Wat is dyn Fryske sportmomint fan 2019? Stim noch oant en mei sneon!

13 des 2019 - 13:01

Pikefel, triennen of gewoan laitsje. Sport docht wat mei minsken. Wat wie dyn sportmomint yn 2019? Omrop Fryslân, de Leeuwarder Courant, Provinsje Fryslân en Sport Fryslân organisearje de Sportmominten 2019. In sjuery hat de meast wichtige, moaiste en bysûnderste mominten útkeazen. Oan de hân fan dizze mominten kinst de top fiif kieze. Stimme kin noch oant en mei sneon 14 desimber.

Foto: Sport Fryslân

Klik op dizze link en stim!

Wa folget Suzanne Schulting op?

Ofrûne jier waard de ferkiezing wûn troch Suzanne Schulting. Doe pakte sy as earste Nederlânske shorttracker oait goud op de Olympyske Spelen. It twadde plak wie foar Epke Zonderland. Hy wûn op it WK yn Doha in gouden medalje op 'e rekstôk. Sven Kramer pakte it tredde plakje nei syn gouden medalje op de 5.000 meter op de Olympyske Spelen. De oeuvrepriis wie foar reedrydster Marrit Leenstra. Wa folgje harren dit jier op? Lit jo stim hearre.

Dit binne de nominearre mominten:

Suzanne Schulting

As earste Nederlânske frou oait waard Suzanne Schulting yn maart fan dit jier wrâldkampioen by it shorttrack. Nei't sy earder al de bêste wie op de 1.000 meter, pakte se ek de allroundtitel troch yn de bepalende superfinale as earste oer de einstreek te kommen.

Spitse en Geurts helje WK-finale

Nei in geweldich toernoai pleatst it Nederlânsk frouljusfuotbal-alvetal har foar de WK-finale. Mei de Friezinnen Sherida Spitse en Loes Geurts yn de seleksje fersloech Nederlân efterinoar foar Nij-Seelân, Kamerûn, Kanada, Japan, Italië en Sweden. Yn de finale wienen de Feriene Steaten krekt wat te sterk (2-0).

Shorttrackfroulju Europeesk Kampioen

Op it Europeesk Kampioenskip shorttrack yn Dordrecht kroanden Suzanne Schulting, Rianne de Vries, Lara van Ruijven, Yara van Kerkhof en Tineke den Dulk harren as Europeesk Kampioen op it ûnderdiel ôflossing. Yn de finale koene sy Ruslân en Hongarije fier foar bliuwe.

Trefwurden: 
Fryslân sportmomint 2019
(advertinsje)
(advertinsje)