklups by oer gefolgen coronafirus
As it betelle fuotbal foar 1 juny alwer losgiet, dan is dat sûnder publyk. Dat hat de KNVB besletten op grûn fan de nijste maatregels fan it kabinet tsjin it coronafirus. De KNVB hat de klups yn it betelle fuotbal tiisdei fia in fideoferbining bypraat oer de gefolgen dêrfan. It ministearje fan Folkssûnens, Wolwêzen en Sport hat befêstige dat de wedstriden en de trainingen yn de sport bûten it beslút falle om gearkomsten oant 1 juny te ferbieden. Foar sport jilde de eardere maatregels yn ferbân mei it coronafirus. Foar 6 april wurdt besjoen wannear't der wer wedstriden spile wurde kinne.
15:51
Ofrûne 24 oeren 22 coronapsajinten opnaam
Yn de Fryske sikehuzen binne de ôfrûne 24 oeren yn totaal 22 minsken mei it coronafirus opnaam. Fan har lizze der trije op de Intensive Care, yn it Antonius-sikehûs yn Snits. De sikehuzen ha ek tolve minsken opnaam mei ferskynsels fan it firus, mar by wa't it noch net offisjeel fêststeld is. De sikehuzen ha moandeitejûn ek noch sân pasjinten út Brabân opnaam, dan giet it om minsken dy't op de klinyske ôfdieling komme te lizzen. Foar har wie yn Brabân op dit stuit gjin romte.
15:50
Steatsboskbehear slút greidefûgelgebieten yn Súdeast-Fryslân ôf
Steatsboskbehear slút fjouwer greidefûgelgebieten ôf yn Súdeast-Fryslân. Der komt in slot of in ketting op it stek. Tefolle minsken kuierje de buorden foarby wêrop dúdlik stiet dat je der nei 1 maart net mear yn komme meie.
15:40
Fan toprestaurant nei besoarchservice
It wie oardel wike lyn noch in grapke yn de keuken: As wy ticht moatte, dan kinne wy in waarm miel besoargje. Dat grapke is realiteit wurden foar it team fan topkok Jan Smink fan it restaurant mei deselde namme yn Wolvegea. Sûnt dit wykein bringe de minsken dy't gewoanwei yn de betsjinning wurkje it iten no rûn.
15:22
Burgumer bedriuw bout mei oan beäzemingsapparatuer
It elektroanikabedriuw Interay Solutions yn Burgum helpt mei om nije needbeäzemingsapparatuer te meitsjen. Wurkboukundigen fan de TU Delft binne dwaande ûnder de namme 'Operation Air' om rap te kommen mei mear beäzemingsapparatuer. Dat is nedich om't der grut ferlet is fan dy masines wannear't coronapasjinten op de Intensive Care komme te lizzen.
15:17
Befeiliger foar de yngong fan de Jumbo
By de Jumbo oan it Cambuurplein yn Ljouwert wurdt strang kontrolearre op hoefolle minsken der binnen komme. Foar de yngong fan de winkel stiet in befeiliger. De supermerk docht dat nei oanlieding fan de maatregels fan it kabinet dat der noch minder minsken gearkomme meie.
15:06
MCL yn oerlis mei Van der Valk en Fletcher
Op dit stuit is der oerlis tusken sikehûs MCL en de Van der Valk- en Fletcher-hotels yn Fryslân oer it opfangen fan pasjinten út oare provinsjes dy't noch net werom kinne nei har eigen provinsje. Dy soene dan tydlik terjochte kinne yn it hotel.
14:35
Oerrock giet dit jier net troch
Muzykfestival Oerrock giet dit jier net troch yn ferbân meit it coronafirus. De organisaasje hat dat tiisdei bekend makke. De kaarten foar de edysje fan 2020 bliuwe jildich foar takom jier. It muzykfestifal yn Oerterp is dan op 13, 14 en 15 maaie.
14:12
63 nije deaden yn Nederlân, totaal 276
It coronafirus hat yntusken 276 libbens easke yn Nederlân. It Rijksinstituut voor Volksgezondheid en Milieu (RIVM) hat de ôfrûne 24 oeren 63 nije deaden teld. Dat is folle mear as moandei, doe't 34 minsken ferstoaren oan de gefolgen fan it coronafirus.
14:01
IOC: Olympyske Spelen dit jier definityf net troch
De Olympyske Spelen geane dit jier definityf net troch. Dat hat it IOC mei in statement op harren webside bekend makke. De Spelen wurde útsteld oant úterlik de simmer fan 2021. Foar guon Fryske sporters giet harren olympyske dream dit jier net troch.
