Fan tsjerkhôf oant muzykkorps: Buro De Vries gong op besite yn Arum

21 jul 2019 - 13:44

Buro de Vries is fan 't simmer alle wiken twa oeren te gast yn in Frysk doarp. Wat is it karakter fan it doarp? Wat is der allegear te rêden? Hokfoar nijsgjirrige minsken wenje der? Dizze kear is de bestimming Arum!

Foto: Omrop Fryslân

De Gekroonde Leeuw

De Gekroonde Leeuw is ús gasthear. Eigeneres is Roos van der Veen, dy't yntusken al wer seis jier efter de taap stiet. It befalt har poerbêst. Njonken in kroech runt Roos ek in lyts restaurant en seis sliepkeamers. En dat is noch net alles, want Roos kombinearret har wurk yn De Gekroonde Leeuw mei in baan yn in sikehûs yn Amsterdam. Mei rjocht is sy ús 'Gekroonde Leeuwin'.

Foto: Omrop Fryslan

Roos van der Veen fan De Gekroonde Leeuw

Lugubere ferhalen

It tsjerkhôf fan Arum wie yn 1880 fol. Der kaam in nij begraafplak, mar in boerinne dy't ferstoar hie foar har stjerren sein dat se perfoarst njonken har man lizze woe. Dy lei noch op it âlde tsjerkhôf. Arbeiders ha doe midden yn de nacht stikem it lyk fan de boer út syn grêf helle en njonken syn frou lein. Arum-kenner Oane Anema fertelt dit wat lugubere ferhaal.

Foto: Omrop Fryslan

Op besite op it tsjerkhôf fan Arum

Hannen út 'e mouwen

Op it yndustryterreintsje fan Arum falle se daliks op: de kranen op it terrein fan Machinehandel Anema. It giet goed mei dit bedriuw dat de grutste wurkjouwer fan Arum is. Sels sa goed dat net alle fakatueres ynfolle wurde kinne.

Foto: Omrop Fryslan
Trefwurden: 
Arum doarpetoer Buro de Vries
(advertinsje)
(advertinsje)