LIVEBLOG: Shorttrack, allround en sprint yn trije EK's

Dizze shorttrackdei sit der hast op. We einigje aansen mei de heale finales fan de relay. De Nederlânske froulju ride aansen mei de ferwachte nammen, nammentlik Suzanne Schulting, Yara van Kerkhof, Lara van Ruijven en Rianne de Vries. Tineke den Dulk is reserve. De froulju ride tsjin Frankryk, Dútslân en Tsjechië. De Nederlânske manlju ride mei deselde shorttrackers as juster, dus dat betsjut dat de ploech wer folslein út Friezen bestiet. Daan Breeuwsma, Itzhak de Laat, Jasper Brunsmann en Dennis Visser nimme it yn harren heale finale op tsjin Hongarije, Letlân en Turkije.

Wat de yndifiduele ofstânnen oanbelanget sit dizze twadde dei fan it Europeesk kampioenskip der op. En dus kinne we de balâns opmeitsje! Suzanne Schulting giet nei har winst op de 1500 meter en har fjirde plak op de 500 meter oan de lieding. Snein steane de 1000 meter en de superfinale (3000 meter) noch op it programma.

1. Suzanne Schulting 42 punten

2. Natalia Maliszewska 34 punten

3. Elise Christie 21 punten

Martina Valcepina 21 punten

Yn de B-finale fan de 500 meter by de manlju einiget Itzhak de Laat as tredde. Dêrtroch pakt hy foar it einklassemint ien puntsje. De Belch Stijn Desmet en de Rus Semen Elistratov waarden earste en twadde yn de B-finale.

Fjirde! Suzanne Schulting giet ûnderút yn de finale fan de 500 meter. Har redens reitsje dy fan Lara van Ruijven en dêrtroch giet Schulting de kessens yn. De ôfstân wurdt wûn troch de Poalske Natalia Maliszewska. De Italiaanske Martina Valcepina einiget as twadde en Van Ruijven wurdt tredde.

It foarstellen fan de rydsters dy't de finale fan de 500 meter ride, is begûn. Ien foar ien wurde de fjouwer rydsters it iis oproppen. Twa Nederlanners. Njonken Suzanne Schulting rydt ek Lara van Ruijven de A-finale.

Tsjin healweis seizen stiet de A-finale fan Suzanne Schulting op it programma. Se nimt it op tsjin lângenoate Lara van Ruijven, de Italiaanske Martina Valcepina en de Poalske Natalia Maliszewska.

Itzhak de Laat pleatst him op de 500 meter foar de B-finale. De Ljouwerter siet yn in drege heale finale, mei ûnder oaren de klassemintslieder Liu, en wurdt dêryn tredde. Dat betsjut dat De Laat de B-finale ride mei. Dêryn binne noch wol wat puntsjes te fertsjinjen foar it einklassemint.

Ja! Se hellet it wer! Suzanne Schulting wurdt yn har twadde heale finale twadde en dus pleatst se har foar de A-finale. Schulting hâldt Sofia Prosvirnova, in konkurrinte foar de allroundtitel op dit EK, efter har. Dêrtroch moat de Russinne de B-finale ride en kin Schulting goeie saken dwaan yn it klassemint.

It sil heve! Suzanne Schulting stiet op it iis foar de heale finale fan de 500 meter. Kin se har op 'e nij pleatse foar de A-finale? Dat docht in oare Nederlânske rydster, Lara van Ruijven, yn elts gefal wol. Se wurdt twadde yn har heale finale. Yara van Kerkhof wurdt dêryn útskeakele.

Sven Kramer is de fluchste op de fiif kilometer yn Collalbo. Mei syn tiid 6.17,66 pakt hy boppedat de leiding op it EK.

It iis wurdt klearmakke yn Dordrecht foar de ûntknoping fan de 500 meter. Tsjin fiven giet it yn de Sportboulevard fierder mei de heale finales fan de 500 meter. Suzanne Schulting treft ûnder oaren Sofia Prosvirnova. Ek Itzhak de Laat kin syn boarst wiet meitsje: hy sit yn de heale finale mei ûnder oaren Sandor Shaolin Liu en Semen Elistratov.

