LDODK no al wis fan heale finale yn fjildkuorbal

12 maaie 2019 - 20:19

De kuorballers fan LDODK binne, mei noch trije wedstriden te spyljen, al wis fan de krúsfinalen yn it fjildkuorbal. De Gordyksters wûnen snein mei 28-16 op besite by AW/DTV út Amsterdam. Om't konkurrint Fortuna ferlear, is LDODK wis fan in plak by de earste twa yn de Eareklasse A.

Foto: Omrop Fryslân, Freark Wijma

Ien klasse leger, yn de Haadklasse A, wûn SCO mei 23-11 op besite by De Meeuwen út Putten. De klup út Aldeholtpea stiet op it fiifde plak, mei acht punten út tsien wedstriden.

Mid-Fryslân stiet ien plakje heger, mei fjouwer punten mear. De Redústers giene snein wol thús ûnderút tsjin Wageningen, dat dêrtroch yn punten op likense hichte kaam. It waard 16-20.

(advertinsje)