13:34
'Olympyske Spelen mei ien jier útsteld'
De Olympyske Spelen yn Tokio wurde mei ien jier útsteld. Dat binne de Japanske premier Shinzo Abe en foarsitter Thomas Bach fan it Ynternasjonaal Olympysk Komitee (IOC) oerienkommen. It bestjoer fan it komitee nimt nei alle gedachten letter tiisdei in definityf beslút.
13:26
Dizze learling hat syn skoaltas al oan de flagge hongen
13:06
Jachthavens Waadeilannen ticht
De jachthavens op de Waadeilannen gean fuortendaliks ticht yn ferbân mei it coronafirus. Dat is tiisdeimoarn ôfpraat tidens in oerlis fan de Stichting Jachthavens Waddeneilanden. It beslút jildt oant en mei 1 juny.
12:58
"Coronafirus kin oant santjin dagen bûten it lichem oerlibje"
It coronafirus kin oant santjin dagen bûten it lichem oerlibje. Dat sizze wittenskippers fan it CDC, it Amerikaanske RIVM, nei ûndersyk op it cruiseskip Diamond Princess. Undersikers hawwe dêr meunsters nommen, oan board fan it skip, sa meldt de NOS.
12:51
Dúdlikheid foar eksamenlearlingen: "Nuver idee"
It beslút dat de sintrale eineksamens dit jier net trochgeane, is foar guon learlingen in nuver idee. "Hjir hast de hiele tiid nei tawurke", seit sechdejiers vwo-learlinge Gaiske Meinsma. De learlingen krije in folweardich diploma, dat like folle wurdich is as de diploma's yn oare jierren, sa seit de kristlike skoalkoepel Fricolore.
12:36
Tal klanten yn supermerken beheind
Nederlânske supermerken en drogisterijen moatte fuortendaliks it tal klanten yn 'e winkel beheine. Winkels meie fan no ôf maksimaal ien klant op tsien fjouwerkante meter hawwe, sadat minsken yn elts gefal oardel meter ôfstân hâlde kinne. In winkelwein wurdt ferplichte. It beslút moat meiwurkers en klanten beskerming jaan tsjin fierdere fersprieding fan it coronafirus.
12:17
Sjoch hjir in part fan de parsekonferinsje fan minister Slob
12:15
TWA NIJE CORONABESMETTINGEN
Der binne tiisdei troch de GGD wer twa minsken yn Fryslân registrearre mei it coronafirus. Dat hat de GGD Fryslân niiskrekt bekend makke. It totale oantal registrearre minsken mei corona yn Fryslân stiet dêrmei op 42. Dat binne allinne de minsken dy't troch de GGD posityf test binne.
12:13
Tefolle druk op skoaleksamens
De praktykeksamens foar vmbo-skoalbern soene takom wike al úteinsette. Fan 7 maaie ôf soe it sintraal skriftlik eksamen plak fine. Foar dy tiid soene alle skoaleksamens klear wêze moatte, mar dat koe net langer, neffens minister Slob. Dêrom is ek besletten om de eksamens no net trochgean te litten.
12:08
11:50
11:33
Sintrale eineksamens skrast, diploma op basis fan skoaleksamens
De sintrale eineksamens foar it middelber ûnderwiis op vmbo, havo en vwo geane dit jier net troch. Dat hat ûnderwiisminister Arie Slob niiskrekt bekend makke op in parsekonferinsje. De learlingen krije, as sy it eksamenjier fierder foldwaande folbrocht hawwe, dochs in diploma. It einsifer wurdt berekkene op basis fan it skoaleksamen. Learlingen krije oant begjin juny de tiid om alle skoaleksamens klear te meitsjen.
11:29
Supermerken yn oerlis oer 'doarbelied'
De supermerken binne mei-inoar yn oerlis foar in 'ûndûbbelsinnich doarbelied' foar alle winkels. Dêrmei moat foarkaam wurde dat der tefolle klanten tagelyk nei binnen kinne. It kabinet warskôge moandei dat yn in soad supermerken wurknimmers troch de drokte harren wurk net goed dwaan kinne. Mooglik wurde BOA's ynset, om oarde te hâlden.
11:23
Parsekonferinsje Slob om 11.30 oere
Underwiisminister Arie Slob komt om 11.30 oere mei in parsekonferinsje oer it beslút om de sintrale eksamens dit jier te skrassen fanwegen it coronafirus.
