LIVEBLOG: Danny Noppert ferliest twadde ronde PDC WK

15 des 2018 - 17:40

Nei in suksesfol earste jier by it profbûn PDC makket darter Danny Noppert fan De Jouwer dit jier syn debút op it WK. Yn it Alexandra Palace yn Londen spilet Noppert sneontemiddei syn twadde wedstriid op it wrâldkampioenskip, nei't er freed al mei 3-0 yn sets ôfrekkene mei Royden Lam. Omrop Fryslân-ferslachjouwers Freark Wijma en Mats Gies binne yn Londen en hâlde jimme hjirûnder op 'e hichte fan de ferrjochtingen fan de Fryske darter.

18:48
Ein fan dit liveblog

Oant safier it liveblog oangeande it WK-aventoer fan Danny Noppert. Letter sneontejûn fine je it ynterview mei de Fries op ús webside, www.omropfryslan.nl en op de Omrop-app. Snein ek omtinken foar de Jouster yn No yn Fryslân op 'e radio. Allegear tige tank foar it folgjen en graach oant in oare kear.

18:39
WK dien foar Noppert

It WK sit der sadwaande op foar Danny Noppert. Nei winst op Royden Lam yn de earste ronde is it yn de twadde ronde dien foar de Jouster. De wedstriid mist? Sjoch hjir foar it wedstriidferslach.

18:23
De statistiken fan de wedstriid: Noppert ferliest mei 3-0 nettsjinsteande in heger gemiddelde.
18:14
Noppert ferliest fan Hopp.

Danny Noppert is útskeakele op it WK darten yn Londen. De Jouster mist twa darts op dûbel 16 om de tredde set te winnen en yn de partij te bliuwen.

18:08
Hopp op 'matchpoint'

Max Hopp profitearret fan missers fan Noppert en smyt al syn finishes út. It is no 2-0 yn sets en 2-1 yn legs foar Hopp. Kin Noppert noch wat dwaan?

17:53
Wer miste dûbels, Hopp profitearret

De dûbels gean noch net lekker foar de Jouster. Noppert stiet mei 2-0 yn sets achter. De Ingelske kollega's telle 14 miste darts op de dûbel.

17:50
Noppert brekt werom en kâns op 9-darter

Mei in keurige 130-finish komt Noppert werom op 1-1. Ek smyt de Jouster hast in 9-darter! By de achtste dart giet it mis..

17:48
Twadde set begûn

De twadde set fan de wedstriid Noppert tsjin Hopp is úteinset. Hopp hat de earste leg pakt fia dûbel 16.

17:40
Miste dûbels foar Noppert.

De earste set giet mei 3-0 yn legs nei de Dútser. Noppert miste yn de twadde leg flink wat darts op de dûbels.

17:36
Hopp pakt earste leg

Max Hopp hat de earste leg op syn namme skreaun yn 14 darts.

17:30
De beide manlju jouwe elkoar de hân!
Foto: Omrop Fryslân
17:28
We sille begjinne!

De partij tusken Danny Noppert en Max Hopp giet oer inkelde minuten los!

17:11
Wedstriid om healwei seizen

Nei alle gedachten begjint de wedstriid fan de Jouster om 17.30 oere.

16:43
Team Noppert út De Jouwer wachtet yn spanning ôf!
Patrick Wielenga, heit Gosse Noppert en Robert Favier. - Foto: Omrop Fryslân, Mats Gies
16:27
Noch ien partij wachtsje

Der moat noch ien partij ôfmakke wurde foardat Danny Noppert begjint oan syn twadde ronde. Om't de partijen wat langer duorje, rint it tiidspaad krekt wat út.

16:12
Ruben van der Meulen út Kollumersweach is spesjaal foar Noppert nei Londen kommen.
15:46
Reaksje Noppert nei earste ronde

"Ik wit no wat my te wachtsjen stiet. Lit elkenien no mar komme, ik fiel my relaxed." Dat sei Danny Noppert freedtejûn nei syn oerwinning yn de earste ronde fan it WK yn Londen.

