LIVEBLOG: Maarten leit wer yn it wetter en swimt rjochting Bartlehiem
De swimtocht fan Maarten van der Weijden by de Fryske alve stêden del is dei en nacht by Omrop Fryslân te folgjen, ûnder oare fia dit liveblog. Maarten sette freed 21 juny útein en moat moandei wer yn Ljouwert oankomme. Hy swimt de meunstertocht fan sa'n 200 kilometer om jild yn te sammeljen foar ferskate projekten tsjin kanker. De earste twa dagen weromlêze kin hjir: dei 1 en dei 2. Alles wat Omrop Fryslân docht op radio, telefyzje en ynternet is te finen op de spesjale side Maartens Alvestêdetocht.
De lêste dei is no echt úteinset! Dêrom slute we dit liveblog ôf, want ek de tredde dei en nacht fan Maarten van der Weijden sitte der echt op. Dei fjouwer is fan no ôf te folgjen yn dit blog.
Maarten hat sawat in heal oere op de begeliedingsboat sitten, mar hy leit no wer yn it wetter en swimt rjochting Bartlehiem. Húsdokter Marco Blanker fertelt ús dat hy Maarten syn skouder ynfette hat en de temperatuermjitter dy't Maarten yn syn pak hie der út helle hat. Dêrtroch fielt hy him in hiel stik better.
Dat it pak út is, is net in goeie saak. Yn in earder petear fertelde húsdokter Marco Blanker dat Maarten eins it pak oanhâlde moast. Op it momint dat Maarten syn pak út giet kin syn hûd opswolle en de bloedfetten iepen stean gean. Hy kin dan in lege bloeddruk krije.
Maarten is it wetter wer út om't syn pak net goed sit. Hy hat lêst fan de wriuwplakken en dêrom wurdt hy op dit stuit út syn pak helle, seit ferslachjouwer Arjen de Boer.
De organisaasje tinkt dat Maarten om 05.45 oere yn Burdaard oankomt en om 10.00 oere yn Dokkum.
Nei mear as 3 oeren sliepe is Maarten van der Weijden wer oan it swimmen. It is noch in pear kilometer foardat hy ûnder de brêge fan Bartlehiem troch komt.