11:14
Sociaal Domein Fryslân wurket oan opfang
Der komt passende opfang foar kwetsbere bern en bern út kwetsbere famyljes yn de coronakrisis. It kennis- en rezjysintrum Sociaal Domein Fryslân wurket dêr oan, yn gearwurking mei it ûnderwiis. Kwetsbere bern meie op dit stuit opfongen wurde op skoalle of opfang. Minister Slob fan ûnderwiis hat dêr tastimming foar jûn. Yn húshâldingen mei dizze problematyk komt alle ûnwissichheid en stress fan de coronakrisis ekstra hurd oan. Minsken dy't soargen ha oer de bern of dy't witte wolle oft se foar opfang yn oanmerking komme, kinne kontakt opnimme mei har wyk- of gebietsteam.
10:56
Gjin ekstra plysjes of hanthaveners
Der sille de kommende tiid gjin ekstra plysjes of hanthaveners de strjitte op gean om de nije coronamaatregels te hanthavenjen. Dat seit boargemaster Sybrand Buma fan Ljouwert. Neffens him sille der net fuortendaliks mear plysjes of hanthaveners beskikber wêze.
10:38
'Sintrale eineksamens geane net troch'
De sintrale eineksamens foar middelbere skoalbern geane net troch. Dat sizze boarnen tsjin de NOS. Skoallen moatte op basis fan de skoaleksamens beslute oft learlingen slagge binne of net. De skoaleksamens binne de toetsen dy't earder al op skoalle ôfnommen binne. Sy telle foar de helte mei foar it sintrale eksamen.
10:32
Hoe komt it mei Sportklup Cambuur?
10:01
Coronaflaggen populêr
De spesjale coronaflaggen fan de Dokkumer Vlaggen Centrale binne populêr. Op dit stuit binne der al 10.000 flaggen ferkocht. En dat is mear as doe't de Vlaggen Centrale in spesjale fuotbalflagge makke foar it EK en WK. De flaggemakker seit de fraach kwalik oan te kinnen. It bedriuw donearret foar eltse flagge in persintaazje fan de opbringst oan it Reade Krús.
09:25
Hast alle ynformaasjebuorden njonken de sneldiken steane yn it ramt fan corona
08:51
Buma: "Daar waar het misgaat, moet je kunnen handhaven"
Boargemasters hawwe fan it kabinet mear foech krigen om de coronamaatregels hanthavenje te kinnen. In tal boargemasters hat moandeitejûn ek oerlein oer de nije maatregels, ûnder wa boargemaster Sybrand Buma fan Ljouwert. "Dit was wat de burgemeesters ook hadden aangegeven bij de minister, namelijk de noodzaak om maatregelen preciezer te kunnen toepassen. In de meeste gevallen gaat het naleven van de coronamaatregelen goed. Maar daar waar het misgaat, moet je kunnen handhaven. En dat kan nu."
08:33
Fytsalvestêdetocht letter is gjin opsje
De Fytsalvestêdetocht giet dit jier net troch. Troch de nije maatregels fan it kabinet kin it evenemint net trochgean op pinkstermoandei 1 juny. "En de Fytsalvestêdetocht letter hâlde is gjin opsje. It heart op pinkstermoandei," seit foarsitter Stephan Rekker.
Alle kaarten wiene ferkocht, mar de organisaasje soe dreech wurde neffens Rekker. "Moatst dy ôffreegje oftst wol genôch frijwilligers krije kinst." Rekker hat sels ien kear earder meimakke dat de tocht net trochgean koe. "Dat wie yn 2001 mei de MKZ."
08:20
Omroep Brabant-ferslachjouwer: "Surrealistische situatie"
Yn Fryslân stiet de teller mei offisjeel fêststelde coronabesmettingen op 40; yn Brabân kinne se it kwealik mear byhâlde. Ferslachjouwer Raoul Cartens wurket by Omroep Brabant en makket de situaasje dêr fan tichteby mei.
"Surrealistisch is het, als je door Breda loopt. Dat is de stad waar ik woon. Het is nog overdreven om het een spookstad te noemen, maar bijna alles is dicht." Yn Brabân binne op dit stuit 1.558 registrearre coronapasjinten. "Een dubieus gevoel van koploper zijn is dat", neffens Cartens.
07:58
Boargemaster Kramer: "Folle minder ûnder de minsken"
Foar boargemaster Johannes Kramer, dy't syn earste moannen as boargemaster fan Noardeast-Fryslân no hân hat, is it in nuvere tiid op it gemeentehûs. "Wy hawwe hielendal gjin eksterne gearkomsten mear en sokssawat", fertelde hy yn Fryslân fan 'e moarn. "Wy prate op it gemeentehûs in soad fia Skype. Koartsein kom ik dizze dagen folle minder ûnder de minsken."
