Topfavoryt Grou foar tredde kear op rige kampioen yn SKS

09 aug 2019 - 22:40

It skûtsje fan Grou is foar de tredde kear op rige kampioen wurden fan de SKS. Yn de slotwedstriid op de Snitser Mar kaam Grou as achtste oer de finish, en dat wie genôch om it klassemint te winnen.

Grou sylde gjin bêste wedstriid. Mar omdat de Grousters yn de buert bleaunen fan De Lemmer en It Hearrenfean, en omdat de foarsprong yn it klassemint grut genôch wie, koe skipper Douwe Visser nei ôfrin in oerwinningsfeestje fiere.

Earnewâld kaam as earste oer de finish op de Snitser Mar, mar dat skûtsje kaam by de boppeste tonne yn in sitewaasje telâne mei de Heale Moanne. Earnewâld sylde oer stjoerboard, en hie dus gjin foarrang. It waard in oanfarring. De Heale Moanne protestearre.

Earnewâld hat it protest ferlern. Dat betsjut dat Akkrum de deiwinner wurden is op de Snitser Mar. De Heale Moanne is twadde wurden, en De Jouwer waard tredde. Earnewâld krijt 14 punten.

Falske start

De earste start wie massaal falsk. "Dat is begryplik", seit ferslachjouwer Freark Wijma. "It is de finale. En de start is hiel bepalend." Foar Snits wie de start dramatysk. Dat skûtsje moast de striid ferlitte nei in oanfarring mei Grou. It helmhout fan de Sneker Pan hat dat net oerlibbe.

Op de bylden fan de start is it net hiel dúdlik te sjen, de oanfarring wie achter de oare skippen.

Neffens skipper Jappie Visser fan Snits wie it syn eigen skuld. "We seagen fan tefoaren al dat we te betiid wiene. Doe woene we ús sa hurd mooglik út de fuotten meitsje en dêrtroch hinderen we Grou by de start."

"Ik sei: 'Gean der mar achterdel, dan kinne jim fierder farre', mar dat slagge krekt net, en doe rekke er krekt mei de opstekker ús helmhout. Foute boel."

Foar Snits is it in seizoen fan alles krekt net. "Dat hindert neat", seit Visser. "Hjir learing út lûke, en takom jier mar wer sjen."

Jappie Visser nei de start

(advertinsje)
(advertinsje)