15:24
In byld fanút it Fans Village yn Alexandra Palace.
Foto: Omrop Fryslân, Mats Gies
14:57

De twadde wedstriid fan de middeissesje is no dwaande. It is noch ûngefear oardel oere wachtsjen oant Noppert en Hopp begjinne.

14:27
Hat Danny Noppert in goeie kâns sneontemiddei?
13:58
De measte supporters binne al yn it Alexandra Palace. De rêst komt no binnen.
Foto: Omrop Fryslân, Mats Gies
13:47
Dei trije fan it WK darten

Goeiemiddei en wolkom by de tredde dei fan it wrâldkampioenskip darten yn it Alexandra Palace yn Londen. It is sneontemiddei 15 desimber 2018, de dei wêrop Danny Noppert syn twadde ronde spilet tsjin Max Hopp út Dútslân. Dy wedstriid begjint om likernôch 16.15 oere Nederlânske tiid.

21:41
Ein fan dit liveblog foar de freed

Oant safier foar freedtejûn dit liveblog fanút it Alexandra Palace yn Londen. Sneontemiddei binne wy der fansels wer mei ek de twadde ronde fan Danny Noppert (ûngefear 16.30 oere Nederlânske tiid) op it wrâldkampioenskip fan de PDC. It wedstriidferslach fan syn earste wedstriid nochris neilêze? Dat kin hjir. It ynterview mei Danny Noppert is letter freedtejûn werom te finen op ús webside en op de Omrop-app.

21:03
Winst foar Danny Noppert!

Danny Noppert is troch nei de twadde ronde fan it WK yn Londen! Hy wint mei 3-0 yn sets (3-1, 3-0, 3-0) fan Royden Lam út Hong Kong. Sneontemiddei nimt de Jouster it op tsjin Max Hopp út Dútslân. Hopp is as 32ste pleatst foar it wrâldkampioenskip fan de PDC. De wedstriid is de lêste fan de middeissesje.

20:54
Twadde ronde tichtby

Danny Noppert liket hieltyd tichter by de twadde ronde te kommen. Yn de tredde set stiet er no mei 2-0 yn legs foar. It is wol de leg fan Lam.

20:46
Tuskenstân: 2-0 yn sets foar Danny Noppert

Mei wer in 13-darter pakt de 27-jierrige Fries ek de twadde set: 3-0. De Jouster hat noch ien set nedich om him te pleatsen foar de twadde ronde yn Londen.

20:32
De earste set is binnen foar de Fryske debutant

Mei in 13-darter pakt Danny Noppert de earste set fan de wedstriid. It gemiddelde fan de Fries yn set 1: 93.48. Tsjinstanner Royden Lam sit op in meagere 80.95.

20:31
Noppert liket nei setwinst te gean

De Jouster stiet mei 2-1 yn legs foar en begjint de fjirde leg mei in 180!

20:27
Yntusken is de earste Fryske flagge ek sjoen yn Ally Pally!
Foto: Omrop Fryslân, Mats Gies
20:26
Stân set 1: 1-1 yn legs

Noppert makket lyk yn de earste set mei in finish fan 95. Mei de lêste pylk fynt er noch krekt de dûbel 19.

20:20
De wedstriid is begûn!

De wedstriid tusken Danny Noppert en Royden Lam is niiskrekt úteinset. Lam mei begjinne oan de earste leg.

19:57
Ferslachjouwer Freark Wijma stiet te plak. Noch tsien minuten oant Noppert begjint.
Foto: Omrop Fryslân, Mats Gies
19:29
Tabeskôging

Ferslachjouwer Andor Faber socht Noppert earder dizze wike op. "Net te leauwen dat ik hjir stean", sa sei Noppert oer syn oankommende WK-debút.

19:11
Noppert iepenet freedtejûn

Danny Noppert iepenet freed de twadde jûn fan it WK darten tsjin Royden Lam. De wedstriid set om likernôch 20.15 oere Nederlânske tiid útein.

18:57
Wedstriid fan de wike by Omrop Fryslân
Foto: Omrop Fryslân
(advertinsje)