Seizoen foar Aris sit der op nei twadde ferlies tsjin Landstede Zwolle

02 maaie 2019 - 21:49

It seizoen foar Aris sit der op. De Ljouwerter basketballers ferlearen op It Kealledykje mei 72-100 fan Landstede Zwolle en kamen dêrtroch mei 2-0 achter yn in best-of-three wedstriid. De kwartfinale is dêrtroch it einstasjon.

Aris-Zwolle Ynternet

Aris begûn, krekt as tiisdei, goed oan de wedstriid. De Ljouwerters kamen op in 20-15 foarsprong. Troch sloardich spul lieten se Zwolle weromkomme en mei in trijepunter yn de lêste sekonde pakte Zwolle sels noch de winst yn it earste kwart: 22-24. Yn it twadde kwart waard it spul fan Aris noch sloardiger. Zwolle begûn just better te spyljen en rûn út nei in 45-36 foarsprong. Aris hie de earste helte mar leafst 13 kear balferlies.

Coach Anne van Dijk

Nei rêst begûn Aris tige min, pakte Zwolle 16 punten op rige en wie it gat al te grut: 36-62. It tredde kwart waard ôfsletten mei tritich punten ferskil: 43-73. It lêste kwart wie dêrtroch in formaliteit. De Zwolle-supporters raasden '100, 100' en dat slagge. De einstân waard 72-100 foar Landstede Zwolle.

Craig Osaikhwuwuomwan

Bas Veenstra

Aris waard yn de kompetysje sânde. Landstede Zwolle einige as twadde en wie dêrtroch ek favoryt. Landstede wûn de earste wedstriid yn Zwolle mei 92-70.

(Advertinsje)
(Advertinsje)