De tiid fan Daan Breeuwsma, dy't tredde waard yn syn kwartfinale, is net genôch om troch te gean nei de heale finale. Dat betsjut dat syn toernoai der, wat de 500 meter oanbelanget, op sit. Itzhak de Laat is wol troch.

Partick Roest set foarearst de flugste tiid del op de 5 km: 6.18,21. Sven Kramer moat leech yn de 6.17 riden om de kopposysje oer te nimmen.

Yn de earste kwartfinale fan de 500 meter pleatst Itzhak de Laat him foar de heale finale. Hy wurdt twadde yn syn heat. Daan Breeuwsma einiget as tredde en moat no ôfwachtsje oft syn tiid rap genôch is om nei de heale finale te gean. Breeuwsma like nei ôfrin lilk te wêzen oer in ynhelaksje fan De Laat.

Suzanne Schulting lit ek op de 500 meter har topfoarm sjen. Se giet as earste troch yn har kwartfinale en dat giet op 'e nij hiel maklik. Opfallend is dat Elise Christie tredde wurdt en dus útskeakele is.

De kwartfinales fan de 500 meter binne úteinset. Suzanne Schulting komt yn aksje yn de fjirde heat. De oare Nederlânske rydsters Yara van Kerkhof en Lara van Ruijven hawwe har earder al pleatst foar de heale finale. Schulting is no oan bar.

Spitich! Daan Breeuwsma hat in geweldige einsprint yn 'e fuotten, mar it is krekt net genôch foar de oerwinning yn de B-finale. De Akkrumer komt in pear sintimeter tekoart en wurdt twadde yn de B-finale efter de Russyske Pavel Sitnikov.

Tegearre mei seis oare riders set Daan Breeuwsma no útein mei de B-finale. Yn de A-finale ride der ek sân riders, dat betsjut dat der yn dizze B-finale striden wurdt foar plak acht oant 'e mei fjirtjin.

Se sei freed nei de foarrondes dat se wedstriden dominearje woe. En dat die se op de 1500 meter. In oantal ronden foar de ein naam Schulting de lieding oer en dan fiert se it tempo sa bot op, dat gjin ien folgje kin. Uteinlik wurdt de Britske Elise Christie twadde. It brûns giet nei de Russyske Sofia Prosvirnova.

JAAAA! Suzanne Schulting pakt har earste Europeeske titel. Se wint goud op de 1500 meter!

Se komt ûnder lûd applaus op it iis... De A-finale fan de 1500 meter mei Suzanne Schulting stiet op it punt fan begjinnen. Pakt se fuortendaliks op de earste ôfstân in medalje?

Op de 5 kilometer op it EK yn Collalbo gjin tsien, mar njoggen ritten. Sven Kramer soe yn rit 9 ride tsjin Davide Ghiotti, mar de Italiaan rekke blesseard op 'e 500 meter en docht net mear mei. No ryd Kramer yn rit 8 tsjin de Noor Sverre Lunde Pedersen, dy't nei de 500 meter tredde stiet. Kramer moat twaenheale sekonde flugger as Pedersen ride om de Noor te passearen.

Der wurdt op it stuit dweild yn Dordrecht. Oer sa'n tsien minuten binne de finales fan de 1500 meter. Mei dus Suzanne Schulting yn de A-finale en Daan Breeuwsma yn de B-finale. We sette aansen útein mei de froulju en dêrnei binne de manlju.

Itzhak de Laat giet al betiid yn de heale finale ûnderút. En dat betsjut dat syn kânsen fersjoen binne wat de 1500 meter oanbelanget. Hy krijt ek noch in straf, om't er neffens de sjuery in ferkearde ynhelaksje pleatste.

Daan Breeuwsma rêdt it net op yn syn heale finale. De bruorren Liu wurde earste en twadde en geane troch nei de A-finale. Breeuwsma wurdt fjirde en giet tegearre mei de Italiaan Tommaso Dotti nei de B-finale. Yn de tredde en lêste heale finale sjogge we Itzhak de Laat op it iis.

Kai Verbij pakt goud op it EK sprint. Nei trije oerwinningen pakt hy mei it twadde plak op de twadde 1000 meter de einoerwinning yn Italië.

