Tiny Hoekstra sjit SC Hearrenfean yn ferlinging nei kwartfinale

13 feb 2019 - 06:51

It frouljusteam fan SC Hearrenfean hat tiisdeitejûn de kwartfinale yn it bekertoernoai berikt. De Friezen wûnen yn Zeist muoisum fan topklasser Saestum (3-4). Pas yn de ferlinging skeat Tiny Hoekstra har ploech nei de folgjende ronde, wêryn't FC Twente wachtet.

Tiny Hoekstra yn aksje tsjin FC Twente - Foto: www.orange-pictures.nl

SC Hearrenfean begûn net goed oan de wedstriid. Nei tweintich minuten seach de ploech fan trainer Roeland ten Berge tsjin in 2-0 efterstân oan. Krekt foar it skoft makke Fenna Kalma de oanslutingstreffer (2-1).

Yn it begjin fan de twadde helte brocht Saestum de marzje wer op twa (3-1). Tweintich minuten dêrnei makke Hoekstra it wer spannend en skeat in rebound binnen (3-2). Saestum like foar in stunt te soargjen, mar yn de ekstra tiid twong Elze Huls in ferlinging ôf (3-3), wêryn't Hoekstra it duel beslisse soe (3-4).

Tsjin FC Twente

Yn de kwartfinale wachtet SC Hearrenfean in útwedstriid tsjin FC Twente, sa wiisde de lotting út. It duel wurdt spile op sneon 9 of snein 10 maart.

(Advertinsje)
(Advertinsje)