Alde natuerstiennen opnij brûkt foar opknappen slûs en brêge Appelskea

31 jan 2020 - 14:20

By it opknappen fan de slûs en it ferfangen fan de brêge Stokersverlaat yn Appelskea krije âlde stiennen op 'e nij in plak. Sûnt 2019 wurket de provinsje oan de slûs en brêge. De natuerstiennen binne yn 1890 út in Dútsk stiengat wei helle.

De slûs yn Appelskea - Foto: Provinsje Fryslân

It giet om blokken basaltlava, dy't yn de 19e iuw mei in skip oer de Rijn nei Nederlân helle binne. De wanden fan de slûs binne yntusken ferstevige en de oannimmer kin de muorren wer opmitselje. Yn maart moat der wer wetter troch de slûs streame. Yn Grinslân wurdt in nije flapbrêge foar Appelskea makke, dy't ek yn maart komme moat. De bedoeling is dat de brêge en slûs klear binne foar maaie, as it farseizoen op de Turfrûte úteinset.

(advertinsje)
(advertinsje)