De manlju sette no útein mei de heale finale fan de 1500 meter. Daan Breeuwsma sit yn de twadde heat, Itzhak de Laat yn de tredde. Benammen Breeuwsma hat it net troffen mei de lotting. Hy moat it ûnder oaren opnimme tsjin de beide bruorren Liu. Ek lângenoat Dylan Hoogerwerf sit by Breeuwsma yn de heale finale.

Suzanne Schulting pleatst har foar de A-finale fan de 1500 meter! Yn har heale finale einiget se frij maklik op it earste plak. Se kin tasjen wa't der út de twadde en tredde heale finale mei har meigean nei de A-finale.

Yn de earste heale finale fan de 1500 meter sjogge we fuortendaliks ien fan de titelfavoriten yn aksje, ús eigen Suzanne Schulting. Se nimt it op tsjin ûnder oaren Yara van Kerkhof en de Russyske Ekaterina Efremenkova. Schulting moat fan de sân riders yn har heale finale by de earste twa einigje om troch te gean nei de A-finale.

Letitia de Jong hat in brûnzen medalje helle op de 1000 meter fan it EK sprint. Se finishte yn 1.15.88 njoggen hûndertste efter de winneres Daria Kachanova. Yn it klassemint fan it EK sprint binne de ferskillen lyts. De Jong stiet dêryn op it fiifde plak. Snein wurdt der op 'e nij in 500 meter en in 1000 meter riden.

It ûngelok fan Sjinkie Knegt hat in soad ympakt op de Nederlânske shorttrackploech. Se wolle moaie prestaasjes delsette op it EK. Net allinne foar harsels, mar ek foar Sjinkie. Sa as kollega-shorttracker Daan Breeuwsma freed sei: "Wy ha hjir ien doel: knalle foar Sjinkie."

Antoinette de Jong is foar it earst Europeesk kampioen allround wurden. Yn Collalbo wûn se trije fan de fjouwer ôfstannen en waard se knap twadde op de ôfslutende 5 km.

Säblíková wûn de 5 km en waard twadde yn it einklassemint, foar Lollabrigida. Wüst waard fjirde.

Oer in lyts oere set yn de Sportboulevard yn Dordrecht de twadde dei fan it Europeesk kampioenskip shorttrack útein. De Fryske shorttrackers rieden freed goeie foarrondes, want allegear berikten se de folgjende rondes. Dat betsjut dat we fan healwei trijen ôf Suzanne Schulting, Daan Breeuwsma en Itzhak de Laat yn aksje sjogge yn de heale finales fan de 1500 meter.

Sven Kramer is goed begûn oan syn 12e EK. Yn Collalbo sette de 32-jierrige Fries mei 36.69 útein op de 500 meter. Dêrmei einige Kramer op it sechde plak, mar hy hat net folle tiid tajûn op syn konkurrinten Patrick Roest en Sverre Lunde Pedersen. Douwe de Vries hie in mindere 500 meter. Hy gie hast ûnderút yn de earste bocht. Dêrtroch ferlear De Vries tiid. Syn 37.58 brocht him nei it tolfde plak.

It EK sprint by de froulju is úteinset mei winst foar favoryt Vanessa Herzog. De Eastenrykse wûn yn 37,61 en dat is in flink nij baanrekôr. Dat wie 38,37.

Jutta Leerdam waard bêste Nederlanner yn 38,55. Friezinne Letitia de Jong fan Feanwâlden waard fiifde yn 38,63.

It giet hurd yn Collalbo. By it EK sprint giet de twadde 500 meter nei Kai Verbij. Hy bliuwt as iennige ûnder de 35 sekonden yn 34.93. Dêrmei pakt Verbij krekt as Antoinette de Jong syn tredde ôfstânsoerwinning en liket de Europeeske titel hast binnen te wêzen.

Antoinette de Jong rydt har bêste EK oant no ta. Nei de winst op de 500 meter en de 3 km pakt se op de twadde dei mei oermacht de winst op de 1.500 meter. Yn de lêste rit ried De Jong mei 1.57.03 hast in sekonde flugger as Lollobrigida (1.57.99) en mear as in sekonde flugger as Sáblíková (1.58.07).

Op de ôfslutende 5 km hat De Jong 12,25 sek. foarsprong op Lollobrigida en mear as 21 sek. op Sáblíková en Wüst.