Neffens Kramer binne der yn Noardeast-Fryslân eins gjin problemen, wat de hanthavening fan de coronamaatregels oanbelanget. "Goed 99 persint fan de minsken hâldt him oan de ôfspraken. Yn ús gemeente binne dus eins gjin problemen. Mar it is wol oars wurkjen. Ik soe elke wike by ien doarp op besite, om yn 'e kunde te kommen. En betinkingen gean net troch. Dat soarte saken mis ik no. It is in útsûnderlike situaasje."
07:40
Problemen foar lytse musea
Lytse musea driigje yn grutte problemen te kommen troch it coronafirus. Sa hawwe se faak te min jild yn kas om de rinnende kosten betelje te kinnen, no't se ticht binne. Duorret dat te lang, dan falle se mooglik om. Mei dy warskôging komt de Museumfederaasje Fryslan. Mar net allinnich it jild is it probleem, mar ek eangst foar it firus by de frijwilligers, fertelt Mirjam Pragt fan de federaasje.
07:35
07:21
Bousektor hurd rekke
De strange maatregels om de gefolgen fan it coronafirus te beheinen, reitsje ek de bousektor hurd. Wenningkorporaasjes hawwe renovaasjeprojekten stillein en ek by de nijbou jilde strange regels, fertelt Johan Keuning fan Friso Bouwgroep yn Snits.
07:07
LTO Noord biedt boeren mentale stipe oan
Boeren hawwe swier te lijen ûnder de coronakrisis. It coronafirus hat foar boeren net allinne finansjele gefolgen, mar ek mentale. Dêrom hat lânbou-organisaasje LTO Noord stipe op tou set foar leden dy't troch it firus yn 'e knipe komme.
06:46
Slachtemaratons skrast, kaarten foar 2021
Ek de Slachtemaraton sil dit jier skrast wurde. De kuiertocht stie yn de planning foar 13 juny. Mar mei it each op de nije maatregels fan it kabinet tsjin it coronafirus kin de edysje fan 2020 net trochgean, seit foarsitter Anne Jochum de Vries. Minsken dy't in kaart kocht hawwe, kinne dy yn 2021 op 'e nij brûke.
06:32
Ferslachjouwer Gerrit de Boer oer de parsekonferinsje
Us ferslachjouwer Gerrit de Boer folge moandei de parsekonferinsje fan it kabinet. "Wy witte no dat it folle langer duorret", sa seit hy oer de ferlinging fan de maatregels oant yn elts gefal 1 juny. "Mar skoallen kinne der eins ek net ûnderút. It ûnderwiis is net eksplisyt neamd, sy sitte fansels bot yn oer hoe't it komt mei de eksamens."
06:25
06:17
Eveneminten ôfsein
De maatregels fan moandei betsjutte dat ferskate grutte eveneminten yn Fryslân net trochgean kinne. Anne Jochum de Vries fan de Slachtemaraton en Stephan Rekker fan de Fytsalvestêdetocht fertelle dêr mear oer yn it radioprogramma Fryslân fan 'e moarn (6.00 - 9.00 oere).
Yn dat radioprogramma hearre we ek wat de gefolgen binne foar boubedriuw Friso yn Snits en watfoar stipe LTO Noord biedt oan de minsken yn de agraryske sektor. Dêrnjonken prate we mei Carla Engelsma oer thúsûnderwiis en mei boargemasters Buma (Ljouwert) en Kramer (Noardeast-Fryslân) oer hoe't sy de coronakrisis oanpakke.
06:02
De dei fan hjoed
It ministearje fan Underwiis seit dat tiisdei mear dúdlik wurdt oer it wol of net trochgean fan de skoaleksamens. De ûnderwiisbûnen en de VO-ried fine dat de skoaleksamens stillein wurde moatte en de sintrale eksamens skrast wurde moatte. Neffens de organisaasjes is it troch de nije maatregels ûnmooglik om de eksamens op in feilige manier te organisearjen. "Het kan onveilig zijn", seit de AOb.
Ek oer de gefolgen fan de sport wurdt tiisdei mear dúdlik, ferwachtsje sportkoepel NOC*NSF en fuotbalbûn KNVB. Dy lêste bepraat tiisdei mei de klups út it betelle fuotbal oer wat de gefolgen binne foar de kompetysjes.
06:00
Wolkom
Goedemoarn en wolkom yn dit liveblog fan tiisdei 24 maart oer it coronafirus. Dit wie it belangrykste nijs fan moandei: