Sulveren biskopsmunt opgroeven by stedhûs fan Boalsert
By it stedhûs fan Boalsert is nei archeologyske opgravingen resintlik in bysûndere munt fûn. It giet om in sulveren biskopsmunt, dy't nei alle gedachten út de tolfde iuw komt.
Hokker biskop yn dy tiid opdracht jûn hat foar it slaan fan de munt, is noch ûndúdlik. It slaan fan munten wie yn de midsiuwen faaks allinne foarbehâlden oan keningen en hege funksjonarissen.
Tûzen jier âld
De ûndersikers hawwe no twa wiken dwaande west yn Boalsert. De âldste spoaren binne sa'n tûzen jier âld. "De oudste vondst tot nu toe komt uit de 10de eeuw, zogenaamd Pingsdorf aardewerk", fertelt archeolooch Yvonne Boonstra.
Ek de kommende tiid wurdt der noch archeologysk ûndersyk dien efter it stedhûs. De ûndersikers binne neffens har no dwaande oan 'e râne fan ien fan de trije terpen, dêr't Boalsert ea op boud is.
